ຂ້າພະເຈົ້າຂໍຮຽນມາຍັງທຸກໆ ທ່ານໃຫ້ຊາບວ່າ ສະໜາມຮົບແຫ່ງສົງຄາມການຕ້ານສັດຕູໂຕຮ້າຍກາດ Covid-19 ຍັງບໍ່ທັນຈົບເທື່ອ ຫາກຍັງເປັນໄປໄດ້ວ່າຈະດຸເດືອດ, ຂ້ຽວຂາດກ່ວານີ້ກໍ່ເປັນໄດ້; ເພາະປະເທດເຮົາ ແລະ ປະຊາຊົນເຮົາຍັງຢືນຢູ່ຕໍ່ໜ້າຄວາມສ່ຽງຫຼາຍດ້ານທີ່ຈະປະເຊີນໃນວັນຕໍ່ໜ້າທີ່ຈະເຖີງນີ້. ດັ່ງນັ້ນ, ຂ້າພະເຈົ້າໃນນາມຕາງໜ້າລັດຖະບານ ຈື່ງຂໍໃຫ້ທຸກໆຄົນໃນທົ່ວສັງຄົມສືບຕໍ່ປະຕິບັດຢ່າງເຂັ້ມງວດ ແລະ ຖືກຕ້ອງຕາມຄຳສັ່ງເລກທີ 06/ນຍ, ລົງວັນທີ 29 ມີນາ 2020; ບັນດານິຕິກໍາ; ຂໍ້ແນະນໍາຂອງຄະນະສະເພາະກິດໃນການປ້ອງກັນ, ສະກັດກັ້ນ ແລະ ແກ້ໄຂການລະບາດຂອງພະຍາດ Covid-19 ຈະແກ່ຍາວໄປຕື່ມອີກ 14 ວັນ ຈົນຮອດວັນທີ 03 ພຶດສະພາ 2020; ຖ້າມີການປ່ຽນແປງແນວໃດ ຈຶ່ງຈະແຈ້ງຕາມພາຍຫຼັງ…

ຂ້າງເທີງນັ້ນແມ່ນບາງຈຸດໃນຄຳຖະແຫຼງກ່ຽວກັບສະພາບການສະກັດກັ້ນ ແລະ ຕ້ານການລະບາດຂອງພະຍາດ Covid-19 ຢູ່ ສປປ ລາວ ຄັ້ງວັນພຸດ ທີ 15 ເມສາ 2020 ທີ່ຫ້ອງການສໍານັກງານນາຍົກລັດຖະມົນຕີ.

ຈາກຄຳຖະແຫຼງດັ່ງກ່າວ ສະແດງວ່າການຈັດຕັ້ງປະຕິບັດຄຳສັ່ງເລກທີ 06/ນຍ ນັ້ນຈະຖືກແກ່ຍາວໄປອີກ 14 ວັນ ຄືຈະສີ້ນສຸດລົງໃນວັນທີ 03 ພຶດສະພາ 2020 ຈາກນັ້ນຈະມີການທົບທວນໃໝ່ຖ້າມີການປ່ຽນແປງແນວໃດ ເພີ່ນກໍ່ຈະມີການແຈ້ງຕື່ມພາຍຫຼັງ.

ແຕ່ໃນຕົວຈິງແລ້ວ ເຫັນວ່າການຈັດຕັ້ງປະຕິບັດຍັງບໍ່ເຂັ້ມງວດ ສະແດງອອກໃນວັນທີ 20 ເມສາ 2020 ຜ່ານມາ ສະເພາະຢູ່ນະຄອນຫຼວງວຽງຈັນ ມີຄົນອອກຈາກເຮືອນຫຼາຍ… ລົດແລ່ນເຕັມທ້ອງຖະໜົນ; ຮ້ານຂາຍເຄື່ອງເປີດຫຼາຍຂື້ນ ທັງທີ່ບໍ່ແມ່ນຮ້ານຂາຍສະບຽງອາຫານ… ການກັກກັນຕົນເອງຢູ່ເຮືອນກໍ່ບໍ່ເຂັ້ມງວດ, ການຮັກສາໄລຍະຫ່າງເວລາໄປຕະຫຼາດກໍ່ບໍ່ເຄັ່ງຄັດ… ຈາກປະກົດການນີ້ຫຼາຍຄົນເປັນຫ່ວງເປັນໄຍຢ້ານການລະບາດຮ້າຍແຮງຂື້ນ ເຖີງແມ່ນວ່າຫຼາຍມື້ຕິດຕໍ່ກັນຄະນະສະເພາະກິດໄດ້ແຈ້ງວ່າບໍ່ມີການຕິດເຊື້ອເພີ່ມຕື່ມກໍ່ຕາມ. ສະນັ້ນ ຈີ່ງຂໍຮຽກຮ້ອງມາຍັງທຸກໆຄົນໃນທົ່ວປະເທດ ຈົ່ງພ້ອມກັນປະຕິບັດຄຳສັ່ງເລກທີ 06/ນຍ ຢ່າງເຂັ້ມງວດ. ເບື້ອງການຈັດຕັ້ງທີ່ກ່ຽວຂ້ອງ ຄືດັ່ງບົດໃນຫົວຂໍ້ ″ເພື່່ອຊະນະສັດຕູໂຕຮ້າຍກາດ Covid-19  ວຽກງານສຶກສາອົບຮົມການເມືອງ-ແນວຄິດ ຕ້ອງນໍາໜ້າ ″ ທີ່ອອກໃນໜ້າອອນລາຍພວກເຮົາຄັ້ງວັນທີ 18/4/2020 ໄດ້ອະທິບາຍຢ່າງຈະແຈ້ງ.

ຜູ້ຂຽນຂໍນໍາເອົາຄຳຖະແຫຼງບາງຕອນຂອງທ່ານນາຍົກລັດຖະມົນຕີມາທວນຄືນອີກຄັ້ງເຊັ່ນ:  ″ພວກເຮົາຕ້ອງສາມັກຄີກັນທົ່ວທັງຊາດ ເປັນຈິດໜຶ່ງໃຈດຽວກັນ; ຄົນລາວເຮົາບໍ່ຖີ້ມກັນ ໃນໄລຍະນີ້ຂໍໃຫ້ອົດທົນຢູ່ເຮືອນ, ລ້າງມືເລື້ອຍໆ, ໃສ່ຜ້າປິດປາກ, ປິດດັງ, ຢູ່ຫ່າງກັນ (ຮັກສາໄລຍະຫ່າງໃນສັງຄົມ) ບໍ່ເຕົ້າໂຮມກັນຫຼາຍຄົນ…  ພວກເຮົາພ້ອມກັນຕໍ່ສູ້ຕ້ານກັບ Covid-19 ໄຊຊະນະຈະຕ້ອງເປັນຂອງພວກເຮົາທຸກຄົນ…″

ໂດຍ: ທິດດີ