ຖືວ່າເປັນຂ່າວດີ ສຳລັບຜົນສຳເລັດໃນການປີ່ນປົວຜູ້ຕິດເຊື້ອ Covid-19 ເຊີ່ງມີຜູ້ອອກໂຮງໝໍຕື່ມອີກ 2 ຄົນ ຢູ່ແຂວງຫຼວງພະບາງຍັງເຫຼືອພຽງ 1 ຄົນ ທີ່ຈະສືບຕໍ່ຕິດຕາມປີ່ນປົວ ແລະ ສະພາບການຕິດເຊື້ອຢູ່ປະເທດເຮົາໄດ້ເວັ້ນໄລຍະຫ່າງມາໄດ້ 10 ວັນແລ້ວ… ນັ້ນຄືຄຳຖະແຫຼງຂອງຄະນະສະເພາະກິດໃນວັນທີ 22 ເມສາ 2020.

        ຂ່າວດີອັນນີ້ ໃຜໆກໍ່ຊື່ນຊົມ ແຕ່ໃນຂະນະດຽວກັນນີ້ ກໍ່ບໍ່ແມ່ນວ່າຈະລະເຫຼີງໃນການປະຕິ ບັດຄຳສັ່ງເລກທີ 06/ນຍ ຕ້ອງຖືຄຳສັ່ງເປັນພັນທະ ແລະ ຄວາມຮັບຜິດຊອບຂອງໝົດທຸກຄົນໃນສັງຄົມ.

        ຢູ່ນະຄອນຫຼວງວຽງຈັນ ຫຼາຍຄົນເປັນຫ່ວງເລື່ອງນີ້ ເພາະໃນພຶດຕິກຳຕົວຈິງ ເຫັນຜູ້ຄົນຢາກຖືເບົາກັນແລ້ວ; ມັນສະແດງອອກໃນການອອກສູ່ການດຳເນີນຊີວິດປົກກະຕິຫຼາຍຂື້ນ… ຢູ່ຕະຫຼາດຄົນບໍ່ຮັກສາໄລຍະຫ່າງໃນສັງຄົມ (ຢູ່ຫ່າງກັນ) ບໍ່ໃສ່ຜ້າປິດປາກ, ປິດດັງ…ໂອຍ! ອັນຕະລາຍພີ່ນ້ອງເອີ່ຍ…

        ເມື່ອເປັນແນວນັ້ນຄວນໃສ່ລະບຽບເຫຼັກກັນແລ້ວນໍ? ຢາກຂໍຮ້ອງໃຫ້ເຈົ້າຂອງຕະຫຼາດ; ຈັດສັນຕະຫຼາດ ຫຼື ຮ້ານຄ້າ-ຂາຍທັງຫຼາຍ ເປັນເຈົ້າການແທ້ໆເນີ! ໃຜເຂົ້າຕະຫຼາດຂໍໃຫ້ໃສ່ຜ້າປິດປາກ, ປິດດັງ ຜູ້ເປັນຈັດສັນຕະຫຼາດກະຄວນແຈກຢາຍໃຫ້ ພ້ອມແນະນຳໃຫ້ຢູ່ຫ່າງກັນ… ໂທລະໂຄ່ງຕິດຕັ້ງຢູ່ຕະຫຼາດຕ້ອງປ່າວຂ່າວປະກາດເລື່ອງນີ້ຢ່າງເປັນປະຈຳ.

        ອີກອັນໜຶ່ງ ແມ່ນຈຸດກວດກາໃນແຕ່ລະບ້ານ ສັງເກດເຫັນວ່າ: ກວດທຳມະດາໂພດ ມັນຕ້ອງມີເຄື່ອງວັດແທກອຸນຫະພູມ; ມີຜ້າປິດປາກ; ມີເຈວລ້າງມື, ມີແພດຢ່າງໜ້ອຍ 02 ຄົນປະຈຳການຢູ່ບ້ານນັ້ນ! ເລື່ອງນີ້ ສະເໜີຄະນະສະເພາະກິດເຮົາເບີ່ງຄືນເນີ! ຕາມຄຳສ່ອງແສງຂອງຜູ້ອ່ານປະຈຳອອນລາຍພວກເຮົານີ້ມີຫຼາຍແທ້ໃດ໋! ທັງກໍລະນີເຂົ້າຕະຫຼາດບໍ່ປິດປາກ-ປິດດັງ; ບໍ່ຮັກສາໄລຍະຫ່າງ.

        ໄລຍະນີ້ ພວກເຮົາຕ້ອງໄດ້ອົດທົນຢູ່ເຮືອນ; ລ້າງມືເລື້ອຍໆ, ເວລາອອກຈາກເຮືອນຕ້ອງໃສ່ຜ້າປິດປາກ-ປິດດັງ (ຢູ່ຫ່າງກັນຮັກສາໄລຍະຫ່າງໃນສັງຄົມ) ບໍ່ເຕົ້າໂຮມກັນຫຼາຍຄົນ. ຂໍໃຫ້ໝົດທຸກຄົນຈົ່ງພ້ອມກັນປ້ອງກັນຕົນເອງ; ປ້ອງກັນຄອບຄົວ ແລະ ທົ່ວສັງຄົມ ຈາກການຕິດເຊື້ອພະຍາດ Covid-19 ໃຫ້ຖືວ່າແມ່ນພັນທະ ແລະ ຄວາມຮັບຜິດຊອບຂອງທຸກຄົນ ແລະ ເປັນການປະກອບສ່ວນອັນສຳຄັນໃຫ້ແກ່ປະເທດຊາດໃນຍາມວິກິດຈາກພະຍາດ Covid-19.

        ພ້ອມກັນຕິດຕາມແຈ້ງການຂອງຄະນະສະເພາະກິດ ເພື່ອຮັບຊາບ ແລະ ຈັດຕັ້ງປະຕິບັດ.

ໂດຍ: ທິດດີ.