ເຫຼົ່າຮົບສື່ມວນຊົນພວກເຮົາທັງພາກລັດ; ເອກະຊົນ ລວມໄປເຖີງສື່ອອນລາຍໄດ້ເຂົ້າຮ່ວມສະໜາມຮົບແຫ່ງສົງຄາມ ການຕ້ານສັດຕູຕົວຮ້າຍກາດ Covid-19 ຕັ້ງແຕ່ຫົວທີ ແລະ ເລີ່ມເຂັ້ມຂຸ້ນຂື້ນນັບຕັ້ງແຕ່ລັດຖະບານສ້າງຕັ້ງຄະນະສະເພາະກິດເປັນຕົ້ນມາ.

        ສະເພາະອອນລາຍຂອງພວກເຮົາກໍ່ມີຂ່າວ, ມີບົດອອກທຸກມື້ ບໍ່ມີວັນພັກ… ບໍ່ມີວັນເສົາ-ວັນອາທິດ ເຊີ່ງກໍ່ໄດ້ຮັບກະແສຕອບຮັບເປັນຢ່າງດີ; ບາງບົດ-ບາງຂ່າວ ໃນມື້ໜື່ງມີຜູ້ເຂົ້າເບີ່ງ-ເຂົ້າອ່ານເກືອບແສນຄົນ; ມີບາງບົດເພີ່ນຂໍຮ້ອງໃຫ້ລົງຕື່ມ ເຊັ່ນບົດໃນຫົວຂໍ້: ຄວາມປະໝາດເປັນບໍ່ເກີດແຫ່ງຄວາມຕາຍ; ເພື່ອຊະນະສັດຕູຕົວຮ້າຍກາດ Covid-19 ວຽກງານການສຶກສາອົບຮົມການເມືອງ-ແນວຄິດຕ້ອງນຳໜ້າ; ເຮັດບຸນຢ້ານໄດ້ບາບ; ຜູ້ລະເມີດຄຳສັ່ງເລກທີ 06/ນຍ ຕ້ອງຖືກລົງໂທດ; ຄຳສັ່ງເລກທີ 06/ນຍ ຈະແກ່ຍາວຮອດຕົ້ນເດືອນພຶດສະພາ…

        ໃນຄຳຖະແຫຼງຂອງທ່ານນາຍົກ ຄັ້ງວັນພຸດ ທີ 15 ເມສາ 2020 ທີ່ຫ້ອງການສຳນັກງານນາຍົກນັ້ນ ມີບາງຕອນທ່ານໄດ້ກ່າວວ່າ: ″ຂໍສະແດງຄວາມຂອບໃຈຢ່າງຈິງໃຈມາຍັງສື່ມວນຊົນທັງຫຼາຍ ທີ່ໄດ້ມີຄວາມພະຍາຍາມສູງ ເຮັດໜ້າທີ່ສຳຄັນໃນການເກັບກຳຂໍ້ມູນ, ເຜີຍແຜ່ຂໍ້ມູນຂ່າວສານ ເພື່ອສື່ສານໃຫ້ປະຊາຊົນຢ່າງເປັນປະຈຳ, ໃຫ້ສັງຄົມໄດ້ຮັບຮູ້ຢ່າງຖືກຕ້ອງ, ທັນການ ແລະ ທົ່ວເຖີງ ທັງຍັງມີການໃຫ້ຄວາມຮູ້ ແລະ ແນະນຳກ່ຽວກັບວິທີທາງປະຕິບັດຕົນເອງທີ່ຖືກຕ້ອງໃຫ້ປະຊາຊົນຕະຫຼອດເວລາອີກດ້ວຍ…″

          ຖືເປັນກຳລັງໃຈ, ເປັນຢາວິຕາມິນແກ່ເຫຼົ່າຮົບສື່ມວນຊົນພວກເຮົາ ເຖີງວ່າວຽກງານຈະລຳບາກໜັກໜ່ວງປານໃດພວກເຮົາກໍ່ຈະຜ່ານຜ່າໄປດ້ວຍກັນ ໂດຍສະເພາະແມ່ນສື່ອອນລາຍ ″ມີເດຍລາວ″ ຂອງພວກເຮົາ.

        ແລະໃນມໍ່ໆມານີ້ ທີ່ກອງປະຊຸມລັດຖະບານສະໄໝສາມັນປະຈຳເດືອນເມສາ 2020 ທີ່ໄຂຂື້ນໃນຕອນເຊົ້າ ແລະ ປິດລົງໃນຕອນແລງຂອງວັນທີ 23 ເມສາ 2020 ນັ້ນ ທ່ານນາຍົກກໍ່ໄດ້ມອບໜ້າທີ່ອັນໜັກໜ່ວງ ແລະ ມີກຽດສະຫງ່າໃຫ້ເຫຼົ່າຮົບສື່ມວນຊົນຂອງພວກເຮົາຕື່ມອີກວ່າ: ″ຂໍໃຫ້ສື່ມວນຊົນທຸກປະເພດ ລວມທັງສື່ອອນລາຍຕ່າງໆ ຈົ່ງຍົກສູງນໍ້າໃຈຮັກຊາດ; ຮັບໃຊ້ປະຊາຊົນບັນດາເຜົ່າ ອອກຂ່າວ, ໃຫ້ຂໍ້ມູນຂ່າວສານຕ່າງໆ ໃຫ້ຖືກຕ້ອງກັບຄວາມເປັນຈິງ ແລະ ເປັນປະໂຫຍດສູງສຸດໃຫ້ແກ່ຊາດ ແລະ ປະຊາຊົນ, ຫຼີກເວັ້ນການອອກຂ່າວ, ໃຫ້ຂໍ້ມູນເທັດ ທີ່ຈະສ້າງຄວາມປັ່ນປ່ວນ ແລະ ເປັນຜົນກະທົບດ້ານລົບຕໍ່ຈິດໃຈ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ຄວາມປອດໄພຂອງສັງຄົມ…″

          ເຫຼົ່າຮົບສື່ມວນຊົນພວກເຮົາຈະພ້ອມກັນປະຕິບັດໜ້າທີ່ດັ່ງກ່າວໃຫ້ສົມກັບຄຳວ່າ: ເປັນອາວຸດອັນແຫຼມຄົມຂອງພັກ-ລັດ.

        ພວກເຮົົາພູມໃຈທີ່ໄດ້ຮັບໜ້າທີ່ອັນມີກຽດສະຫງ່າ.

ໂດຍ: ທິດດີ.