ໃນວັນທີ 27 ສິງຫາ 2019 ທາງໜ່ວຍສະເພາະກິດ ຂອງກອງບັນຊາການທະຫານແຂວງບໍ່ແກ້ວ ໄດ້ຮັບແຫຼ່ງຂ່າວຈາກພົນລະເມືອງດີວ່າຈະມີການຂົນສົ່ງຢາເສບຕິດລາຍໃຫຍ່ ຢູ່ເຂດບ້ານປາກງາວ ຫາບ້ານຫ້ວຍຕາບ ເມືອງຫ້ວຍຊາຍແຂວງບໍ່ແກ້ວ ຈຶ່ງໄດ້ແຕ່ງຕັ້ງໜ່ວຍງານສະເພາະກິດລົງກວດກາ ແລະ ຕິດຕາມຢູ່ເຂດດັ່ງກ່າວ ເຖິງເວລາປະມານ 1 – 2 ໂມງກາງຄືນຂອງວັນທີ 28 ສິງຫາ 2019 ແມ່ນໄດ້ຍິນສຽງເຮືອຈັກລ່ອງລົງມາແຕ່ທາງບ້ານປາກງາວ ມາຈອດຢູຂອບເຂດຫ້ວຍດົງດໍາ ຈຶ່ງເຂົ້າໄປເພື່ອກວດຄົ້ນ ເປົ້າໝາຍໄດ້ລົບໜີເຂົ້າໄປໃນປ່າ ກວດຄົ້ນສະຖານທີ່ເກີດເຫດ ແມ່ນໄດ້ພົບເຫັນກາບ 5 ແຮງຈໍານວນ 1 ລໍາ, ຢູ່ໃນເຮືອດັງກ່າວແມ່ນພົບເຫັນເປົາຈໍານວນ 13 ເປົາ ຜ່ານການກວດຄົ້ນຕົວຈິງ, ຈຶ່ງຮູ້ວ່າຢູ່ໃນເປົາແມ່ນຢາເສບຕິດ (ປະເພດຢາບ້າ) ຈໍານວນ 1280 ມັດ ໜັກ 295 kg ແລະ ໄດ້ສົ່ງໝອບໃຫ້ທາງຫ້ອງຕໍາຫຼວດ ພະແນກ ສະກັດກັ້ນ ແລະ ຕ້ານຢາເສບຕິດ ເພື່ອດໍາເນີນການຕໍ່ໄປ ປະຈຸບັນທາງເຈົ້າໜ້າຕໍາຫຼວດ ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ພວມສືບສວນ-ສອບສວນຊອກຫາກຸ່ມແກ່ງມາດໍາເນີນຄະດີຕາມຂັ້ນຕອນຂອງລະບຽບກົດໝາຍ.