ທ່ານຮອງນາຍົກ ລົງຊຸກຍູ້ວຽກສະກັດກັ້ນ ແລະ ຄວບຄຸມການລະບາດພະຍາດ ໂຄວິດ-19

0
98

ຮອງນາຍົກລັດຖະມົນຕີ ລົງຊຸກຍູ້ວຽກງານສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19 ທີ່ຫ້ອງແຖວພັກເຊົາຂອງປະຊາຊົນຢູ່ບ້ານຊ້າງຄູ້, ບ້ານ​ໄຊ​ສົມ­ບູນ ແລະ ​ພົບ​ປະ​ກັບບັນດາຜູ້​ປະ­ກອບ​ການ​ທຸ­ລະ​ກິດ​ໂຮງ­ແຮມ ແລະ ຮ້ານ​ອາ­ຫານ.

ໃນວັນທີ 26 ເມສາ 2020 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ພ້ອມຄະນະ ລົງຊຸກຍູ້ວຽກງານສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19 ທີ່ຫ້ອງແຖວພັກເຊົາຂອງປະຊາຊົນຢູ່ບ້ານຊ້າງຄູ້, ບ້ານ​ໄຊ​ສົມ­ບູນ ເມືອງໄຊທານີ ນະຄອນຫຼວງວຽງຈັນ ແລະ ໄດ້ພົບ​ປະ​ກັບບັນດາຜູ້​ປະ­ກອບ​ການ​ທຸ­ລະ​ກິດ​ໂຮງ­ແຮມ ແລະ ຮ້ານ​ອາ ຫານ ໂດຍມີທ່ານ ສີຫຸນ ສິດທິລືໄຊ ຮອງເຈົ້າຄອງ ນວ, ທ່ານຮອງລັດຖະມົນຕີກະຊວງ ຖວທ ທ່ານເຈົ້າເມືອງ, ບັນດາຫົວໜ້າພະແນກການ, ອົງການປົກຄອງນະຄອນຫຼວງ ແລະ ປະຊາຊົນໃຫ້ການຕ້ອນຮັບ. 

ການເຄື່ອນໄຫວຄັ້ງນີ້ ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີຍຕໍ່ຄວາມເອົາໃຈໃສ່ຢ່າງຕັ້ງໜ້າຂອງອໍານາດການປົກຄອງ, ພໍ່ແມ່ປະຊາຊົນທີ່ພ້ອມກັນເອົາໃຈໃສ່ຈັດຕັ້ງຜັນຂະ ຫຍາຍຄໍາສັ່ງເລກທີ 06 ຂອງທ່ານນາຍົກດ້ວຍຄວາມຮັບຜິດຊອບສູງ ພ້ອມທັງໄດ້ຍົກໃຫ້ເຫັນຜົນຂອງການຈັດຕັ້ງປະຕິບັດຄຳສັ່ງເລກທີ 06/ນຍ ແລະ ເນັ້ນໃຫ້ເອົາໃຈໃສ່ມາດຕະການແກ້ໄຂ, ຊີວິດການເປັນຢູ່ໃນໄລຍະພະຍາດໂຄວິດ-19 ທີ່ພວມແຜ່ລະບາດ ໃຫ້ມີຄວາມຕື່ນຕົວ ເອົາໃຈໃສ່ເຂັ້ມງວດປ້ອງກັນຕົນເອງຢູ່ພາຍໃນບ້ານເຮືອນ.

ຕໍ່​ກັບບັນ­ຫາ​ທີ່​ທາງ​ສະ­ມາ­ຄົມໂຮງແຮມ ແລະ ຮ້ານ​ອາ­ຫານ​ລາວ ​ສະ­ເໜີ​ຫຼາຍ​ບັນ­ຫາໂດຍສະເພາະແມ່ນສະ­ພາບ​ການ​ຟື້ນ​ຕົວ​ຂອງ​ການ​ບໍ­ລິ­ການ ແມ່ນ​ຈະ​ໃຊ້​ໄລ­ຍະ​ເວ­ລາ​ດົນ​ສົມ­ຄວນ ລວມ​ທັງ​ການ​ປະ­ຕິ­ບັດ​ນະ­ໂຍ­ບາຍ​ຕ່າງໆ​ຕໍ່​ກັບ​ພະ­ນັກ­ງານ ການ​ຈ້າງ​ງານ ບັນ­ຫາ​ການ​ຫວ່າງ​ງານ​ທີ່​ຈະ​ຕາມ​ມາ ແລະ ອີກ​ຫຼາຍ​ບັນ­ຫາ​ທີ່​ໄດ້​ຍົກ​ຂຶ້ນ​ມາ​ເພື່ອ​ນຳ​ສະ­ເໜີ​ຕໍ່​ທ່ານ​ຮອງ​ນາ­ຍົກ.

ນອກຈາກນີ້ທ່ານ​ຮອງ​ນາ­ຍົກ​ໄດ້​ເນັ້ນ​ໃຫ້​ທາງ​ສະ­ມາ­ຄົມ​ໃຫ້​ຮີບ​ດ່ວນ​ສຳ​ຫຼວດ ຂຶ້ນ​ບັນ­ຊີ​ເປົ້າ​ໝາຍ​ເພື່ອ​ປະ­ສານ​ສົມ­ທົບ​ກັບ​ຂະ­ແໜງ­ການ​ກ່ຽວ­ຂ້ອງ ເຊັ່ນ: ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ, ກະ­ຊວງ​ແຮງ​ງານ-ສະ­ຫວັດ­ດີ​ການ​ສັງ­ຄົມ ແລະ ບັນ­ດາ​ຂະ­ແໜງ­ການ​ຕ່າງໆ​ທີ່​ກ່ຽວ­ຂ້ອງ ນຳ​ໃຊ້​ສື່­ສານ​ທີ່​ທັນ​ສະ­ໄໝ ເພື່ອ​ຄວາມ​ວ່ອງ­ໄວ​ໃນ​ແກ້​ໄຂ​ບັນ­ຫາ​ໃຫ້​ຖືກ​ຈຸດ ສ່ວນ​ອີກ​ຫຼາຍ​ບັນ­ຫາ​ທີ່​ນຳ​ສະ­ເໜີ​ມາ​ນັ້ນ ຈະ​ໄດ້​ນຳ​ສະ­ເໜີ​ຕໍ່​ທ່ານ​ນາ­ຍົກ­ລັດ­ຖະ­ມົນ­ຕີ ເພື່ອ​ຈັດ​ກອງ​ປະ­ຊຸມ​ປຶກ­ສາ​ຫາ­ລື ຊອກ​ຫາ​ຊ່ອງ​ທາງ​ແກ້​ໄຂ​ໃຫ້​ທ່ວງ​ທັນ​ກັບ​ສະ­ພາບ ສາ­ມາດ​ແກ້​ໄຂ​ບັນ­ຫາ​ເຫຼົ່າ­ນັ້ນ​ໃຫ້​ເໝາະ​ສົມ ແລະ ທັນ​ເວ­ລາ.

ແຫລ່ງຂ່າວ: ໜສພ ວຽງຈັນໃໝ່.