ພິທີປາຖະກະຖາເລົ່າມູນເຊື້ອວັນສ້າງຕັ້ງສື່ມວນຊົນແຫ່ງຊາດ ແລະ ການພິມຈໍາໜ່າຍ ຄົບ ຮອບ 69 ປີ ( 13 ສິງຫາ 1950 – 13 ສິງຫາ 2019 ) ສະຫຼຸບຜົນງານໃນ 1 ປີ ຜ່ານມາ ແລະ ວັນສ້າງຕັ້ງລັດຖະທໍາມະນູນແຫ່ງ ສ ປປ ລາວ ຄົບຮອບ 28 ປີ ( 15 ສິງຫາ 1991 – 15 ສິງຫາ 2019) ໂດຍທ່ານ ສົມພອນ ແກ້ວມະນີ ຮອງປະທານສະພາປະຊາຊົນແຂວງ, ມີບັນດາຫົວໜ້າ, ຮອງຫົວໜ້າພະແນກການ, ສອງກອງບັນຊາການອ້ອມຂ້າງແຂວງ ຕະຫຼອດຮອດນັກຮົບສື່ມວນຊົນພາຍໃນແຂວງເຂົ້າຮ່ວມຮັບຟັງຢ່າງພ້ອມພຽງ.

ທ່ານ ສົມພອນ ແກ້ວມະນີ ໄດ້ຍົກໃຫ້ເຫັນຄວາມໝາຍ ຄວາມສໍາຄັນ ແລະ ການເຕີບໃຫຍ່ຂະຫຍາຍຕົວຂອງວຽກງານສື່ມວນຊົນ ແລະ ບົດບາດໜ້າທີ່ຂອງສື່ໃນການເປັນປາກກະບອກສຽງອັນແຫຼມຄົມ, ໂຄສະນາເຜີຍແຜ່ແນວທາງນະໂຍບາຍຂອງພັກ – ລັດແຕ່ລະໄລຍະ, ໂຄສະນາແນວ ທາງຂອງພັກວານໃບປິວ, ຕິດທຸງຊາດປະຕິວັດ, ປຸກລະດົມປະຊາຊົນລຸກຮືຂຶ້ນ ຂົວລົ້ມພວກລ່າເມືອງຂຶ້ນແບບເກົ່າ ແລະ ແບບໃໝ່ໃນການຕໍ່ສູ້ປົດປ່ອຍຊາດ ເພື່ອຍາດເອກະລາດມາສູ້ປະຊາຊົນບັນດາເຜົ່າ ແລະ ສາມາດປົດປ່ອຍປະເທດຊາດໄດ້ຢ່າງສົມບູນ ວັນທີ 2 ທັນວາ 1975.

ໃນປີຜ່ານມານັກຮົບສື່ມວນຊົນແຂວງບໍ່ແກ້ວ ກໍ່ໄດ້ເອົາໃຈໃສ່ໃນການໂຄສະນາສຶກສາອົບ ຮົມແນວທາງການເມືອງຂອງພັກ – ລັດຢ່າງກວ້າງຂວາງ. ທົ່ວແຂວງບໍ່ແກ້ວ ມີສະຖານີວິທະຍຸ 1 ແຫ່ງ, ໂທລະພາບ 1 ແຫ່ງ, ມີໂທລະໂຄ່ງ 200 ບ້ານ ແລະ ບ້ານທີ່ບໍ່ທັນມີໂທລະໂຄ່ງ 45 ບ້ານ, ໄດ້ຜະລິດຂ່າວອອກທາງວິທະຍຸ – ໂທລະພາບ, ໜັງສືພິມ, ສື່ອອນລາຍ ຈໍານວນ 2,917 ຂ່າວ, ໄດ້ສົ່ງໃຫ້ສູນກາງ 1,180 ຂ່າວ ແລະ ຜະລິດລາຍການບໍ່ແກ້ວວັນນີ້ອອກທາງໂທລະພາບແຫ່ງຊາດໄດ້ 279 ຄັ້ງ, ໄດ້ອອກບັດນັກຂ່າວໃຫ້ນັກຂ່າວບັນດາພະແນກການ, ກົມກອງ, ເມືອງ ໃນທົ່ວແຂວງ ຈໍານວນ 68 ບັດ, ສໍາເລັດການກໍ່ສ້າງຫ້ອງການສະຖານີວິທະຍຸກະຈາຍສຽງເມືອງຕົ້ນເຜິ້ງ, ສໍາເລັດການຕິດຕັ້ງໂທລະໂຄ່ງໄດ້ 2 ບ້ານ ແລະ ຈະສືບຕໍ່ຕິດຕັ້ງອີກ 2 ເມືອງຄື: ເມືອງປາກທາ ແລະ ເມືອງຜາອຸດົມ ຈໍານວນ 4 ບ້ານ, ໄດ້ລົງຝຶກອົບຮົມໃຫ້ນັກຂ່າວເມືອງຜາອຸດົມ 1 ຄັ້ງ ແລະ ອື່ນໆ.
ຂະນະດຽວກັນ ທ່ານຍັງໄດ້ຍົກໃຫ້ຮູ້ເຖິງຄວາມເປັນມາຂອງວັນລັດຖະທໍາມະນູນ, ສະພາບການຈັດຕັ້ງປະຕິບັດລັດຖະທໍາມະນູຸນ ແລະ ກົດໝາຍໃນການຄຸ້ມຄອງລັດດ້ວຍກົດໝາຍຕາມຈຸດໝາຍທີ່ພັກໄດ້ກໍານົດໄວ້ ແນ່ໃສ່ເຮັດໃຫ້ປະເທດຊາດມັ່ງຄັງເຂັ້ມແຂງ, ປະຊາຊົນຮັ່ງມີຜາສຸກ, ສັງ ຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທໍາ ແລະ ສີວິໄລ.