ໃນຍາມປະເທດຊາດ-ບ້ານເມືອງພົບກັບການລະບາດຂອງພະຍາດ Covid-19 ນີ້ສັງເກດເຫັນວ່າການນຳສະເໜີຂໍ້ມູນຂ່າວສານບາງອັນເກີນຈິງ; ການພາດຫົວຂໍ້ຂ່າວກໍ່ແບບບໍ່ສ້າງສັນ ໂດຍສະເພາະແມ່ນສື່ອອນລາຍ ອັນເຮັດໃຫ້ສັງຄົມແຕກຕື່ນ.

        ໃນກອງປະຊຸມລັດຖະບານສະໄໝສາມັນປະຈຳເດືອນເມສາ 2020 ທີ່ໄຂຂື້ນ ແລະ ປິດລົງໃນວັນທີ 23 ເມສາ 2020 ນັ້ນ ທ່ານນາຍົກລັດຖະມົນຕີກໍ່ຮຽກຮ້ອງວ່າ ″ຂໍໃຫ້ສື່ມວນຊົນທຸກປະເພດ ລວມທັງສື່ອອນລາຍຕ່າງໆ ຈົ່ງຍົກສູງນໍ້າໃຈຮັກຊາດ, ຮັບໃຊ້ປະຊາຊົນບັນດາເຜົ່າອອກຂ່າວ; ໃຫ້ຂໍ້ມູນຂ່າວສານຕ່າງໆໃຫ້ຖືກຕ້ອງກັບຄວາມເປັນຈິງ ແລະ ເປັນປະໂຫຍດສູງສຸດ ໃຫ້ແກ່ຊາດ ແລະ ປະຊາຊົນ; ຫຼີກເວັ້ນການອອກຂ່າວ; ໃຫ້ຂໍ້ມູນເທັດທີ່ຈະສ້າງຄວາມປັ່ນປ່ວນ ແລະ ເປັນຜົນກະທົບດ້ານລົບຕໍ່ຈິດໃຈ; ຄວາມສະຫງົບ ແລະ ຄວາມເປັນລະບຽບຮຽບຮ້ອຍ; ຄວາມປອດໄພຂອງສັງຄົມ…″ ບໍ່ທໍ່ນັ້ນ ຄະນະສະເພາະກິດເວລາຖະແຫຼງຂ່າວ ເພີ່ນກໍ່ຮຽກຮ້ອງເລື້ອຍໆ ເຖີງສື່ອອນລາຍທີ່ກະຈາຍຂ່າວບໍ່ຊັດເຈນໃນບາງກໍລະນີ.

        ການຈັດຕັ້ງເພີ່ນຈະຫັນກຽວເຂົ້າແທ້ເນີ! ສຳລັບສື່ອອນລາຍທີ່ເຮັດໜ້າທີ່ປານກັບວ່າໂຕເປັນສຳນັກຂ່າວ; ຖ້າຫາກຢາກເປັນກໍ່ຕ້ອງໄປຂື້ນທະບຽນຄັກແນ່ນຳ ກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຫາກບໍ່ຂື້ນທະບຽນ ແຕ່ເສືອກເຮັດໜ້າທີ່ປານສຳນັກຂ່າວມັນກໍ່ຜິດກົດໝາຍ ໂດຍສະເພາະກົດໝາຍວ່າດ້ວຍການຕ້ານ ແລະ ສະກັດກັ້ນອາດຊະຍາກຳທາງລະບົບຄອມພິວເຕີ ສະບັບເລກທີ 61/ສພຊ ລົງວັນທີ 15 ກໍລະກົດ 2015 ໃນມາດຕາ 62 ທີ່ລະບຸວ່າ: ການສ້າງຄວາມເສຍຫາຍຜ່ານສື່ສັງຄົມອອນລາຍຈະຖືກລົງໂທດແຕ່ 3 ເດືອນ ຫາ ສາມປີ ແລະ ຈະຖືກປັບໄໝແຕ່ 4ລ້ານກີບ ຫາ 20 ລ້ານກີບ.

        ຂໍໃຫ້ຜູ້ໃຊ້ສື່ອອນລາຍທັງຫຼາຍ ຈົ່ງມີສະຕິເວລາໂພສອອກ;  ຢ່າລ່ວງ ແລະ ທຳຕົນແບບນັກຂ່າວ; ຄວນຊອກອ່ານຈັນຍາບັນຂອງນັກຂ່າວ; ກົດໝາຍວ່າດ້ວຍສື່ມວນຊົນ… ຫາກຍັງສືບຕໍ່ສ້າງຂ່າວປັ່ນປ່ວນ ເມື່ອການຈັດຕັ້ງ ສັ່ງປິດແລ້ວສິຫາວ່າບໍ່ເຕືອນ.

ໂດຍ: ທິດດີ.