ກອງປະຊຸມ ປຶກສາຫາລືໃນການວາງແຜນການໂຕ້ຕອບຕໍ່ການລະບາດຂອງພະຍາດໄຂ້ຍຸງລາຍ.ໄດ້ເປີດຂຶ້ນໃນວັນທີ 28 ສິງຫາ 2019 ນີ້; ຢູ່ທີ່ຫ້ອງປະຊຸມຂອງຫ້ອງການສາທາລະນະສຸກເມືອງ. ໂດຍພາຍໃຕ້ການເຂົ້າຮ່ວມເປັນປະທານຂອງທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ ນອກນັ້ນ ກໍ່ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ທະຫານ, ຕໍາຫຼວດ ແລະ ບັນດາທ່ານນາຍບ້ານໃນບ້ານເປົ້າ ໝາຍ ຕະຫຼອດບັນດາຫົວໜ້າສຸກສາລາ 8 ສຸກສາລາພາຍໃນເມືອງກໍ່ໄດ້ເຂົ້າຮ່ວມ.

ໃນພິທີທ່ານ ດຣ ນາງ ສຸພາບ ອິນສີຊຽງໃໝ່ ຫົວໜ້າຫ້ອງການສາທາລະນະສຸກເມືອງ ອາດສະພັງທອງກໍ່ໄດ້ລາຍງານສະພາບການລະບາດຂອງໄຂ້ຍຸງລາຍໃນຂອບເຂດເມືອງ ອາດສະພັງທອງຄືໃນໄລຍະຜ່ານມາພາຍໃຕ້ການນໍາແຕ່ລະຂັ້ນກໍ່ຄືຫ້ອງການສາທາລະນະສຸກເມືອງໂດຍສົມທົບກັບການຊ່ວຍເຫຼືອຂອງບັນດາອົງການຈັດຕັ້ງຕ່າງໆໃນສັງຄົມຕະຫຼອດຮອດຊຸມຊົນແມ່ນໄດ້ພະຍາຍາມຮ່ວມມືກັນໃນຫຼາຍດ້ານເພື່ອຕໍ່ສູ້ບັນຫາພະຍາດໄຂ້ເລືອດອອກພາຍໃນເມືອງແຕ່ກໍ່ຍັງສາມາດຄວບຄຸມການລະບາດຂອງພະຍາດໄດ້ດີເທົ່າທີ່ຄວນເຊິ່ງສະແດງອອກໃນການລະບາດຂອງໄຂ້ຍຸງລາຍໃນທົ່ວເມືອງມີ 422 ກໍລະນີ ແລະ ໄດ້ເສຍຊີວິດ 1 ກໍລະນີ. ຈາກນັ້ນ; ໃນພິທີກໍ່ໄດ້ມີການຮ່ວມປຶສາຫາລືສົນທະນາປະເມີນຄືນວີທີການຈັດຕັ້ງປະຕິບັດຂະບວນການຕ້ານໄຂ້ຍຸງລາຍ, ປຶກສາຫາລືການສ້າງຂະບວນການທໍາລາຍແຫຼ່ງເພາະພັນຂອງຍຸງລາຍໂດຍການຊຸກຍູ້ໃຫ້ຊຸມຊົນໄດ້ມີສ່ວນຮ່ວມ ແລະ ສົນທະນາຖອດຖອນບົດຮຽນຫາທາງແກ້ໄຂບັນຫາຕ່າງໆໃນການຈັດຕັ້ງປະຕິບັດຍຸດທະສາດ 5 ປ ຢູ່ຂັ້ນບ້ານແມ່ນໃຫ້ປະຕິບັດຄື:ໃຫ້ເຮັດສຸກຂະສຶກສາກັບທີ່ ແລະ ຊຸມຊົນຈາກນັ້ນ;

ຕ້ອງໄດ້ນໍາພາຂະບວນການເຮັດອານາໄມ 3 ສະອາດເປັນຕົ້ນຕ້ອງປະຕິບັດຕາມຫຼັກການ 5 ປ ເພື່ອປາບປາມຍຸງລາຍຄື: ປິດຝາພາຊະນະທີ່ເກັບນໍ້າໃນເຮືອນນອກເຮືອນເພື່ອບໍ່ໃຫ້ຍຸງມາໄຂ່ໃສ່, ປ່ຽນນໍ້າຜັດຖູພາຊະນະເປັນຕົ້ນແມ່ນເຕົ້າດອກໄມ້ນໍ້າຮອງຕີນຕູ້ຖ້ານຮອງຈອກນໍ້າເປັນຕົ້ນ, ປ່ອຍປາຫາງນົກຍຸງເພື່ອກິນໜອນນໍ້າ, ປັບປຸງບໍ່ໃຫ້ມີນໍ້າຄ້າງຂັງເຊັ່ນກະໂປະຮາງລິນຢາງຕີນລົດເກົ່າ ແລະ ປະຕິບັດເປັນປະຈໍາທຸກໆອາທິດຖ້າຫາກວ່າມີອາການເປັນໄຂ້ໃຫ້ໄປປິ່ນປົວຢູ່ໂຮງໝໍ ຫຼື ສຸກສາລາໃກ້ບ້ານຂອງທ່ານຖ້າຫາກທຸກທ່ານປະຕິບັດໄດ້ຕາມນີ້ກໍ່ສາມາດຫຼຸດຜ່ອນການເປັນໄຂ້ຍຸງລາຍໄດ້. ສ່ວນຂໍ້ຫຍຸ້ງຍາກສໍາລັບການລົງຈັດຕັ້ງປະຕິບັດໃນຊຸມຊົນຜ່ານມາແມ່ນປະຊາຊົນແມ່ນຍັງບໍ່ເຂົ້າໃຈຕໍ່ກັບການເຮັດອານາໄມ 3 ສະອາດ ແລະ ບໍ່ປະຕິບັດຕາມຫຼັກການ 5 ປ, ສ່ວນໃຫ່ຍແມ່ນບໍ່ໃຫ້ຄວາມຮ່ວມມືກັບພະນັກງານແພດໝໍທີ່ລົງຊີ້ນໍາ – ນໍາພາ. ເພື່ອໃຫ້ພິທີມີຄວາມໝາຍຄວາມສໍາຄັນຂຶ້ນຕື່ມໃນຕອນທ້າຍຂອງພິທີທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ ກໍ່ໄດ້ໃຫ້ກຽດໂອ້ລົມຕໍ່ພິທີຢ່າງມີຄວາມໝາຍຄວາມສໍາຄັນຢ່າງເລິກເຊິ່ງພ້ອມນັ້ນທ່ານໄດ້ເນັ້ນໃຫ້ບັນດາກົມກອງຫ້ອງການອ້ອມຂ້າງເມືອງ, ກຸ່ມບ້ານ ແລະ ບ້ານຈົ່ງພ້ອມກັນຈັດຕັ້ງປະຕິບັດຕາມຫຼັກການ 5 ປ ເພື່ອຫຼຸດຜ່ອນອັດຕາການເປັນໄຂ້ຍຸງລາຍໃຫ້ຫຼຸດໜ້ອຍລົງຕື່ມດ້ວຍ.