ໃນຍາມລະບາດຂອງພະຍາດ Covid-19 ການນໍາສະເໜີຂ່າວໃນແຕ່ລະມື້ ໂດຍສະເພາະສື່ອອນລາຍແມ່ນຫຼວງຫຼາຍ. ເພື່ອນຜູ້ອ່ານອອນລາຍຖາມມາວ່າ: ບໍ່ຮູ້ສິຟັງຄວາມໃຜ?
ກ່ຽວກັບເລື່ອງນີ້ ຜູ້ຂຽນຄິດວ່າ: ຜູ້ເສບຂ່າວທັງຫຼາຍຕ້ອງລະວັງ ບໍ່ເຕັ້ນຕາມຂ່າວ… ເຊີ່ງຫວ່າງມໍ່ໆມານີ້ ກໍ່ມີການສະເໜີມາດຕະການຜ່ອນຜັນຂອງລັດຖະບານ ເຊີ່ງໃນຄວາມເປັນຈິງຜ່ານກອງປະຊຸມປຶກສາຫາລືຫຼັງວັນທີ 3 ພຶດສະພາຈະປະຕິບັດ… ສະນັ້ນຂ່າວແບບນີ້ຕ້ອງໄດ້ລະວັງ, ຄວນມີເນື້ອໃນວ່າກອງປະຊຸມປຶກສາຫາລື; ຫາກແມ່ນທາງການເພີ່ນໃຫ້ປະຕິບັດຕ້ອງມີຄຳສັ່ງ; ຂໍ້ຕົກລົງຫຼັງວັນທີ 3 ພຶດສະພາ 2020; ສຳລັບບາງສື່ ລົງຕາຕະລາງຜ່ອນຜັນກໍ່ຍັງບໍ່ເປັນທາງການເຊັ່ນກັນ.
ຍ້ອນວ່າສື່ອອນລາຍ ບໍ່ມີບັນນາທິການກວດແກ້ ສະນັ້ນຈື່ງຄ່ອຍມີບັນຫາເລື່ອງຄວາມຊັດເຈນໃນຂໍ້ມູນ ແລະ ຮູບພາບປະກອບ. ດັ່ງກໍລະນີແພດໝໍມອບຊໍ່ດອກໄມ້ໃຫ້ຄົນເຈັບອອກໂຮງໝໍ ຄັນແມ່ນມີບັນນາທິການເພີ່ນຈະບໍ່ໂພສຮູບລົງ ເພາະແທນທີ່ຄົນເຈັບຈະມອບໃຫ້ທ່ານໝໍ ແຕ່ກົງກັນຂ້າມ. ເລື່ອງນີ້ບໍ່ຜິດບ້ານເມືອງດອກ ພຽງແຕ່ໃນຈິດສຳນຶກ ບາງຄົນວ່າບໍ່ສົມຄວນ.
ຂ້າງເທີງນັ້ນ ພຽງແຕ່ຍົກບາງກໍລະນີທໍ່ນັ້ນ; ຍັງມີຫຼາຍກໍລະນີສະນັ້ນ ຜູ້ເບີ່ງຂ່າວຕ້ອງໄດ້ລະວັງ; ມີສະຕິ ບໍ່ເຕັ້ນຕາມຂ່າວເນີ! ດີທີ່ສຸດ ໃຫ້ເບີ່ງແຫຼ່ງຂ່າວພວກເຮົານີ້ລະຊັດເຈນດີ ແລະ ເປັນທາງການ; ຂໍໂທດເນີ ບໍ່ແມ່ນເຂົ້າຂ້າງຕົນເອງ ″ມີເດຍລາວ″ ເຮົາແຕ່ລະມື້; ແຕ່ລະຊົ່ວໂມງ ມີຂ່າວລາຍງານສະພາບພະຍາດ Covid-19 ເປັນປົກກະຕິໄປຄຽງຄູ່ຂ່າວອື່ນໆ ບໍ່ທໍ່ນັ້ນຍັງມີບົດຄວາມ, ບົດວິຈານຕ່າງໆອອກຄຽງຄູ່ກັນໄປ ເພື່ອອະທິບາຍ ແລະ ຊີ້ແຈງບັນຫາຕ່າງໆທີ່ເກີດຂື້ນ ພ້ອມທັງສະເໜີແນະນຳທາງອອກຂອງບັນຫາອີກດ້ວຍ.
ຂໍໃຫ້ມີສະຕິເວລາເບີ່ງຂ່າວບໍ່ເຕັ້ນຕາມຂ່າວ.
ທິດດີ