ຖືເປັນຂ່າວດີສຳລັບການຕໍ່ສູ້ກັບພະຍາດໂຕຮ້າຍກາດ Covid-19 ຢູ່ປະເທດເຮົາ ເພາະວ່າເລີ່ມແຕ່ວັນທີ 12 ເມສາ 2020 ບໍ່ມີຜູ້ຕິດເຊື້ອໃໝ່ເພີ່ມຂື້ນເປັນເວລາ 19 ມື້ (ຮອດວັນທີ 1 ພຶດສະພາ 2020) ມາຮອດປະຈຸບັນຜູ້ຕິດເຊື້ອສະສົມ 19 ຄົນ ໃນນີ້ປີ່ນປົວຫາຍດີ 8 ຄົນ ສ່ວນເຫຼືອ 11 ຄົນກຳລັງປີ່ນປົວຢູ່ໂຮງໝໍ; ອັນພົ້ນເດັ່ນແມ່ນບໍ່ມີຜູ້ເສຍຊີວິດ. ສະແດງໃຫ້ເຫັນວ່າສະພາບການລະບາດຂອງພະຍາດ Covid-19 ຢູ່ປະເທດເຮົາຜ່ອນຄາຍລົງແດ່ແລ້ວ; ແຕ່ລັດຖະບານເຮົາ ກໍ່ຄືຄະນະສະເພາະກິດກໍ່ບໍ່ໄດ້ພໍໃຈຜົນສຳເລັດອັນນັ້ນ; ໃນຕໍ່ໜ້າພວກເຮົາອາດມີຄວາມສ່ຽງສູງທີ່ຈະເກີດການລະບາດຮອບໃໝ່ ແລະ ສີ່ງທ້າຍທາຍຈຳນວນໜຶ່ງ. ສະນັ້ນ ເພີ່ນຈື່ງປະກາດສືບຕໍ່ແກ່ຍາວການຈັດຕັ້ງປະຕິບັດຄຳສັ່ງເລກທີ 06/ນຍ ໄປຕື່ມອີກ ນັບແຕ່ວັນທີ 4 ຫາວັນທີ 17 ພຶດສະພາ 2020.

ລາຍລະອຽດຂອງມາດຕະການຊົ່ວຄາວນີ້ມີຄົບຖ້ວນໃນບົດຖະແຫຼງຂ່າວຂອງ ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ກ່ຽວກັບການສືບຕໍ່ປະຕິບັດບັນດາມາດຕະການປ້ອງກັນ; ຄວບຄຸມ; ສະກັດກັ້ນ ແລະ ແກ້ໄຂການລະບາດຂອງພະຍາດ Covid-19 ໃນໄລຍະແຕ່ວັນທີ 4-17 ພຶດສະພາ 2020. ຄັ້ງວັນສຸກ ວັນທີ 1 ພຶດສະພາ 2020. ໃນຄໍາຖະແຫຼງ 5 ຂໍ້ນັ້ນມີທັງມາດຕະການຜ່ອນຜັນ ແລະ ຫ້າມ (ເຊີ່ງອີງໃສ່ຂໍ້ຫ້າມຂອງຄຳສັ່ງເລກທີ 06/ນຍ).
ນອກຈາກຄຳຖະແຫຼງແລ້ວ ຫ້ອງວ່າການສຳນັກງານນາຍົກລັດຖະມົນຕີຍັງອອກແຈ້ງການເລກທີ 524/ຫສນຍ ລົງວັນທີ 01 ພຶດສະພາ 2020 ຕື່ມອີກ ເລື່ອງ: ການສືບຕໍ່ປະຕິບັດມາດຕະການໃນການປ້ອງກັນ; ຄວບຄຸມ; ສະກັດກັ້ນ ແລະ ແກ້ໄຂການລະບາດຂອງພະຍາດ Covid-19 ໃນໄລຍະແຕ່ວັນທີ 04-17 ພຶດສະພາ 2020. ເນື້ອໃນຂອງແຈ້ງການທັງ 6 ຂໍ້ນັ້ນ ມີທັງການຜ່ອນຜັນ ແລະ ຂໍ້ຫ້າມ; ໃນນີ້ ຜູ້ຂຽນຢາກນຳສະເໜີຂໍ້ 6 ເຊີ່ງເວົ້າເຖີງວິທີການຈັດຕັ້ງປະຕິບັດເຊີ່ງມີ 5 ຂໍ້ນ້ອຍ ລະອຽດດັ່ງນີ້:

6.1. ມາດຕະການຜ່ອນຜັນນີ້ແມ່ນເປັນການຊົ່ວຄາວ; ຖ້າມີການລາຍງານກໍລະນີຜູ້ຕິດເຊື້ອເກີດຂື້ນຢູ່ແຂວງໃດແຂວງໜຶ່ງ ຈະໄດ້ຈຳກັດການເຂົ້າ-ອອກ  ແລະ ປະຕິບັດຄືນມາດຕະການຕ່າງໆຢ່າງເຂັ້ມງວດສະເພາະແຂວງນັ້ນ  ເຊີ່ງແມ່ນຄະນະສະເພາະກິດແຂວງນັ້ນຈະໄດ້ເປັນຜູ້ປະກາດແຈ້ງການ;  ຖ້າຫາກເກີດມີຜູ້ຕິດເປັນຈຸ້ມ ແຕ່ສອງແຂວງຂື້ນໄປແມ່ນຈະໄດ້ກັບມາປະຕິບັດບັນດາມາດຕະການຕ່າງໆ ທີ່ໄດ້ກຳນົດໃນຄຳສັ່ງເລກທີ 06/ນຍ ຄືນໃໝ່ຢ່າງເຂັ້ມງວດ.

6.2. ມອບໃຫ້ບັນດາກະຊວງ; ຂະແໜງການ; ອົງການປົກຄອງທ້ອງຖີ່ນທຸກຂັ້ນ ກວດກາຄືນບັນດານິຕິກຳ; ຄຳແນະນຳຕ່າງໆຂອງຕົນເພື່ອປັບປຸງໃຫ້ສອດຄ່ອງກັບມາດຕະການຜ່ອນຜັນຂ້າງເທີງ ແລະ ຜັນຂະຫຍາຍເປັນອັນລະອຽດເພື່ອມີຄວາມເຂົ້າໃຈເປັນເອກະພາບໃນການຈັດຕັ້ງປະຕິບັດ.

6.3.ມອບໃຫ້ບັນດາກະຊວງ; ຂະແໜງການ; ອົງການປົກຄອງທ້ອງຖີ່ນທຸກຂັ້ນເອົາໃຈໃສ່ຕິດຕາມ-ກວດກາການຈັດຕັ້ງປະຕິບັດບັນດາມາດຕະການໃໝ່ ທີ່ໄດ້ກຳນົດໃນແຈ້ງການສະບັບນີ້ຢ່າງເຂັ້ມງວດ ເພື່ອຮັບປະກັນບໍ່ໃຫ້ມີການລະບາດຂອງພະຍາດ Covid-19 ຂື້ນມາໃໝ່ພາຍຫຼັງການຜ່ອນຜັນ.

6.4.ໃຫ້ກໍາລັງປ້ອງກັນຊາດ; ປ້ອງກັນຄວາມສະຫງົບ; ຄະນະສະເພາະກິດ; ຂະແໜງການ; ອົງການປົກຄອງທ້ອງຖີ່ນ ແລະ ທຸກພາກສ່ວນໃນສັງຄົມ ພ້ອມກັນເປັນເຈົ້າການຕິດຕາມ; ຮັກສາຄວາມສະຫງົບ; ຮັກສາຄວາມເປັນລະບຽບຮຽບຮ້ອຍໃນສັງຄົມ ແລະ ຈັດຕັ້ງປະຕິບັດມາດຕະການທີ່ໄດ້ກຳນົດໃນແຈ້ງການສະບັບນີ້ຢ່າງເຂັ້ມງວດ. ກໍລະນີມີການລະເມີດແມ່ນໃຫ້ເຈົ້າໜ້າທີ່ປ້ອງກັນຄວາມສະຫງົບ ແລະ ເຈົ້າໜ້າທີ່ກ່ຽວຂ້ອງດຳເນີນມາດຕະການຕາມກົດໝາຍ ແລະ ລະບຽບການກ່ຽວຂ້ອງຢ່າງເຂັ້ມງວດ.

6.5. ມາດຕະການທີ່ກໍານົດໄວ້ຂ້າງເທີງນີ້ ເລີ່ມມີຜົນສັກສິດນັບແຕ່ວັນທີ 4 ຫາ 17 ພຶດສະພາ 2020; ໃນພາກປະຕິບັດຕົວຈິງ ຈະໄດ້ມີການປະເມີນ; ທົບທວນ ແລະ ດັດປັບໃຫ້ເໝາະສົມຕື່ມ; ກໍລະນີມີການປ່ຽນແປງ ລັດຖະບານຈະແຈ້ງໃຫ້ຊາບເປັນແຕ່ລະໄລຍະ.

                ຮຽກຮ້ອງໃຫ້ໝົດທຸກຄົນໃນທົ່ວປະເທດ ຈົ່ງພ້ອມກັນຈັດຕັ້ງປະຕິບັດມາດຕະການຜ່ອນຜັນຄັ້ງນີ້ຢ່າງເຂັ້ມງວດ… ເພື່ອພ້ອມກັນເອົາຊະນະສັດຕູໂຕຮ້າຍກາດພະຍາດ Covid-19 ຢ່າງມີໄຊ.

ໂດຍ: ທິດດີ.