ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ຖະແຫຼງຂ່າວປະຈໍາວັນທີ 04 ພຶດສະພາ ປີ 2020 ໂດຍ: ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ.

ສະພາບການເຝົ້າລະວັງ COVID-19 ຢູ່ ສປປ ລາວຮອດ 5 ໂມງແລງ ຂອງວັນທີ 03 ພຶດສະພາ 2020 ຕາມຈຸດຜ່ານດ່ານມີຈໍານວນຜູ້ເດີນທາງເຂົ້າມາມີທັງໝົດ 1,215 ຄົນ ຄື:

  • ຈຸດຜ່ານດ່ານລາວ-ໄທ ທັງໝົດ 636 ຄົນ, ໃນນັ້ນມີແຮງງານກັບມາແຕ່ໄທຜ່ານດ່ານຊ່ອງເມັກ ແຂວງຈຳປາສັກ 26 ຄົນ,ເຫຼືອນັ້ນແມ່ນຜູ້ຂັບລົດຂົນສົ່ງສິນຄ້າ
  • ຈຸດຜ່ານດ່ານລາວ-ຈີນ ທັງໝົດ 17 ຄົນ,​ທັງໝົດ ແມ່ນຜູ້ຂັບລົດຂົນສົ່ງສິນຄ້າ
  • ຈຸດຜ່ານດ່ານລາວ-ຫວຽດ ທັງໝົດ 562 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ
  • ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 00 ຄົນ

ໃນທຸກດ່ານແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້, ສຳລັບແຮງງານລາວຈຳນວນ 26 ຄົນທີ່ເຂົ້າມາໃໝ່ຜ່ານດ່ານຊ່ອງເມັກແຂວງຈຳປາສັກນັ້ນ ແມ່ນມີຖິ່ນຖານມາຈາກແຂວງຈຳປາສັກ 20 ຄົນ, ສາລະວັນ 05 ຄົນ, ສະຫວັນນະເຂດ 01 ຄົນ, ເຊິ່ງໄດ້ນຳສົ່ງໄປຈຳກັດບໍລິເວນຢູ່ສູນຂອງແຂວງຈົນຄົບກຳນົດ 14 ວັນ.

ການເຝົ້າລະວັງ ແລະ ວິເຄາະໃນວັນທີ 03 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 39 ຄົນ, ໃນນັ້ນມີກໍລະນີສົງໄສ 14 ຄົນ ແລະ ແຮງງານລາວທີ່ກັບມາຈາກປະເທດໄທ 25 ຄົນ. ໃນຈໍານວນກໍລະນີສົງໄສທັງໝົດ 14 ຄົນແມ່ນມາຈາກນະຄອນຫຼວງວຽງຈັນ 13 ຄົນ ແລະ ແຂວງວຽງຈັນ 01 ຄົນ. ໃນຈຳນວນແຮງງານລາວທີ່ກັບມາແຕ່ໄທ 25 ຄົນລາຍລະອຽດດັ່ງລຸ່ມນີ້:

  • ຈຳປາສັກ 18 ຄົນ
  • ວຽງຈັນ 04 ຄົນ
  • ຫຼວງພະບາງ 01 ຄົນ
  • ຊຽງຂວາງ 01 ຄົນ
  • ສະຫວັນນະເຂດ 01ຄົນ

ຜົນກວດທັງໝົດ 39 ຄົນ ຂອງມື້ວານນີ້ບໍ່ພົບເຊື້ອໃໝ່. ໝາຍຄວາມວ່າໃນວັນທີ 03 ພຶດສະພາ 2020 ບໍ່ມີກໍລະນີໃໝ່.

ປະຈຸບັນມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍມິດຕະພາບ 09 ຄົນທັງໝົດເຫັນວ່າ ມີອາການເບົາບາງ ແລະ ຍັງຕິດຕາມເພື່ອກວດວິເຄາະຢັ້ງຢືນການບໍ່ພົບເຊື້ອ ແລະ ໄດ້ຮັບເອົາຜູ້ທີ່ອອກໂຮງໝໍນ້ຳເບີ 14 ກັບເຂົ້າມາຕິດຕາມອາການຢູ່ໂຮງໝໍຄືນ, ແຕ່ວ່າໄດ້ແຍກໄວ້ຢູ່ຕຶກແຍກປ່ຽວໜຶ່ງຕ່າງຫາກ ບໍ່ໄດ້ໄປປົນກັບຜູ້ຕິດເຊື້ອ 9 ຄົນທີ່ກຳລັງປິ່ນປົວຢູ່ນັ້ນ, ໝາຍວ່າປະຈຸບັນນີ້ມີຜູ້ນອນຕິດຕາມຢູ່ໂຮງໝໍມິດຕະພາບ 10 ຄົນ.

ນັບແຕ່ເດືອນມັງກອນ ຮອດ ວັນທີ 03 ພຶດສະພາ 2020 ໄດ້ເກັບຕົວຢ່າງມາກວດທັງໝົດມີ 2,223 ຕົວຢ່າງ, ກວດພົບເຊື້ອສະສົມ 19 ຄົນ (22 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ).

Medialaos MMD