ຖະແຫຼງຂ່າວ
ຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19
ປະຈໍາວັນທີ05ພຶດສະພາ ປີ2020
ໂດຍ: ທ່ານ ຮສ ດຣ. ພູທອນ ເມືອງປາກຮອງລັດຖະມົນຕີກະຊວງສາທາລະນະສຸກ,
ຜູ້ປະຈໍາການຄະນະສະເພາະກິດ
I. ສະພາບການເຝົ້າລະວັງCOVID-19ຢູ່ ສປປ ລາວຮອດ 5 ໂມງແລງ ຂອງວັນທີ 04ພຶດສະພາ 2020

  1. ວຽກງານຈຸດຜ່ານດ່ານ
    • ຈໍານວນຜູ້ເດີນທາງເຂົ້າມາມີທັງໝົດ1,574ຄົນ
  • ຈຸດຜ່ານດ່ານລາວ-ໄທ ທັງໝົດ 884 ຄົນ, ໃນນັ້ນມີແຮງງານລາວກັບມາຈາກປະເທດໄທຜ່ານດ່ານຊ່ອງເມັກ ແຂວງຈຳປາສັກ76ຄົນແລະຜ່ານດ່ານຂົວມິດຕະພາບI ຈຳນວນ104 ຄົນ, ເຫຼືອນັ້ນແມ່ນຜູ້ຂັບລົດຂົນສົ່ງສິນຄ້າ
  • ຈຸດຜ່ານດ່ານລາວ-ຈີນ ທັງໝົດ 24 ຄົນ,ທັງໝົດ ແມ່ນຜູ້ຂັບລົດຂົນສົ່ງສິນຄ້າ
  • ຈຸດຜ່ານດ່ານລາວ-ຫວຽດ ທັງໝົດ666ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ
  • ຈຳນວນຜູ້ເດີນທາງຜ່ານສະໜາມບິນສາກົນວັດໄຕ00ຄົນ
    • ໃນທຸກດ່ານແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້, ສຳລັບ
    ແຮງງານລາວຈຳນວນ76ຄົນທີ່ເຂົ້າມາໃໝ່ຜ່ານດ່ານຊ່ອງເມັກແຂວງຈຳປາສັກ
    ນັ້ນແມ່ນມີຖິ່ນຖານມາຈາກ:
  • ແຂວງຈຳປາສັກ45ຄົນ
  • ສາລະວັນ08ຄົນ
  • ສະຫວັນນະເຂດ12ຄົນ
  • ຫຼວງພະບາງ05ຄົນ
  • ຄຳມ່ວນ03ຄົນ
  • ເຊກອງ01ຄົນ
  • ຫົວພັນ01 ຄົນ
  • ອັດຕະປຶ01ຄົນ
    ສ່ວນແຮງງານລາວທີ່ເຂົ້າມາຜ່ານດ່ານຂົວມິດຕະພາບI ຈຳນວນ104ຄົນນັ້ນແມ່ນ
    ມີຖິ່ນຖານມາຈາກ:
  • ນະຄອນຫຼວງວຽງຈັນ20ຄົນ
  • ຫຼວງພະບາງ28ຄົນ
  • ອຸດົມໄຊ32 ຄົນ
  • ໄຊຍະບູລີ07ຄົນ
  • ສະຫວັນນະເຂດ05ຄົນ
  • ບໍລິຄຳໄຊ 07ຄົນ
  • ວຽງຈັນ02ຄົນ
  • ສາລະວັນ03ຄົນ
    ແຮງງານທັງໝົດໄດ້ເກັບຕົວຢ່າງມາກວດ ແລະ ນຳສົ່ງໄປຈຳກັດບໍລິເວນຢູ່ສູນຂອງແຂວງຈົນຄົບກຳນົດ 14ວັນ.
  1. ການເຝົ້າລະວັງ ແລະ ວິເຄາະ
    • ໃນວັນທີ04ພຶດສະພາ 2020, ໄດ້ເກັບຕົວຢ່າງມາກວດທັງໝົດ195ຄົນ,ໃນນັ້ນມີກໍລະນີສົງໄສ06ຄົນແລະແຮງງານລາວທີ່ກັບມາຈາກປະເທດໄທ189ຄົນ.
    • ກໍລະນີສົງໄສທັງໝົດ06ຄົນແມ່ນມາຈາກນະຄອນຫຼວງວຽງຈັນ05ຄົນແລະຄຳມ່ວນ01 ຄົນ.
    • ແຮງງານລາວທີ່ກັບມາຈາກປະເທດໄທ189ຄົນລາຍລະອຽດດັ່ງລຸ່ມນີ້:
  • ນະຄອນຫຼວງວຽງຈັນ109ຄົນ (ສູນຫຼັກ27)
  • ຈຳປາສັກ47ຄົນ
  • ສາລະວັນ04 ຄົນ
  • ສະຫວັນນະເຂດ28ຄົນ
  • ຄຳມ່ວນ 01ຄົນ
    • ຜົນກວດທັງໝົດ195ຄົນ ຂອງມື້ວານນີ້ບໍ່ພົບເຊື້ອໃໝ່. ໝາຍຄວາມວ່າໃນວັນທີ 04ພຶດສະພາ 2020 ບໍ່ມີກໍລະນີໃໝ່.
    • ນັບແຕ່ເດືອນມັງກອນ ຮອດ ວັນທີ 04 ພຶດສະພາ2020 ໄດ້ເກັບຕົວຢ່າງມາກວດທັງ
    ໝົດມີ2,418ຕົວຢ່າງ,ກວດພົບເຊື້ອສະສົມ19ຄົນ(23 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ).
  1. ການຕິດຕາມຜູ້ເດີນທາງມາຈາກຕ່າງປະເທດໂດຍສະເພາະແຮງງານລາວຢູ່ສະຖານທີ່ຈຳກັດບໍລິເວນຕ່າງໆຂອງແຂວງ
    • ມາຮອດວັນທີ 04ພຶດສະພາ 2020 ທົ່ວປະເທດ ຍັງມີສູນຈໍາກັດບໍລິເວນ ທັງໝົດ93ສູນ, ມີຜູ້ຈຳກັດບໍລິເວນຢູ່ສູນ566ຄົນ,ເກັບຕົວຢ່າງມາກວດວິເຄາະຫາເຊື້ອ 934 ຄົນ. ທັງໝົດບໍ່ພົບເຊື້ອ.ຮອດມື້ນີ້ ຜູ້ຈຳກັດບໍລິເວນຢູ່ເຮືອນແມ່ນຄົບກຳນົດແລ້ວ. ຜູ້ທີ່ເດີນທາງເຂົ້າມາ ສປປ ລາວ ເລິ່ມແຕ່ວັນທີ 20 ເມສາ 2020 ເປັນຕົ້ນມາ ແມ່ນໄດ້ຈຳກັດບໍລິເວນຢູ່ສູນ ຫຼື ໂຮງແຮມຕາມທີ່ໄດ້ກຳນົດໄວ້ໃນແຈ້ງການເລກທີ 507/ຫສນຍ ຊຶ່ງບໍ່ອະນຸຍາດໃຫ້ຈຳກັດບໍລິເວນຢູ່ເຮືອນ ເພື່ອຮັບປະກັນການປະຕິບັດມາດຕະການປ້ອງກັນການແຜ່ເຊື້ອ ແລະ ມີຄວາມສະດວກໃນການຕິດຕາມກວດກາສຸຂະພາບແຕ່ລະວັນ ແລະ ການລາຍງານຕໍ່ຄະນະສະເພາະກິດ.
  2. ການຕິດຕາມປີ່ນປົວຄົນເຈັບຢູ່ໂຮງໝໍ
  • ປະຈຸບັນມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍມິດຕະພາບ09 ຄົນທັງໝົດເຫັນວ່າ ມີອາການເບົາບາງແລະຍັງຕິດຕາມເພື່ອກວດວິເຄາະຢັ້ງຢືນການບໍ່ພົບເຊື້ອ;
  • ໄດ້ຮັບເອົາຜູ້ທີ່ອອກໂຮງໝໍນ້ຳເບີ 14 ກັບເຂົ້າມາຕິດຕາມອາການຢູ່ໂຮງໝໍ, ແຕ່ວ່າໄດ້ແຍກໄວ້ຢູ່ຕຶກແຍກປ່ຽວໜຶ່ງຕ່າງຫາກ ບໍ່ໄດ້ໄປປົນກັບຜູ້ຕິດເຊື້ອ 9 ຄົນທີ່ກຳລັງປິ່ນປົວຢູ່ນັ້ນ, ໝາຍວ່າປະຈຸບັນນີ້ມີຜູ້ຕິດຕາມຢູ່ໂຮງໝໍມິດຕະພາບ 10 ຄົນ.
  1. ການຕິດຕາມສະພາບການລະບາດຂອງປະເທດໃກ້ຄຽງແລະ ການລະບາດຢູ່ໃນໂລກ ເຫັນວ່າ:
    • ມາຮອດເວລາ 6:00 ໂມງເຊົ້າ ຂອງວັນທີ 05ພຶດສະພາ 2020, ທົ່ວໂລກມີການລາຍງານການລະບາດ ທັງໝົດ 212 (ປະເທດ/ເຂດ)
    -ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ3,639,512 (75,823 ໃໝ່);
    -ເສຍຊິວິດ251,708 (3,562ໃໝ່) ກວມເອົາ 6.91% ຂອງຜູ້ຕິດເຊື້ອທັງໝົດ;
    -ປີ່ນປົວຫາຍດີ1,190,967(37,974 ໃໝ່)ກວມເອົາ 32.7% ຂອງຜູ້ຕິດເຊື້ອທັງ
    ໝົດ;
    -ມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 22,145ຄົນ ແລະ ເສຍຊີວິດ894 ຄົນ
    ຕໍ່ມື້;
  • ອັດຕາຄວາມຮ້າຍແຮງຂອງມື້ນີ້ແມ່ນ 6.91% (ມື້ວານນີ້ 6.96%).
    • ສະເພາະກຸ່ມປະເທດອາຊຽນກໍ່ເຫັນວ່າຍັງມີບາງປະເທດທີ່ມີອັດຕາການຕິດເຊື້ອ ແລະ ເສຍຊີວິດສູງຢູ່ ມີບາງປະເທດຕິດເຊື້ອໃໝ່ ໃນວັນທີ 04ພຶດສະພາ 2020 ນີ້ ເຖິງ 573ຄົນ ແລະ ເສຍຊີວິດໃນມື້ດຽວຢູ່ກຸ່ມປະເທດອາຊຽນເຖິງ35ຄົນ.
  1. ຂໍ້ແນະນຳ
    ບັນດາທ່ານທີ່ນັບຖື ແລະ ຮັກແພງ,
    • ສປປ ລາວ ບໍ່ພົບຜູ້ຕິດເຊື້ອໃໝ່23 ມື້ແລ້ວ (ເລິ່ມແຕ່ວັນທີ 12 ເມສາ 2020 ເປັນຕົ້ນມາ). ໃນຈໍານວນຜູ້ຕິດເຊື້ອສະສົມ 19 ຄົນ ກໍ່ໄດ້ອອກໂຮງໝໍແລ້ວ 10 ຄົນແລະຍັງເຫຼືອ 09 ຄົນທີ່ຈະໄດ້ສືບຕໍ່ຕິດຕາມປິ່ນປົວຕາມອາການຢ່າງໃກ້ຊິດ ໃນນີ້ໄດ້ຮັບຄົນເຈັບເກົ່າເຂົ້າມາຕິດຕາມອາການ 01 ຄົນ, ລວມມີ 10 ຄົນຢູ່ໂຮງໝໍມິດຕະພາບ.ພວກເຮົາຈະໄດ້ເອົາໃຈໃສ່ເຝົ້າລະວັງຜູ້ທີ່ຈະເດີນທາງເຂົ້າມາໃໝ່ຢ່າງເຂັ້ມງວດເພື່ອບໍ່ໃຫ້ນຳເຊື້ອເຂົ້າມາປະເທດເຮົາອີກ. ຜູ້ທີ່ຍັງມີຜົນກວດບວກ ກໍ່ໄດ້ຕິດຕາມຢູ່ໂຮງໝໍທັງໝົດ ເພື່ອບໍ່ໃຫ້ມີຄວາມສ່ຽງທີ່ຈະແຜ່ກະຈາຍເຊື້ອອອກໄປຕິດໃສ່ຜູ້ອື່ນ.
    • ຄືບັນດາທ່ານໄດ້ຮັບຮູ້ຂໍ້ມູນຂ່າວສານຈາກສື່ຕ່າງໆນັ້ນ ການລະບາດຂອງພະຍາດ COVID-19 ໃນໂລກນີ້ ຍັງສືບຕໍ່ມີການລະບາດ ແລະ ມີຜູ້ເສຍຊີວິດແຕ່ລະວັນ. ເຖິງວ່າ ສະພາບການລະບາດຢູ່ປະເທດເຮົາຈະຜ່ອນຄາຍລົງກໍ່ຕາມ ແຕ່ພວກເຮົາກໍ່ບໍ່ໄດ້ປະໝາດແລະຍັງມີການເຝົ້າລະວັງຢ່າງໃກ້ຊິດເພື່ອສະກັດກັ້ນບໍ່ໃຫ້ມີການລະບາດຄືນຄັ້ງທີ2.ເລິ່ມແຕ່ມື້ວານນີ້ ວັນທີ 4 ພຶດສະພາ ຈົນເຖິງ ວັນທີ 17 ພຶດສະພາ ກໍ່ໄດ້ມີມາດຕະການຜ່ອນຜັນບາງຢ່າງຕາມແຈ້ງການຂອງຫ້ອງວ່າການສຳນັກງານນາຍົກລັດຖະ
    ມົນຕີເລກທີ 524/ຫສນຍ ລົງວັນທີ 1 ພຶດສະພາ 2020 ເຊິ່ງມີ 8 ມາດຕະການຜ່ອນຜັນ, 5 ມາດຕະການສືບຕໍ່ຫ້າມ ແລະ ມີຄໍາແນະນໍາເພິ່ມເຕີມຂອງຂະແໜງ
    ການອອກຫຼາຍສະບັບ ເປັນຕົ້ນແມ່ນ ການຈຳກັດບໍລິເວນຜູ້ເດີນທາງເຂົ້າມາ ສປປ ລາວ, ການເປີດບໍລິການຮ້ານອາຫານ, ການເດີນທາງໄປຕ່າງແຂວງ, ການກະກຽມເປີດໂຮງຮຽນ ແລະ ອື່ນໆ.
    • ສະນັ້ນ, ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ ເອົາໃຈໃສ່ສືກສາແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ແລະ ຄຳແນະນຳຂອງຂະແໜງການຕ່າງໆໃຫ້ມີຄວາມເຂົ້າໃຈ,ຮ່ວມແຮງຮ່ວມໃຈກັນຈັດຕັ້ງປະຕິບັດໃຫ້ຖືກຕ້ອງ ແລະ ເຂັ້ມງວດ.
    • ຖ້າວ່າບັນດາທ່ານ ຫຼື ຄົນໃນຄອບຄົວຂອງທ່ານ ຫາກມີອາການໄຂ້, ໄອ, ເຈັບຫົວ, ເຈັບທ້ອງ ຫຼື ມີອາການອື່ນໆ ກໍ່ຂໍໃຫ້ບັນດາທ່ານ ເຂົ້າໄປພົບແພດຢູ່ໂຮງໝໍ ເພື່ອຈະໄດ້ຄັດແຍກ ວ່າມີອາການສົງໃສ ກ່ຽວກັບພະຍາດ COVID-19 ຫຼືບໍ່ ພ້ອມທັງຈະໄດ້ເກັບຕົວຢ່າງໄປກວດວິເຄາະຊອກຫາເຊື້ອ ຫຼືວ່າ ບັນດາທ່ານທີ່ມີພະຍາດອື່ນກໍ່ຈະໄດ້ຄັດແຍກໄປບ່ອນໜຶ່ງສະເພາະ ເພື່ອທຳການປິ່ນປົວຢ່າງທັນການ.
    • ບັນດາທ່ານໄດ້ຮັບຊາບຂໍ້ມູນຂ່າວສານ ກ່ຽວກັບສະພາບການລະບາດຂອງພະຍາດ
    COVID-19 ແລະ ການຕິດຕາມປີ່ນປົວຜູ້ຕິດເຊື້ອຢູ່ໂຮງໝໍໄປແລ້ວ.
    ມື້ນີ້ ວັນທີ 5 ພຶດສະພາ 2020 ເຊິ່ງກົງກັບວັນລ້າງມືສາກົນ ທີ່ອົງການອະນາໄມໂລກ ໄດ້ກຳນົດໃຫ້ມີການສະເຫຼີມສະຫຼອງແຕ່ ປີ 2009 ເປັນຕົ້ນມາ.
    ທຸກໆປີໄດ້ມີການຈັດຕັ້ງພິທີເຜີຍແຜ່ ແລະ ເຊີນເອົາບຸກຄົນສຳຄັນມາສາທິດເປັນຕົວແບບໃນການລ້າງມືໃຫ້ຖືກວິທີ. ປີນີ້ໄດ້ຕັ້ງຄໍາຂວັນວ່າ “ຊີວິດປອດໄພ ໃສ່ໃຈລ້າງມືເລື້ອຍໆ”ເຊິ່ງມີຄວາມສອດຄ່ອງ ແລະ ເປັນຂອດສໍາຄັນທີ່ສຸດໃນການຕັດຕ່ອງໂສ້ ການແຜ່ລະບາດຂອງພະຍາດ COVID-19 ທີ່ພວກເຮົາພ້ອມກັບປະຊາຊາດທົ່ວໂລກ ກໍາລັງໂຄສະນາ, ປຸກລະດົມ, ຂົນຂວາຍ ໃຫ້ມວນມະນຸດທົ່ວໂລກ ປະຕິບັດຢ່າງແຂງແຮງ ເພື່ອໂຕ້ຕອບ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19ໃຫ້ຜ່ອນຄາຍລົງ.
    • ດັ່ງທີ່ພວກເຮົາຮູ້ກັນດີແລ້ວວ່າ ການລ້າງມືດ້ວຍນ້ຳສະອາດໃສ່ສະບູ ແມ່ນວິທີທີ່ດີທີ່ສຸດ, ປະຫຍັດທີ່ສຸດ ໃນການປ້ອງກັນການຕິດເຊື້ອພະຍາດທາງລະບົບຫາຍໃຈ ແລະ ທາງລະບົບລະລາຍ. ຈາກການຄົ້ນຄວ້າທາງດ້ານວິທະຍາສາດຢັ້ງຢືນວ່າພຽງແຕ່ເຮົາລ້າງມືໃຫ້ສະອາດຢູ່ເລື້ອຍໆກໍ່ສາມາດປ້ອງກັນການເຈັບເປັນໄດ້ແລ້ວ 50%. ໃນສະໄໝກ່ອນພະຍາບານ ແລະ ຜະດຸງຄັນ ໄດ້ນຳໃຊ້ວິທີການລ້າງມືກ່ອນການຊ່ວຍເກີດລູກ ຈຶ່ງສາມາດຫຼຸດຜ່ອນອັດຕາການເສຍຊີວິດຂອງແມ່ມານ ແລະ ເດັກເກີດໃໝ່.
    • ຈາກບົດຮຽນຕົວຈິງທີ່ພວກເຮົາຖອດຖອນໄດ້ ໃນການໂຕ້ຕອບ ການລະບາດຂອງພະຍາດ COVID-19 ທີ່ກໍາລັງລະບາດຢູ່ໃນທົ່ວໂລກນີ້, ການລ້າງມືເລື້ອຍໆ ແມ່ນມາດຕະການສຳຄັນອັນໜຶ່ງ ຫຼັງຈາກເຮົາໄດ້ຈັບບາຍກັບສິ່ງຂອງຕ່າງໆ ກ່ອນທີ່ເຮົາຈະມາສຳຜັດກັບໃບໜ້າ ແລະ ຮ່າງກາຍຂອງເຮົາເອງ ເພື່ອຕັດຕ່ອງໂສ້ການຕິດເຊື້ອພະຍາດ ແລະ ຈຳກັດການລະບາດຂອງພະຍາດ COVID-19.
    • ການລ້າງມືຈະຕ້ອງປະຕິບັດໃຫ້ຖືກເວລາ ແລະ ຖືກວິທີ ເຊັ່ນວ່າ: ລ້າງມືທຸກຄັ້ງຫຼັງຈາກໄອ-ຈາມ ຫຼື ສຳພັດສິ່ງເປີເປື້ອນ, ຫຼັງຈາກຈັບບາຍຄົນເຈັບ, ກ່ອນ-ໄລຍະ ແລະ ຫຼັງປຸງອາຫານ, ກ່ອນກິນເຂົ້າ, ຫຼັງໃຊ້ຫ້ອງນ້ຳ, ເວລາແນມເຫັນມືເປື້ອນ ຫຼັງຈາກຈັບບາຍສັດແລະ ວັດຖຸສິ່ງຂອງ.
    • ລ້າງມືຖືກວິທີແມ່ນ ລ້າງມືດ້ວຍສະບູ ແລະ ນ້ຳສະອາດ ເຊິ່ງປະກອບດ້ວຍ 7 ຂັ້ນຕອນ (ຝາມື, ຫຼັງມື, ງ່າມມື, ນິ້ວມືແຕ່ລະນິ້ວ, ນິ້ວໂປ້, ເລັບມື ແລະ ຂໍ້ມື) ຫຼື ລ້າງດ້ວຍເຈລ ຫຼື ເຫຼົ້າ 70% ຂຶ້ນໄປ.
    • ໂອກາດວັນລ້າງມືສາກົນ ວັນທີ 5 ພຶດສະພາ 2020 ນີ້, ຈຶ່ງຂໍເຊີນຊວນ ບັນດາທ່ານ, ພະນັກງານ, ທະຫານ, ຕຳຫຼວດ, ພໍ່ຄ້າຊາວຂາຍ, ພໍ່ແມ່ປະຊາຊົນບັນດາເຜົ່າທຸກຊັ້ນຄົນ, ທຸກເພດໄວ ຈົ່ງຮ່ວມແຮງຮ່ວມໃຈກັນລ້າງມືຂອງຕົນເອງເລື້ອຍໆກາຍເປັນວິຖີຊີວິດໃໝ່, ຄວາມຊິນເຄີຍໃໝ່ໃນການດໍາລົງຊີວິດເພື່ອປ້ອງກັນການຕິດເຊື້ອ ໂດຍການລ້າງມື, ມືປອດໄພ, ຊີວິດປອດໄພ (infection prevention, hand hygiene, save hands, save lives).
    • ຂໍອວຍພອນໃຫ້ບັນດາທ່ານ ຈົ່ງມີສຸຂະພາບແຂງແຮງ ປາສະຈາກໂຣກໄພໄຂ້ເຈັບຈົ່ງຮ່ວມແຮງຮ່ວມໃຈກັນປະຕິບັດແຈ້ງການ ແລະ ຄຳແນະນຳຂອງຄະນະສະເພາະກິດ ເພື່ອຜ່ານຜ່າວິກິດພະຍາດ COVID-19 ນີ້ໄປພ້ອມກັນ.