ໃນວັນທີ 8 ພຶດສະພາ 2020 ທີ່ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ບໍລິສັດ ເອັສທີເອັສ ຂາອອກ-ຂາເຂົ້າ ຈຳກັດຜູ້ດຽວ ໄດ້ນຳເອົາອຸປະກອນການແພດ ປະເພດຜ້າອັດປາກ-ດັງ ຈຳນວນ 10 ພັນອັນ ແລະ ໜ້າກາກພາລາຊະຕິກໃສ 60 ພັນອັນ ລວມມູນຄ່າ 30 ກວ່າລ້ານກີບ ມອບໃຫ້ກະຊວງ ຖວທ ເພື່ອນຳໄປແຈກຢາຍໃຫ້ບັນດາກົມກອງ, ສື່ ແລະ ໂຮງຮຽນຕ່າງໆທີ່ຂຶ້ນກັບກະຊວງ ຖວທ ເພື່ອນຳໃຊ້ເຂົ້າໃນການປ້ອງກັນ ພະຍາດໂຄວິດ-19 ທີ່ກໍາລັງລະບາດຢູ່ໃນທົ່ວໂລກ. ຕາງໜ້າມອບເຄື່ອງໃນຄັ້ງນີ້, ໂດຍ ທ່ານ ຈັ່ນເຫວີຍ (Zan Wei) ຜູ້ຈັດການຂອງບໍລິສັດ ເອັສທີເອັສ ຈຳ ກັດຜູ້ດຽວ ແລະ ຕາງໜ້າຮັບໂດຍ ທ່ານ ກິແກ້ວ ໄຂຄຳພິທູນ ລັດຖະມົນຕີ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ.

ໃນໂອກາດດັ່ງກ່າວ, ທ່ານລັດຖະມົນຕີ ກໍໄດ້ກ່າວສະແດງຄວາມຂອບໃຈ ຕໍ່ບໍລິສັດດັ່ງກ່າວທີ່ໄດ້ນຳເອົາອຸປະກອນການແພດ ມາປະກອບສ່ວນຊ່ວຍເຫລືອໃຫ້ແກ່ກະຊວງ ຖວທ ຊຶ່ງສະແດງໃຫ້ເຫັນເຖິງຄວາມມີນ້ຳໃຈຂອງຄູຮ່ວມສະຕາກຳຂອງສອງປະເທດ ລາວ-ຈີນ ພ້ອມກັນນີ້ ຍັງສະແດງເຖິງຄວາມເປັນຫ່ວງເປັນໃຍ ຕໍ່ພະນັກງານ-ລັດຖະກອນຂອງພວກເຮົາ, ຊຸກຍູ້ໃຫ້ພະນັກງານ-ລັດຖະກອນ ມີກຳລັງໃຈໃນການຕໍ່ຕ້ານພະຍາດໂຄວິດ-19.
ໃນໄລຍະຜ່ານມາ ບໍລິສັດ ເອັສທີເອັສ ໄດ້ປະກອບສ່ວນເປັນຜ້າອັດປາກ-ດັງ, ເຄື່ອງວັດອຸນຫະ ພູມ ແລະ ເຈວລ້າງມື ໃຫ້ແກ່ກະຊວງຂອງພວກເຮົາ, ເຊິ່ງເຄື່ອງຊ່ວຍເຫລືອຈຳນວນດັ່ງກ່າວ ກໍໄດ້ນຳໄປແຈກຢາຍໃຫ້ແກ່ບັນດາກົມກອງ, ສື່, ແຂວງ ແລະ ໂຮງຮຽນຕ່າງໆ ທີ່ຂຶ້ນກັບກະຊວງ ຖວທ ໃນທົ່ວປະ ເທດ. ສຳລັບເຄື່ອງຊ່ວຍເຫລືອໃນມື້ນີ້, ສັນຍາວ່າຈະນຳໃຊ້ເຄື່ອງດັ່ງກ່າວ ໃຫ້ເກີດປະໂຫຍດສູງສຸດ.