ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ຖະແຫຼງຂ່າວປະຈໍາວັນທີ09ພຶດສະພາ ປີ2020 ໂດຍ: ທ່ານ ຮສ ດຣ. ພູທອນ ເມືອງປາກຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ.

ສະພາບການເຝົ້າລະວັງ COVID-19 ຢູ່ ສປປ ລາວຮອດ 5 ໂມງແລງ ຂອງວັນທີ 08 ພຶດສະພາ 2020 ຕາມຈຸດຜ່ານດ່ານຕ່າງໆ ມີຈໍານວນຜູ້ເດີນທາງເຂົ້າມາທັງໝົດ 1,884 ຄົນ ມີຄື:

  • ຈຸດຜ່ານດ່ານລາວ-ໄທ ທັງໝົດ 1,112 ຄົນ, ໃນນັ້ນມີແຮງງານລາວກັບມາຈາກປະເທດໄທຜ່ານດ່ານຊ່ອງເມັກ ແຂວງຈຳປາສັກ 13 ຄົນ, ຜ່ານດ່ານຂົວມິິດຕະພາບ II ຈຳນວນ 01 ຄົນ, ເຫຼືອນັ້ນແມ່ນຜູ້ຂັບລົດຂົນສົ່ງສິນຄ້າ
  • ຈຸດຜ່ານດ່ານລາວ-ຈີນ ທັງໝົດ 05 ຄົນ,​ທັງໝົດ ແມ່ນຜູ້ຂັບລົດຂົນສົ່ງສິນຄ້າ
  • ຈຸດຜ່ານດ່ານລາວ-ຫວຽດ ທັງໝົດ 767 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ
  • ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 00 ຄົນ
  • ໃນທຸກດ່ານແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້

ສຳລັບແຮງງານລາວຈຳນວນ 13 ຄົນ ທີ່ເຂົ້າມາໃໝ່ຜ່ານດ່ານຊ່ອງເມັກແຂວງຈຳປາສັກນັ້ນແມ່ນມີຖິ່ນຖານມາຈາກ: ແຂວງຈຳປາສັກ 11 ຄົນ ແລະ ແຂວງສາລະວັນ 02 ຄົນ, ສ່ວນແຮງງານລາວຈຳນວນ 01 ຄົນ ທີ່ເຂົ້າມາໃໝ່ຜ່ານດ່ານຂົວມິິດຕະພາບ II ນັ້ນແມ່ນມີຖິ່ນຖານມາຈາກແຂວງສະຫວັນນະເຂດ, ສຳລັບແຮງງານທັງໝົດໄດ້ເກັບຕົວຢ່າງມາກວດ ແລະ ນຳສົ່ງໄປຈຳກັດບໍລິເວນຢູ່ສູນຂອງແຂວງຈົນຄົບກຳນົດ 14 ວັນ.

ການເຝົ້າລະວັງ ແລະ ວິເຄາະ ມາຮອດວັນທີ 08 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 175 ຄົນ,ໃນນັ້ນມີກໍລະນີສົງໄສ 14 ຄົນ, ຜູ້ຕິດເຊື້ອທີ່ອອກໂຮງໝໍມິດຕະພາບ 03 ຄົນແລ້ວກັບມາກວດຄືນ, ຜູ້ທີ່ນອນປິ່ນປົວຕິດຕາມອາການຢູ່ໂຮງໝໍມິດຕະພາບ 06 ຄົນ ແລະແຮງງານລາວທີ່ກັບມາຈາກປະເທດໄທ 152 ຄົນ ບໍ່ມີຜູ້ຕິດເຊື້ອ.

ການຕິດຕາມປີ່ນປົວຄົນເຈັບຢູ່ໂຮງໝໍ ຜູ້ນອນຕິດຕາມຢູ່ໂຮງໝໍມິດຕະພາບ 10 ຄົນລວມທັງນ້ຳເບີ 14 ທີ່ເອົາກັບຄືນມານອນຕິດຕາມອາການຢູ່ໂຮງໝໍຄືນ, ທັງໝົດເຫັນວ່າມີອາການເບົາບາງ, ໄດ້ເກັບຕົວຢ່າງມາກວດຄືນ 2 ຄັ້ງຕິດຕໍ່ກັນ ພົບວ່າມີຜົນລົບ 4 ຄົນ (ນ້ຳເບີ 03, 06, 09 ແລະ 19) ເຊິ່ງຈະໄດ້ອອກໂຮງໝໍໄປຈໍາກັດບໍລິເວນຢູ່ເຮືອນອີກ 14 ວັນ ໝາຍວ່າຍັງມີຜູ້ທີ່ຈະສືບຕໍ່ຕິດຕາມຢູ່ໂຮງໝໍ 6 ຄົນ.

ສຳລັບຜູ້ຕິດເຊື້ອທີ່ອອກໂຮງໝໍພາຍຫຼັງຕິດຕາມຄົບກຳນົດ 14 ວັນແລ້ວກັບມາກວດຄືນ 03 ຄົນເຊິ່ງແມ່ນນ້ຳເບີ 01 (ພະນັກງານຄຣາວພລາຊ່າ, ບ້ານຈັນສະຫວ່າງ, ເມືອງສີໂຄດຕະບອງ), ເບີ 11 (ພະນັກງານພູເບ້ຍມາຍນິ້ງ, ສັນຊາດ ປາປົວນິວກີເນຍ)ແລະເບີ 15 (ບ້ານຈອມມະນີ, ເມືອງໄຊເສດຖາ). ຜົນກວດວິເຄາະແມ່ນລົບ ສະນັ້ນ, ເຂົາເຈົ້າຈະໄດ້ກັບຄືນໄປປະຕິບັດໜ້າທີ່ວຽກງານຕາມເດີມ ແຕ່ກໍ່ຈະຕ້ອງໄດ້ປະຕິບັດມາດຕະການປ້ອງກັນການຕິດເຊື້ອຄືກັນກັບຄົນທົ່ວໄປ.

Medialaos MMD