ວັນທີ່ 29 ສີງຫາ 2019 ນີ້ ນະຄອນ ຫຼວງພະບາງ ໄດ້ຈັດບຸນຊ່ວງເຮືອປະເພນີປະຈຳປີ 2019 ໃຫ້ກຽດເຂົ້າຊົມ ມີ ທ່ານ ອາຊາງ ລາວລີ, ທ່ານ ສົມສະຫວາດ ເລັ່ງສະຫັວດ ທີ່ປຶກສາຄະນະບໍລິຫານງານສູນກາງພັກ, ພ້ອມດ້ວຍການນຳຂັ້ນແຂວງ, ຂັ້ນນະຄອນ-ເມືອງ, ມວນຊົນທັງພາຍໃນ ແລະຕ່າງປະເທດ ຕາມແຄມຟັ່ງນ້ຳຄານ. ພິທີ ເລີ້ມແຕ່ຕອນເຊົ້າໄດ້ເຕົ້າໂຮມການນໍາພັກ-ລັດ ຊາວພຸດທະສາສະນິກະຊົນ, ແຂກທັງພາຍໃນ ແລະຕ່າງປະເທດ, ຕະຫຼອດຮອດປະຊາຊົນບັນດາເຜົ່າທຸກຖ້ວນໜ້າ ພ້ອມກັນໃສ່ບາດຢາດນ້ຳ ແລະ ປະກອບພິທີທາງສາສະໜາ

ຈາກນັ້ນ ໄດ້ມີການເຕົ້າໂຮມບັນດາເຮືອຊ່ວງທີ່ເຂົ້າແຂ່ງຂັນ ຢູ່ນ້ຳຄານ ເພື່ອດຳເນີນການແຂ່ງຂັນຢ່າງເປັນທາງການ, ທ່ານ ຈັນສຸກ ພັນໂດລັກ ເຈົ້ານະຄອນ ຫຼວງພະບາງ ກ່າວເປີດພິທີຢ່າງເປັນທາງການວ່າ: ເປັນປະຈຳທຸກປີ ພໍຮອດມື້ແຮມ 14 ຄໍ່າເດືອນ 9 ທີ່ຊາວຫຼວງພະບາງ ເມືອງມໍລະດົກໂລກ ໄດ້ຈັດໃຫ້ມີການຊ່ວງເຮືອປະເພນີ ເນື່ອງໃນໂອກາດບຸນຫໍ່ເຂົ້າປະດັບດີນ, ອັນເປັນປາງບຸນໜື່ງ ທີ່ໄດ້ ສືບທອດກັນມາແຕ່ດືກດຳບັນ ແລະຍັງຄົງຮັກສາໄດ້ຮີດຄອງປະເພນີ ທີ່ເປັນເອກະລັກອັນດັ່ງເດີມ ພິເສດປີນີ້ ໄດ້ຈັດໃຫ້ເປັນກິດຈະກຳສົ່ງເສີມການທ່ອງທ່ຽວລາວ-ຈີນ ເນື່ອງໃນໂອກາດ ປີທ່ອງທ່ຽວລາວ-ຈີນ 2019.
ບຸນຊ່ວງເຮືອໃນປີນີ້ ຄະນະພັກ-ອົງການປົກຄອງນະຄອນ ຫລວງພະບາງ ໄດ້ເສີມຂະຫຍາຍໃຫ້ກ້ວາງຂວາງ ໂດຍໄດ້ອານຸຍາດໃຫ້ເຮືອຊ່ວງຈາກທ້ອງຖີ່ນອື່ນ ເຂົ້າຮ່ວມມາແຂ່ງຂັນ ແຕ່ຕ້ອງປະຕິບັດຕາມ ກົດລະບຽບການ ທີ່ຄະນະກຳມະການຈັດການແຂ່ງຂັນວາງໄວ້ ໃນນັ້ນ ມີເຮືອຊ່ວງຈາກບັນດາບ້ານພາຍໃນນະຄອນ ຫຼວງພະບາງ, ຕາງໜ້າຈາກເມືອງອ້ອມຂ້າງ, ພິເສດແມ່ນມີເຮືອຊ່ວງຈາກນະຄອນຫຼວງວຽງຈັນ ແລະແຂວງໄຊຍະບູລີ ເຂົ້າຮ່ວມແຂ່ງຂັນທັງໝົດ 31 ລໍາ ໂດຍຈະແຂ່ງຂັນໃນຮູບແບບ ເສຍສອງຄັ້ງແລ້ວຂັດອອກ ພ້ອມທັງຈັດອັນດັບທີ່ ສ່ວນເຮືອທີ່ເສຍຄັ້ງໜື່ງ ແມ່ນສາມາດຊີງຂື້ນໄປເຖີງຮອບຊີງຊະນະເລີດ.
ຂ່າວ: ອາພຸດເດດ ບຸບຜາ
ພາບ: ເພັດສາຄອນ ສີມມະວົງ