ຢູ່ໃນຫ້ອງການຂອງທ່ານສີຈິ້ນຜິງປະທານປະເທດຈີນໄດ້ມີຮູບຖ່າຍຫຼາຍໃບຂອງທ່ານສີຈິ້ນຜິງກັບພໍ່ແມ່ ແລະຄອບຄົວ, ໃນນັ້ນມີຮູບຖ່າຍໃບໜຶ່ງທີ່ປະທັບໃຈຫຼາຍເຊິ່ງ ໄດ້ບັນທຶກກ່ຽວກັບທ່ານສີຈິ້ນຜິງຈັບມືແມ່ຂອງເພິ່ນໄປຍ່າງຫລີ້ນ.ການ​ອົບ​ຮົມ​ບົ່ມສອນດ້ວຍການປະພຶດ​ດີຂອງແມ່ ໄດ້ສົ່ງອິດທິພົນໃຫ້ກັບທ່ານສີຈິ້ນຜິງຕະຫຼອດຊີວິດ.

​ຈົນມາຮອດປັດຈຸບັນ,ທ່ານສີຈິ້ນຜິງຍັງຈື່​ບໍ່​ລື​ມວ່າ: ຕອນ​ທີ່​ຕົນ​ມີ​ອາ​ຍຸ 5-6ຂວບ,ແມ່ເຄີຍເຈ່ຍ​ຕົນໄປຊື້ປື້ມປະກອບຮູບແຕ້ມກ່ຽວກັບຢ້ວຍເຟີ່ຍຢູ່ຮ້ານຂາຍປື້ມຊິ່ນຮວາ. ແມ່ໄດ້ເລົ່າເລື່ອງໃຫ້ຟັງວ່າ: “ແມ່ຂອງຢ້ວຍ​ເຟີ່ຍໄດ້ເອົາ​ເຂັມ​ສັກຕົວໜັງສືໃສ່ຫຼັງຂອງຢ້ວຍເ​ຟີ່ຍ” ທີ່ຂຽນວ່າ “ຄວນຈົງຮັກພັດດີເພື່ອຕອບແທນບຸນຄຸນຂອງປະເທດຊາດ” ເຊິ່ງ​ສຳ​ນວນ​ນີ້​ປານ​ວ່າ​ໄດ້​ປູກ​ຝັງ​ແນວ​ພັນໃນໃຈຂອງທ່ານສີຈິ້ນຜິງ, ເຮັດໃຫ້ທ່ານຈື່ຈຳໄວ້ໃນໃຈຕະຫຼອດມາຈົນ ຮອດປັດຈຸບັນແລະກາຍເປັນເປົ້າໝາຍທີ່ສະແຫວງຫາໃນຕະຫຼອດຊີວິດຂອງທ່ານ.

ທ່ານສີຈິ້ນຜິງເຄີຍກ່າວວ່າ: “ຜູ້ເປັນພໍ່ແມ່ແລະ​ຜູ້​ປົກ​ຄອງຄວນ​ອົບ​ຮົມ​ບົ່ມສອນຄຸນສົມບັດອັນດີງາມໃຫ້ແກ່ລູກ, ​ສອນ​ໃຫ້ເຂົາເຈົ້າ​ປະ​ພຶດ​ຕົນ​ໃຫ້​ເປັນ​ຄົນ​ທີ່​ມີຄວາມເຂັ້ມແຂງ​ກ້າ​ຫານ​ແລະ​ຊື່​ສັດ​ສຸດ​ຈະ​ລິດ, ຊ່ວຍເຂົາເຈົ້າສ້າງຈິດໃຈທີ່ດີງາມ, ເຮັດໃຫ້ເຂົາເຈົ້າເຕີບໃຫຍ່ຢ່າງ​ປອດ​ໃສແລະກາຍເປັນຄົນທີ່ມີປະໂຫຍດຕໍ່ປະເທດຊາດແລະປະຊາຊົນ.”

ຄອບຄົວຂອງທ່ານສີຈິ້ນຜິງໄດ້ອົບຮົມບົ່ມສອນຄວາມຮັກທີ່ມີຕໍ່ຄອບຄົວແລະ ຈິດ​ໃຈ​ຮັກຊາດທັງໄດ້ສ້າງນິດໄສທີ່ເຂັ້ມແຂງ,ກ້າຫານແລະ​ຊື່​ສັດ​ສຸດ​ຈະ​ລິດໃຫ້ກັບທ່ານສີຈິ້ນຜິງ.

ພໍ່ແມ່ຂອງທ່ານສີຈິ້ນຜິງໄດ້ຍຶດໝັ້ນໃນແບບແຜນຄອບຄົວທີ່ເຂັ້ມງວດໃນການອົບຮົມສັ່ງສອນລູກເຕົ້າ,ຮັກສາມູນເຊື້ອທີ່ດຸໝັ່ນແລະປະຢັດມັດທະຍັດ.

ທ່ານນາງຊີຊິນ ຜູ້ເປັນແມ່ໄດ້ເປັນແບບຢ່າງດ້ວຍການປະຕິບັດຕົວຈິງໂດຍ ສົ່ງອິດທິພົນແລະອົບຮົມສັ່ງສອນລູກເຕົ້າດ້ວຍແບບແຜນຄອບຄົວທີ່ດີງາມ. ເພິ່ນໄດ້ເບິ່ງແຍງດູແລລູກໃຫ້ດີ,ທັງຕ້ອງປະຕິບັດບັດໜ້າທີ່ການງານຂອງຕົນໃຫ້ດີ, ບໍ່ວ່າຈະອິດເມື່ອລຳບາກປານໃດກໍຕາມ, ເພິ່ນລ້ວນແຕ່ໄດ້ຍຶດໝັ້ນໃນການ ຖືໜ້າທີ່ການງານເປັນສຳຄັນແລະບໍ່ໃຫ້ເລື່ອງຄອບຄົວກະທົບເຖິງວຽກງານ. ເມື່ອມີຄວາມຫຍຸ້ງຍາກກໍຈະຜ່ານຜ່າດ້ວຍຕົນເອງ. ເປັນເວລາດົນນານມາແລ້ວ, ທ່ານນາງຊີຊິນໄດ້ຍຶດໝັ້ນແບບແຜນວິທີດຳລົງຊີວິດທີ່ປະຢັດແລະລຽບງ່າຍ, ໂດຍບໍ່ໄດ້ໃຊ້ສິດພິເສດໃນນາມເປັນພັນລະຍາຂອງທ່ານສີຈົ້ງຊຸນ ຮອງນາຍົກລັດ ຖະມົນຕີຈີນໃນເວລານັ້ນ. ເວລາທີ່ລູກເຕົ້າກິນນອນກຢູ່ໂຮງຮຽນຫຼືຢູ່ໂຮງ ລ້ຽງເດັກ,ທ່ານນາງຊີຊິນບໍ່ໄດ້ຈ້າງແມ່ເຮືອນມາຊ່ວຍວຽກບ້ານການເມືອງ. ເພິ່ນ ບໍ່ເຄີຍຄິດຈັກເທື່ອທີ່ຈະສວຍໃຊ້ສິດຕຳແໜ່ງຂອງສາມີສັບຊ້ອນບ່ອນເຮັດວຽກທີ່ໃກ້ເຮືອນຕົນ.ເພິ່ນໄດ້ເຂົ້າຮ່ວມກິດຈະກຳການຕ່າງປະເທດໃນຖານະເປັນພັນລະຍາຮອງນາຍົກລັດຖະມົນຕີພຽງເທື່ອດຽວເທົ່ານັ້ນ.

ທ່ານສີຈິ້ນຜິງໄດ້ຮັບອິດທິພົນຈາກແບບແຜນຄອບຄົວທີ່ຊື່ສັດສຸດຈະລິດແລະປອງດອງກັນ,ເພິ່ນກໍໄດ້ປະພຶດຕົວຕາມແບບແຜນທີ່ປະຢັດມັດທະຍັດ,ລຽບງ່າຍແລະຕິດແທດຕົວຈິງ.

ທ່ານສີຈິ້ນຜິງໃຫ້ຄວາມສຳຄັນຕໍ່ຄອບຄົວກໍຄືຄວາມຮັກແພງລະຫວ່າງຄົນໃນຄອບຄົວ. ແຕ່ຍ້ອນເປັນພະນັກງານການນຳແລະມີວຽກຫຼາຍ,ສະນັ້ນຈິ່ງເປັນເລື່ອງ ປົກກະຕິທີ່ທ່ານບໍ່ສາມາດກັບໄປຢາມບ້ານໃນເວລາວັນບຸນສຳຄັນຕ່າງໆ.

ບຸນກຸດຈີນໃນປີ 2001 ທ່ານນາງຊີຊິນ ຜູ້​ເປັນ​ແມ່ໄດ້ໂທລະສັບລົມ ກັບທ່ານສີຈິ້ນຜິງທີ່ເປັນເຈົ້າແຂວງແຂວງຝູຈ້ຽນໃນເວລານັ້ນໂດຍໄດ້ຖາມຂ່າວແລະສັ່ງສອນລູກວ່າ:“ຂໍພຽງແຕ່ລູກເຮັດວຽກໃຫ້ດີກໍ່ຖືວ່າແມ່ນຄວາມກະ​ຕັນຍູຕໍ່ພໍ່ແມ່ ທີ່ດີທີ່ສຸດແລ້ວ, ນີ້ຄືຮັບຜິດຊອບຕໍ່ຄອບຄົວແລະຮັບຜິດຊອບ ຕໍ່ລູກເອງ, ທັງສອງຢ່າງນີ້ເປັນເອກະພາບກັນ.

“ຄອບຄົວ​ນ້ອຍ” ​ແລະ “ຄອບຄົວ​ໃຫຍ່” ມີ​ແຫຼ່ງກຳ​ເນີ​ດດຽວ​ກັນ. ຄວາມ​ເຂົ້າ​ໃຈ ​ແລະ ການສະໜັບສະໜູນ​ຂອງ​ແມ່​ແມ່ນ​ເຕັມ​ໄປ​ດ້ວຍ​ຄວາມ​ມຸ່ງ​ຫວັງ​ຢ່າງ​ຍິ່ງ​ໃຫ້​ມີ​ຈິດ​ໃຈ​ທີ່“ກ້າຮັບຜິດຊອບ” ​ແລະ “ປະຕິບັດ​ໜ້າ​ທີ່​ຢ່າງ​​ມີ​ຄວາມ​ຮັບ​ຜິດ​ຊອບ​ສູງ”.

​ໂດຍ​ຍຶດໝັ້ນ​ຈິດ​ໃຈ​ທີ່​ເຮັດ​ວຽກ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນ, ທ່ານ​ສີ​ຈິ້ນ​ຜິ​ງ​ໄດ້​ຖື​​ເອົາ​ຊີວິດ​ການ​ເປັນ​ຢູ່​ທີ່​ດີງາມຂອງປະຊາຊົນ​​ເປັນ​ພັນ​ເປັນ​ໝື່ນ​ຄອບຄົວ​ເປັນ​ເປົ້າ​ໝາຍ​ສູ້​ຊົນ​ຂອງ​ຕົນ.

“ທັດສະນະ​ການ​ປົກຄອງ​ຂອງ​ຂ້າພະ​ເຈົ້າ, ​ເວົ້າ​ໂດຍສັງເຂບແລ້ວ​ກໍ​​ແມ່ນ: ຮັບ​ໃຊ້​ປະຊາຊົນ, ​ແບກ​ຫາບ​ຄວາມ​ຮັບຜິດຊອບ​ຂອງ​ຕົນ.” ຫຼາຍ​ປີ​ມາ​ນີ້ບໍ່​ໄດ້​ມີການປ່ຽນ​ແປງ, ລົງ​ຮາກ​ຖານ​ຢ່າງ​ເລິກ​ເຊິ່ງ, ​ເຮັດ​ແທ້​ທຳ​ຈິງຢູ່​ຄຽງບ່າຄຽງໄຫລ່ກັບ​ປະຊາຊົນ, ທ່ານ​ສີ​ຈິ້ນ​ຜິ​ງ​ໄດ້​ຮັກສາ​ອຸດົມ​ການ​ແຕ່​ຫົວທີ​ທີ່ເຮັດ​ວຽກ​ເພື່ອ​ປະ​ຊາ​ຊົນ​ໂດຍ “ຮັກ​ປະຊາຊົນ​ຄື​ກັບ​ຮັກ​ພໍ່​ແມ່​ຂອງ​ຕົນ”.

ຄວາມ​ປອດ​ໃສ​ຂາວ​ສະອາດ​ແມ່ນ​ກຳລັງ​ນາມ​ມະ​ທຳ, ທັງ​ແມ່ນ​ຜົນ​ຕອບ​ແທນ​ທີ່​ດີ​ທີ່​ສຸດ​ໃຫ້​ແກ່​ຄອບຄົວ.ໃນ​​ແຕ່​ລະບາດ​ກ້າວເດີນຂອງ​ທ່ານ​ສີ​ຈິ້ນ​ຜິ​ງ, ທ່ານ​ນາງ​ຊີ​​ຊິນຈະ​​ໃຫ້​ກຳລັງ​ໃຈ ​ແລະຄຳ​ສັ່ງສອນ​ຢ່າງ​ທັນ​ການ.

ມີ​ເທື່ອ​ໜຶ່ງ, ຢູ່​ຕໍ່ໜ້າ​ລູກ​ຊາຍ​ ​ແລະລູກ​ສາວ, ທ່ານ​ນາງຊີ​ຊິນໄດ້ສັ່ງສອນ​ວ່າ: “ບໍ່​ຄວນ​ໃຫ້​ເລື່ອງ​ນ້ອຍ​ໃນ​ຄອບຄົວໄປກະທົບ​ເຖິງ​ໜ້າ​ວຽກ.​”ທ່ານ​ສີ​ຈົ້ງ​ຊຸ່ນໄດ້ຟັງ​ແລ້ວ​ກໍ​ໄດ້​ເວົ້າ​ຢ່າງ​ເຄັ່ງ​ຄັດ​ວ່າ: “​ເລື່ອງ​ໃຫຍ່​ກໍ​ບໍ່​ໃຫ້​ກະທົບ​ເຖິງ​ໜ້າ​ວຽກ​ເຊັ່ນ​ກັນ.”

​ ໃນ​ເວລາ​ທີ່​ທ່ານ​ສີ​ຈິ້ນ​ຜິ​ງດຳລົງ​ຕຳ​ແໜ່​ງເປັນ​ເຈົ້າ​ແຂວງ​ແຂວງ​ຝູ​ຈ້ຽນ, ທ່ານ​ນາງ​ຊີ​ຊິນ​ໄດ້​ຂຽນ​ຈົດໝາຍ​​ໄປເຖິງທ່ານ​ສີ​ຈິ້ນ​ຜິ​ງຕາມ​ແບບແຜນຂອງ​ຄອບຄົວ, ​ເພິ່ນ​ຂຽນ​ດ້ວຍ​ຄວາມໜັກ​ແໜ້ນວ່າ: “ຢູ່​ບ່ອນ​ສູງຈະ​ຮູ້ສຶກ​ທົນ​ຄວາມໜາວ​ພີລຶກ​ໄດ້​ຍາກ”, ​ໂດຍ​ໄດ້ສັ່ງສອນ​ໃຫ້​ທ່ານ​ສີ​ຈິ້ນຜິ​ງ​ຕ້ອງປະພຶດ​ຕົວຢ່າງ​ເຂັ້ມ​ງວດກວ່າ​ເກົ່າ.

“ຄົນ​ຄົນ​ໜຶ່ງ​ຫາກ​ບໍ່​ສາ​ມາດ​ເຂັ້ມ​ງວດ​ຕໍ່​ຕົນ​ເອງ​ແລະ​ຂາດ​ຄວາມ​ປອດ​ໃສ​ຂາວ​ສະ​ອາດ​ກໍ​ຈະ​ເປັນ​ຄົນ​ທີ່​ໄຮ້​ຄວາມ​ຊື່​ສັດ​ສຸດ​ຈະ​ລິດ. ຕ້ອງ​ຈື່​ຈຳ​ເຫດ​ຜົນ​ທີ່​ວ່າ: ຄວາມ​ປອດ​ໃສ​ຂາວ​ສະ​ອາດ​ເປັນ​ສິ່ງ​ທີ່​ມີ​ໂຊກ, ຄວາມ​ຕັນ​ຫາ​ໂລ​ພາ​ເປັນ​ພິດໄພ, ການສ້າງ​ໃຫ້​ມີ​ທັດ​ສະ​ນະ​ອັນ​ຖືກ​ຕ້ອງ​ກ່ຽວ​ກັບ​ສິດ​ອຳ​ນາດ,ຖາ​ນະ​, ຜົນ​ປະ​ໂຫຍດ. ເວ​ລາ​ໃດ​ກໍ​ຕ້ອງ​ມີ​ຈິດ​ໃຈ​ອັນ​ເດັດ​ດ່ຽວ, ຄວບ​ຄຸມ​ການ​ປະ​ພຶດ​ຂອງ​ຕົນ​ແລະ​ຮັກ​ສາ​ຄວາມ​ປອດ​ໃສ​ຂາວ​ສະ​ອາດ​ໃຫ້​ໄດ້. ” ເຊິ່ງທາດ​ແທ້​ໃນການສ້າງ​ພັກ​ເພື່ອ​ປະ​ຊາ​ຊົນ,ປະ​ຕິ​ບັດ​ໜ້າ​ທີ່​ວຽກ​ງານ​ເພື່ອ​ສ່ວນ​ລວມ​ດ້ວຍ​ຄວາມ​ປອດ​ໃສ​ຂາວ​ສະ​ອາດ​ໃນ​ລັກ​ສະ​ນະ​ນີ້​ໄດ້​ສະ​ແດງ​​ໃຫ້​ເຫັນ​ຢ່າງ​ພົ້ນ​ເດັ່ນ​ໃນ​ແນວ​ຄິດ​ແລະ​ພຶດ​ຕິ​ກຳ​ຕົວ​ຈິງ​ຂອງ​ທ່ານ​ສີ​ຈິ້ນ​ຜິງ​ໃນ​ການ​ບໍ​ລິ​ຫານ​ປະ​ເທດ.ທ່ານ​ນາງ​ຊີ​ຊິນ​ໄດ້​ຈື່​ຈຳ​ຄຳ​ເຕືອນ​ຂອງ​ສາ​ມີ​ໄວ້​ເພື່ອເປັນ​ຄະ​ຕິ​ເຕືອນ​ໃຈ​ປະ​ຈຳ​ຊີ​ວິດ​ຕົນ​ຄື: “ເຮັດ​ວຽກ​ໃຫ້​ດີ, ຮ່ຳ​ຮຽນ​ໃຫ້​ດີ,ທຸກ​ສິ່ງ​ຢ່າງ​ຕ້ອງ​ແກ້​ໄຂ​ໃຫ້​ດີ​ໝົດ.”

ເຖິງ​ຈະ​ປະ​ສົບ​ກັບ​ສະ​ພາບ​ຫຍຸ້ງ​ຍາກ​ລຳ​ບາກກໍ​ຕາມ, ແຕ່​ທ່ານ​ນາງ​ຊີ​ຊິນ​ພ້ອມ​ລູກ​ເຕົ້າ​ທັງຫຼາຍ​ກໍ​ບໍ່​ໄດ້​ທໍ້​ຖອຍ​ໃຈ. ເພິ່ນ​ຮັກ​ແພງ​ແລະເອົາ​ໃຈ​ໃສ່​ຄອບ​ຄົວ​ດ້ວຍ​ຄວາມ​ເຂັ້ມ​ແຂງ​ແລະມີ​ຄວາມ​ເມດ​ຕາ​ໃນ​ຖາ​ນະ​​ແມ່. ຈາກ​ຈິດ​ໃຈ​ທີ່​ເຂັ້ມ​ແຂງ​ຄື​ແນວ​ນີ້, ໝົດ​ທຸກ​ຄົນ​ໃນ​ຄອບ​ຄົວ​ໄດ້​ຮ່ວມ​ກັນ​ປະ​ເຊີ​ນ​ໜ້າ​ກັບ​ອຸ​ປະ​ສັກ​ແລະ​ຄວາມ​ຫຍຸ້ງ​ຍາກ​ລຳ​ບາກ​ຕ່າງໆ​ນາໆ​ທີ່​ເກີດ​ຂຶ້ນ​ໃນ​ຊີ​ວິດ​ດ້ວຍ​ຄວາມ​ເຊື່ອ​ໝັ້ນ​ອັນ​ເດັດ​ດ່ຽວ​ໜຽວ​ແໜ້ນ​ແລະ ມີ​ທັດ​ສະ​ນະ​ເບິ່ງ​ໂລກ​ໃນ​ແງ່​ດີ.

​ ໃນ​ສະ​ພາບ​ທີ່​ມີຄວາມສະ​ດວກ​ສະ​ບາຍກໍຍັງ​ສາ​ມາດ​ຮັກ​ສາ​ທາດ​ແທ້​ຂອງ​ຕົນ, ​ໃນ​ສະ​ພາບ​ທີ່​ມີຄວາມຫຍຸ້ງ​ຍາກ​ລຳ​ບາກ​ແຮ່ງ​ມີ​ຈິດ​ໃຈທຸ່ນທ່ຽງ. ປະ​ສົບ​ການທີ່​ບຸກ​ບືນ​ສູ້​ຊົນ​ຂອງ​ພໍ່​ແມ່​ໄດ້​ສົ່ງ​ອິດ​ທິ​ພົນ​ຢ່າງ​ເລິກ​ເຊິ່ງ​ຍາວ​ນານ​ໃຫ້ກັບ​ທ່ານ​ສີ​ຈິ້ນ​ຜິງ.

ຫຼາຍ​ປີ​ມາ​ນີ້, ບໍ່​ວ່າ​ວຽກ​ງານ​ແລະ​ຕຳ​ແໜ່ງ​ຈະ​ມີ​ການ​ປ່ຽນ​ແປງໄປ​ແນວ​ໃດ, ທ່ານ​ສີ​ຈິ້ນ​ຜິງ​ກໍຍັງ​ຈື່​ຈຳ​ຄຳ​ສັ່ງ​ສອນ​ຂອງ​ແມ່ ແລະ​ ໄດ້ຍຶດ​ໝັ້ນ​ອຸ​ດົມ​ການ​ແຕ່​ຫົວ​ທີ​ຢ່າງ​ສະ​ເໝີ​ຕົ້ນ​ສະ​ເໝີ​ປາຍ.

ແຫລ່ງຂ່າວ: CRI-FM93Mhz