ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ຜູ້​ປະ­ຈຳ­ການ​ຄະ­ນະ​ສະ­ເພາະ​ກິດ ພ້ອມ​ດ້ວຍ​ຄະ­ນະ ໄດ້​ເຄື່ອນ​ໄຫວ​ຢ້ຽມ­ຢາມ​ແຮງ​ງານ​ລາວ ທີ່​ກັບ​ມາ​ຈາກ​ຕ່າງ­ປະ­ເທດ ໃນ​ວັນ​ທີ 11 ພຶດ­ສະ­ພາ 2020 ທີ່​ສູນ​ກັກ​ກັນ​ແຮງ​ງານ​ສະ­ໜາມ​ຍິງ​ປືນ​ກອງ­ທັບ (ຫຼັກ 27) ໂດຍ​ມີ​ທ່ານ ບຸນ​ທອງ ພົມ­ມະ­ຈັນ ຫົວ­ໜ້າ​ຄະ­ນະ​ຈັດ​ຕັ້ງ​ນະ­ຄອນ­ຫຼວງ​ວຽງ​ຈັນ (ນວ) ຮອງ​ຫົວ­ໜ້າ​ຄະ­ນະ​ສະ­ເພາະ​ກິດ​ຂັ້ນ ນວ ທ່ານ ຄຳ​ແກ້ວ ມະ­ຫາ​ໄຊ ຮອງ​ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ໃຫ້­ການ​ຕ້ອນ­ຮັບ.

ທ່ານ ນາງ ນາ­ລີ ຂັນ​ທະ​ລັກ ຮອງ​ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ ນວ ຫົວ­ໜ້າ​ໜ່ວຍ​ງານ​ຄຸ້ມ​ຄອງ​ກໍ­ລະ­ນີ​ກັກ​ກັນ ແລະ ອະ­ນາ­ໄມ​ກັນ​ພະ­ຍາດ ໄດ້​ລາຍ​ງານ​ສະ­ພາບ​ລວມ​ໃຫ້​ຊາບ​ວ່າ: ປັດ­ຈຸ­ບັນ ຢູ່​ສູນ​ດັ່ງ­ກ່າວ​ມີ­ແຮງ​ງານ​ທີ່​ກັບ​ມາ​ຈາກ​ປະ­ເທດ ຜ່ານ​ດ່ານ​ຂົວ​ມິດ­ຕະ­ພາບ​ລາວ-ໄທ​ແຫ່ງ​ທີ 1 ລວມ​ທັງ​ຜູ້​ທີ່​ລັກ­ລອບ​ເຂົ້າ​ມາ​ບໍ່​ຜ່ານ​ດ່ານ​ທັງ​ໝົດ 434 ຄົນ ຍິງ 127 ຄົນ ໃນ​ນັ້ນ​ໄດ້​ຈັດ​ສັ່ງ​ໄປ​ກັກ​ກັນ​ຢູ່​ແຕ່​ລະ​ແຂວງ​ແລ້ວ 89 ຄົນ ແລະ ໃນ​ວັນ​ນີ້ ຈະ​ສົ່ງ​ໄປ​ແຕ່​ລະ​ແຂວງ​ຕື່ມ​ອີກ 90 ຄົນ ເພື່ອ​ໄປ​ຕິດ­ຕາມ​ອາ­ການ​ເຂົາ­ເຈົ້າ ສຳ­ລັບ​ການ​ຕິດ­ຕາມ ແລະ ເຝົ້າ​ລະ­ວັງ​ພາຍ​ໃນ​ສູນ ພາຍ­ຫຼັງ​ທີ່​ຮັບ​ແຮງ​ງານ​ຈຳ­ນວນ​ດັ່ງ­ກ່າວ​ເຂົ້າ​ມາ ຄະ­ນະ​ຮັບ­ຜິດ­ຊອບ​ໄດ້​ເອົາ­ໃຈ­ໃສ່​ຕິດ­ຕາມ​ຢ່າງ​ໃກ້­ຊິດ ໂດຍ​ໄດ້​ມີ​ການ​ໄດ້​ຄັດ​ແຍກ​ຫ້ອງ​ນອນ​ໃນ​ສູນ​ອອກ​ເປັນ 4 ຕືກ ເຊິ່ງ​ຕຶກ​ໜຶ່ງ​ຮັບ​ໄດ້ 90 ຄົນ ມີ 40 ຫ້ອງ​ນອນ ແລະ ສາ­ມາດ​ນອນ​ນຳ​ກັນ​ໄດ້ 3 ຄົນ​ຕໍ່​ຫ້ອງ ພ້ອມ​ນັ້ນ ຍັງ​ໄດ້​ຈັດ​ສົ່ງ​ທີມ​ແພດ​ຕິດ­ຕາມ​ເຝົ້າ​ລະ­ວັງ ຕິດ­ຕາມ​ອາ­ການ​ຢ່າງ​ເປັນ​ປະ­ຈຳ ຖ້າ​ຫາ​ກວ່າ​ພົບ​ມີ​ກໍ­ລະ­ນີ​ສົງ­ໄສ ທາງ​ສູນ​ກໍ​ຈະ​ໄດ້​ສົ່ງ​ໄປ​ໂຮງ­ໝໍ​ທັນ­ທີ ແຕ່​ຖ້າ​ບໍ່​ມີ​ອາ­ການ​ຫຍັງ ສຳ­ລັບ​ຄົນ​ຕ່າງ​ແຂວງ ແມ່ນ​ຈະ​ໄດ້​ສືບ­ຕໍ່​ມອບ​ໃຫ້​ຄະ­ນະ​ສະ­ເພາະ​ກິດ​ຂອງ​ແຕ່​ລະ​ແຂວງ ນຳ​ຕົວ​ໄປ​ສູນ​ກັກ​ກັນ​ຂອງ​ແຂວງ ເພື່ອ​ສືບ­ຕໍ່​ຕິດ­ຕາມ​ອາ­ການ​ເປັນ​ໄລ­ຍະ​ເວ­ລາ 14 ວັນ​ຕື່ມ​ອີກ.

ຈາກ​ນັ້ນ ທ່ານ​ຮອງ​ລັດ­ຖະ­ມົນ­ຕີ​ສາ­ທາ­ລະ­ນະ​ສຸກ ໄດ້​ສະ­ແດ​ງວ​ຄວາມ​ຊົມ­ເຊີຍ​ຕໍ່​ການ​ເອົາ­ໃຈ­ໃສ່​ຂອງ​ຄະ­ນະ​ດັ່ງ­ກ່າວ ຍົກ​ໃຫ້​ເຫັນ​ບາງ​ມາດ​ຕະ­ການ​ຜ່ອນ­ຜັນ​ຂອງ​ລັດ­ຖະ­ບານ ໃນ​ແຕ່​ຂົງ­ເຂດ ແລະ ເນັ້ນ​ໃຫ້​ທຸກ​ພາກ­ສ່ວນ​ເອົາ­ໃຈ­ໃສ່​ຕໍ່​ການ​ປະ­ຕິ­ບັດ​ວຽກ​ງານ​ດັ່ງ­ກ່າວ​ຢ່າງ​ຈິງ​ຈັງ ໂດຍ​ສະ­ເພາະ ການ​ຕິດ­ຕາມ ແລະ ເຝົ້າ​ລະ­ວັງ​ຢ່າງ​ໃກ້­ຊິດ ເພື່ອ​ບໍ່​ໃຫ້​ມີ​ກໍ­ລະ­ນີ​ໃໝ່​ໃນ​ລາວ​ເພີ່ມ​ຂຶ້ນ ພ້ອມ​ນັ້ນ ຄະ­ນະ​ຍັງ​ໄດ້​ມີ​ການ​ປືກ​ສາ​ຫາ­ລື​ກ່ຽວ​ກັບ​ບາງ​ມາດ​ຕະ­ການ​ໃຫ້​ຄວາມ​ຊ່ວຍ­ເຫຼືອ​ທີ່​ຈຳ­ເປັນ ໂດຍ​ສະ­ເພາະ​ເລື່ອງ​ອາ­ຫານ​ການ​ກິນ​ໃນ​ແຕ່​ລະ​ວັນ​ຂອງ​ເຂົາ­ເຈົ້າ ແລະ ແຜນ­ການ​ລະ­ດົມ​ທຶນ​ໃນ​ສັງ­ຄົມ​ໃຫ້​ກວ້າງ­ຂວາງ ແລະ ອື່ນໆ ເພື່ອ​ໃຫ້­ການ​ຊ່ວຍ­ເຫຼືອ​ເຂົາ­ເຈົ້າ​ຢ່າງ​ທົ່ວ​ເຖິງ.