ເລີ່ມແຕ່ມື້ນີ້ 18 ພຶດສະພາ ຫາ 01 ມິຖຸນາ 2020 ຍັງຄົງຢູ່ໃນມາດຕະການຜ່ອນຜັນການແຜ່ລະບາດຂອງພະຍາດໂຄວິດ -19 ຕາມແຈ້ງການເລກທີ 580/ຫສນຍ ລົງວັນທີ 15 ພຶດສະພາ 2020.

ເຖິງແມ່ນວ່າຜ່ານມາເປັນເດືອນແລ້ວທີ່ບໍ່ມີຜູ້ຕິດເຊື້ອ ແຕ່ພວກເຮົາກໍບໍ່ຄວນຖືເບົາ ແລະ ປະໝາດຢ່າງເດັດຂາດ ເພາະວ່າໃນໂລກຍັງລະບາດຢູ່ ແລະ ໂຕອັນຕະລາຍແມ່ນການກັບຄືນມາລະບາດໃໝ່ຮອບສອງ. ສະນັ້ນ ຄະນະສະເພາະກິດຈຶ່ງໄດ້ສືບຕໍ່ໄປອີກ; ແຕ່ໃຫ້ປະຕິບັດມາດຕະການປ້ອງກັນການຕິດເຊື້ອເປັນຕົ້ນ ການຮັກສາໄລຍະຫ່າງ 1 ແມັດຂຶ້ນໄປ; ລ້າງມືດ້ວຍນ້ຳສະອາດໃສ່ສະບູ ຫຼື ເຈວລ້າງມື; ໃສ່ຜ້າອັດປາກ-ດັງ; ແທກອຸນຫະພູມ ແລະ ອະນາໄມສະຖານທີ່ຕາມຄຳແນະນຳຂອງຄະນະສະເພາະກິດວາງອອກ.

ສຳລັບມາດຕະການມີທັງໝົດ 9 ຂໍ້ ແລະ ສືບຕໍ່ປະຕິບັດຢ່າງເຂັ້ມງວດບາງມາດຕະການທີ່ກຳນົດໃນຄຳສັ່ງເລກທີ 06/ນຍ ລົງວັນທີ 29 ມີນາ 2020…(ໃນຂໍ້ 5 ເຊິ່ງມີ 4 ຂໍ້ນ້ອຍຕາມແຈ້ງການເລກທີ 580/ຫສນຍ)…ເພື່ອຄວາມເປັນເອກະພາບໃນການຈັດຕັ້ງປະຕິບັດຜູ້ຂຽນຈຶ່ງຂໍສະເໜີຂໍ້ທີ 6 ໃນແຈ້ງການນີ້ລະອຽດຄື:

6. ວິທີຈັດຕັ້ງປະຕິບັດ:

          6.1 ມາດຕະການຜ່ອນຜັນນີ້ ແມ່ນເປັນການຊົ່ວຄາວ, ຖ້າມີການລາຍງານ ກໍລະນີຜູ້ຕິດເຊື້ອເກີດຂຶ້ນຢູ່ໃນແຂວງໃດໜຶ່ງ ຈະໄດ້ຈຳກັດການເຂົ້າ-ອອກ ແລະ ປະຕິບັດຄືນມາດຕະການຕ່າງໆຢ່າງເຂັ້ມງວດສະເພາະແຂວງນັ້ນ ເຊິ່ງແມ່ນຄະນະສະເພາະກິດແຂວງນັ້ນຈະໄດ້ເປັນຜູ້ປະກາດແຈ້ງການ; ຖ້າຫາກເກີດມີຜູ້ຕິດເຊື້ອເປັນຈຸ້ມແຕ່ 2 ແຂວງຂຶ້ນໄປ ແມ່ນຈະໄດ້ກັບມາປະຕິບັດບັນດາມາດຕະການຕ່າງໆທີ່ກຳນົດໃນຄຳສັ່ງເລກທີ 06/ນຍ ຄືນໃໝ່ຢ່າງເຂັ້ມງວດ.

          6.2 ມອບໃຫ້ບັນດາກະຊວງ, ຂະແໜງການ, ອົງການປົກຄອງທ້ອງຖິ່ນທຸກຂັ້ນ ກວດຄືນບັນດານິຕິກຳ, ຄຳແນະນຳຕ່າງໆຂອງຕົນ ເພື່ອປັບປຸງໃຫ້ສອດຄ່ອງກັບມາດຕະການຕ່າງໆ ທີ່ໄດ້ລະບຸໃນແຈ້ງການສະບັບນີ້ ແລະ ຜັນຂະຫຍາຍເປັນອັນລະອຽດຢ່າງທັນການ ເພື່ອມີຄວາມເຂົ້າໃຈເປັນເອກະພາບໃນການຈັດຕັ້ງປະຕິບັດ.

          6.3 ໃຫ້ກຳລັງປ້ອງກັນຊາດ, ປ້ອງກັນຄວາມສະຫງົບ, ຄະນະສະເພາະກິດ, ບັນດາກະຊວງ, ຂະແໜງການ, ອົງການປົກຄອງທ້ອງຖິ່ນທຸກຂັ້ນ ແລະ ທຸກພາກສ່ວນໃນສັງຄົມ ພ້ອມກັນເປັນເຈົ້າການຕິດຕາມກວດກາ, ຮັກສາຄວາມສະຫງົບ, ຮັກສາຄວາມເປັນລະບຽບຮຽບຮ້ອຍໃນສັງຄົມ ແລະ ຈັດຕັ້ງປະຕິບັດມາດຕະການທີ່ໄດ້ກຳນົດໃນແຈ້ງການສະບັບນີ້ຢ່າງເຂັ້ມງວດ. ກໍລະນີມີການລະເມີດ ແມ່ນໃຫ້ເຈົ້າໜ້າທີ່ປ້ອງກັນຄວາມສະຫງົບ ແລະ ເຈົ້າໜ້າທີ່ ທີ່ກ່ຽວຂ້ອງດຳເນີນມາດຕະການຕາມກົດໝາຍ ແລະ ລະບຽບການກ່ຽວຂ້ອງຢ່າງເຂັ້ມງວດ.

          6.4 ມາດຕະການທີ່ກຳນົດໄວ້ແຈ້ງການສະບັບນີ້ມີຜົນສັກສິດນັບແຕ່ວັນທີ 18 ພຶດສະພາ ຫາ 01 ມີຖຸນາ 2020. ໃນພາກປະຕິບັດຕົວຈິງຈະໄດ້ມີການປະເມີນ, ທົບທວນ ແລະ ດັດປັບໃຫ້ເໝາະສົມຕື່ມ, ກໍລະນີມີການປ່ຽນແປງ ລັດຖະບານຈະແຈ້ງໃຫ້ຊາບເປັນແຕ່ລະໄລຍະ.

          ຂໍໃຫ້ພວກເຮົາຮັບຮູ້ໄວ້ວ່າ: ພະຍາດ Covid -19 ເປັນສັດຕູທີ່ແນມບໍ່ເຫັນ; ມັນເປັນສົງຄາມທີ່ບໍ່ມີພົມແດນ; ບໍ່ເລືອກຊັ້ນຄົນ…

ໂດຍ: ທິດດີ