ເພື່ອນຜູ້ອ່ານຂາປະຈຳອອນລາຍເຮົາສົ່ງຂ່າວມາຢາກໃຫ້ຂຽນເຕືອນແດ່ວ່າຊັ່ນ! ເຫັນໂຄສະນາຂາຍຫວຍຕ່າງປະເທດ ເຕັມໜ້າເຟສບຸກຢູ່!…

ແລ້ວຊິໃຫ້ໃຜຕັກເຕືອນເຂົາ ຫຼື ເອົາຜິດຫຍັງບໍ່…ມັນໂພດກາຍ ປານວ່າບ້ານເມືອງບໍ່ມີຂື່ມີແປ…ທ້າທາຍເກີນໄປວ່າຊັ່ນ…! ຜູ້ຂຽນກໍບໍ່ຢາກຂ້ອງກ່ຽວ ແຕ່ວ່າມັນເປັນພັນທະຂອງຄົນຂຽນຂ່າວຈຶ່ງຈຳຕ້ອງເລົ່າຕໍ່ສູ່ກັນຟັງ…

ຕາມຮູ້ພວກມັກສ່ຽງໂຊກເຂົາວ່າມື້ໜຶ່ງມີຫວຍຕ່າງປະເທດທີ່ຄົນລາວມັກຫຼິ້ນມັກແທງມີຫຼາຍແທ້ໃດ໋ ເລີ່ມແຕ່ 16 ໂມງ (ຫວຍຈີນ) 17 ໂມງ; 17 ໂມງເຄິ່ງ; 19 ໂມງ 30 (ຫວຍຫວຽດ) ແລະ 20 ໂມງ (ຫວຍຈີນ) ຍັງມີອີກຫວຍມາເລ…ຫວຍໄທ. ແນ່ນອນເຈົ້າມືບໍ່ແມ່ນລັດ…ລັດບໍ່ໄດ້ຫຍັງນຳເຂົາດອກ…ມີແຕ່ອະນຸຍາດໃຫ້ເຂົາເຮັດເປັນກຸ່ມ…ເປັນສະມາຄົມ ຈຶ່ງຈະໄດ້ເງິນ.

ຜ່ານມາກໍ່ມີການເຕືອນ ແລະ ລົງໂທດຢູ່ເພາະມັນເຮັດໃຫ້ຫວຍພັດທະນາຂາຍບໍ່ຄ່ອຍດີ ຄັນເວົ້າຕາມພາສາການຕະຫຼາດກໍ່ແມ່ນເສຍລູກຄ້າ.

ເວົ້າເລື່ອງການຂາຍຫວຍເຖື່ອນນີ້ກໍ່ມີລະບຽບວາງອອກຢູ່ເປັນຕົ້ນແມ່ນແຈ້ງການເລກທີ 1244/ຫສນຍ-ກລຂ ລົງວັນທີ 17 ສິງຫາ 2017 ແລະ ຕໍ່ມາກໍ່ມີແຈ້ງການເລກທີ 1971/ຫສນຍ-ກລຂ ລົງວັນທີ 13 ທັນວາ 2017 ແລະ ຫຼ້າສຸດແມ່ນແຈ້ງການຂອງກົມຕຳຫຼວດເສດຖະກິດ ເລກທີ 701/302 ລົງວັນທີ 27/03/2020.

ເລື່ອງຈັດຕັ້ງປະຕິບັດແມ່ນຍາກຫຼາຍຕ້ອງເຫັນໃຈເຈົ້າໜ້າທີ່ເພີ່ນ…ແຕ່ຄິດວ່າຄົງຕ້ອງມີການເຮັດຕາມລະບຽບການ ເຊິ່ງອາດບໍ່ທັນໃຈນໍ?

ໃນມໍ່ໆນີ້ຄົງຈັດການທີ່ໂພສຂຶ້ນເຟສບຸກເພາະມັນຊອກແຫຼ່ງຂໍ້ມູນງ່າຍ…

ໂດຍ: ທິດດີ