Lynda Weinman ຜູ້ສ້າງຕັ້ງຂອງ Lynda.com

0
220

ເມື່ອເວົ້າເຖິງ Lynda Weinman ຫຼາຍຄົນອາດຈະບໍ່ຄຸ້ນເຄີຍເທົ່າໃດ ແລະ ຖ້າບອກວ່າເປັນຜູ້ສ້າງຕັ້ງເວັບໄຊທ໌ໂຮງຮຽນອອນລາຍ ເຊັ່ນ: Lynda.com ທີ່ສອນກ່ຽວກັບທຸລະກິດ, ຊອບແວ, ເຕັກໂນໂລຢີ ແລະ ການອອກແບບກຣາບຟິກ ອາດຈະຍັງຄິດບໍ່ອອກກໍ່ໄດ້.

ໃນເດືອນເມສາ ປີ 2015 ສື່ສັງຄົມລາຍໃຫຍ່ທີ່ກ່ຽວຂ້ອງກັບທຸລະກິດ ແລະ ປະຫັວດການເຮັດວຽກລວມສູນ ສູນກາງມືອາຊີບເຊັ່ນ: LinkedIn ໄດ້ຊື້ Lynda.com ໃນມູນຄ່າ 1,5 ພັນລ້ານໂດລາ ຫຼາຍຄົນເວົ້າວ່າລາວບໍ່ຄິດວ່າລາວຈະສ້າງເວັບໄຊທ໌ ຂອງໂຮງຮຽນ online ເພື່ອເຕີບໃຫຍ່ໄດ້ຂະໜາດນີ້? ເພາະລາວເບີ່ງບໍ່ຄືຄົນໜ້າທັນສະໄໝ ຫຼື ບໍ່ໜ້າຈະທັນຍຸກເຕັກໂນໂລຢີ ເຊີ່ງໃນໄລຍະທໍາອິດສາມາດສ້າງລາຍໄດ້ຮ້ອຍລ້ານ ໂດຍບໍ່ໄດ້ອາໄສເງິນຈາກນັກລົງທືນເລີຍ.

ນີ້ແມ່ນເລື່ອງຂອງ Lynda Weinman ຜູ້ສ້າງຕັ້ງເວັບໄຊທ໌ Lynda.com ເຊິ່ງເລີ່ມຕົ້ນດ້ວຍການເຊົ່າໂດເມນເນມໃນລາຄາພຽງ 35 ໂດລາ.

ເມື່ອເວົ້າເຖິງ Lynda.com ປະກອບດ້ວຍຜູ້ຮ່ວມກໍ່ຕັ້ງສອງທ່ານຄື Lynda Weinman ແລະ Bruce Heavin ເຊີ່ງເປັນສາມີ ຫຼື ຄູ່ຮ່ວມຊີວິດຂອງ Lynda.

Lynda Susan Weinman ເກີດໃນວັນທີ 24 ມັງກອນ 1955 ໃນສະຫະລັດອາເມລິກາ ລາວເຕີບໃຫຍ່ຢູ່ໃນຄອບຄົວທີ່ແຕກແຍກ ເພາະວ່າພໍ່ແມ່ໄດ້ຢ່າຮ້າງ ແລະ ແຍກກັນຕັ້ງແຕ່ຍັງນ້ອຍ.

ຫຼັງຈາກທີ່ຈົບການສຶກສາໃນຄະນະມະນຸດສາດ ໃນມະຫາວິທະຍາໄລ The Evergreen State College ໃນເມືອງ Olympia Washington ເປັນເວລາ 1 ປີແລ້ວ ລາວໄດ້ເລີ່ມຕົ້ນເຮັດທຸລະກິດໂດຍການເປີດຮ້ານຂາຍຍ່ອຍ ເຊີ່ງມີສອງຮ້ານຂາຍສິນຄ້າທົ່ວໄປຄື: Vertigo on Melrose ແລະ Vertigo on Sunset ໃນ Los Angeles ແຕ່ຕ້ອງໄດ້ປິດໃນປີ 1982 ເຊິ່ງຮູ້ກັນງ່າຍໆ ວ່າຮ້ານເຈັ້ງ.

ຕໍ່ມາລາວໄດ້ຊອກຫາວຽກໃນຝັນ ໃນເວລານັ້ນລາວມີໂອກາດໄດ້ເຮັດວຽກກ່ຽວກັບກາຕູນແອນິເມຊັ່ນ ແລະ ສະເປໂຊແອັບເຟັກໃຫ້ກັບຮູບເງົາຊື່ດັ່ງເຊັ່ນ: RoboCop 2 (1990), Bill & Ted’s Adventure Adventure (1989) ແລະ Star Trek V: The Final Frontier (1989).

ແລະ ຕໍ່ມາລາວໄດ້ມີໂອກາດເປັນຄູສອນໃນວິຊາຄອມພິວເຕີ ໂດຍລົງເລີກການໃຊ້ແອັບເຟັກ ແລະ ແອນິເມຊັ່ນຕ່າງໆ ແລະ ລາວໄດ້ມີໂອກາດສອນຢູ່ສະຖາບັນທີ່ມີຊື່ສຽງຕ່າງໆ ເຊັ່ນ: Art Center College of Design ໃນ Pasadena, California (1989 – 1996) ), UCLA, ສະຖາບັນຮູບເງົາອາເມລິກາ ແລະ ມະຫາວິທະຍາໄລແຫ່ງລັດ San Francisco ລາວໄດ້ສອນວິຊາ Computer graphics, animation, interaction design ແລະ motion graphics.

ລາວໄດ້ພະຍາຍາມຄົ້ນຄ້ວາປື້ມ ແລະ ຂໍ້ມູນຕ່າງໆ ທີ່ຈະເປັນປະໂຫຍດໃຫ້ແກ່ນັກຮຽນ ເຊີ່ງໄດ້ໄປຄົ້ນຄ້ວາຢູ່ຫໍສະໝຸດ ແລະ ໄດ້ພົບວ່າ: ປື້ມກ່ຽວກັບການອອກແບບເວັບໄຊທ໌ ໃນສະໄໝນັ້ນຫາຍາກຫຼາຍເພື່ອທີ່ຈະອ່ານ ເຖິງວ່າຈະເປັນຜູ້ຊ່ຽວຊານກໍ່ຕາມ ເຊີ່ງຕ້ອງໃຊ້ເວລາດົນເພື່ອເຂົ້າໃຈເນື້ອໃນ ເພາະສະນັ້ນຖ້າຄົນທົ່ວໄປທີ່ຫາກໍ່ເລີ່ມຮຽນແມ່ນບໍ່ລອດແນ່ນອນ ເຊີ່ງສາເຫດນີ້ໄດ້ດົນບັນດານໃຈໃຫ້ລາວຂຽນປື້ມທີ່ມີຊື່ວ່າ: ການອອກແບບກຣາບຟິກເວັບໄຊທ໌ເປັນພາສາທີ່ງ່າຍ ເຂົ້າໃຈໄວ ແລະ ຕໍ່ມາໄດ້ກາຍເປັນຜູ້ຂາຍດີທີ່ສຸດໃນປີ 1995 ເຊິ່ງເຮັດໃຫ້ລາວມີຊື່ສຽງ ແລະ ເປັນທີ່ຍອມຮັບຈາກຄົນໃນອຸດສາຫະກຳກຣາບຟິກ.

ໃນປີດຽວກັນ ປີ 1995 ນາງໄດ້ລົງທະບຽນເຊົ່າໂດເມນ Lynda.com ເມື່ອລາວໄດ້ຮັບອີເມວທີ່ມີຊື່ວ່າ debbie@debbie.com ລາວຄິດວ່າມັນງ່າຍໃນການຈື່ຈໍາ ໂດຍສະເພາະໃນເວລາທີ່ພົວພັນກັບກຸ່ມນັກຮຽນ ຫຼັງຈາກນັ້ນລາວໃຊ້ຊື່ຂອງຕົນເອງເປັນຊື່ຂອງເວັບໄຊທ໌ ລາວກັບຜົວໄດ້ຮ່ວມກັນລົງທະບຽນເປັນນິຕິບຸກຄົນ ສອງປີຕໍ່ມາໃນປີ 1997 ທີ່ເມືອງ Ojai California.

ເຊິ່ງໄດ້ເວົ້າໄປແລ້ວວ່າເວັບໄຊທ໌ Lynda.com ແຕ່ເກົ່າແມ່ນບໍ່ໄດ້ຖືກສ້າງຂື້ນມາເປັນເວັບໄຊທ໌ຂອງໂຮງຮຽນ online ເພາະວ່າລາວສ້າງຂື້ນມາເພື່ອເປັນແຫຼ່ງຂໍ້ມູນກ່ຽວກັບການອອກແບບກຣາບຟິກຕ່າງໆ ສຳລັບນັກຮຽນຂອງລາວເອງ ທີ່ມາຊອກຫາຂໍ້ມູນທ່ານຄົງຈະຈິນຕະນາການໄດ້ ໃນຍຸກຂອງ Google ແລະ YouTube ຍັງບໍ່ທັນເກີດການຊອກຫາຂໍ້ມູນນັ້ນແມ່ນມີຢູ່ໃນຫໍສະໝຸດ ແລະ ໃນປຶ້ມເທົ່ານັ້ນ.

ຫຼັງຈາກປື້ມສອນການອອກແບບເວັບໄຊທ໌ຖືກປ່ອຍອອກມາ ຕໍ່ມາເວັບໄຊທ໌ໄດ້ກາຍເປັນຕົວຢ່າງ ສຳລັບເນື້ອຫາໃນປື້ມ ແລະ ໃຊ້ເປັນວິທີການສົ່ງເສີມປື້ມ ແລະ ປື້ມຂອງລາວແມ່ນເປັນທີ່ນິຍົມຫຼາຍ.

ໃນຊ່ວງປິດພາກຮຽນໃນລະດູໃບໄມ້ລົ່ນ ຜົວຂອງລາວ Bruce Heavin ໄດ້ມີຄວາມຄິດຈະທົດລອງເປີດຫ້ອງອອກແບບເວັບໄຊທ໌ ໂດຍການເກັບເງິນຈາກຄ່າທຳນຽມລິຂະສິດ ຈຳນວນ 20,000 ໂດລາ ເພື່ອຕິດຕໍ່ເຊົ່າຄອມພິວເຕີຂອງໂຮງຮຽນໃນໄລຍະພັກຮຽນ ຫຼັງຈາກນັ້ນພະຍາ ຍາມລົງໂຄສະນາໃນເວັບໄຊທ໌ Lynda.com ເພື່ອເບິ່ງວ່າມີນັກຮຽນເຂົ້າຮຽນ ຫຼື ບໍ່? ເຊິ່ງປະກົດວ່າຫ້ອງຮຽນນີ້ຖືກຈອງເຕັມໂດຍມີນັກຮຽນເຂົ້າຮຽນໝົດປີ ແລະ ນອກຈາກນັ້ນຍັງໄດ້ເປີດໂລກທັສະຂອງ Lynda ແລະ Bruce ນອກຈາກນັກຮຽນນາໆ ຊາດທີ່ເຂົ້າມາຮຽນແລ້ວຍັງມີນັກຮຽນທີ່ບິນໄກຈາກອອສເຕເລຍ ບິນໂດຍກົງເພື່ອມາຮຽນການອອກແບບເວັບໄຊທ໌ເຊັ່ນກັນ.

4 ປີຕໍ່ມາການດຳເນີນງານມາຮອດ ປີ 2001 Lynda.com ກາຍເປັນບໍລິສັດທີ່ມີພະນັກງານຫຼາຍກ່ວາ 35 ຄົນເຊິ່ງສາມາດສ້າງລາຍຮັບທັງໝົດຫຼາຍກ່ວາ 3,5 ລ້ານໂດລາ ແຕ່ຫຼັງຈາກນັ້ນໃນປີດຽວກັນ ເກີດວິກິດການເສດຖະກິດໃຫຍ່ດັ່ງທີ່ພວກເຮົາຮູ້ຊື່ວ່າ dot-com ຫຼື ວິກິດເສດຖະກິດ dot com crash ທຸລະກິດດ້ານໄອທີ ແລະ ເຕັກໂນໂລຢີ ແລະ ເວັບໄຊທ໌ຕ່າງໆ ຖືກທຳລາຍຍ້ອນມູນຄ່າການຕະຫຼາດສູງຂື້ນ ນອກນັ້ນຍັງມີເຫດການ 9/11 ທີ່ພວກກໍ່ການຮ້າຍໄດ້ຈັບເຮືອບິນໂດຍສານ ແລະ ຂ້າຕົວຕາຍໃນເຂດ Twin Towers ຂອງສູນການຄ້າໂລກ.

ແນ່ນອນວ່າທຸລະກິດຂອງ Lynda.com ໄດ້ຮັບຜົນກະທົບໂດຍກົງຈາກເຫດການນີ້ ສະນັ້ນລາວ ແລະ ຜົວຕ້ອງຫຼຸດຂະໜາດຂອງອົງກອນ ໂດຍການຢຸດຈ້າງພະນັກງານເກືອບທັງໝົດ ເຊິ່ງເຫຼືອພຽງ 9 ຄົນ ລວມໄປເຖີງຕ້ອງຢຸດສັນຍາເຊົ່າສະຖານທີ່ທີ່ເຄີຍເປັນໂຮງຮຽນອອກແບບເວັບໄຊທ໌ນຳອີກ.

ຕໍ່ມາໃນປີ 2002 ເພື່ອແກ້ໄຂວິກິດການທີ່ຂາດເງິນ ແລະ ເຊົ່າສະຖານທີ່ໃຫ້ນັກຮຽນມາຮຽນ ລາວໄດ້ເລີ່ມຕົ້ນບັນທຶກເທບວີດີໂອ ແລະ ອະນຸຍາດໃຫ້ນັກໄປຮຽນຢູ່ໃນເວັບໄຊທ໌ Lynda.com ໂດຍເກັບເງິນເປັນເດືອນຈາກເວັບໄຊທ໌ເບີ່ງໜັງ online ເຊິ່ງໄດ້ນຳມາໃຊ້ກັບ Lynda.com. ໃນຕອນເລີ່ມຕົ້ນເກັບເງິນ 25 ໂດລາຕໍ່ເດືອນ ເຊິ່ງໃນເວລານັ້ນແມ່ນຮູບແບບທຸລະກິດໃໝ່ທີ່ສຸດ ເຊີ່ງບໍ່ມີໃຜໄປສະໝັກຮຽນເລີຍ ຖືວ່າແມ່ນຍຸກທີ່ມືດມົນຂອງ Lynda.com ບໍ່ວ່າຈະເປັນທຸລະກິດຈະຢູ່ ຫຼື ໄປກໍ່ຕາມ.

ຈົນມີນັກຮຽນ 1,000 ຄົນ ມາລົງທະບຽນ ເຖິງແມ່ນວ່າຈະມາຊ້າໆ ມັນກໍ່ພຽງພໍທີ່ຈະເປີດທຸລະກິດຂອງ Lynda.com ໄດ້ ເທົ່າທີ່ໄດ້ສຶກສາຮູບແບບທຸລະກິດຈາກເວັບໄຊທ໌ເບິ່ງໜັງອອນລາຍ ພົບວ່າໃນຕອນເລີ່ມຕົ້ນມັນຈະຄ່ອຍໆ ຂະຫຍາຍ ແຕ່ເມື່ອເວລາຜ່ານໄປລາຍຮັບຂອງພວກເຂົາເພີ່ມຂື້ນສອງເທົ່າໃນແຕ່ລະປີ ໃນປີ 2004 ເວັບໄຊທ໌ Lynda.com ກໍ່ມີຫຼັກສູດຮຽນຫຼາຍກວ່າ 100 ຫຼັກສູດ.

ມາຮອດປີ 2006 ທຸລະກິດໄດ້ຂະຫຍາຍເປັນສິບເທົ່າ ເຊິ່ງມີນັກຮຽນຫຼາຍກ່ວາ 100,000 ຄົນໄດ້ລົງທະບຽນ ແລະ Lynda ກໍ່ສະເຫຼີມສະຫຼອງຜົນສຳເລັດໃນຄັ້ງນີ້ ໂດຍການນໍາເອົາພະນັກງານເຂົ້າມາໃນບໍລິສັດ ລວມທັງຄອບຄົວພະນັກງານຫຼາຍກ່ວາ 150 ຄົນ ໄດ້ຍົກທີມເພື່ອເດີນທາງໄປທ່ຽວ Disneyland ດ້ວຍຄວາມມ່ວນຊື່ນທີ່ສຸດ.

ເຄັດລັບທີ່ໃຊ້ໃນການຈັດການວຽກກັບຄົນໃນອົງກອນກໍ່ຄື ການປະຕິບັດຕໍ່ພະນັກງານຄືກັບວ່າພວກເຂົາເປັນຄອບຄົວດຽວກັນ ພະນັກງານທັງໝົດ 150 ຄົນ Lynda ສາມາດຈື່ຊື່ຂອງພະນັກງານໄດ້ທັງໝົດ.

ແລະ ອີກເຄັດລັບໜຶ່ງທີ່ໜ້າສົນໃຈກໍ່ຄື ເນື່ອງຈາກວ່າໃນປັດຈຸບັນໂລກມີເນື້ອຫາທີ່ບໍ່ເສຍຄ່າຫຼາຍ ເຊິ່ງສາມາດພົບໄດ້ໃນ Google ຫຼື Youtube ໂດຍບໍ່ເສຍຄ່າ ແຕ່ເປັນຫຍັງຄົນຈຶ່ງລົງທະບຽນກັບ Lynda.com ຊໍ້າແລ້ວຊໍ້າອີກໃນແຕ່ລະເດືອນ ໃນແຕ່ລະປີ? Lynda Weinman ໄດ້ອະທິບາຍວ່າ:

ຂໍ້ 1 – Lynda.com ເລີ່ມເຮັດທຸລະກິດຕອນບໍ່ມີຄູ່ແຂ່ງ ສັງເກດໄດ້ຈາກນັກຮຽນທີ່ບິນໄກຈາກອອສເຕເລຍເພື່ອມາຮຽນກັບລາວ ຕອນທີ່ລາວຍັງສອນຢູ່ໃນຫ້ອງຮຽນ

ຂໍ້ 2 – ລາວມີຊື່ສຽງກ່ອນທີ່ຈະເປີດທຸລະກິດ ເພາະວ່າກ່ອນທີ່ລາວຈະສ້າງ Lynda.com ໄດ້ເປັນທີ່ຮູ້ຈັກກັນດີ ສຳລັບປື້ມທີ່ລາວອອກແບບ Web Graphics ແລະ ກໍ່ຂາຍດີ ຈົນໄດ້ກາຍເປັນທີ່ຮູ້ຈັກຢ່າງກວ້າງຂວາງຕໍ່ຜູ້ອ່ານ ແລະ ຕັດສິນໃຈສຶກສາຢູ່ໃນເວັບໄຊທ໌ Lynda.com ຕໍ່ມາ.

ຂໍ້ 3 – ເກີດການຕະຫຼາດແບບປາກຕໍ່ປາກ ເຊິ່ງເປັນຕະຫຼາດທີ່ມີປະສິດທິພາບສູງສຸດໃນບັນດາການຕະຫຼາດເກືອບທຸກປະເພດ ເພາະວ່ານອກຈາກຈະບໍ່ເສຍເງິນໃນເຮັດການຕະຫຼາດແລ້ວ ຜູ້ທີ່ຂາຍສິນຄ້າກໍ່ແມ່ນລູກຄ້າຕົນເອງ ເພາະວ່າເມື່ອລູກຄ້າພໍໃຈກັບເນື້ອໃນຫຼັກສູດ ລູກຄ້າຈະເລີ່ມບອກໝູ່ເພື່ອນທີ່ພວກເຂົາຮູ້ໂດຍການແນະນຳໃຫ້ພວກເຂົາໄປສຶກສາໃນເວັບໄຊທ໌ Lynda.com ແລະ ສິ່ງທີ່ຈະນຳ ໄປສູ່ການຕະຫລາດ Word of mouth ແມ່ນການສຸມໃສ່ການສ້າງຜະລິດຕະພັນທີ່ດີ ໃນກໍລະນີນີ້ Lynda ສຸມໃສ່ຄຸນນະພາບຂອງເນື້ອໃນຫຼັກສູດໃຫ້ດີທີ່ສຸດ.

ຂໍ້ 4 – ຊະນະຜູ້ແຂ່ງຂັນແບບອອບລາຍໂດຍບໍ່ເຫັນຝຸ່ນເລີຍ ກ່ຽວກັບລາຄາ ແລະ ຄວາມສະດວກສະບາຍ ຊື່ງ Lynda ເບີ່ງວ່ານອກຈາກ Youtube ໄດ້ເບີ່ງວີດີໂອຟຣີແລ້ວ ລາວບໍ່ເຫັນຄູ່ແຂ່ງໃດໆ ທີ່ເຮັດ online ເລີຍ ໃນການທີ່ຈະເລີ່ມຕົ້ນ online ທຳອິດ ຄວນເລືອກເອົາພຽງແຕ່ຫົວຂໍ້ Nich Market ຫຼື ເນື້ອຫາການອອກແບບເວັບໄຊທ໌ເທົ່ານັ້ນ ເມື່ອລູກຄ້າປຽບທຽບກັບໂຮງຮຽນອື່ນທີ່ມີພຽງແຕ່ວິທີການສອນ ຕ້ອງເດີນທາງໄປຮຽນໃນຫ້ອງຮຽນ ເຊິ່ງມີຂໍ້ຈຳກັດກ່ຽວກັບສະຖານທີ່ ແລະ ເວລາຮຽນ ນອກຈາກນັ້ນເມື່ອຄິດໄລ່ຄ່າໃຊ້ຈ່າຍແລ້ວ ການຮຽນໃນເວັບໄຊທ໌ Lynda.com ນອກຈາກບໍ່ຕ້ອງເສຍເງິນ ແລະ ໃຊ້ເວລາໃນການເດີນທາງແລ້ວ ແຖມຍັງສາມາດເບິ່ງຄືນໄດ້ຕະຫຼອດເວລາ ຕາບໃດທີ່ຈ່າຍຄ່າທຳນຽມສະມາຊິກລາຍເດືອນຢູ່.

ຂໍ້ 5 – ຫຼັກສູດຖືກສ້າງຂື້ນຈາກຜູ້ຊ່ຽວຊານຂັ້ນສູງໃນສາຂານັ້ນ ເຊິ່ງເຮັດໃຫ້ນັກຮຽນສາມາດເຂົ້າໄປຮຽນໄດ້ ເລືອກທີ່ຈະລົງທະບຽນຮຽນກັບ Lynda.com ແທນທີ່ຈະໄປວັດດວງຟຣີຢູ່ໃນ YouTube ເຊິ່ງມັນທັງມີດີ ແລະ ບໍ່ດີປົນກັນ ແຕ່ຖ້າຮຽນກ່ຽວກັບ Lynda.com ທ່ານສາມາດໝັ້ນໃຈໃນສິ່ງນັ້ນໄດ້ ພຽງແຕ່ຜູ້ຊ່ຽວຊານຂັ້ນສູງໃນອຸດສະຫະກຳທີ່ມີເອກະລັກ ແລະ ວຽກງານທີ່ໄດ້ຮັບການຮັບປະກັນສາມາດຮຽນໄດ້ດີແນ່ນອນ.

ຂໍ້ 6 – Lynda.com ມີໂປໂມຊັ່ນຫຼາຍຢ່າງ ສຳລັບການທົດລອງຟຣີ ເຊີ່ງແມ່ນຫຼັກສູດໜຶ່ງທີ່ນັກຮຽນຕ້ອງທົດລອງຮຽນຮູ້ ແລະ ໄດ້ຊີມລົດຊາດກ່ອນ ຄຸນນະພາບຂອງຫຼັກສູດຕອບສະໜອງຄວາມຮຽກ ຮ້ອງຕ້ອງການ ຫຼື ບໍ່? ແລະຖ້າຢາກສືບຕໍ່ລົງທະບຽນເຂົ້າຮຽນແບບລາຍເດືອນໂດຍບໍ່ມີພັນທະໃດໆ.

ຕໍ່ມາໃນປີ 2008 ຈາກຫຼັກສູດສອນສະເພາະການອອກແບບ ແລະ ການອອກແບບເວັບໄຊທ໌ Lynda.com ໄດ້ເລີ່ມຂະຫຍາຍໝວດໝູ່, ຄວາມຄິດສ້າງສັນ, ສິລະປິນ ແລະ ຜູ້ປະກອບການ.

ຫຼັງຈາກ Lynda.com ດຳເນີນງານເປັນເວລາ 18 ປີ ຈົນຮອດເດືອນມັງກອນ 2013 Lynda.com ໄດ້ຮັບການລົງທືນຈາກ Venture Capital ຫຼື ນັກລົງທືນ ເຊັ່ນ: Accel Partners ແລະ Spectrum Equity ເປັນມູນຄ່າຫຼາຍກ່ວາ 103 ລ້ານໂດລາ ໄດ້ຂະຫຍາຍຕົວຢ່າງໄວວາ ຈົນມີພະນັກງານປະຈຳ 500 ຄົນ ແລະ ຄູອາຈານທີ່ມີສ່ວນຮ່ວມຫຼາຍກວ່າ 140 ຄົນ ໂດຍຕົກລົງທີ່ຈະແບ່ງປັນກັບຄູໃນຮູບແບບລາຍຮັບຮ່ວມກັນ ຫຼື ແບ່ງອອກຈາກອັດຕາສ່ວນການຂາຍທີ່ຕົກລົງກັນໃນໄລຍະທຳອິດ Lynda.com ໄດ້ສຸມໃສ່ການສອນຫົວຂໍ້ຕ່າງໆ ໃນບັນດາໝວດຊອບແວຣ໌ ແລະ ເຕັກໂນໂລຢີ ສ່ວນຫຼາຍແມ່ນຍ້ອນຜູ້ສ້າງເອງ ມີພື້ນຖານຈາກການເຄີຍເຮັດແອມິເນຊັ່ນ ແລະ ສະເປໂຊເຟັກ.

ສອງປີຕໍ່ມາ ໃນວັນທີ 14 ມັງກອນ 2015 Lynda.com ໄດ້ປະກາດລະດົມທຶນອີກຄັ້ງໜຶ່ງ ຈຳ ນວນເງິນຫຼາຍກ່ວາ 186 ລ້ານໂດລາສະຫະລັດ ໂດຍໄດ້ຮັບທຶນຈາກນັກລົງທຶນ TPG Capital ເຂົ້າມາເສີມໃນຄັ້ງນີ້.

ເຊິ່ງໃນນັ້ນ Lynda.com ໄດ້ຮັບເອົາບໍລິສັດ video2brain ບໍລິສັດ Austrian ເຊິ່ງເປັນເວັບໄຊທ໌ຂອງໂຮງຮຽນ online ທີ່ສອນກ່ຽວກັບການອອກແບບ ແລະ ຂຽນໂປແກຼມເວັບ ເຊິ່ງຮັບຮອງ 4 ພາສາດ້ວຍກັນ ເຊັ່ນ: ເຢຍລະມັນ, ຝຣັ່ງ, ສະເປນ ແລະ ອັງກິດ.

ນອກຈາກນັ້ນ Lynda.com ຍັງໄດ້ຊື້ Compilr ເຊິ່ງເປັນການເລີ່ມຕົ້ນສ້າງເວທີໃຫ້ຄົນໄດ້ຮຽນຮູ້ການຂຽນໂຄດ ແລະ ການຂຽນໂປແກມຟັງຜ່ານເວັບບຼາວເຊີ ຈຸດປະສົງກໍ່ຄືຕ້ອງການພັດທະນາໃນສ່ວນຂອງການສະໜັບສະໜູນຜູ້ໃຊ້ ແລະ ຫຼັກສູດວິດີໂອຈຳນວນຫຼາຍ Lynda.com.

ພຽງແຕ່ 3 ເດືອນຕໍ່ມາ ໃນວັນທີ 7 ເມສາ 2015 ທີ່ LinkedIn ໄດ້ສະເໜີຊື້ Lynda.com ທີ່ມີມູນຄ່າ 1.5 ຕື້ໂດລາ ໂດຍການສ້າງສໍາເລັດ ໃນວັນທີ 14 ເດືອນພຶດສະພາ ຫຼັງຈາກນັ້ນລາວໄດ້ລາອອກຈາກບໍລິສັດ ແຕ່ຍັງຄົງຖືຫຸ້ນ Lynda.com ຈົນຮອດວັນທີ 13 ມິຖຸນາ 2016 ບໍລິສັດຍັກໃຫຍ່ເຊັ່ນ Microsoft ໄດ້ສະເໜີຊື້ LinkedIn ໃນມູນຄ່າ 26 ພັນລ້ານໂດລາ ໂດຍການຕົກລົງປິດສຳເລັດ ໃນວັນທີ 8 ທັນວາ 2016 ແລະ ນັບແຕ່ປີ 2017 ເປັນຕົ້ນມາ Lynda.com ໄດ້ລວມເອົາເວັບໄຊທ໌ LinkedIn Learning ເຊິ່ງປະຈຸບັນໃຫ້ບໍລິການຫຼາຍກ່ວາ 10,000 ອົງກອນທົ່ວໂລກ ເຊິ່ງມີຫຼາຍກວ່າ 7,000 ຫຼັກສູດ.

Lynda Weinman ອາຍຸ 64 ປີ ໃນປີ 2017 ຖືກຈັດອັນດັບເປັນເສດຖີຊາວອາເມລິກາທີ່ສ້າງຕົນເອງເປັນລຳດັບທີ 55 ດ້ວຍຊັບສິນທີ່ມີມູນຄ່າ 280 ລ້ານໂດລາສະຫະລັດ ແລະ ນີ້ແມ່ນເລື່ອງຄວາມສຳເລັດພາຍໃນໄລຍະ (20ປີ) ທີ່ເຮັດໃຫ້ລາວເປັນເສດຖີພັນລ້ານ.