ອາທິດຜ່ານມາ “ມີເດຍລາວ ອອນລາຍ…” ມີບົດພາດຫົວຂໍ້:..ບໍ່ຄວນປ່ອຍລາຄາໄຟຟ້າເດືອນພຶດສະພາ…ໃນວັນທີ 21/05/2020.

ເຊິ່ງຕໍ່ມາກໍ່ມີການຖະແຫຼງຂ່າວຈາກຄະນະນຳຂອງບໍລິສັດໄຟຟ້າລາວກ່ຽວກັບການເໜັງຕີງຄ່າກະແສໄຟຟ້າທີ່ສັງຄົມໃຫ້ຄວາມສົນໃຈຫຼາຍ…ແຕ່ເບິ່ງຄືວ່າສັງຄົມບໍ່ໂລ່ງໃຈປານໃດ? ແຕ່ທຸກບັນຫາຍ່ອມມີທາງອອກສະເໝີ…ໂດຍໃນທີ່ສຸດສັງຄົມກໍ່ໂລ່ງໃຈ ຊື່ນຊົມຍິນດີ.

ເມື່ອກອງປະຊຸມລັດຖະບານສະໄໝສາມັນປະຈຳເດືອນພຶດສະພາ ທີ່ໄຂຂຶ້ນໃນວັນທີ 21 ແລະ ປິດລົງໃນວັນທີ 22 ພຶດສະພາ 2020 ພາຍໄຕ້ການເປັນປະທານຂອງ ທ່ານ ທອງລຸນ ສີສຸລິດ; ນາຍົກລັດຖະມົນຕີ; ມີບັນດາທ່ານຮອງນາຍົກລັດຖະມົນຕີ; ລັດຖະມົນຕີ ສະມາຊິກລັດຖະບານ ເຂົ້າຮ່ວມຢ່າງພ້ອມພຽງ. ກອງປະຊຸມໄດ້ພິຈາລະນາຫຼາຍບັນຫາສຳຄັນ ເຊິ່ງໃນນັ້ນມີຂໍ້ທີ 5 ກ່າວວ່າ:”…ໃຫ້ກະຊວງພະລັງງານ ແລະ ບໍ່ແຮ່, ກວດກາຄືນ ກ່ຽວກັບຄ່າກະແສໄຟຟ້າເຫັນວ່າ ສັງຄົມມີຄວາມສົນໃຈຫຼາຍ; ເນື່ອງຈາກ ຄ່າບໍລິການຊົມໃຊ້ກະແສໄຟຟ້າເພິ່ມຂຶ້ນສູງ. ພ້ອມນີ້ກໍ່ໃຫ້ອະທິບາຍຊີ້ແຈງຢ່າງສົມເຫດສົມຜົນກ່ຽວກັບຄ່າກະແສໄຟຟ້າ ໃຫ້ສັງຄົມມີຄວາມເຂົ້າໃຈ ແລະ ມີຄວາມສະຫງົບ; ພ້ອມນັ້ນກໍ່ໃຫ້ກວດຄືນລະບົບ, ການຕິດຕັ້ງ ແລະ ເດີນສາຍໄຟຟ້າ ໃນໄລຍະຜ່ານມານີ້ເຫັນວ່າຈຳນວນອັກຄີໄພເພີ່ມຫຼາຍຂຶ້ນ ໂດຍສະ ເພາະໄຟຟ້າລັດວົງຈອນ ເຮັດໃຫ້ບ້ານເຮືອນຂອງປະຊາຊົນຖືກໄຟໄໝ້ ແລະ ກະທົບຕໍ່ການດຳລົງຊີວິດຂອງເຂົາເຈົ້າ…”

ສະນັ້ນ ຈຶ່ງຮຽກຮ້ອງໃຫ້ທຸກທ່ານທົ່ວສັງຄົມຈົ່ງລໍຟັງ ແຈ້ງການຈາກກະຊວງພະລັງງານ ແລະ ບໍ່ແຮ່ ກ່ຽວກັບຄ່າກະແສໄຟຟ້າຕາມການມອບໝາຍຂອງລັດຖະບານ.

ໃນກອງປະຊຸມລັດຖະບານຄັ້ງນີ້ຍັງຮຽກຮ້ອງໃຫ້ສື່ມວນຊົນທຸກປະເພດລວມທັງສື່ອອນລາຍຕ່າງໆຈົ່ງຍົກສູງນ້ຳໃຈຮັກຊາດ; ຮັບໃຊ້ປະຊາຊົນບັນດາເຜົ່າ; ອອກຂ່າວ; ໃຫ້ຂໍ້ມູນຂ່າວສານຕ່າງໆໃຫ້ຖືກຕ້ອງກັບຄວາມເປັນຈິງ ແລະ ເປັນປະໂຫຍດສູງສຸດໃຫ້ແກ່ຊາດ ແລະ ປະຊາຊົນ; ຫຼີກເວັ້ນການອອກຂ່າວໃຫ້ຂໍ້ມູນເທັດທີ່ຈະສ້າງຄວາມປັ່ນປ່ວນ ແລະ ເປັນຜົນກະທົບດ້ານລົບຕໍ່ຈິດໃຈ; ຄວາມສະຫງົບ ແລະ ຄວາມເປັນລະບຽບຮຽບຮ້ອຍ; ຄວາມປອດໄພຂອງສັງຄົມ.

ສະນັ້ນ ສື່ມວນຊົນທຸກປະເພດລວມທັງສື່ອອນລາຍຕ້ອງນຳເອົາຂໍ້ມູນການອະທິບາຍຊີ້ແຈງຈາກກະຊວງພະລັງງານ ແລະ ບໍ່ແຮ່ ຕາມການມອບໝາຍຂອງລັດຖະບານທໍ່ນັ້ນ…%

ໂດຍ: ທິດດີ