ພິທີເຊັນສັນຍາ ການບໍລິການ ຮັບ-ສົ່ງສັນຍານ ວິທະຍຸ-ໂທລະພາບດາວທຽມ

0
223

ໃນວັນທີ 26 ພຶດສະພາ 2020, ທີ່ໂຮງແຮມ ແລນມາກ, ນະຄອນຫຼວງວຽງຈັນ ໄດ້ຈັດພິທີເຊັນສັນຍາ ການບໍລິການ ຮັບ-ສົ່ງສັນຍານ ວິທະຍຸ-ໂທລະພາບດາວທຽມ ລະຫວ່າງ ກົມສື່ມວນຊົນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ບໍລິສັດ ດາວທຽມລາວ ເອເຊຍ-ປາຊີຟີກ ຈຳກັດ.

ໂດຍການເປັນກຽດເຂົ້າຮ່ວມໃນພິທີຂອງດັ່ງກ່າວມີ:

 1. ທ່ານ  ສາດສດາຈານ ປຣີຍາເອກ ກິແກ້ວ ໄຂຄໍາພິທູນ ເລຂາທິການສູນກາງພັກ, ເລຂາຄະນະພັກ,  ລັດຖະມົນຕີ ກະຊວງ ຖວທ;

2. ທ່ານ ປຣີຍາເອກ ທັນສະໄໝ ກົມມະສິດ ກໍາມະການສູນກາງພັກ, ລັດຖະມົນຕີ ກະຊວງ ປທສ;

3. ທ່ານ ສະຫວັນຄອນ ຣາຊະມຸນຕີ ຮອງ ລມຕ ກະຊວງ ຖວທ;

4. ທ່ານ ຫຽມ ພົມມະຈັນ ປະທານສະພາບໍລິຫານບໍລິສັດດາວທຽມລາວເອເຊຍປາຊີຟິກຈໍາກັດ;

5. ທ່ານ ຕິງ ຢົງບິງ ຜູ້ອໍານວຍການໃຫຍ່ບໍລິສັດດາວທຽມລາວ ເອເຊຍ-ປາຊີຟິກຈໍາກັດ; 

6. ທ່ານ ປິ່ນປາຖະໜາ ພັນທະມາລີ ຫົວໜ້າກົມສື່ມວນຊົນ;

ມີບັນດາທ່ານ ຫົວໜ້າກົມ, ຮອງກົມ, ພະນັກງານທີ່ກ່ຽວຂ້ອງຈາກກະຊວງ ຖວທ, ກະຊວງ ປທສ ແລະ ບໍລິສັດກໍໄດ້ໃຫ້ກຽດເຂົ້າຮ່ວມຢ່າງພ້ອມພຽງ.

ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ບໍລິສັດ ດາວທຽມລາວ ເອເຊຍ-ປາຊີຟິກ ຈຳກັດ ໄດ້ຮ່ວມກັນຈັດພິທີ ເຊັນສັນຍາວ່າດ້ວຍການບໍລິການ ຮັບ-ສົ່ງ ສັນຍານວິທະຍຸ-ໂທລະພາບຜ່ານດາວທຽມລາວແຊັດ 1 ຊຶ່ງເປັນດາວທຽມຂອງລາວເຮົາເອງ ເພື່ອໃຫ້ບໍລິການສົ່ງສັນຍານ ໂທລະພາບ ແລະ ວິທະຍຸ ຈາກນະຄອນຫລວງວຽງຈັນ ລົງໄປຮອດທ້ອງຖິ່ນໃນທົ່ວປະເທດ ແລະ ຕ່າງປະເທດຈໍານວນໜຶ່ງ.

ກົມສື່ມວນຊົນ, ກະຊວງ ຖວທ ໄດ້ເຊັນສັນຍານໍາໃຊ້ດາວທຽມລາວແຊັດ 1 ເລີ່ມແຕ່ ວັນທີ 1 ເມສາ 2020 ຫາ 31 ທັນວາ 2024 ເພື່ອບໍລິການໃນການສົ່ງສັນຍານ ໂທລະພາບແຫ່ງຊາດ ຊ່ອງ ທຊລ 1  ແລະ ສັນຍານຄື້ນວິທະຍຸກະຈາຍສຽງແຫ່ງຊາດ ລະບົບ AM ແລະ FM ໂດຍມີສູນສົ່ງສັນຍານຂຶ້ນດາວທຽມທີ່ສະຖານີດາວທຽມພາກພື້ນດິນ ຫລັກ 52 ເປັນຫລັກ ແລະ ສະຖານີດາວທຽມຫລັກ 14 ຂອງບໍລິສັດດາວທຽມລາວ ເອເຊຍ ປາຊີຟິກ ເປັນສະຖານີສໍາຮອງ. ພາຍຫລັງທີ່ ສປປ ລາວ ເຮົາມີດາວທຽມແລ້ວ, ລັດຖະບານໄດ້ອະນຸຍາດໃຫ້ ກະຊວງ ຖວທ ຫັນມານໍາໃຊ້ດາວທຽມລາວແຊັດ 1 ເພື່ອສືບຕໍ່ເຜີຍແຜ່ແນວທາງນະໂຍບາຍ ຂອງພັກລັດ ໃຫ້ໄປຮອດໄປເຖິງ ປະຊາຊົນທີ່ຢູ່ ທັງພາຍໃນ ແລະຕ່າງປະເທດ ເຂດຫ່າງໄກສອກຫລີກ ທຸລະກັນດານ ໃຫ້ໄດ້ຮັບຂໍ້ມູນຂ່າວສານຢ່າງວ່ອງໄວທັນເວລາ ຢ່າງເອກະພາບໃນຂອບເຂດທົ່ວປະເທດ.

Medialaos MMD