ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ຖະແຫຼງຂ່າວປະຈໍາວັນພຸດ ວັນທີ 27 ພຶດສະພາ ປີ2020 ໂດຍ: ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ.

ສະພາບການເຝົ້າລະວັງ COVID-19 ຢູ່ ສປປ ລາວ ມາຮອດ 5 ໂມງແລງ ຂອງວັນທີ 26 ພຶດສະພາ 2020 ການຕິດຕາມຜູ້ເດີນທາງຢູ່ຈຸດຜ່ານແດນຕ່າງໆ ຈໍານວນຜູ້ເດີນທາງເຂົ້າມາມີທັງໝົດ 1,878 ຄົນ ຄື: ຈຸດຜ່ານດ່ານ ລາວ-ໄທ ທັງໝົດ 1,222 ຄົນ, ໃນນັ້ນມີແຮງງານລາວກັບມາຈາກປະເທດໄທທັງໝົດ 11 ຄົນ, ຜ່ານດ່ານສາກົນວັງເຕົົ່າ-ຊ່ອງເມັກ ແຂວງຈຳປາສັກເຫຼືອນັ້ນແມ່ນຄົນຂັບລົດຂົນສົົ່ງສິນຄ້າ, ຈຸດຜ່ານດ່ານ ລາວ-ຈີນ ທັງໝົດ 04 ຄົນ, ໃນນັ້ນມີແຮງງານຄົນລາວກັບມາຈາກປະເທດຈີນ 01 ຄົນ, ເຫຼືອນັ້ນແມ່ນຜູ້ຂັບລົດຂົນສົ່ງສິນຄ້າ. ສ່ວນຈຸດຜ່ານດ່ານລາວ-ຫວຽດ ມີຈຳນວນທັງໝົດ 652 ຄົນ ທັງໝົດແມ່ນຄົນຂັບລົດຂົນສົ່ງສິນຄ້າ. ສ່ວນຈຳນວນຜູ້ເດີນທາງຜ່ານສະໜາມບິນສາກົນວັດໄຕ 00 ຄົນ. ໃນທຸກດ່ານແມ່ນໄດ້ກວດແທກອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.

ສຳລັບແຮງງານລາວຈຳນວນ 11 ຄົນທີ່ມາຈາກປະເທດໄທເຊິ່ງຜ່ານດ່ານວັງເຕົ່າ-ຊ່ອງເມັກແຂວງຈຳປາສັກມີຖິ່ນຖານມາຈາກແຂວງຈໍາປາສັກ 08 ຄົນ, ສະຫວັນນະເຂດ 02 ຄົນ, ສາລະວັນ 01 ຄົນ. ແຮງງານລາວກັບມາຈາກປະເທດຈີນ ຜ່ານດ່ານບໍ່ເຕັນ, ແຂວງຫຼວງນ້ຳທາ 01 ຄົນ ມີຖິ່ນຖານຢູ່ແຂວງຫົວພັນ. ແຮງງານລາວທັງໝົດໄດ້ເກັບຕົວຢ່າງມາກວດ ແລ້ວນຳສົ່ງໄປຈຳກັດບໍລິເວນຢູ່ສະຖານທີ່ທີ່ກຳນົດໄວ້ຈົນກ່ວາຈະຄົບກຳນົດ 14 ວັນ.

ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດນັ້ນ ໃນວັນທີ 26 ພຶດສະພາ 2020, ໄດ້ເກັບຕົວຢ່າງມາກວດວິເຄາະທັງໝົດ 83 ຄົນ, ໃນນັ້ນມີແຮງງານລາວທີ່ກັບມາແຕ່ໄທ 72 ຄົນ, ແຮງງານຫວຽດນາມ 06 ຄົນ, ກໍລະນີສົງໃສ 01 ຄົນ ແລະ ຄົນເຈັບຕິດເຊື້ອນອນປີ່ນປົວຢູ່ໂຮງໝໍມິດຕະພາບທີ່ເກັບຕົວຢ່າງມາກວດຄືນ 04 ຄົນ.

ສຳລັບແຮງງານລາວທີ່ກັບມາຈາກປະເທດໄທ 72 ຄົນເຊີ່ງມາຈາກທ້ອງຖີ່ນແຕ່ລະແຂວງລາຍລະອຽດດັ່ງນີ້: ແຂວງສະຫວັນນະເຂດ 24 ຄົນ, ວຽງຈັນ 21 ຄົນ, ຈຳປາສັກ 14 ຄົນ, ສາລະວັນ 08 ຄົນ, ບໍລິຄຳໄຊ 03 ຄົນ, ໄຊຍະບູລີ 01 ຄົນ, ເຊກອງ 01 ຄົນ. ຜົນກວດແຮງງານລາວ ແລະ ກໍລະນີສົງໃສທັງໝົດແມ່ນ ບໍ່ພົບເຊື້ອ.

ສຳລັບຜົນກວດຄົນເຈັບທີ່ຕິດເຊື້ອ 4 ຄົນ ແມ່ນໃຫ້ຜົນລົບ 02 ຄົນ (ບໍ່ພົບເຊື້ອ) ເປັນຈຳນວນ 2 ຄັ້ງ ສະນັ້ນພວກກ່ຽວໄດ້ອອກໂຮງໝໍໄປຈຳກັດບໍລິເວນຢູ່ເຮືອນໃຫ້ຄົບ 14 ວັນ ເພື່ອຕິດຕາມອາການຂອງພວກກ່ຽວ.

Medialaos MMD