ເພື່ອເປັນການສືບຕໍ່ຈັດຕັ້ງ ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ແລະ ແຈ້ງການຂອງ ກົມອຸດສາຫະກຳ ແລະ ຫັດຖະກຳ ໃນການກຳນົດທິດທາງແຜນການປັບປຸງ ແລະ ດັດສົມ ໂຮງງານປຸງແຕ່ງໄມ້ ໃຫ້ສຳເລັດຕາມລະດັບຄາດໝາຍ ແນໃສ່ຫັນບັນດາໂຮງງານປຸງແຕ່ງໄມ້ ເຂົ້າສູ່ການຄຸ້ມຄອງຕາມລະບຽບກົດໝາຍເທື່ອລະກ້າວ.

ໃນຕອນເຊົ້າ ວັນທີ 30 ສິງຫາ 2019 ນີ້ ກອງປະຊຸມປຶກສາຫາລືກ່ຽວກັບແຜນການສືບຕໍ່ປັບປຸງ ແລະ ດັດສົມໂຮງງານອຸດສາຫະກຳໄມ້ ໄດ້ເປີດຂື້ນ ທີ່ຫ້ອງປະຊຸມເບີ 2 ຫ້ອງວ່າການແຂວງ ພາຍໃຕ້ການເປັນປະທານຂອງທ່ານ ນາງ ສິງຄຳ ຄົງສະຫວັນ ຮອງເຈົ້າແຂວງໆ ວຽງຈັນ, ທ່ານ ໄພວັນ ປະຖັມມະວົງ ຫົວໜ້າພະແນກອຸດສາຫະກຳ ແລະ ການຄ້າແຂວງ, ທ່ານ ສະຫວາດ ຂຸນດາວົງ ຮອງຫົວໜ້າກົມອຸດສາຫະກຳ ແລະ ຫັດຖະກຳ, ມີບັນດາທ່ານ ຫົວໜ້າພະແນກ, ຮອງພະແນກ, ເຈົ້າເມືອງ, ຮອງເຈົ້າເມືອງ, ຫົວໜ້າ, ຮອງຫ້ອງການອຸດສາຫະກຳ ແລະ ການຄ້າເມືອງ ເຂົ້າຮ່ວມ.

ກອງປະຊຸມພວກເຮົາໃນຄັ້ງນີ້ ແມ່ນມີຄວາມໝາຍຄວາມສໍາຄັນເປັນຢ່າງຍິ່ງ ເພາະເປັນການຈັດຕັ້ງປະຕິ ບັດທິດຊີ້ນໍາ ແລະ ນະໂຍບາຍຂອງລັດຖະບານ. ໂດຍສະເພາະແມ່ນການຈັດຕັ້ງຜັນຂະຫຍາຍຄໍາສັ່ງເລກທີ 15/ນຍ, ລົງວັນທີ 13/05/2016. ທີ່ທຸກໆຂະແໜງການທົ່ວປະເທດເວົ້າລວມ, ເວົ້າສະເພາະກໍ່ຄືແຂວງວຽງຈັນ ພວກເຮົາກໍາລັງສຸມໃສ່ຈັດຕັ້ງປະຕິບັດ ເພື່ອເຮັດໃຫ້ວຽກງານຄຸ້ມຄອງ ໂຮງງານປຸງແຕ່ງໄມ້, ເຟີນິເຈີໄມ້ ແລະ ການຄ້າໄມ້ ໃຫ້ເຂົ້າສູ່ລະບົບ ມີຄວາມສະຫງົບໂດຍພື້ນຖານ.

ການປັບປຸງໂຮງງານປຸງແຕ່ງໄມ້ກໍ່ແມ່ນເພື່ອຈຸດປະສົງແນໃສ່ການນໍາໃຊ້ວັດຖຸດິບໃຫ້ຄຸ້ມຄ່າ, ສ້າງມູນຄ່າເພີ່ມໃຫ້ແກ່ຜະລິດຕະພັນສູງສຸດ, ຜະລິດຕະພັນສາມາດແຂ່ງຂັນກັບຕະຫຼາດສາກົນໄດ້. ຄຽງຄູ່ກັບການປັບປຸງໂຮງງານແລ້ວ ກໍ່ຍັງມີວຽກງານດັດສົມໂຮງງານ ເນື່ອງຈາກວ່າຍັງມີບາງໂຮງງານເຄື່ອນໄຫວບໍ່ຖືກຕ້ອງ, ບໍ່ມີການປັບປຸງໂຮງງານຕົນເອງ, ຍິ່ງໄປກ່ວານັ້ນບາງໂຮງງານກໍ່ໄດ້ຮື້ຖອນເຄື່ອງຈັກອອກແລ້ວ. ສະນັ້ນ, ຕໍ່ກັບບັນຫາການປັບປຸງ ແລະ ດັດສົມໂຮງງານດັ່ງກ່າວນີ້ ຂ້າພະເຈົ້າຈຶ່ງຂໍສະເໜີບັນດາທ່ານຊ່ວຍມີຄໍາຄິດຄໍາເຫັນ ເພື່ອຈະໄດ້ພ້ອມກັນຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າ.

ພາບ ແລະ ຂໍ້ມູນ : ຄອນສະໄຫມ
ຮຽບຮຽງ : ພູເງິນ ບົວທອງ
ແຂວງວຽງຈັນ MediaLaos