ເຄີຍຂຽນເລື່ອງຫວຍເຖື່ອນ…ການພະນັນທາງອອນລາຍມາແລ້ວສອງບົດລົງຕິດຕໍ່ກັນໃນອອນລາຍພວກເຮົາຄືໃນວັນທີ 20/05/2020 ເລື່ອງ ຫວຍຕ່າງປະເທດ ແລະ ໃນວັນທີ 23/05/2020 ເລື່ອງ ຕ້ອງມີສະຕິ; ການພະນັນເທິງໜ້າເຟສບຸກ ແຕ່ເພື່ອນຜູ້ອ່ານອອນລາຍພັດຕັ້ງບັນຫາວ່າ: ປານໃດຊິມີການເຂັ້ມງວດເລື່ອງນີ້ ແລະ ເປັນໜ້າທີ່ຂອງພາກສ່ວນໃດວ່າຊັ້ນ!…ຈະປ່ອຍປະໄປແນວນີ້ມັນຊິເປັນບໍ?

ຕາມຊອກຮູ້ໃນແຈ້ງການຂອງຫ້ອງວ່າການສຳນັກງານນາຍົກ ແຕ່ປີ 2017 ພຸ້ນ ແມ່ນມອບ ໃຫ້ກະຊວງການເງິນ ແລະ ກະຊວງປ້ອງກັນຄວາມສະຫງົບ ເປັນຜູ້ແກ້ໄຂ ແລະ ດຳເນີນການຕາມກົດໝາຍ ໂດຍສະເພາະແມ່ນກົດໝາຍອາຍາ.

ເວົ້າແລື່ອງແຈ້ງການແມ່ນມີແຈ້ງການເລກທີ 1244/ຫສນຍ-ກລຂ ລົງວັນທີ 17 ສິງຫາ 2017 ແລະ ແຈ້ງການເລກທີ 1971/ຫສນຍ-ກລຂ ລົງວັນທີ 13 ທັນວາ 2017; ສ່ວນເບື້ອງກະຊວງປ້ອງກັນຄວາມສະຫງົບກໍ່ມີແຈ້ງການຂອງກົມຕຳຫຼວດເສດຖະກິດ ເລກທີ 701/302 ລົງວັນທີ 27/03/2020 ຕໍ່ເພື່ອນຜູ້ອ່ານອອນລາຍຕັ້ງບັນຫາວ່າ ເປັນໜ້າທີ່ຂອງພາກສ່ວນໃດ? ກໍ່ຄົງຈະແຈ້ງແລ້ວນໍ? ສ່ວນການເຂັ້ມງວດໃນການຈັດຕັ້ງປະຕິບັດນັ້ນຄົງຕ້ອງລໍເບິ່ງນໍ? ພວກເພິ່ນກໍ່ຄົງຈະມີວິທີແກ້ໄຂ.

ເວົ້າເລື່ອງແຈ້ງການນີ້ກໍ່ຫາກມີຫຼາຍແຈ້ງການທີ່ຍັງບໍ່ທັນຖືກປະຕິບັດຢ່າງເຂັ້ມງວດ.

ຂໍໃຫ້ເຫັນໃຈເຈົ້າໜ້າທີ່ຜູ້ປະຕິບັດຍາກຫຼາຍ .

ໂດຍ: ທິດດີ