ເຈົ້າ​ຮູ້​ບໍ່?.. ການນອນຫຼັບພຽງພໍຕະຫຼອດຄືນສາມາດສົ່ງຜົນດີຕໍ່ສຸຂະພາບ ໃນຂະນະດຽວກັນຍັງຊ່ວຍຫຼຸດຜ່ອນຄວາມຕຶງຄຽດໄດ້ເຊັ່ນກັນ ໃນເວລານອນຮ່າງກາຍຂອງເຮົາມີກົນໄກໃນການສ້ອມແປງຈຸລັງ ແລະ ອະໄວຍະວະຕ່າງໆ ລວມທັງຮໍໂມນ ການດຸ່ນດ່ຽງໃນຮ່າງກາຍ ສົ່ງຜົນໃຫ້ມີສຸຂະພາບແຂງແຮງ.

ຍ້ອນວ່າຊີວິດປະຈຳວັນມີຄວາມຫຍຸ້ງຍາກເຮັດໃຫ້ການນອນຫຼັບຍາກສຳລັບບາງຄົນ ແຕ່ບໍ່ຕ້ອງກັງວົນ ເພາະອາການເຫຼົ່ານີ້ຍັງມີວິທີແກ້ໄຂຢູ່ ເຮົາມີ 7 ເຄັດລັບສຳລັບຄົນທີ່ນອນຫຼັບຍາກພະຍາຍາມປ່ຽນພຶດ ຕິກຳໂດຍບໍ່ຈຳເປັນຕ້ອງກິນຢານອນຫຼັບຊ່ວຍ ເຊື່ອໄດ້ວ່າໃນເວລາພຽງສອງສາມຄືນທ່ານຈະໄດ້ນອນຫຼັບສະນິດ, ໜ້າຕາສົດຊື່ນຢ່າງແນ່ນອນ …

  • ສ້າງບັນຍາກາດຫ້ອງນອນໃໝ່ ຫ້ອງນອນທີ່ດີຄວນຈະງຽບ, ບໍ່ມີສຽງລົບກວນ, ອຸນຫະພູມໃນຫ້ອງຕ້ອງເຢັນ ແລະ ບໍ່ມີແສງສະຫວ່າງສົດໃສຈາກແສງໄຟແຮງໃນຕອນກາງຄືນ ເຊັ່ນດຽວກັບໂທລະສັບສະມາດໂຟນ ຫຼື ແທັບເລັດ ຄວນຫຼີກລ່ຽງເດັດຂາດສຳລັບຄົນນອນຫຼັບຍາກ.
  • ພັກຜ່ອນ 1-2 ຊົ່ວໂມງກ່ອນເຂົ້ານອນ ລອງເຮັດກິດຈະກໍາທີ່ຊ່ວຍໃຫ້ຮ່າງກາຍຜ່ອນຄາຍເຊັ່ນ:ການຝຶກເພື່ອຜ່ອນຄາຍກ້າມເນື້ອໂດຍການຫາຍໃຈເລີກໆ ແລະ ປ່ອຍລົມຫາຍໃຈຊ້າໆ ພະຍາຍາມມີສະຕິໃຫ້ຢູ່ກັບການຫາຍໃຈຈະໄດ້ຮັບຜົນດີຍີ່ງຂື້ນ ຢຸດຄິດເລື່ອງຕ່າງໆ ຢຸດຄິດບັນຫາ ບອກຕົວເອງວ່ານີ້ແມ່ນເວລາທີ່ຄວນນອນ ແລະ ເວລາຕ້ອງພັກຜ່ອນ ບັນຫາທັງໝົດເອົາໄວ້ມື້ອື່ນ.
  • ການກິນອາຫານທີ່ມີແມກນີຊຽມສູງ ເຊັ່ນ: ໝາກໄມ້, ເມັດພືດ, ອາໂວກາໂດ, ໝາກກ້ວຍ, ນົມສົ້ມ, ມັນຝຣັ່ງ, ໝາກອຶ, ຜັກຫົມ, ນົມຖົ່ວເຫຼືອງ, ນໍ້າເຕົ້າຮູ້ ແລະ ປາທູນາ ເພາະຖ້າຮ່າງກາຍຂາດແມກນີຊຽມຈະສົ່ງຜົນກະທົບຕໍ່ລະບົບປະສາດ, ສະໝອງທີ່ຊ່ວຍໃຫ້ການນອນຫຼັບ ແລະ ຄວນງົດເວັ້ນອາຫານທີ່ມີສານຄາເຟອີນ ເພາະອາຫານເຫຼົ່ານີ້ຈະເຮັດໃຫ້ລະບົບປະສາດຕື່ນຕົວ ແລະ ບໍ່ສາມາດນອນຫຼັບໄດ້.
  • ແຊ່ຕີນດ້ວຍນໍ້າອຸ່ນກ່ອນນອນມັນເປັນວິທີທາງທຳມະຊາດ ແລະ ສົ່ງເສີມໃຫ້ມີສຸຂະພາບດີ ພຽງແຕ່ແຊ່ຕີນຂອງທ່ານລົງໃນນໍ້າດ້ວຍອຸນຫະພູມປະມານ 40-50 ອົງສາ ຫຼັງຈາກນັ້ນໃຫ້ໃຊ້ຝາມືຖູບໍລິເວນອ້ອມຕີນເພື່ອກະຕຸ້ນການໄຫຼວຽນຂອງເລືອດ ສາມາດຊ່ວຍບັນເທົາອາການອ່ອນເພຍ ຫຼຸດຜ່ອນຄວາມເຄັ່ງຕຶງຂອງສະໝອງ ເຮັດໃຫ້ທ່ານນອນຫຼັບສະບາຍ.
  • ກິ່ນຫອມລາເວນເດີຊ່ວຍບຳບັດ ກິ່ນຫອມຂອງສະໝຸນໄພທຳມະຊາດທີ່ຖືກສະກັດອອກເປັນນໍ້າມັນຫອມ ຫຼື ດັ່ງທີ່ພວກເຮົາຮູ້ອີກຢ່າງໜື່ງວ່າ “ອາໄຣມາເທີລາປີ” ຊ່ວຍໃຫ້ຮູ້ສຶກສົດຊື່ນ ແລະ ຜ່ອນຄາຍ ສຳລັບທ່ານໃດທີ່ມີບັນຫາກ່ຽວກັບການນອນບໍ່ຫຼັບ ແນະນຳໃຫ້ໃຊ້ນໍ້າມັນຫອມກິ່ນລາເວນເດີທີ່ (lavender) ເຊິ່ງຊ່ວຍໃຫ້ນອນຫຼັບງ່າຍ ປັບອາລົມໃຫ້ສົມດຸນ ແລະ ເຮັດໃຫ້ຈິດໃຈສະຫງົບ.
  • ປັບອຸນຫະພູມ ແລະ ເຄື່ອງປັບອາກາດ ສຳລັບການນອນຫຼັບທີ່ສະບາຍ ຄວນຕັ້ງອຸນຫະພູມໃນລະດັບ 17-25 ອົງສາ ນອກຈາກນີ້ຍັງໃຫ້ໃຊ້ເຄື່ອງປັບອາກາດຢູ່ໃນຫ້ອງນອນເພື່ອເພີ່ມປະລິມານອົກຊີເຈນໃນຫ້ອງ ແລະ ຍັງຊ່ວຍກຳຈັດສານພິດ ແລະ ສານທີ່ກໍ່ໃຫ້ເກີດພູມແພ້ ທີ່ມີສ່ວນປະກອບນ້ອຍໆ ການປັບອຸນຫະພູມ ແລະ ການນຳໃຊ້ເຄື່ອງປັບອາກາດແມ່ນອີກວິທີໜຶ່ງທີ່ຈະຊ່ວຍໃຫ້ນອນຫຼັບດີໄດ້ຢ່າງຕໍ່ເນື່ອງ.
  • ນອນຫຼັບໃຫ້ເປັນເວລາ ຄົນທີ່ນອນຫຼັບຍາກປ່ຽນນິໄສການນອນແມ່ນເປັນສີ່ງສຳຄັນ ທົດລອງຈັດຕາຕະລາງເວລານອນໃນເວລາດຽວກັນທຸກໆ ຄືນໃຫ້ຈະກາຍເປັນເລື່ອງປົກກະຕິ ຮ່າງກາຍຂອງເຮົາຈະປັບຕົວ ແລະ ຄຸ້ນເຄີຍຈົນກວ່າມັນຈະສາມາດນອນໄດ້ໃນເວລານັ້ນ ວິທີການນີ້ຕ້ອງຄ່ອຍໆ ເຮັດ ເພາະຖ້າຫາກຮີບຮ້ອນຫຼາຍຈະກາຍເປັນຄວາມທໍ້ແທ້ໃຈຂອງຕົນເອງ ຊື່ງຈະເຮັດໃຫ້ເຮົາຄຽດ ແລະ ນອນບໍ່ຫຼັບ.

ທົດລອງໃຊ້ວິທີເຫຼົ່ານີ້ເບີ່ງ ເພື່ອການນອນຫຼັບໃຫ້ພຽງພໍ ແລະ ມີຄວາມສຸກບໍ່ແມ່ນເລື່ອງຍາກອີກຕໍ່ໄປ…