ສະພາປະຊາຊົນແຂວງໄຊສົມບູນ ຊຸດທີ I ໄຂກອງປະຊຸມ ສະໄໝວິສາມັນ ເທື່ອທີ 1

0
255

ກອງປະຊຸມສະໄໝວິສາມັນ ເທື່ອທີ 1 ຂອງສະພາປະຊາຊົນ ແຂວງໄຊສົມບູນ ຊຸດທີ I ໄດ້ໄຂຂຶ້ນຢ່າງເປັນທາງການໃນວັນທີ 29 ສິງຫາ 2019 ນີ້ ທີ່ສະໂມສອນເມືອງອະນຸວົງ ໂດຍການເປັນປະທານຮ່ວມຂອງທ່ານ ບຸນສຸກ ຈອມວິສານ, ປະທານສະພາປະຊາຊົນແຂວງ, ມີທ່ານ ຄຳແດງ ສີລາວົງ, ຮອງປະທານສະພາປະຊາຊົນ ແຂວງ ແລະ ທ່ານ ພັທ ວິໄຊທໍ່ ເພຍຫຼວງຈົ່ງເສີ, ຮອງປະທານສະພາປະຊາຊົນແຂວງ, ມີສະມາຊິກສະພາແຫ່ງຊາດ ປະຈຳເຂດເລືອກຕັ້ງ 18 ສະມາຊິກສະພາປະຊາຊົນ ແຂວງ ປະຈຳເຂດເລືອກຕັ້ງ ແຕ່ລະເມືອງ, ເຂົ້າຮ່ວມກອງປະຊຸມຄັ້ງນີ້ ໂດຍທ່ານ ພົຕ ຄຳລຽງ ອຸທະໄກສອນ, ເຈົ້າແຂວງໄຊສົມບູນ ພ້ອມດ້ວຍພະແນກການ, ອົງການ-ກົມກອງ ອ້ອມຂ້າງແຂວງ ເຂົ້າຮ່ວມ.

ຕະຫຼອດໄລຍະການດຳເນີນກອງປະຊຸມ ບັນດາທ່ານສະມາຊິກສະພາປະຊາຊົນ ແຂວງ ໄດ້ເຊີດຊູຄວາມຮັບຜິດຊອບສູງໃນການຄົ້ນຄວ້າ, ປະກອບຄໍາຄິດຄໍາເຫັນ ຢ່າງມີເຫດຜົນ, ມີເນື້ອໃນເລິກເຊິ່ງ ແລະ ກວ້າງຂວາງ ພ້ອມນີ້ ກອງປະຊຸມ ໄດ້ມີຄວາມເປັນເອກະພາບສູງ ໃນການພິຈາລະນາ ແລະ ຮັບຮອງເອົາບັນດາເນື້ອໃນສຳຄັນຕ່າງໆ ທີ່ໄດ້ນຳເຂົ້າມາພິຈາລະນາໃນກອງປະຊຸມ ເປັນຕົ້ນ ພິຈາລະນາ ແລະ ຮັບຮອງເອົາການສະເໜີແຕ່ງຕັ້ງທ່ານ ແດງ ປະທຸມທອງ, ຫົວໜ້າຫ້ອງວ່າການແຂວງ ຂຶ້ນເປັນຮອງເລຂາພັກແຂວງ, ຮອງເຈົ້າແຂວງໄຊສົມບູນ, ພິຈາລະນາ ແລະ ຮັບຮອງເອົາທ່ານ ສົມບູນ ສອນລິດທິເດດ, ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງ ຂຶ້ນເປັນຫົວໜ້າຫ້ອງວ່າການ ແຂວງ ແລະ ພິຈາລະນາຮັບຮອງເອົາທ່ານ ຢົງຢີ ລີເຍ່ຍວື, ຮັກສາການຫົວໜ້າພະແນກສຶກສາທິການ ແລະ ກິລາ ແຂວງ ຂຶ້ນເປັນຫົວໜ້າພະແນກສຶກສາທິການ ແລະ ກິລາ ແຂວງ. ທັງນີ້ ກໍເພື່ອຕອບສະໜອງຕາມຄວາມຮ້ອງຕ້ອງການຕໍ່ໜ້າທີ່ການເມືອງຂອງພັກ ເວົ້າລວມ, ເວົ້າສະເພາະ ກໍຄືແຂວງໄຊສົມບູນ ທັງສະເພາະໜ້າ ແລະ ຍາວນານ. ຊຶ່ງກອງປະຊຸມ ສະໄໝວິສາມັນ ເທື່ອທີ 1 ຂອງສະພາປະຊາຊົນ ແຂວງໄຊສົມບູນ ຊຸດທີ I ໄດ້ຮັບຜົນສຳເລັດຢ່າງຈົບງາມ ຕາມແຜນການທີ່ວາງໄວ້. ໃນໂອກາດກ່າວສູນພົດອັດກອງປະຊຸມ ທ່ານ ບຸນສຸກ ຈອມວິສານ, ປະທານສະພາປະຊາຊົນ ແຂວງ ໄດ້ຮຽກຮ້ອງມາຍັງຄະນະປະຈຳສະພາປະຊາຊົນ ແຂວງ ສະມາຊິກສະພາແຫ່ງຊາດ ປະຈຳເລືອກຕັ້ງທີ 18, ສະມາຊິກສະພາປະຊາຊົນ ແຂວງ ແລະ ອົງການປົກຄອງ ແຂວງ ໂດຍສະເພາະ ບັນດາບຸກຄະລາກອນ ທີ່ໄດ້ຮັບຮອງໃນກອງປະຊຸມ ຄັ້ງນີ້ ຈົ່ງພ້ອມກັນສືບຕໍ່ເສີມຂະຫຍາຍສະຕິປັນຍາຂອງຕົນ ຕໍ່ໜ້າທີ່ວຽກງານທີ່ພັກ-ລັດ ແລະ ປະຊາຊົນມອບໝາຍ ໃຫ້ມີຜົນສຳເລັດ, ມີນໍ້າໃຈເສຍສະຫຼະ, ມີຄວາມຮັບຜິດຊອບສູງ ພ້ອມກັນຊີ້ນຳ-ນຳພາ ຂະແໜງການທຸກຂັ້ນຂອງຕົນ ແລະ ປະກອບສ່ວນ ເຂົ້າໃນການຈັດຕັ້ງຜັນຂະຫຍາຍມະຕິກອງປະຊຸມ ຄັ້ງນີ້ ໃຫ້ໄດ້ຮັບຜົນສຳເລັດ ເພື່ອເຮັດໃຫ້ການປະຕິບັດພາລະກິດປົກປັກຮັກສາ ແລະ ສ້າງສາພັດທະນາ ແຂວງໄຊສົມບູນ ໃຫ້ມັ່ງຄັ່ງເຂັ້ມແຂງ ແລະ ປະຊາຊົນຫຼຸດພົ້ນອອກຈາກຄວາມທຸກຍາກ ເທື່ອລະກ້າວ.

ພາບ-ຂ່າວ: ຈິນລະວອນ ວໍລະສົມບູນ