ຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19

ປະຈໍາວັນເສົາ ວັນທີ 30 ພຶດສະພາ ປີ 2020

ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈໍາການ ຄະນະສະເພາະກິດ ລາຍງານວ່າ: ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 29 ພຶດສະພາ 2020 ແລະ ການຕິດຕາມຜູ້ເດີນທາງຢູ່ຈຸດຜ່ານແດນຕ່າງໆ ຈໍານວນຜູ້ເດີນທາງເຂົ້າມາ ມີທັງ ໝົດ 2,478 ຄົນ ຈຸດຜ່ານດ່ານລາວ-ໄທ 1,700 ຄົນ ໃນນີ້ມີແຮງງານລາວກັບມາຈາກປະເທດໄທ 155 ຄົນ ຜ່ານດ່ານຂົວມິດຕະພາບລາວ-ໄທ ແຫ່ງທີ I ນະຄອນຫຼວງວຽງຈັນ 99 ຄົນ, ຜ່ານດ່ານສາກົນວັງເຕົົ່າ-ຊ່ອງເມັກ ແຂວງຈຳປາສັກ ຈໍານວນ 51 ຄົນ, ຜ່ານດ່ານສາກົນຂົວມິດຕະພາບລາວ-ໄທ ແຫ່ງທີ II ສະຫວັນນະເຂດ ຈໍານວນ 05 ຄົນ; ພະນັກງານວິຊາການຄົນໄທເຮັດວຽກ ຢູ່ບໍລິສັດໄຟຟ້ານໍ້າງືມ 2 ຈໍານວນ 90 ຄົນ ຜ່ານດ່ານຂົວມິດຕະພາບລາວ-ໄທ ແຫ່ງທີ I ນະຄອນຫຼວງວຽງຈັນ, ເຫຼືອນັ້ນແມ່ນຄົນຂັບລົດຂົນສົົ່ງສິນຄ້າ 1,455 ຄົນ.

ຈຸດຜ່ານດ່ານລາວ-ຈີນ 35 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ ແລະ ຈຸດຜ່ານດ່ານລາວ-ຫວຽດນາມ 592 ຄົນ, ຄົນລາວກັບຈາກຫວຽດນາມ 08 ຄົນ ຜ່ານດ່ານລະໄລ ແຂວງສາລະວັນ 01 ຄົນ, ຜ່ານ ດ່ານສາກົນນໍ້າພ້າວ ແຂວງບໍລິຄໍາໄຊ  07 ຄົນ ເຫຼືອນັ້ນແມ່ນຄົນຂັບລົດຂົນສົ່ງສິນຄ້າ ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 151 ຄົນ. ໃນນີ້ມີນັກສຶກສາລາວກັບຈາກປະເທດມາເລເຊຍ143 ຄົນ, ຄົນມາເລເຊຍ 07 ຄົນ ແລະ ອິນໂດເນເຊຍ 01 ຄົນ.

ທຸກຄົນໄດ້ແທກອຸນຫະພູມຮ່າງກາຍ ແລະ ກວດຫາອາການຜິດປົກກະຕິ, ບໍ່ພົບຜູ້ມີອາການເປັນໄຂ້, ທັງໝົດໄດ້ເກັບຕົວຢ່າງມາກວດແລ້ວນຳສົ່ງໄປຈຳກັດບໍລິເວນຢູ່ສະຖານທີ່ທີ່ກຳນົດໄວ້ຈົນກ່ວາຈະຄົບກຳນົດ 14 ວັນ.

ໃນວັນທີ 29 ພຶດສະພາ 2020, ໄດ້ເກັບຕົວຢ່າງມາກວດວິເຄາະທັງໝົດ 291 ຄົນ, ໃນນັ້ນມີແຮງງານລາວທີ່ກັບມາແຕ່ໄທ 183 ຄົນ, ພະນັກງານວິຊາການໄທເຂົ້າມາເຮັດວຽກຢູ່ລາວ 90 ຄົນ, ຄົນເຈັບຕິດເຊື້ອປີ່ນປົວຫາຍດີຈໍາກັດບໍລິເວນຢູ່ບ້ານຄົບ 14 ວັນແລ້ວມາກວດຄືນ 03 ຄົນ, ກໍລະນີສົງໃສ 15 ຄົນ ຜົນກວດແຮງງານລາວ, ພະນັກງານວິຊາການໄທ, ກໍລະນີສົງໃສທັງໝົດ ທີ່ກວດມື້ວານນີ້ ບໍ່ພົບເຊື້ອ ໝາຍຄວາມວ່າໃນວັນທີ 29 ພຶດສະພາ 2020 ບໍ່ມີຜູ້ຕິດເຊື້ອໃໝ່.

ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 29 ພຶດສະພາ2020 ໄດ້ເກັບຕົວຢ່າງມາກວດທັງໝົດ ມີ 6,432 ຕົວຢ່າງ, ກວດພົບເຊື້ອສະສົມ 19 ຄົນ (48 ມື້ແລ້ວທີ່ບໍ່ພົບຜູ້ຕິດເຊື້ອໃໝ່) ການຕິດຕາມຜູ້ຈຳກັດບໍລິເວນຢູ່ສະຖານທີ່ຈຳກັດບໍລິເວນຕ່າງໆທົ່ວປະເທດ ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 70 ສູນ, ມີຜູ້ຈຳກັດບໍລິເວນຢູ່ສູນ 2,160 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ມີຜູ້ຕິດເຊື້ອ.

ການຕິດຕາມປີ່ນປົວຄົນເຈັບຢູ່ໂຮງໝໍ ປະຈຸບັນມີຜູ້ນອນຕິດຕາມຢູ່ໂຮງໝໍມິດຕະພາບ 03 ຄົນ, ຍີງ 02 ຄົນ, ທັງໝົດມີອາການປົກກະຕິ ຈະໄດ້ຕິດຕາມເກັບຕົວຢ່າງມາກວດຈົນກ່ວາບໍ່ພົບເຊື້ອຈີ່ງພິຈາລະນາໃຫ້ອອກໂຮງໝໍ

ນອກຈາກການຕິດຕາມສະພາບການລະບາດລະບາດພາຍໃນປະເທດແລ້ວ ຄະນະສະເພາະກິດຍັງໄດ້ຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ ເຫັນວ່າ:

  • ມາຮອດເວລາ 6:00 ໂມງເຊົ້າ ຂອງວັນທີ 30 ພຶດສະພາ 2020, ທົ່ວໂລກມີການລາຍງານການລະບາດ ທັງໝົດ 213 (ປະເທດ/ເຂດ).

–  ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 6,019,971 (119,774 ໃໝ່)  ມື້ວານນີ້ 5,900,197

–  ເສຍຊິວິດ 366,284 (4,735 ໃໝ່) ກວມເອົາ 6.08 % ຂອງຜູ້ຕິດເຊື້ອທັງໝົດ.

–  ປີ່ນປົວຫາຍດີ 2,655,228 (78,069 ໃໝ່) ກວມເອົາ 44,10 % ຂອງຜູ້ຕິດເຊື້ອທັງໝົດ.

  • ປະເດັນສຳຄັນ ແມ່ນຍັງມີການລະບາດເປັນວົງກ້ວາງຢູ່ ທະວີບອາເມລິກາ ແລະ ທະວີບຍູຣົບ, ມີບາງປະເທດ ຈໍານວນຜູ້ຕິດເຊື້ອມື້ດຽວ ມີເຖິງ 26,354 ຄົນ ແລະ ບາງປະເທດເສຍຊີວິດ 1,175 ຄົນຕໍ່ມື້.
  • ໃນບັນດາກຸ່ມປະເທດອາຊຽນ ມາຮອດເວລາ 6:00 ໂມງເຊົ້າ ຂອງວັນທີ 30 ພຶດສະພາ ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 87,336 (2,450 ໃໝ່), ເສຍຊີວິດ 2,657, ຍັງມີບາງປະເທດທີ່ມີອັດຕາການຕິດເຊື້ອໃໝ່ສູງເຖິງ 678ຄົນຕໍ່ມື້. ມື້ວານນີ້ເສຍຊີວິດໃນປະເທດອາຊຽນທັງໝົດ 45 ຄົນ.
  • ບັນດາທ່ານໄດ້ຮັບຟັງຂໍ້ມູນ ສະພາບການລະບາດຂອງພະຍາດ COVID-19 ຢູ່ປະເທດເຮົາກໍ່ຄືຢູ່ປະເທດ ໃນອາຊຽນ ແລະ ໃນທົ່ວໂລກ. ມື້ວານນີ້ບັນດາທ່ານກໍ່ໄດ້ຮັບຟັງແຈ້ງການ ສະບັບໃໝ່ຂອງຫ້ອງວ່າການສຳນັກງານນາຍົກລັດຖະມົນຕີ ເລກທີ 597/ຫສນຍ, ລົງວັນທີ 29 ພຶດສະພາ 2020 ​ຊຶ່ງແມ່ນການຜ່ອນຜັນໄລຍະທີ່ III ເລີ່ມແຕ່ວັນທີ 02 ເຖີງ ວັນທີ່30 ມິຖຸນາ 2020 .
  • ບັນຫາສຳຄັນ ຂໍໃຫ້ບັນດາທ່ານເຂົ້າໃຈວ່າ ການຜ່ອນຜັນມາດຕະການຕ່າງໆ ແມ່ນນະໂຍບາຍຂອງພັກ-ລັດຖະບານ ທີ່ເປັນຮ່ວງເປັນໄຍຕໍ່ຜົນກະທົບດ້ານຊີວິດການເປັນຢູ່ຂອງພໍ່ແມ່ປະຊາຊົນ ແລະ ດ້ານເສດຖະກິດ-ສັງຄົມ ຊຶ່ງເປັນໂອກາດໃຫ້ພາກທຸລະກິດ ກໍ່ຄືພໍ່ແມ່ປະຊາຊົນບັນດາເຜົ່າໄດ້ກັບຄືນມາດຳເນີນຊີວິດແບບປົກກະຕິ ກໍ່ຄືດຳເນີນກິດຈະການໃຫ້ກັບຄືນມາສູ່ສະພາບເດີມເທື່ອລະກ້າວ ຂໍໃຫ້ບັນດາທ່ານສ້າງຄວາມເຂົ້າໃຈຕໍ່ແຈ້ງການສະບັບໃໝ່ນີ້ໃຫ້ມີຄວາມເປັນເອກະພາບ ແລະ ຮ່ວມແຮງຮ່ວມໃຈກັນປະຕິບັດໃຫ້ຖືກຕ້ອງ ແລະ ເຂັ້ມງວດ;
  • ບົດຮຽນໃນໄລຍະຜ່ານມາ ກໍ່ຍ້ອນວ່າມີການຮ່ວມມືເປັນຢ່າງດີຈາກພໍ່ແມ່ປະຊາຊົນບັນດາເຜົ່າ ແລະ ທຸກພາກສ່ວນໃນສັງຄົມ, ຈຶງເຮັດໃຫ້ພວກເຮົາສາມາດຄວບຄຸມສະພາບການລະບາດຂອງພະຍາດ COVID -19 ໄວ້ໃນລະດັບຕໍ່າກວ່າໝູ່ໃນປະເທດອາຊຽນ.

ຂໍຮຽກຮ້ອງໃຫ້ບັນດາທ່ານຈົ່ງສືບຕໍ່ຮ່ວມແຮງຮ່ວມໃຈກັນປະຕິບັດແຈ້ງການສະບັບໃໝ່ນີ້ ແລະ ຄຳແນະນຳຕ່າງໆຂອງຂະແໜງການກ່ຽວຂ້ອງ ດ້ວຍຄວາມຮັບຜິດຊອບສູງ ຈົນກວ່າ ຈະມີການປະເມີນຄືນ ແລະ ພິຈາລະນາຜ່ອນຜັນຂັ້ນຕໍ່ໄປ. ສໍາລັບລາຍລະອຽດຂໍ້ມູນທີ່ເປັນທາງການ ທ່ານສາມາດຕິດຕາມໄດ້ຈາກເວັບໄຊ້ www.covid19.gov.la ແລະ ເຟັດບຸກຂອງສູນຂ່າວສານການແພດ ແລະ ສຸຂະສຶກສາ

ໃນໂອກາດນີ້, ຂໍລາຍງານໃຫ້ບັນດາທ່ານຊາບກ່ຽວກັບການນຳໃຊ້ງົບປະມານ ແລະ ເຄື່ອງຊ່ວຍເຫຼືອຕ່າງໆທີ່ໄດ້ຮັບຈາກລັດຖະບານ, ບັນດາປະເທດເພື່ອນມິດ, ອົງການຈັດຕັ້ງສາກົນ, ຄູ່ຮ່ວມພັດທະນາ,ພາກສ່ວນທຸລະກິດ, ສ່ວນບຸກຄົນ ແລະ ການຈັດຕັ້ງທາງສັງຄົມ ເຊີ່ງພວກເຮົາໄດ້ນຳໃຊ້ງົບປະມານດັ່ງກ່າວໃນການກະກຽມປະມູນ, ຈັດຊື້ອຸປະກອນການແພດ, ເຄື່ອງປ້ອງກັນການຕິດເຊື້ອເຊີ່ງໜ່ວຍງານພະລາທິການຈະໄດ້ເປີດການປະມູນໃນວັນທີ່ 3 ມີຖຸນາ 2020 ນີ້. ສ່ວນອຸປະກອນທີ່ໄດ້ຮັບການຊ່ວຍເຫຼືອເຊັ່ນວ່າ:ເຈວລ້າງມື, ຜ້າອັດປາກ-ດັງ, ເຄື່ອງແທກອຸນຫະພູມແລະ ຈັກສູບຫາຍໃຈ.

ໄດ້ແບ່ງປັນໃຫ້ 80 ພາກສ່ວນຢູ່ສູນກາງ ແລະ ທ້ອງຖີ່ນເປັນຕົ້ນແມ່ນ: ໂຮງໝໍ ແລະ ສູນບໍລິການຢູ່ສູນກາງ 14 ແຫ່ງລວມທັງໂຮງໝໍ 103 ກອງທັບ ແລະ ໂຮງໝໍ 5 ເມສາ ປກສ; ສຳລັບຢູ່ທ້ອງຖີ່ນແບ່ງປັນໃຫ້ 17 ແຂວງ ແລະ ນະຄອນຫຼວງເປັນຊຸດທີ່ 06 ສ່ວນລາຍລະອຽດແມ່ນໜ່ວຍພະລາທິການຈະມາໃຫ້ຂໍ້ມູນຕື່ມອີກ.

ອີກເທື່ອໜື່ງ ຂໍສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ພັກ ແລະ ລັດຖະບານ ແລະ ທຸກພາກສ່ວນທີ່ໄດ້ມີຄວາມເປັນຫ່ວງເປັນໃຍໃນການຊ່ວຍເຫຼືອສະໜັບສະໜູນທີ່ມີມູນຄ່າທີ່ສຸດຕໍ່ການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາ COVID-19 ຢູ່ປະເທດຂອງພວກເຮົາ.