ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ຖະແຫຼງຂ່າວປະຈໍາວັນອາທິດ ວັນທີ 31 ພຶດສະພາ ປີ2020 ໂດຍ: ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ.

ສະພາບການເຝົ້າລະວັງ COVID-19 ຢູ່ ສປປ ລາວຮອດ 5 ໂມງແລງ ຂອງວັນທີ 30 ພຶດສະພາ 2020 ການຕິດຕາມຜູ້ເດີນທາງຕາມຈຸດຜ່ານແດນຕ່າງໆ ຈໍານວນຜູ້ເດີນທາງເຂົ້າມາມີທັງໝົດ 2,181 ຄົນ ຄື: ຈຸດຜ່ານດ່ານ ລາວ-ໄທ ມີຈຳນວນ 1,344 ຄົນ, ໃນນີ້ມີແຮງງານລາວກັບມາຈາກປະເທດໄທ 57 ຄົນເຊິ່ງຜ່ານດ່ານຂົວມິດຕະພາບລາວ-ໄທ ແຫ່ງທີ II ມີ 40 ຄົນ, ຜ່ານດ່ານສາກົນວັງເຕົົ່າ-ຊ່ອງເມັກ ແຂວງຈຳປາສັກ ຈໍານວນ 17 ຄົນ, ນັກສຶກສາລາວມີ 06 ຄົນ, ຄົນເຈັບກັບມາແຕ່ປິ່ນປົວ 03 ຄົນຜ່ານຂົວມິດຕະພາບລາວ-ໄທ ແຫ່ງທີ I, ເຫຼືອນັ້ນແມ່ນຄົນຂັບລົດຂົນສົົ່ງສິນຄ້າ 1,278 ຄົນ. ສ່ວນຈຸດຜ່ານດ່ານ ລາວ-ຈີນ ມີຈຳນວນ 22 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ. ສຳລັບ ຈຸດຜ່ານດ່ານ ລາວ-ຫວຽດນາມ ມີຈຳນວນ 646 ຄົນ,ໃນນັ້ນ ມີນັກສຶກສາລາວກັບມາແຕ່ ສສ ຫວຽດນາມ 05 ຄົນ ເຊິ່ງຜ່ານດ່ານສາກົນນໍ້າພ້າວ, ແຂວງບໍລິຄໍາໄຊ, ເຫຼືອນັ້ນແມ່ນຄົນຂັບລົດຂົນສົ່ງສິນຄ້າ 641 ຄົນ. ຈຸດຜ່ານດ່ານ ລາວ-ກຳປູເຈຍ ມີຈຳນວນ 01 ຄົນເຊິ່ງແມ່ນຄົນລາວຜ່ານດ່ານໜອງນົກຂຽນ. ສ່ວນຈຳນວນຜູ້ເດີນທາງຜ່ານສະໜາມບິນສາກົນວັດໄຕ 168 ຄົນ, ທັງໝົດແມ່ນແຮງງານຈີນສ້າງທາງລົດໄຟ 94 ຄົນ ແລະ ສ້າງທາງດ່ວນ 74 ຄົນ. ທຸກຄົນໄດ້ແທກອຸນຫະພູມຮ່າງກາຍ ແລະ ກວດຫາອາການຜິດປົກກະຕິ, ບໍ່ພົບຜູ້ມີອາການເປັນໄຂ້, ທັງໝົດໄດ້ເກັບຕົວຢ່າງມາກວດແລ້ວນຳສົ່ງໄປຈຳກັດບໍລິເວນຢູ່ສະຖານທີ່ ທີ່ກຳນົດໄວ້ຈົນກ່ວາຈະຄົບກຳນົດ 14 ວັນ.

ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໃນວັນທີ 30 ພຶດສະພາ 2020, ໄດ້ເກັບຕົວຢ່າງມາກວດວິເຄາະທັງໝົດ 496 ຄົນ, ໃນນັ້ນມີແຮງງານລາວທີ່ກັບມາແຕ່ໄທ 280 ຄົນ, ແຮງງານຈີນທີ່ເຂົ້າມາລາວ 168 ຄົນ, ກໍລະນີສົງໃສ 47 ຄົນ, ສຳລັບຄົນເຈັບຕິດເຊື້ອປີ່ນປົວຫາຍດີແມ່ນໄດ້ຈໍາກັດບໍລິເວນຢູ່ບ້ານຄົບ 14 ວັນແລ້ວ ມາກວດຄືນ 01 ຄົນ. ສຳລັບຜົນກວດແຮງງານລາວ, ແຮງງານຈີນ, ກໍລະນີສົງໃສທັງໝົດທີ່ກວດແມ່ນ ບໍ່ພົບເຊື້ອ. ສາມາດສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 30 ພຶດສະພາ 2020 ໄດ້ເກັບຕົວຢ່າງມາກວດທັງໝົດມີ 6,928 ຕົວຢ່າງ, ຖືວ່າກວດພົບເຊື້ອສະສົມມີແຕ່ 19 ຄົນເທົ່ານັ້ນ (ມາຮອດປັດຈຸບັນ 49 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

Medialaos MMD