ປະຕິບັດເຂັ້ມງວດ ແຈ້ງການ ເລກທີ 597/ຫສນຍ

0
170

ນັບເປັນເວລາເດືອນປາຍມາແລ້ວ ທີ່ປະເທດເຮົາສາມາດຄວບຄຸມການລະບາດຂອງພະຍາດໂຄວິດ -19 ໄວ້ໄດ້ ໂດຍບໍ່ມີຜູ້ຕິດເຊື້ອເພິ່ມ ແລະ ສາມາດປິ່ນປົວຜູ້ຕິດເຊື້ອດີແລ້ວຈຳນວນ 16 ຄົນ ໃນຈຳນວນຜູ້ຕິດເຊື້ອທັງໝົດ 19 ຄົນ.

ຕໍ່ສະພາບການດັ່ງກ່າວ ພວກເຮົາກໍ່ບໍ່ຄວນຖືເບົາ ແລະ ປະໝາດຢ່າງເດັດຂາດ ເນື່ອງຈາກ ໃນຕໍ່ໜ້າຍັງມີຄວາມສ່ຽງ ແລະ ສິ່ງທ້າທາຍທີ່ຈະເກີດມີການລະບາດອີກຮອບໃໝ່…ເພື່ອສືບຕໍ່ປະຕິບັດມາດຕະການຜ່ອນຜັນ; ມາດຕະການໃນການປ້ອງກັນ; ຄວບຄຸມ; ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ -19 ໃນໄລຍະແຕ່ວັນທີ 02-30 ມີຖຸນາ 2020 ຫ້ອງວ່າການສຳນັກງານນາຍົກລັດຖະມົນຕີ ຈຶ່ງອອກ ແຈ້ງການ ເລກທີ 597/ຫສນຍ ລົງວັນທີ 29 ພຶດສະພາ 2020 ລວມມີທັງໝົດ 5 ຂໍ້ ເຊິ່ງມີທັງອະນຸຍາດ ແລະ ສືບຕໍ່ປິດ ທັງນີ້ກໍ່ເພື່ອສ້າງເງື່ອນໄຂກ້າວໄປສູ່ການດຳລົງຊີວິດປົກກະຕິແບບໃໝ່ (New Normal) ເທື່ອລະກ້າວ.

ຜູ້ຂຽນຂໍອະນຸຍາດສະເໜີຈຸດສຳຄັນຂອງແຈ້ງການສະບັບນີ້; ນັ້ນຄືຂໍ້ທີ 5

5. ມາດຕະການຈັດຕັ້ງປະຕິບັດ

    5.1 ມາດຕະການຜ່ອນຜັນນີ້ ແມ່ນເປັນການຊົ່ວຄາວ; ຖ້າມີລາຍງານ ກໍລະນີມີຜູ້ຕິດເຊື້ອເກີດຂຶ້້ນຢູ່ໃນແຂວງໃດແຂວງໜຶ່ງ ຈະໄດ້ຈຳກັດການເຂົ້າ-ອອກ ແລະ ປະຕິບັດຄືນມາດຕະການຕ່າງໆຢ່າງເຂັ້ມງວດສະເພາະແຂວງນັ້ນ ເຊິ່ງແມ່ນຄະນະສະເພາະກິດແຂວງນັ້ນຈະເປັນຜູ້ພິຈາລະນາ; ຖ້າຫາກເກີດມີຜູ້ຕິດເຊື້ອເປັນຈຸ້ມແຕ່ 2 ແຂວງຂຶ້ນໄປ ແມ່ນຈະໄດ້ກັບມາປະຕິບັດມາດຕະການຕ່າງໆທີ່ໄດ້ກຳນົດໃນຄຳສັ່ງ ສະບັບເລກທີ 06/ນຍ ຄືນໃໝ່ຢ່າງເຂັ້ມງວດ;

    5.2 ມອບໃຫ້ບັນດາກະຊວງ, ຂະແໜງການ, ອົງການປົກຄອງທ້ອງຖິ່ນທຸກຂັ້ນ ກວດກາຄືນບັນດານິຕິກຳ, ຄຳແນະນຳຕ່າງໆຂອງຕົນ ເພື່ອປັບປຸງໃຫ້ສອດຄ່ອງກັບມາດຕະການຜ່ອນຜັນຂ້າງເທິງ ແລະ ຜັນຂະຫຍາຍເປັນອັນລະອຽດ ເພື່ອມີຄວາມເຂົ້າໃຈເປັນເອກະພາບໃນການຈັດຕັ້ງປະຕິບັດ;

    5.3 ໃຫ້ກຳລັງປ້ອງກັນຊາດ, ປ້ອງກັນຄວາມສະຫງົບ, ຄະນະສະເພາະກິດ, ບັນດາກະຊວງ, ຂະແໜງການ, ອົງການປົກຄອງທ້ອງຖິ່ນທຸກຂັ້ນ ແລະ ທຸກພາກສ່ວນໃນສັງຄົມ ພ້ອມກັນເປັນເຈົ້າການຕິດຕາມກວດກາ ຮັກສາຄວາມສະຫງົບ, ຮັກສາຄວາມເປັນລະບຽບຮຽບຮ້ອຍໃນສັງຄົມ ແລະ ຈັດຕັ້ງປະຕິບັດ ມາດຕະການທີ່ໄດ້ກຳນົດໃນແຈ້ງການສະບັບນີ້ຢ່າງເຂັ້ມງວດ. ກໍລະນີມີຜູ້ລະເມີດ ແມ່ນໃຫ້ເຈົ້າໜ້າທີ່ປ້ອງກັນຄວາມສະຫງົບ ແລະ ເຈົ້າໜ້າທີ່ ທີ່ກ່ຽວຂ້ອງດຳເນີນມາດຕະການຕາມກົດໝາຍ ແລະ ລະບຽບການທີ່ກ່ຽວຂ້ອງຢ່າງເຂັ້ມງວດ;

    5.4 ມາດຕະການທີ່ກຳນົດໄວ້ຂ້າງເທິງນີ້ ມີຜົນສັກສິກ ນັບແຕ່ວັນທີ 02 ຫາ 30 ມິຖຸນາ 2020. ໃນພາກປະຕິບັດຕົວຈິງ ຈະໄດ້ມີການປະເມີນ, ທົບທວນ ແລະ ດັດປັບ ໃຫ້ເໝາະສົມຕື່ມ, ກໍລະນີມີການປ່ຽນແປງ ລັດຖະບານຈະແຈ້ງໃຫ້ຊາບເປັນໄລຍະ.

ສະນັ້ນ ຈຶ່ງຂໍຮຽກຮ້ອງໃຫ້ໝົດທຸກຄົນທົ່ວສັງຄົມ ພ້ອມກັນເຊື່ອມຊຶມ ສຳຄັນແມ່ນຕ້ອງອ່ານໃຫ້ເຂົ້າໃຈ ເພື່ອປະຕິບັດໃຫ້ຖືກຕ້ອງ; ເຂັ້ມງວດ ແຈ້ງການດັ່ງກ່າວ %

ໂດຍ: ທິດດີ