ຂ່າວດີ! 50 ມື້ແລ້ວທີ່ບໍ່ພົບຜູ້ຕິດເຊື້ອໃໝ່ໃນ ສປປ ລາວ

0
105

ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ຖະແຫຼງຂ່າວປະຈໍາວັນຈັນ ວັນທີ 01 ມິຖຸນາ ປີ 2020 ໂດຍ: ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ.

ສະພາບການເຝົ້າລະວັງ COVID-19 ຢູ່ ສປປ ລາວຮອດ 5 ໂມງແລງ ຂອງວັນທີ 31 ພຶດສະພາ 2020 ຕິດຕາມຜູ້ເດີນທາງເຂົ້າຈຸດຜ່ານແດນຕ່າງໆ ມີຈໍານວນຜູ້ເດີນທາງເຂົ້າມາທັງໝົດ 1,688 ຄົນ ຄື: ຈຸດຜ່ານດ່ານ ລາວ-ໄທ ມີຈຳນວນ 976 ຄົນ, ທັງໝົດແມ່ນຄົນຂັບລົດຂົນສົົ່ງສິນຄ້າ. ຈຸດຜ່ານດ່ານ ລາວ-ຈີນ ມີຈຳນວນ 22 ຄົນ, ໃນນັ້ນມີຄົນລາວ 02 ຄົນ, ເປັນນັກສຶກສາລາວ 01 ຄົນ, ເຫຼືອນັ້ນແມ່ນຜູ້ຂັບລົດຂົນສົ່ງສິນຄ້າ 20 ຄົນ. ຈຸດຜ່ານດ່ານ ລາວ-ຫວຽດນາມ ມີຈຳນວນ 690 ຄົນ, ໃນນັ້ນ ມີຄົນລາວກັບມາແຕ່ວຽກລັດຖະການ 07 ຄົນ ເຊິ່ງຜ່ານດ່ານສາກົນນໍ້າພ້າວ, ແຂວງບໍລິຄໍາໄຊ, ເຫຼືອນັ້ນແມ່ນຄົນຂັບລົດຂົນສົ່ງສິນຄ້າ 683 ຄົນ. ຈຸດຜ່ານດ່ານ ລາວ-ກຳປູເຈຍ ມີຈຳນວນ 0 ຄົນ. ສຳລັບຈຳນວນຜູ້ເດີນທາງຜ່ານ ສະໜາມບິນສາກົນວັດໄຕ ມີຈຳນວນ 0 ຄົນ. ທຸກຄົນໄດ້ແທກອຸນຫະພູມຮ່າງກາຍ ແລະ ກວດຫາອາການຜິດປົກກະຕິ, ບໍ່ພົບຜູ້ມີອາການເປັນໄຂ້, ທັງໝົດໄດ້ເກັບຕົວຢ່າງມາກວດແລ້ວນຳສົ່ງໄປຈຳກັດບໍລິເວນຢູ່ສະຖານທີ່ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 31 ພຶດສະພາ 2020, ໄດ້ເກັບຕົວຢ່າງມາກວດວິເຄາະທັງໝົດ 252 ຄົນ, ໃນນັ້ນມີແຮງງານລາວທີ່ກັບມາແຕ່ໄທ 44 ຄົນ, ແຮງງານຈີນທີ່ເຂົ້າມາລາວ 45 ຄົນ, ແຮງງານໄທເຂົ້າມາລາວ 129 ຄົນ, ກໍລະນີສົງໃສ 34 ຄົນ. ແຕ່ຜົນກວດແຮງງານລາວ ,ແຮງງານຈີນ, ແຮງງານໄທ ແລະ ກໍລະນີສົງໃສທັງໝົດທີ່ກວດແມ່ນ ບໍ່ພົບເຊື້ອ. ໝາຍຄວາມວ່າໃນວັນທີ 31 ພຶດສະພາ 2020 ຍັງບໍ່ມີຜູ້ຕິດເຊື້ອໃໝ່. ສັງລວມການກວດວິເຄາະ ແລະ ຕິດຕາມເກັບຕົວຢ່າງມາກວດ 50 ມື້ແລ້ວທີ່ບໍ່ພົບຜູ້ຕິດເຊື້ອໃໝ່.

ສ່ວນຜູ້ນອນຕິດຕາມຢູ່ໂຮງໝໍມິດຕະພາບ 03 ຄົນ, ຍິງ 02 ຄົນ, ທັງໝົດມີອາການປົກກະຕິ ແຕ່ໄດ້ຕິດຕາມເກັບຕົວຢ່າງມາກວດຈົນກ່ວາບໍ່ພົບເຊື້ອຈີ່ງພິຈາລະນາໃຫ້ອອກໂຮງໝໍໄດ້.

ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 70 ສູນ, ມີຜູ້ຈຳກັດບໍລິເວນຢູ່ສູນ 2,336 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ແຕ່ບໍ່ມີຜູ້ຕິດເຊື້ອ.

Medialaos MMD