ບໍ່ພົບຜູ້ຕິດເຊື້ອໃໝ່ ແຕ່ສືບຕໍ່ປະຕິບັດມາດຕະການຢ່າງເຂັ້ມງວດ

0
88

ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ຖະແຫຼງຂ່າວ ປະຈໍາວັນອັງຄານ ວັນທີ 02 ມິຖຸນາ ປີ2020 ໂດຍ: ທ່ານ ດຣ. ສີສະຫວາດ ສຸດທານີລະໄຊ, ຮອງຫົວໜ້າ ກົມຄວບຄຸມພະຍາດຕິດຕໍ່,  ກະຊວງສາທາລະນະສຸກ.

ສະພາບການເຝົ້າລະວັງ COVID-19 ຢູ່ ສປປ ລາວຮອດ 5 ໂມງແລງ ຂອງວັນທີ 01 ມິຖຸນາ 2020 ການຕິດຕາມຜູ້ເດີນທາງຢູ່ຈຸດຜ່ານແດນຕ່າງໆມີຈໍານວນຜູ້ເດີນທາງເຂົ້າມາທັງໝົດ 1,496 ຄົນ ຄື:ຈຸດຜ່ານດ່ານ ລາວ-ໄທ ມີຈຳນວນ 799 ຄົນ, ໃນນັ້ນ ຜ່ານດ່ານຂົວມິດຕະພາບ I ມີແຮງງານລາວ 61 ຄົນ ແລະ ຄົນເຈັບກັບມາແຕ່ປິ່ນປົວ 02 ຄົນ; ສ່ວນແຮງງານລາວທີ່ຜ່ານດ່ານຂົວມິດຕະພາບ II ມີ 05 ຄົນ, ເຫຼືອນັ້ນ ແມ່ນຄົນຂັບລົດຂົນສົົ່ງສິນຄ້າ 731 ຄົນ. ຈຸດຜ່ານດ່ານ ລາວ-ຈີນ ມີຈຳນວນ 25 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ. ຈຸດຜ່ານດ່ານ ລາວ-ຫວຽດນາມ ມີຈຳນວນ 625 ຄົນ, ທັງໝົດ ແມ່ນຄົນຂັບລົດຂົນສົ່ງສິນຄ້າ. ຈຸດຜ່ານດ່ານ ລາວ-ກຳປູເຈຍ ມີຈຳນວນ 0 ຄົນ. ຈຳນວນຜູ້ເດີນທາງຜ່ານ ສະໜາມບິນສາກົນວັດໄຕ ມີຈຳນວນ 47 ຄົນ, ໃນນັ້ນ ມີແຮງງານຈີນກໍ່ສ້າງທາງລົດໄຟ 46 ຄົນ ແລະ ຄົນລາວ 01 ຄົນ ມີຜົວເປັນຄົນຈີນ. ທຸກຄົນໄດ້ແທກອຸນຫະພູມຮ່າງກາຍ ແລະ ກວດຫາອາການຜິດປົກກະຕິ, ບໍ່ພົບຜູ້ມີອາການເປັນໄຂ້, ທັງໝົດໄດ້ເກັບຕົວຢ່າງມາກວດແລ້ວນຳສົ່ງໄປຈຳກັດບໍລິເວນຢູ່ສະຖານທີ່ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໃນວັນທີ 01 ມິຖຸນາ 2020, ໄດ້ເກັບຕົວຢ່າງມາກວດວິເຄາະທັງໝົດ 69 ຄົນ, ໃນນັ້ນມີແຮງງານລາວທີ່ກັບມາແຕ່ໄທ 42 ຄົນ, ແຮງງານຈີນ 09 ຄົນ, ກໍລະນີສົງໃສ 15 ຄົນ ແລະ ຜູ້ຕິດເຊື້ອນອນປິ່ນປົວຢູ່ໂຮງໝໍມິດຕະພາບ 03 ຄົນ (ນໍ້າເບີ 07, 10 ແລະ 17). ຜົນກວດແຮງງານລາວ, ແຮງງານຈີນ, ກໍລະນີສົງໃສທັງໝົດທີ່ກວດແມ່ນ ບໍ່ພົບເຊື້ອ. ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 01 ມິຖຸນາ 2020 ການກວດວິເຄາະ ແລະ ເກັບຕົວຢ່າງມາກວດ 51 ມື້ແລ້ວທີ່ບໍ່ພົບຜູ້ຕິດເຊື້ອໃໝ່.

Medialaos MMD