ຄະ​ນະ​ພັກ-ຄະ​ນະ​ປົກ​ຄອງ​ເມືອງ​ສັງ​ທອງ ນະ​ຄອນຫຼວງວຽງ​ຈັນ ຮ່ວມ​ກັບ​ຄະ​ນະ​ພັກ​ຮາກ​ຖານ-ຄະ​ນະ​ອຳ​ນວຍ​ການ​ທະ​ນາ​ຄານ​ນະ​ໂຍ​ບາຍ (ທນບ) ໄດ້​ຈັດ​ຕັ້ງ​ການ​ຍ້ອງ​ຍໍ​ການ​ຈັດ​ຕັ້ງ ແລະ ປະ​ຊາ​ຊົນ​ບ້ານ​ໄຮ່​ເໜືອ ເມືອງ​ດັ່ງ​ກ່າວ​ທີ່​ມີ​ຜົນ​ງານ​ໃນ​ການ​ຊຳ​ລະ​ຕົ້ນ​ທຶນ ແລະ ດອກ​ເບ້ຍ​ດີ (ບໍ່​ມີ​ໜີ້ NPL) ແລະ ກອງ​ປະ​ຊຸມ​ສະຫຼູບ​ຕີ​ລາ​ຄາ​ການ​ເຄື່ອນ​ໄຫວ​ວຽກ​ງານ​ປ່ອຍ​ສິນ​ເຊື່ອຜ່ານອົງການຈັດຕັ້ງການເມືອງ-ສັງຄົມ ແລະ ກອງທຶນຂັ້ນບ້ານ (ອກສກ) ທີ່ ທນບ ຂອງ ສ​ປ​ປ ລາວ ໄດ້ນໍາເອົາບົດຮຽນຂອງທະນາຄານນະໂຍບາຍສັງຄົມຫວຽດນາມມາເຮັດທົດລອງ​ຢູ່​ບ້ານ​ດັ່ງ​ກ່າວ​ຊ​ຶ່ງຈັດ​ຂຶ້ນ​ທີ່​ບ້ານໄຮ່ເໜືອ ໂດຍ​ການ​ໃຫ້​ກຽດ​ມອບ​​ໃບ​ກຽດ​ຕິ​ຄຸນຂອງທ່ານນາງ ແກ້ວ ພົມມະລາດ ຮອງເລຂາພັກເມືອງ, ຮອງເຈົ້າເມືອງສັງທອງ, ປະທານຄະນະກໍາມະການຄຸ້ມຄອງສິນເຊື່ອຂອງ ທນບ ຂັ້ນເມືອງ; ທ່ານ ສີສຸພັນ ໂພໄຊສີ ຄະນະພັກ, ຮອງຜູ້ອໍານວຍການ ທນບ; ຄະ​ນະ​ປົກ​ຄອງ-ປະ​ຊາ​ຊົນບ້ານ ແລະ ພາກ​ສ່ວນ​ກ່ຽວ​ຂອງ​ເຂົ້າ​ຮ່ວມ.

ທ່ານ ປັນ​ຍາ​ສະ​ໄຫວ ຣັດ​ຖະ​ເສ​ນາ ເລ​ຂາ​ໜ່ວຍ​ພັກ-ຮອງປະທານຄະນະກໍາມະການຄຸ້ມຄອງສິນເຊື່ອຂັ້ນເມືອງ, ຫົວ ໜ້າ ທນບ ໜ່ວຍ​ບໍ​ລິ​ການ​ເມືອງ​ສັງ​ທອງ ໄດ້ລາຍງານຜົນການຈັດຕັ້ງປະຕິບັດວຽກງານປ່ອຍສິນເຊື່ອນັບ​ແຕ່ໄລຍະປີ 2008-2019, ທນບໄດ້ປ່ອຍເງິນກູ້ຢູ່ບ້ານໄຮ່ເໜືອທັງໝົດ 2,33 ຕື້ກີບໃນນີ້ເປົ້າໝາຍຊື້ລົດໄຖນ້ອຍ 80 ລ້ານກີບ ປີ 2017 ຊໍາລະສູນ;ເປົ້າໝາຍບຸກເບີກ 203,10 ລ້ານກີບປີ 2009 ຊໍາລະສູນ;ເປົ້າໝາຍປູກເຂົ້ານາປີ 2,05 ຕື້ກີບປີ 2008-2019, ຍອດເຫຼືອຕົ້ນທຶນ78,2 ລ້ານກີບ;ສິນເຊື່ອດັ່ງກ່າວກວມ 11 ກຸ່ມຜະລິດ, 65 ຄອບຄົວໄດ້ຮັບເງິນກູ້ເທົ່າກັບ 100% ຂອງຄອບຄົວທັງໝົດ(65 ຄອບຄົວ), ຮອດທ້າຍເດືອນ 5/2020 ມີຍອດເຫຼືອຕົ້ນທຶນທັງໝົດ 78,2 ລ້ານກີບ(ເປົ້າໝາຍປູກເຂົ້ານາປີ 2019) ຍອດດອກເບ້ຍປົກກະຕິຄ້າງຊໍາລະ 0 ກີບ, ແຕ່ປີ 2008-ປັດຈຸບັນບໍ່ມີໜີ້ທີ່ບໍ່ເກີດດອກອອກຜົນ(NPL)

ສຳ​ລັບການປ່ອຍສິນເຊື່ອຜ່ານອົງການຈັດຕັ້ງການເມືອງ-ສັງຄົມ ແລະ ກອງທຶນຂັ້ນບ້ານ (ອກສກ) ຢູ່ບ້ານໄຮ່ເໜືອຜ່ານ ອກ​ສກ ທີ່ ທນບ ນຳ​ໃຊ້ບົດຮຽນຂອງທະນາຄານນະໂຍບາຍສັງຄົມຫວຽດນາມມາເຮັດທົດລອງຢູ່ບັນດາບ້ານເປົ້າໝາຍ ໂດຍ​ບ້ານໄຮ່ເໜືອເປັນບ້ານແຫ່ງທີ 2 ຂອງ​ນະ​ຄອນຫຼວງທີ່ດໍາເນີນມາ​ເປັນໄລຍະ 6 ເດືອນ ແຕ່ເດືອນ 12/2019 ຮອດປັດຈຸບັນ. ການເຄື່ອນໄຫວວຽກງານດັ່ງກ່າວເປັນການປະກອບສ່ວນ ແລະ ຕິດພັນກັບນະໂຍບາຍແກ້ໄຂຄວາມທຸກຍາກຂອງ ປະຊາຊົນ​ຕາມ​ແນວ​ທາງຂອງພັກ, ລັດຖະບານ ແລະ ໄດ້ຮັບມອບໝາຍ, ຊີ້ນໍາຢ່າງໃກ້ສິດຈາກອົງການປົກຄອງທ້ອງຖິ່ນກໍ່ຄືປະທານຄະນະກໍາມະການຄຸ້ມຄອງສິນເຊື່ອຂອງ ທນບ ຂັ້ນເມືອງ, ຄະນະພັກ-ຄະນະອໍານວຍການ, ສະນັ້ນ, ທນບ ໜ່ວຍບໍລິການເມືອງສັງທອງໄດ້ສົມທົບກັບອໍານາດການປົກຄອງບ້ານ ແລະ ຄະນະກໍາມະການຄຸ້ມຄອງສິນເຊື່ອຂອງ ທນບ ຂັ້້ນບ້ານເຮັດໃຫ້ການເຄື່ອນໄຫວຜ່ານມາສອດຄ່ອງກັບນິຕິກໍາ ແລະ ຮັບໝາກຜົນດີສະແດງອອກໃນມື້ນັດໝາຍວັນທີ 25 ຂອງທຸກໆເດືອນ ທະນາຄານຈະລົງເຮັດວຽກກັບຫົວໜ້າກຸ່ມ(ມີ 6 ກຸ່ມ) ຮັບຊໍາລະໜີ້ໄດ້ທັງໝົດ 143,18 ລ້ານກີບ ໃນນີ້: ດອກເບ້ຍເງິນກູ້ຢືມ 7,88 ລ້ານກີບ(ໄດ້ 100% ທຸກເດືອນ) ແລະ ຕົ້ນທຶນ 135,30 ລ້ານກີບ. ຄຽງຄູ່ກັນນີ້, 3 ເດືອນໃດ ທະນາຄານໄດ້ຄິດໄລ່ ແລະ ມອບເງິນບໍາເນັດໃຫ້ຄະນະກໍາມະການຄຸ້ມຄອງສິນເຊື່ອຂອງ ທນບ ບ້ານໄຮ່ເໜືອທັງໝົດ 763,000 ກີບ ໃນນີ້: 40% ໃຫ້ຄະນະກໍາມະການ, 60% ໃຫ້ຫົວໜ້າກຸ່ມ+ຮອງກຸ່ມຂອງຈໍານວນເງິນບໍາເນັດທັງໝົດ.

ທ່ານ ຈັນທອນ ສົມພ່ານ ເລຂາພັກບ້ານ, ນາຍບ້ານ ບ້ານໄຮ່ເໜືອ, ຫົວໜ້າຄະນະກໍາມະການຄຸ້ມຄອງສິນເຊື່ອຂອງ ທນບ ຂັ້ນບ້ານ ​ຢືນຢັນວ່າ: ການຈັດຕັ້ງເຄື່ອນໄຫວວຽກງານ ອກສກ ສົ່ງຜົນດີຫຼາຍດ້ານ ແລະ ເອື້ອອໍານວຍຜົນປະໂຫຍດຮ່ວມກັນໂດຍ​ສະ​ເພາະຮັບຮູ້ເຂົ້າໃຈຢ່າງຈະແຈ້ງກ່ຽວກັບແນວທາງຂອງພັກ, ນະໂຍບາຍຂອງລັດຕໍ່ກັບການແກ້ໄຂຄວາມທຸກຍາກໃຫ້ປະຊາຊົນ ດ້ວຍການໃຫ້ໂອກາດເຂົ້າເຖິງ ແລະ ຊົມໃຊ້ແຫຼ່ງທຶນດອກເບ້ຍນະໂຍບາຍຂອງລັດຖະບານ ຜ່ານທນບ;ຮຽນຮູ້ວຽກງານທະນາຄານຫຼາຍຂຶ້ນເປັນຕົ້ນກົນໄກສິນເຊື່ອທີ່ເປັນລະບົບຄົບຊຸດ ນັບແຕ່ການສ້າງແຜນຄວາມຕ້ອງການສິນເຊື່ອ, ການສັງລວມແຜນ, ການຄົ້ນຄວ້າພິຈາລະນາ, ການອະນຸມັດ, ການຕິດຕາມກວດການໍາໃຊ້ເງິນກູ້, ການປະເມີນປະສິດທິຜົນ, ການເກັບໜີ້, ພັນທະຄວາມຮັບຜິດຊອບການກູ້ຢືມເງິນ ແລະການແບ່ງໜ້າທີ່ຄວາມຮັບຜິດຊອບພາຍໃນຄະນະກໍາມະການ, ບົດຮຽນດັ່ງກ່າວນີ້ ສາມາດນໍາມາປັບປຸງວຽກງານກອງທຶນຂັ້ນບ້ານ ຫຼື ກຸ່ມທ້ອນເງິນແມ່ຍິງບ້ານ ໄດ້ເປັນຢ່າງດີ;ຄຸນນະພາບຊີວິດການເປັນຢູ່ຂອງສະມາຊິກກູ້ຢືມເງິນນັບມື້ໄດ້ຮັບການປັບປຸງດີຂຶ້ນເລື້ອຍໆ ຫຼາຍຄອບຄົວ ມີເນື້ອທີ່ທໍາການຜະລິດ ມີວຽກເຮັດງານທໍາ, ມີລາຍຮັບຈາກການເຮັດຜະລິດ, ມີຊັບສິນເພີ່ມຂຶ້ນ ເປັນຕົ້ນ ລົດໄຖນານ້ອຍ, ທີ່ດິນ ແລະ ມີເຂົ້າກິນພຽງພໍ;ໄດ້ຮັບເງິນບໍາເນັດ ແລະ ສິ່ງອໍານວຍຄວາມສະດວກຈໍານວນໜຶ່ງ.

ທ່ານ ປະທານຄະນະກໍາມະການຄຸ້ມຄອງສິນເຊື່ອຂອງ ທນບ ຂັ້ນເມືອງ ໄດ້​ເນັ້ນ​ວ່າ:ທນບ ໜ່ວຍບໍລິການເມືອງສັງທອງມີບົດບາດສໍາຄັນຫຼາຍໃນການປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມຂອງເມືອງສັງທອງໂດຍສະເພາະແຜນງານການແກ້ໄຂຄວາມທຸກຍາກໃຫ້ປະຊາຊົນທົ່ວ; ຈາກການປ່ອຍສິນເຊື່ອດອກເບ້ຍນະໂຍບາຍຂອງລັດຖະບານ, ໄລຍະ 5 ປີ(2014-2019) ຈໍານວນເງິນ 62,61 ຕື້ກວ່າກີບ ຊຸກຍູ້ການຜະລິດສ້າງເສດຖະກິດຄອບຄົວຊີວິດການເປັນຢູ່ຂອງປະຊາຊົນໄດ້ນັບມື້ດີຂຶ້ນ ສາມາດເວົ້າໄດ້ວ່າການມີສ່ວນຮ່ວມສໍາຄັນດັ່ງກ່າວນີ້ເຮັດໃຫ້ແຜນງານແກ້ໄຂຄວາມທຸກຍາກຂອງເມືອງໄດ້ຮັບການແກ້ໄຂຖືກຈຸດທັນສະພາບການ ສະແດງອອກ ໄລຍະແຕ່ປີ 2014-2019 ລາຍຮັບຕໍ່ຫົວຄົນ 3.800 ໂດລາສະຫະລັດ, ຫຼາຍຄອບຄົວໄດ້ຫຼດພົ້ນອອກຈາກຄອບຄົວທຸກຍາກແລ້ວ, ມາຮອດວັນທີ 1 ສິງຫາ ປີ 2014ລັດຖະບານໄດ້ປະກາດໃຫ້ເມືອງສັງທອງເປັນເມືອງພົ້ນທຸກຢ່າງເປັນທາງການ.

ການຈັດຕັ້ງເຄື່ອນໄຫວວຽກງານຂອງ ທນບ ປະຈໍາເມືອງສັງທອງ ໄດ້ເຮັດໜ້າທີ່ການເມືອງຢ່າງມີຜົນສໍາເລັດດ້ວຍດີຕະຫຼອດມາຕາມການມອບໝາຍ, ການຊີ້ນໍາຢ່າງໃກ້ສິດຂອງຄະນະພັກ-ຄະນະຜູ້ວ່າການ, ສະພາບໍລິຫານ, ຄະນະພັກຄະນະອໍານວຍການ ແລະ ອົງການປົກຄອງທ້ອງຖິ່ນກໍ່ຄືຄະນະກໍາມະການຄຸ້ມຄອງສິນເຊື່ອແຕ່ລະຂັ້ນ ເຮັດໃຫ້ການຄຸ້ມຄອງ-ບໍລິຫານ ແລະ ການຈັດຕັ້ງເຄື່ອນໄຫວຂອງໜ່ວຍບໍລິການ ມີຄວາມສະດວກ, ທຸກວຽກງານໄດ້ຮັບການແກ້ໄຂຖືກຈຸດທັນການທັງສອດຄ່ອງກັບລະບຽບ-ນິຕິກໍາ ແລະ ກົດໝາຍ ໂດຍ​ສະ​ເພາະການເຄື່ອນໄຫວສິນເຊື່ອຢູ່ບ້ານໄຮ່ເໜືອໄດ້ເປັນແບບຢ່າງທີ່ດີຕະຫຼອດ 12 ປີຜ່ານມາບໍ່ມີໜີ້ເສຍ ຫຼື ໜີ້ບໍ່ເກີດດອອກອອກຜົນຈັກກີບ, ບໍ່ມີດອກເບ້ຍຄ້າງຮັບ, ທຶນຮອນຂອງພັກ-ລັດທີ່ມີຢ່າງຈໍາກັດນັ້ນໄດ້ຖືກນໍາໃຊ້ຢ່າງມີປະສິດທິພາບໝາຍວ່າຜູ້ກູ້ຢືມໄດ້ຮັບທຶນຮອນ ກໍ່ເຮັດແທ້ທໍາຈິງໄດ້ຮັບຜົນຜະລິດເຫຼືອ ກິນແລະຂາຍເປັນສິນຄ້າ ມີລາຍຮັບສາມາດຊໍາລະໜີ້ໃຫ້ທະນາຄານທັນຕາມກໍານົດເວລາສັນຍາ ຫຼາຍຄອບຄົວກໍ່ຊໍາລະກ່ອນສັນຍາຈະໝົດລົງ, ທນບ ກໍ່ເອົາໃຈໃສ່ລົງຊຸກຍູ້, ຕິດຕາມ, ກວດກາ ໃຫ້ຄໍາແນະນໍາ ແລະ ນໍາພາຄະນະກໍາມະການສິນເຊື່ອຂັ້ນບ້ານເຮັດຕົວຈິງ ຕົວຢ່າງການປ່ອຍສິນເຊື່ອຜ່ານອກສກ ຢູ່ບ້ານໄຮ່ເໜືອເປັນຕົວຊີ້ວັດ ຫຼື ແບບທີ່ດີມີຂັ້ນຕອນດໍາເນີນການເປັນລະບົບ.

Medialaos MMD