ໂດຍປະຕິບັດຕາມຄຳສັ່ງເລກທີ 04/ຄລສພ ລົງວັນທີ 7 ພຶດສະພາ 2018 ວ່າດ້ວຍການກະກຽມດຳເນີນກອງປະຊຸມໃຫຍ່ 3 ຂັ້ນ; ເຊີ່ງມາຮອດປະຈຸບັນ ຢູ່ຂັ້ນທ້ອງຖີ່ນໄດ້ສຳເລັດການດຳເນີນກອງປະຊຸມໃຫຍ່ອົງຄະນະພັກເມືອງ-ນະຄອນແລ້ວ 132 ເມືອງ-ນະຄອນ; ຂັ້ນກະຊວງ-ອົງການ ໄດ້ສຳເລັດການດຳເນີນກອງປະຊຸມໃຫຍ່ຮາກຖານພັກແລ້ວທັງໝົດ 945 ຮາກຖານພັກ. ປະຈຸບັນສະພາບການລະບາດຂອງພະຍາດ Covid-19 ໄດ້ຜ່ອນຄາຍລົງ ແລະ ຢູ່ໃນວົງຈຳກັດ. ສະນັ້ນ ເພື່ອສືບຕໍ່ກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກໃນສະພາບການດັ່ງກ່າວ ຄະນະເລຂາທິການສູນກາງພັກຈີ່ງໄດ້ອອກຄຳສັ່ງເລກທີ 08/ຄລສພ ແມ່ນຄຳສັ່ງແນະນຳເພີ່ມເຕີມກ່ຽວກັບການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ: ເຖີງ ຄະນະປະຈຳພັກ; ຄະນະພັກກະຊວງ-ອົງການ; ແຂວງ-ນະຄອນຫຼວງ ໃນການສືບຕໍ່ກອງປະຊຸມດຳເນີນກອງປະຊຸມໃຫຍ່ 3 ຂັ້ນຂອງພັກ. ຄຳສັ່ງສະບັບນີ້ລວມມີ 10 ຂໍ້; ລົງວັນທີ 11 ພຶດສະພາ 2020 ຜູ້ຂຽນຂໍຄັດຈ້ອນສະເໜີບາງຂໍ້ລົງພິມໂດຍສະເພາະແມ່ນກ່ຽວກັບເນື້ອໃນຄື:

ຂໍ້ທີ 2. ໃຫ້ຄະນະພັກກະຊວງ-ອົງການ. ແຂວງ-ນະຄອນຫຼວງ ກວດກາປັບປຸງຄືນດ້ານການຈັດຕັ້ງການນຳພາ-ຊີ້ນຳ; ການແຕ່ງຕັ້ງຄະນະຮັບຜິດຊອບກະກຽມດຳເນີນກອງປະຊຸມໃຫຍ່ອົງຄະນະພັກກະຊວງ-ອົງການ; ແຂວງ-ນະຄອນຫຼວງ, ສ້າງແຜນດຳເນີນງານແຕ່ນີ້ຮອດມື້ດຳເນີນກອງປະຊຸມໃຫຍ່ອົງຄະນະພັກຕົນ, ແບ່ງງານ, ແບ່ງຄວາມຮັບຜິດຊອບໃຫ້ລະອຽດຈະແຈ້ງ ພ້ອມນີ້ໃຫ້ກຳນົດວັນ ເວລາທີ່ຈະດຳເນີນກອງປະຊຸມໃຫຍ່ອົງຄະນະພັກຂັ້ນຕົນ ແລ້ວໃຫ້ລາຍງານຕໍ່ຄະນະເລຂາທິການສູນກາງພັກ ໂດຍຜ່ານຄະນະຈັດຕັ້ງສູນກາງພັກ.

ຂໍ້ທີ 3. ໃຫ້ຄະນະພັກແຂວງ-ນະຄອນຫຼວງ ສືບຕໍ່ນຳພາ-ຊີ້ນຳ ກະກະກຽມດຳເນີນກອງປະຊຸມໃຫຍ່ອົງຄະນະພັກເມືອງ ແລະ ຮາກຖານພັກອ້ອມຂ້າງແຂວງ-ນະຄອນຫຼວງ ໃຫ້ສຳເລັດພາຍໃນເດືອນມິຖຸນາ 2020 ບ່ອນທີ່ສຳເລັດກອງປະຊຸມໃຫຍ່ແລ້ວ ໃຫ້ຮີບຮ້ອນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ອົງຄະນະພັກຕົນ ເຂົ້າສູ່ການກະທຳຕົວຈິງໂດຍໄວ.

ຂໍ້ທີ 4. ໃຫ້ຄະນະພັກກະຊວງ-ອົງການ ເພີ່ມທະວີການນຳພາ-ຊີ້ນຳ ການກະກຽມດຳເນີນກອງປະຊຸມໃຫຍ່ບັນດາຮາກຖານພັກ ທີ່ຂື້ນກັບອົງຄະນະພັກຕົນ ໃຫ້ສຳເລັດພາຍໃນເດືອນກໍລະກົດ 2020. ການກະກຽມດຳເນີນກອງປະຊຸມໃຫຍ່ຮາກຖານພັກ ໃຫ້ຕິດພັນກັບການປັບປຸງກົງຈັກການຈັດຕັ້ງ, ສັບຊ້ອນຈັດວາງບຸກຄະລາກອນຂັ້ນກົມ, ກອງ ແລະ ທຽບເທົ່າ ແລະ ແກ້ໄຂປະກົດການຫຍໍ້ທໍ້ຕ່າງໆໃນກົງຈັກການຈັດຕັ້ງ ເຮັດໃຫ້ກົງຈັກການຈັດຕັ້ງທີ່ດຳເນີນພາລະບົດບາດມະຫາພາກໃຫ້ມີຄວາມເຂັ້ມແຂງ.

ຂໍ້ທີ 5. ການກະກຽມດຳເນີນກອງປະຊຸມໃຫຍ່ໃຫ້ເອົາໃຈໃສ່ນຳພາ-ຊີ້ນຳ 3 ວຽກງານຕົ້ນຕໍດັ່ງນີ້:

  • ວຽກງານຂະບວນການ: ໃຫ້ສືບຕໍ່ຊຸກຍູ້ຂະບວນການດ້ານຕ່າງໆໃຫ້ຟົດຟື້ນ ແຂງແຮງຕື່ມອີກ ເປັນຕົ້ນແມ່ນ: ຂະບວນການຈັດຕັ້ງປະຕິບັດບັນດາຄາດໝາຍສູ້ຊົນຕ່າງໆທີ່ກຳນົດໄວ້ໃນມະຕິກອງປະຊຸມໃຫຍ່ອົງຄະນະພັກຕົນ, ຂະບວນການປະຕິບັດໜ້າທີ່ການເມືອງ, ວິຊາສະເພາະ, ຂະບວນການປ້ອງກັນຊາດ-ປ້ອງກັນຄວາມສະຫງົບ, ຂະບວນການຜະລິດເປັນສິນຄ້າ ແກ້ໄຂຄວາມທຸກຍາກຂອງປະຊາຊົນ, ຂະບວນການປ້ອງກັນ, ສະກັດກັ້ນການລະບາດຂອງພະຍາດໂຄວິດ-19 ແລະ ການແກ້ໄຂຜົນກະທົບດ້ານເສດຖະກິດ-ສັງຄົມ ແລະ ຂະບວນການອື່ນໆ…
  • ວຽກງານເນື້ອໃນ: ຊີ້ນຳການກະກຽມລາຍງານການເມືອງ, ແຜນພັດທະນາເສດຖະກິດ-ສັງຄົມຂອງແຂວງ-ນະຄອນຫຼວງ ແລະ ຂອງຂະແໜງການໃຫ້ຖືກທິດ, ສອດຄ່ອງກັບຄຳແນະນຳຂອງອະນຸກຳມະການເນື້ອໃນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ, ຈັດຕັ້ງການສຳມະນາ, ທາບທາມຄຳເຫັນຂອງພະນັກງານ, ສະມາຊິກໃຫ້ກ້ວາງຂວາງ ແລະ ເລິກເຊີ່ງ.
  • ວຽກງານບຸກຄະລາກອນ: ໃຫ້ເຊື່ອມຊຶມກຳແໜ້ນ ມະຕິຂອງກົມການເມືອງສູນກາງພັກ, ຄຳສັ່ງແນະນຳຂອງຄະນະເລຂາທິການສູນກາງພັກກ່ຽວກັບວຽກງານບຸກຄະລາກອນໃຫ້ເລິກເຊີ່ງ, ຄົ້ນຄ້ວາສັບຊ້ອນຈັດວາງ ແລະ ຄາດຄະເນບຸກຄະລາກອນທີ່ຈະສະໝັກເລືອກຕັ້ງເຂົ້າໃນຄະນະພັກ, ຕ້ອງບົນພື້ນຖານມາດຕະຖານ-ເງື່ອນໄຂໄດ້ກຳນົດໄວ້ ແລະ ຕາມທິດຫັນເປັນໝຸ່ມ ໃຫ້ເອົາໃຈໃສ່ປະຕິບັດຖືກຕ້ອງ ແລະ ເຂັ້ມງວດບາດກ້າວ, ຂັ້ນຕອນຕ່າງໆຂອງການກະກຽມບຸກຄະລາກອນ.

ຂໍ້ທີ 6. ເອົາໃຈໃສ່ກະກຽມດຳເນີນຊີວິດການເມືອງຄະນະບໍລິຫານງານພັກທ້າຍສະໄໝໃຫ້ເລິກເຊີ່ງ, ເຖີງຖອງ, ກ້າຫານຕຳນິຕິຊົມເຊີ່ງກັນ ແລະ ກັນດ້ວຍຄວາມຈິງໃຈ, ກົງໄປກົງມາ ແລະ ສ້າງສັນ ບົນພື້ນຖານຜົນຂອງການດຳເນີນຊີວິດການເມືອງຄະນະບໍລິຫານງານພັກທ້າຍສະໄໝ  ຈີ່ງຕົກລົງບຸກຄະລາກອນໃນຄະນະພັກຊຸດເກົ່າ ໃຜຈະສືບຕໍ່ສະໝັກ ແລະ ບໍ່ສືບຕໍ່ສະໝັກ.

ຂໍ້ທີ 7. ການດຳເນີນກອງປະຊຸມໃຫຍ່ອົງຄະນະພັກກະຊວງ-ອົງການ ແລະ ແຂວງ-ນະຄອນ ຫຼວງ ສູ້ຊົນໃຫ້ສຳເລັດພາຍໃນ ເດືອນພະຈິກ ປີ 2020. ການດຳເນີນກອງປະຊຸມໃຫຍ່ໃຫ້ເອົາໃຈ ໃສ່ທາງດ້ານເນື້ອໃນເປັນຕົ້ນຕໍ ຫຼຸດຜ່ອນດ້ານຮູບການຕ່າງໆທີ່ບໍ່ຈຳເປັນລົງເຊັ່ນ: ຫຼຸດຈຳນວນແຂກທີ່ຖືກເຊີນ; ຢຸດເຊົາການມອບຊໍ່ດອກໄມ້; ການເຂົ້າອວຍພອນຂອງມວນຊົນ; ຈຳກັດເວລາດຳເນີນກອງປະຊຸມໃຫຍ່; ການຈັດງານລ້ຽງ ງານມ່ວນຊື່ນ ແລະ ອື່ນໆ ເພື່ອເປັນການປ້ອງກັນ ສະກັດກັ້ນການລະບາດຂອງພະຍາດໂຄວິດ-19 ແລະ ຫຼີກລ້ຽງຄວາມສ່ຽງການຕິດເຊື້ອພະຍາດດັ່ງກ່າວ ທັງເປັນການຫຼຸດຜ່ອນການສີ້ນເປືອງໃຊ້ຈ່າຍງົບປະມານ ໃນສະພາບທີ່ພວກເຮົາພວມປະເຊີນໜ້າກັບຄວາມຫຍຸ້ງຍາກໃນປະຈຸບັນ.

ກຳນົດເວລາດຳເນີນກອງປະຊຸມໃຫຍ່ດັ່ງນີ້: ກອງປະຊຸມໃຫຍ່ອົງຄະນະພັກກະຊວງ-ອົງການ ໃຫ້ໃຊ້ເວລາ 1 ວັນເຄີ່ງ. ກອງປະຊຸມໃຫຍ່ອົງຄະນະພັກແຂວງ-ນະຄອນຫຼວງ ໃຫ້ໃຊ້ເວລາ 2 ວັນ, ກອງປະຊຸມໃຫຍ່ອົງຄະນະພັກເມືອງ ໃຫ້ໃຊ້ເວລາ 1 ວັນເຄີ່ງ.

ທັງໝົດນັ້ນຄືບາງເນື້ອໃນສຳຄັນຂອງຄຳສັ່ງເລກທີ 08/ຄລສພ ທີ່ຢາກໃຫ້ກຳໄດ້ ເພາະນີ້ແມ່ນນິຕິກຳສຳຄັນຂອງພັກ ສະນັ້ນ ຈື່ງມີຄວາມຈຳເປັນທີ່ສະມາຊິກພັກແຕ່ລະສະຫາຍ, ຄະນະພັກແຕ່ລະຂັ້ນ ຕ້ອງໄດ້ກຳແໜ້ນ ແລະ ເຊື່ອມຊຶມຢ່າງເລິກເຊີ່ງ ເພື່ອພ້ອມກັນຈັດຕັ້ງປະຕິບັດໃຫ້ມີຜົນສຳເລັດ ແລະ ບັນລຸຈຸດປະສົງຄາດໝາຍທີ່ວາງໄວ້.

ໂດຍ: ທິດດີ