ທ່ານ ບຸນ​ທອງ ຈິດ​ມະນີ ກໍາ​ມະ​ການ​ກົມ​ການເມືອງ​ສູນ​ກາງ​ພັກ ຄະ​ນະເລຂາທິການ​ສູນ ​ກາງ​ພັກ ຮອງ​ນາຍົກລັດຖະມົນຕີ ປະທານ​ຄະນະ​ກວດກາ ​ສູນ​ກາງ​ພັກ ແລະ ອົງການກວດກາ​ລັດຖະບານ ຫົວໜ້າອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ຫົວໜ້າ​ຄະນະ​ຊີ້​ນໍາ​ໂຄງການ​ກໍ່ສ້າງ​ທາງ​ລົດໄຟ​ລາວ​-​ຈີນ  ພ້ອມ​ດ້ວ​ຍຄະນະໂດຍ​ ມີທ່ານ ບຸນ​ຈັນ  ສິນ​ທະ​ວົງ  ກໍາ​ມະ​ການ​ສູນ​ກາງ​ພັກ ລັດຖະມົນຕີ​ກະຊວງ​ໂຍທາ​ທິ​ການ ແລະ ຂົນສົ່ງ ໄດ້​ລົງ​ເຄື່ອນໄຫວ ຊຸກຍູ້​ໂຄງການ​ກໍ່ສ້າງ​ທາງລົດ ໄຟ​ລາວ​-​ຈີນ ຢູ່​​ໄລ​ຍະນະ ຄອນ ຫຼວງ​ວຽງ​ຈັນ ແລະ ແຂວງ​ວຽງ​ຈັນ​ໃນ​ວັນ​ທີ 4 ມິຖຸນາຜ່ານ​ມາ.

ທ່ານ ຊຽວ ກົວ ເວິນ (Xiaa Qianwen) ຜູ້​ອໍາ​ນວຍ​ການ​ໃຫຍ່​ບໍລິສັດ​ທາງ​ລົດໄຟ​ລາວ​-​ຈີນ ໄດ້​ລາຍ​ງານ ກ່ຽວ​ກັບ​ຄວາມ​ຄືບ​ໜ້າ​ໃນ​ການ​ກໍ່ສ້າງ​ທາງ​ລົດໄຟ​ລາວ​-​ຈີນ ຕໍ່​ທ່ານ​ຮອງ​ນາຍົກລັດຖະມົນຕີ ພ້ອມ​ດ້ວຍ​ຄະນະ​ຊາບ​ວ່າ: ມາ​ຮອດ​ທ້າຍ​ເດືອນ​ພຶດສະພາ 2020 ສາມາດ​ປະຕິບັດ​ໄດ້​ສໍາ​ເລັດ 89,43% ຂອງ​ວຽກ​ງານ​ທັງ​ໝົດ, ການ​ກໍ່ສ້າງ​ພື້ນຖານ​ໂຄງ​ລ່າງ​ທາງ​ລົດໄຟ​ປະກອບ​ມີ ການ​ຊີ​ເຈາະ​ອຸ​ໂມງ​ໄດ້ 75 ອຸ​ໂມງ ໃນ​ນີ້​ສາມາດ​ເຈາະ​ທະລຸ​ແລ້ວ 65 ອຸ​ໂມງ, ກໍ່ສ້າງ​ຂົວ​ໄດ້ 164 ແຫ່ງ ໃນ​ນີ້​ສ້າງ​ເສົາ​ຂົວ​ສໍາ​ເລັດ​ເກືອບ 2.000 ເສົາ, ວາງ​ຂາງ​ຂົວ​ໄດ້ 746 ໄລ​ຍະ​ເສົາ ຊຶ່ງ ກວມ​ເອົາ 36,60% ຂອງ​ການ​ອອກ​ແບບ. ສ່ວນ​ການ​ວາງ​ລາງ​ລົດໄຟ​ແມ່ນ​ເລີ່ມ​ແຕ່​ບ້ານ​ຫ້ວຍ​ນຳ້​ເຢັນ ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ຫາແຂວງ​ຫຼວງ​ພະ​ບາງ ແມ່ນ ​ສໍາ​ເລັດ​ເກືອບ 50 ກິໂລແມັດ ຂອງ​ຄວາມ​ຍາວ​ທັງ​ໝົດ 409 ກິໂລ​ແມັດ. ສໍາ​ລັບ​ຄວາມ​ຄືບ​ໜ້າ​ໃນ​ການຈັດຕັ້ງ​ປະຕິບັດ​ໂຄງການ​ກໍ່ສ້າງ​ທາງ​ລົດໄຟ​ລາວ​-​ຈີນ ໄລຍະ 2 ແຕ່​ສະຖານີ​ໂດຍສານ​ນະຄອນ​ຫຼວງ​ວຽ​​ງ ຈັນ ຫາ ສະຖານີ​ສິນຄ້າ​ວຽງ​ຈັນ​ໃຕ້ (ເຂດ​ທ່າ​ນາ​ແລ້ງ) ແມ່ນ​ເຮັດ​ສໍາ​ເລັດ​ການ​ປັກ​ຫຼັກ ເຂດ​ສະຖານີ​ໂດຍສານ ໃນ​ເນື້ອທີ່ 150 ເຮັກຕາ, ປັກ​ຫຼັກ​ເຂດ​ສະຫງວນ​ທາງ​ລົດໄຟ ຍາວ 17 ກິໂລແມັດ; ປັກ​ຫຼັກ ເຂດ​ສະຖານີ​ວຽງ​ຈັນ​ໃຕ້ ຈໍາ​ນວນ 3 ຈຸດ ໃນ​ນີ້​ສາມາດ​ເຮັດ​ສໍາ​ເລັດ​ແລ້ວ 2 ຈຸດ ຄື:  ຈຸດ​ສູນ​ເຕັກນິກ​ໃນ​ເນື້ອທີ່ 57 ເຮັກຕາ ແລະ ຈຸດ​ສາງ​ພັກ​ສິນຄ້າ 50 ເຮັກຕາ; ສ່ວນ​ຈຸດ​ຄ່ຽນ​ຖ່າຍ​ສິນ​ຄ້າ​ກໍາ​ລັງ​ຢູ່​ໃນ​ຂັ້ນ​ຕອນ​ອອກ​ແບບ ແລະ ວຽກ​ງານ​ອື່ນໆ​ກໍ່​ມີ​ຄວາມ​ຄືບ​ໜ້າ​ເຊັ່ນ​ດຽວ​ກັນ ຄາດ​ວ່າ​ໂຄງການ​ນີ້​ຈະ​ໃຫ້​ສໍາ​ເລັດ​ທ້າຍ​ປີ 2021.

ໂອກາດ​ນີ້ ທ່ານ ບຸນ​ທອງ ຈິດ​ມະນີ ກໍ​ໄດ້​ຕາງໜ້າ​ໃຫ້​ລັດຖະບານ ສະແດງ​ຄວາມ​ຊົມເຊີຍ​ຕໍ່​ບັນດາ ຄະ​ນະ​ນໍາ ແລະ ພະນັກງານ​ບໍລິສັດ​ທາງ​ລົດໄຟ​ລາວ​-​ຈີນ ທີ່​ສາມາດ​ເຮັດ​ສໍາ​ເລັດ​ວຽກ​ງານ​ໃນຫຼາຍ ​ດ້ານ ​ຊຶ່ງ​ຈະ​ສົ່ງ​ຜົນໃຫ້​ໂຄງ ການ​ສາ​ມາດ​ສໍາ​ເລັດ​ຕາມ ແຜນການ​ທີ່​ວາງ​ໄວ້. ພ້ອມ​ນີ້​ທ່ານ​ໄດ້​ເນັ້ນ​ໜັກ​ໃຫ້​ຄະ​ນະ​ນໍາ​ຂອງ​ບໍລິສັດ ແລະ ຄະນະ​ຮັບຜິດຊອບ​ໂຄງການ ຈົ່ງ​ພ້ອມ​ກັນ​ເອົາໃຈໃສ່​ສືບຕໍ່​ຕິດຕາມ, ກວດກາ ແລະ ຄຸ້ມ​ຄອງ​ວຽກ​ງານ​ໃຫ້​ໄປ​ຕາມ ແຜນ ແລະ ທິດ​ຊີ້​ນໍາ​ຂອງ​ຂັ້ນ​ເທິງ;ສືບຕໍ່​ປຶກສາ​ຫາລື​ກັນ​ໃນ​ການ​ຍົກຍ້າຍ​ປະຊາ​ຊົນ​ຈໍາ​ນວນ​ໜຶ່ງ ໃນ 4 ຈຸດ ຂອງ ໂຄງການ​ໄລຍະ 2 ໃຫ້​ສໍາ​ເລັດ​ໂດຍ​ໄວ, ສ່ວນ​ກິດ​ຈະ​ກໍາ​ຕ່າງໆ​ທີ່​ທາງ​ບໍລິສັດ​ໄດ້​ມອບ​ໃຫ້​ແກ່​ສັງຄົມ​ໃນ​ໄລຍະ​ຜ່ານ​ມາ ໃຫ້​ສືບຕໍ່​ຈັດ​ຕັ້ງ​ປະຕິບັດ​ຕໍ່.

ທີ່​ສໍາ​ຄັນ​ມາ​ຮອດ​ປັດຈຸບັນ​ການ​ແຜ່​ລະບາດ​ຂອງ​ພະຍາດໂຄ​ວິດ-19 ຍັງ​ສືບຕໍ່​ແຜ່​ລະບາດນັ້ນ ໃຫ້​ທາງ​ບໍລິສັດ​ສືບຕໍ່​ຈັດ​ຕັ້ງ​ປະຕິບັດ​ມາດ​ຕະການ​ປ້ອງ​ກັນ​ຕ່າງໆ​ທີ່​ລັດຖະບານ​ກໍ​ຄື​ຄະນະ​ສະເພາະ​ກິດ​ວາງ​ອອກ​ໃນ​ແຕ່​ລະ​ໄລຍະ​ຢ່າງ​ເຂັ້ມ​ງວດ​ເພື່ອ​ປ້ອງ​ກັນ​ການ​ລະບາດ​ຂອງ​ພະຍາດ​ນີ້​ໃນ​ຂອບ​ເຂດ​ຂອງ​ໂຄງການເຊັ່ນ: ໃຫ້​ພະນັກງານ​ກໍາ​ມະກອນ​ໃສ່​ຜ້າ​ອັດ​ປາກ​ດັງ, ລ້າງ​ມື​ດ້ວຍ​ເຈ​ວ​ທີ່​ມີ​ທາດ​ເຫຼົ້າ, ກ່ອນ​ຈະ​ເຂົ້າ​ທີ່​ພັກ​ໃຫ້​ອະນາໄມ​ຮ່າງກາຍ​ໃຫ້​ສະອາດ ແລະ ອື່ນໆ.

ໂອກາດ​ນີ້ ທ່ານ​ຮອງ​ນາຍົກລັດຖະມົນຕີ ພ້ອມ​ດ້ວຍ​ຄະນະ ໄດ້​ລົງ​ເຄື່ອນ​ໄຫວ​ເບິ່ງ ການ​ກໍ່ສ້າງ​ຢູ່​ພາກ​ສະໜາມ ຂອງ​ໂຄງການ​ກໍ່ສ້າງ​ທາງ​ດ່ວນ​ວຽງ​ຈັນ​-​ວັງ​ວຽງ ທີ່​ມີ​ຄວາມ​ຍາວ 109 ກິໂລແມັດ ໃນ​ມູນ​ຄ່າ​ການ​ກໍ່ສ້າງ​ທັງ​ໝົດ​ເກືອບ 1,3  ຕື້​ໂດ​ລາ ຕື່ມ​ອີກ.

Medialaos MMD