ກິນຜັກ ແລະ ໝາກໄມ້ເຮັດໃຫ້ຮ່າງກາຍມີວິຕາມິນຊີ ແຮ່ທາດພຽງພໍ ແລະ ຊ່ວຍກະຕຸ້ນລະບົບພູມຕ້ານທານເຮັດວຽກໄດ້ດີຂື້ນ ເພື່ອຕ້ານເຊື້ອພະຍາດ ແລະ ໄວຣັດຊະນິດຕ່າງໆ ໂດຍພາວະໂລກລະບາດ ການກະກຽມຮ່າງກາຍໃຫ້ພ້ອມສາມາດຊ່ວຍຫຼຸດຜ່ອນຄວາມສ່ຽງໄດ້.

ເມື່ອໂລກເຕັມໄປດ້ວຍມົນລະພິດ ແລະ ໄວຣັດທີ່ແຜ່ລາມໄປທົ່ວໂລກ ການກະກຽມຂອງຮ່າງກາຍຂອງພວກເຮົາຈຶ່ງເປັນທາງເລືອກໜື່ງຈະຊ່ວຍຫຼຸດຜ່ອນຄວາມສ່ຽງຕໍ່ການເປັນພະຍາດຕ່າງໆ ປັບນິໄສການນອນ ເພີ່ມການອອກກຳລັງກາຍ ແລະ ເລືອກກິນອາຫານທີ່ມີວິຕາມິນ, ແຮ່ທາດ ໂດຍສະເພາະແມ່ນ ໝາກໄມ້ ແລະ ຜັກເປັນປະຈຳ ເພາະວິຕາມິນໃນໝາກໄມ້ມີຫຼາຍສີສັນ ຈັດເປັນສານທີ່ຊ່ວຍຕໍ່ຕ້ານອະນຸມູນອິດສະລະ ແລະ ຊ່ວຍເສີມສ້າງລະບົບພູມຕ້ານທານແບບທຳມະຊາດ ຊື່ງໃຫ້ເຮັດວຽກຢ່າງມີປະສິດທິພາບ.

ນາທີນີ້ມີຜົນປະໂຫຍດດີໆ ຈາກຜັກ ແລະ ໝາກໄມ້

ຜັກ ແລະ ໝາກໄມ້ ຖືວ່າເປັນອາຫານທີ່ມີປະໂຫຍດຫຼາຍຕໍ່ຮ່າງກາຍ ເຕັມໄປດ້ວຍສານເຄມີຕ່າງໆ (Phytonutrients ຫຼື Phytochemicals) ມັກພົບໃນເມັດສີຂອງພືດ ວິຕາມິນ ແລະ ແຮ່ທາດຊ່ວຍຫຼຸດຜ່ອນການເກີດອະນຸມູນອິດສະຫຼະໃນຮ່າງກາຍ ເຮັດໃຫ້ຈຸລັງເສື່ອມໂຊມຊ້າລົງ ແລະ ກະຕຸ້ນລະບົບພູມຕ້ານທານ ພ້ອມທັງຍັບຍັ້ງການຂະຫຍາຍໂຕຂອງເຊື້ອພະຍາດຕ່າງໆ.

ນອກຈາກນັ້ນ ຜັກ ແລະ ໝາກໄມ້ບັນຈຸມີເສັ້ນໃຍອາຫານແລ້ວຍັງດີຕໍ່ລະບົບຍ່ອຍອາຫານ ແລ ະການຂັບຖ່າຍ ຊື່ງລໍາໄສ້ແມ່ນບ່ອນທີ່ມີຈຸລັງພູມຕ້ານທານຫຼາຍກວ່າ 70% ຈີ່ງເຮັດໃຫ້ສຸຂະພາບຂອງລໍາໄສ້ ມີຄວາມສຳຄັນໃນການກະຕຸ້ນພູມຕ້ານທານເພື່ອຕ້ານທານກັບພະຍາດຕ່າງໆ.

ຜັກກະຕຸ້ນພູມຕ້ານທານ

  • ຜັກສີຂຽວ, broccoli, ຜັກຫົມ ແລະ ຜັກສີຂຽວຫຼາຍມີສານຄໍໂຣຟິລ (Chlorophyll) ຊ່ວຍຕ້ານອະນຸມູນອິດສະລະ ຊ່ວຍຕ້ານມະເລັງ ມີແຮ່ທາດ ວິຕາມິນ ແລະ ໄຟຣ໌ເບີສູງ.
  • ຜັກສີເຫລືອງ, ໝາກອຶ, ສາລີເຫຼືອງ, ດອກດາວເຮືອງມີສານລູທີນ (lutein) ຊ່ວຍບຳລຸງສາຍຕາ ຫຼຸດຄວາມສ່ຽງໃນການເກີດກັບຈໍປະສາດຕາ.
  • ຜັກສີເຫຼືອງສົ້ມ ແລະ ສີແດງ ເຊັ່ນ: ແຄລອດ, ໝາກເຂືອຄືນ, ໝາກເຜັດໃຫຍ່ມີສານແຄໂຣທີນອຍ (Carotenoids) ຊ່ວຍເພີ່ມລະບົບພູມຕ້ານທານ ຫຼຸດການເກີດຂອງອະນຸມູນອິດສະຫຼະໃນຮ່າງກາຍ ແລະ ບຳລຸງສາຍຕາ.
  • ຜັກສີແດງເຊັ່ນ: ໝາກເຜັດແດງ, ໝາກເລັ່ນ, ໝາກຫຸ່ງມີສານ Lycopene ເຊິ່ງເປັນສານຕ້ານອະນຸມູນອິດສະຫຼະທີ່ຊ່ວຍກະຕຸ້ນລະບົບພູມຕ້ານທານ, ຊະລໍຄວາມແກ່ເຖົ້າ ເຮັດໃຫ້ເຊວໃນຮ່າງກາຍແຂງແຮງ.
  • ຜັກສີມ້ວງແດງ ແລະ ສີມ້ວງສີຟ້າ ເຊັ່ນ: ເຂົ້າໄລເບີລີ້, ກະລໍ່າປີສີມ້ວງ, ແຄລອດສີມ້ວງ ແລະມັນຕົ້ນສີມ້ວງມີສານແອນໂທໄຊຍານິນ (Anthocyanin) ຊ່ວຍຫຼຸດການເສື່ອມສະພາບຂອງຈຸລັງໃນຮ່າງກາຍ ຊ່ວຍຫຼຸດຄວາມສ່ຽງຂອງໂລກຫົວໃຈ ແລະ ເສັ້ນເລືອດອຸດຕັນ.
  • ຜັກ ແລະ ໝາກໄມ້ສີຂາວ ເຊັ່ນ: ຜັກທຽມ, ເຫັດ, ຂີງ, ຜັກບົ່ວ ແລະ ຫົວສີງໄຄມີສານ Allicin ເພື່ອຊ່ວຍຕ້ານອະນຸມູນອິດສະຫຼະ ຊ່ວຍຫຼຸດໄຂມັນໃນເສັ້ນເລືອດ ປ້ອງກັນຄວາມດັນເລືອດ ແລະພະຍາດຫົວໃຈຫຼອດເລືອດ ແລະ ກະຕຸ້ນລະບົບພູມຕ້ານທານ.

ໝາກໄມ້ທີ່ເຕັມໄປດ້ວຍວິຕາມິນຊີ

ໝາກໄມ້ເອງກໍ່ບໍ່ນ້ອຍໜ້າມີປະໂຫຍດ ແລະ ວິຕາມິນຫຼາຍ ໂດຍສະເພາະໃນເວລາທີ່ພວກເຮົາຕ້ອງຕໍ່ສູ້ກັບເຊື້ອພະຍາດ, ວິຕາມິນຊີ (ascorbic Acid) ແມ່ນວິຕາມິນທີ່ຮ່າງກາຍບໍ່ສາມາດສັງເຄາະໄດ້ເອງ ຕ້ອງໄດ້ຮັບຈາກການກິນອາຫານເທົ່ານັ້ນ.

ວິຕາມິນ C ຊ່ວຍປ້ອງກັນ ແລະ ຫຼຸດຜ່ອນຄວາມຮຸນແຮງໄຂ້ຫວັດໄດ້ ຈາກຄຸນລັກສະນະຕ່າງໆ ທີ່ຊ່ວຍໃຫ້ລະບົບພູມຕ້ານທານເຮັດວຽກໄດ້ຢ່າງມີປະສິດຕິພາບ ແລະ ຍັງຊ່ວຍຫຼຸດຜ່ອນຄວາມສ່ຽງຂອງພະຍາດ, ພູມແພ້, ພະຍາດທີ່ເກີດຈາກການຕິດເຊື້ອໄວຣັດ ແລະ ແບັດທີເລຍ.

ໝາກໄມ້ເກືອບທັງໝົດ ທີ່ມີລົດຊາດສົ້ມຈະມີປະລິມານວິຕາມິນ C ຫຼາຍ ລວມທັງໝາກອະງຸ່ນ, ໝາກ ກ້ຽງ, ໝາກນາວ, ໝາກນັດ, ໝາກໂປມ, ແລະ ລູກເບີລີ້ຊະນິດຕ່າງໆ ນອກຈາກນີ້ຜັກໃບຂຽວຫຼາຍຊະນິດຍັງມີວິຕາມິນຊີສູງເຊັ່ນ: ຜັກກະລໍ່າ, ກາດນາ, ແກ່ນຜັກອີ່ຫຸມ, ຜັກຫົມ ແລະ ບ໋ອກໂຄລີ້ເປັນຕົ້ນ.

ກິນ 400 ກຣາມຕໍ່ຄົນຕໍ່ມື້.

ແນະນຳໃຫ້ກິນໝາກໄມ້ ແລະ ຜັກຕາມຄຳແນະນຳ ຂອງອົງການອະນາໄມໂລກຄື 400 ກຣາມຕໍ່ຄົນຕໍ່ມື້.

  • ແບ່ງຜັກອອກເປັນ 6 ບ່ວງຕໍ່ມື້ (ຜັກປຸງແຕ່ງສຸກຈະມີນໍ້າໜັກສະເລ່ຍປະມານ 50 ກຣາມຕໍ່ 1 ບ່ວງ).
  • ໝາກໄມ້ 2-3 ສ່ວນຕໍ່ມື້ (ໝາກໄມ້ 1 ສ່ວນຈະມີນໍ້າໜັກປະມານ 80-100 ກຼາມ)

ເລືອກຜັກທີ່ມີເສັ້ນໃຍສູງ, ປານກາງ, ຕໍ່າ ແລະ ເລືອກໝາກໄມ້ທີ່ມີປະລິມານນໍ້າຕານທີ່ເໝາະສົມກັບສະພາບສຸຂະພາບຂອງທ່ານ ເລືອກຜັກ ແລະ ໝາກໄມ້ຊະນິດຕ່າງໆ ໃຫ້ສະຫຼັບໝູນວຽນກັນໃຫ້ຫຼາຍ ຫຼື ຖ້າບໍ່ມີເວລາ ຫຼື ເຮັດອາຫານບໍ່ເປັນ, ກິນຜັກ ແລະ ນໍ້າໝາກໄມ້ປັ່ນ ຫຼື ດື່ມອາຫານດ້ວຍນໍ້າໝາກ ໄມ້ ແລະ ຜັກ 100% ແມ່ນທາງເລືອກທີ່ສະດວກ ແລະ ງ່າຍກວ່າ.

ເສີມສ້າງພູມຕ້ານທານ ຕ້ອງຈັດໃຫ້ສຳເລັດສູດ

ນອກຈາກການກິນໝາກໄມ້ຜັກ ແລະ ອາຫານທີ່ດີຕໍ່ສຸຂະພາບ ການອອກກໍາລັງກາຍເປັນປະຈໍາຢ່າງຕໍ່ເນື່ອງ ກໍ່ມີສ່ວນໃນການເສີມສ້າງລະບົບພູມຄຸ້ມກັນເຊັ່ນ: ເລືອກກິດຈະກຳການອອກກຳລັງກາຍ ທີ່ເໝາະສົມກັບສະພາບຮ່າງກາຍ ເລືອກບ່ອນທີ່ປອດໄພ ອາກາດປອດໂປ່ງ ແສງແດດສ່ອງດີ ເຊັ່ນ: ເດີ່ນໜ້າບ້ານ, ລະບຽງ ຫຼື ບໍລິເວນປ່ອງຢ້ຽມ ແລະ ປະຕູຢ່າງໜ້ອຍ 30-40 ນາທີ ຫຼື 3-4 ມື້ຕໍ່ອາທິດ.

ອີກຢ່າງໜຶ່ງທີ່ບໍ່ຄວນເບິ່ງຂ້າມ ແລະ ຄວນໃຫ້ຄວາມສຳຄັນຄືການນອນຫຼັບໃຫ້ພຽງພໍ ເນື່ອງຈາກການຄົ້ນຄ້ວາຫຼາຍອັນສະແດງໃຫ້ເຫັນວ່າຮ່າງກາຍຂອງຄົນເຮົາຈະສ້າງລະບົບພູມຕ້ານທານຂື້ນມາໃນລະຫວ່າງທີ່ເຮົາພວມນອນຫຼັບສະນິດ ການນອນຫຼັບທີ່ມີຄຸນນະພາບແມ່ນນອນຫຼັບ 7-8 ຊົ່ວໂມງຕໍ່ມື້ແລະ ຄວນຫຼຸດຜ່ອນຄວາມຕືງຄຽດ ເພື່ອຫຼຸດຜ່ອນການເກີດຂອງອະນຸມູນອິດສະຫຼະໃນຮ່າງກາຍ.