ກອງປະຊຸມ ລາຍງານ ຄວາມຄືບໜ້າໂຄງການປັບປຸງ ຂະຫຍາຍລະບົບນຳ້ປະປາ ແລະ ສຸຂາພິບານເມືອງໄຊຍະບູລີ ແລະ ເມືອງບໍ່ແຕນ ແຂວງ ໄຊຍະບູລີ ໄດ້ຈັດຂຶ້ນໃນວັນທີ 9 ມິຖຸນາຜ່ານມາ, ທີ່ຫ້ອງປະຊຸມ ພະແນກໂຍທາທິການ ແລະ ຂົນສົ່ງ(ຍທຂ) ແຂວງໄຊຍະບູ ລີ ໂດຍການເປັນປະທານຮ່ວມ ຂອງທ່ານນາງ ວິໄລຄຳ ໂພສະລາດ ຮອງລັດຖະມົນຕີ ກະຊວງ ຍທຂ, ທ່ານ ບຸນແທນ ທີແກ້ວ ກໍາມະການພັກແຂວງ ເລຂາ ພັກເມືອງ ເຈົ້າເມືອງໄຊຍະບູລີ, ມີພາກສ່ວນກ່ຽວຂ້ອງ ພ້ອມ ດ້ວຍພະນັກງານວິຊາການກ່ຽວຂ້ອງເຂົ້າຮ່ວມ.

ໃນກອງປະຊຸມທ່ານ ສົມພອນ ຈັນທະວົງ ຫົວໜ້າໜ່ວຍ ງານຈັດຕັ້ງປະຕິບັດໂຄງການ ນ້ຳປະປາ ແລະ ສຸຂາພິບານ ແຂວງໄຊຍະບູລີໄດ້ຂຶ້ນລາຍງານການຈັດຕັ້ງປະຕິບັດໂຄງການ ນໍ້າປະປາ ສຸຂາພິບານ ວ່າ: ອີງຕາມສັນຍາຮັບເໝົາ ກໍ່ສ້າງໂຄງການນ້ຳປະປາ ແລະ ສຸຂາພິບານເມືອງໄຊຍະບູລີ ແຂວງໄຊຍະບູລີ ລົງວັນທີ 17 ກໍລະກົດ 2018 ວ່າດ້ວຍການ ປັບປຸງ ແລະ ກໍ່ສ້າງລະບົບນ້ຳ ປະປາ ແລະ ສຸຂາພິບານ, ລວມມູນຄ່າໃນສັນຍາທັງໝົດ 4 ລ້ານກວ່າໂດລາ ເພື່ອສະໜອງນຳ້ໃຫ້ 24 ບ້ານເປົ້າໝາຍໂຄງການ; ກຳນົດເວລາກໍ່ສ້າງຕາມສັນຍາ 36 ເດືອນ (20 ສິງຫາ 2018-20 ສິງຫາ 2021), ຮັບເໝົາກໍ່ສ້າງ ໂດຍກຸ່ມບໍລິສັດ ຊົງເມີຍ ວິສະວະກໍາ ຈໍາກັດ.

ມາຮອດປັດຈຸບັນການຈັດຕັ້ງປະຕິບັດແມ່ນລົງມືກໍ່ສ້າງໄປແລ້ວ 23 ເດືອນ ເຫັນວ່າມີຄວາມຄືບໜ້າ 66,97%, ສ່ວນເມືອງບໍ່ແຕນແມ່ນອີງຕາມສັນຍາຮັບເໝົາກໍ່ສ້າງລົງວັນທີ 23 ເມສາ 2019. ລວມມູນຄ່າການກໍ່ສ້າງ 12 ຕື້ 170 ລ້ານກວ່າກີບ ເພື່ອແຈກຈ່າຍນໍ້າສະອາດໃຫ້ 4 ບ້ານເປົ້າໝາຍເມືອງບໍ່ແຕນ, ກຳນົດເວລາກໍ່ສ້າງ 18 ເດືອນ (15 ພຶດສະພາ 2018-15 ຕຸລາ 2019) ແລະ ຕໍ່ສັນຍາຕື່ມ 2 ຄັ້ງລວມ 56 ວັນ, ຜ່ານການຈັດຕັ້ງປະຕິບັດໂຄງການມາຮອດປະຈຸບັນແມ່ນປະຕິບັດແລ້ວ 20 ເດືອນເຫັນວ່າໜ້າວຽກທັງໝົດຂອງສັນຍາແມ່ນສໍາເລັດ 100%. 

Medialaos MMD