“ເຈົ້າເປັນຄົນນອນກົນບໍ່?” ທ່ານຮູ້ບໍ່ວ່າການນອນກົນມີຄວາມສ່ຽງຕໍ່ການເປັນພະຍາດຫຼາຍ ເພາະວ່າການນອນກົນເກີດຈາກອາການຜິດປົກກະຕິທາງດ້ານການນອນ ແລະ ສຸຂະພາບບໍ່ດີ ເຊັ່ນ: ໂລກອ້ວນອາດຈະເຮັດໃຫ້ມີເນື້ອເຍື່ອລຳຄໍເປັນຈຳນວນຫຼວງຫຼາຍເຊິ່ງເຮັດໃຫ້ເກີດການນອນກົນ ຄໍອັກເສບ ຫຼື ຄົນເຈັບທີ່ມີບັນຫາກ່ຽວກັບລະບົບຫາຍໃຈໂດຍບໍ່ຮູ້ຕົວ ແລະ ອື່ນໆ.

ວິທີຮັກສາອາການນອນກົນ

ກ່ອນທີ່ພະຍາດຈະອ້ອມຕົວທ່ານຄວນແກ້ໄຂບັນຫາການນອນກົນໂດຍໄວ ກ່ອນທີ່ມັນຈະສາຍເກີນໄປ ເຮົາມີວິທີແກ້ໄຂບັນຫາທີ່ຊ່ວຍປັບປຸງສຸຂະພາບການນອນຂອງທ່ານ ດັ່ງຕໍ່ໄປນີ້:

ປັບປ່ຽນທ່ານອນ

ໃຜຮູ້ບໍ່ວ່າພຽງແຕ່ປັບປ່ຽນທ່ານອນຂອງທ່ານ ສາມາດຊ່ວຍແຫ້ບັນຫານອນກົນ ໂດຍບໍ່ຕ້ອງອາໃສການກິນຢາຊ່ວຍ ເພາະຄົນສ່ວນຫຼາຍທີ່ມີຄວາມຜິດປົກກະຕິດ້ານການນອນມັກຈະເລີ່ມຕົ້ນດ້ວຍສິ່ງງ່າຍໆ ເຊັ່ນ: ມັກນອນຢູ່ໃນທ່າທີ່ບໍ່ຖືກຕ້ອງ ເຊິ່ງກໍ່ໃຫ້ເກີດຄວາມບໍ່ສະບາຍ ສົ່ງຜົນໃຫ້ເກີດການນອນບໍ່ກົນ ລະເມີ ຫຼື ຝັນຮ້າຍ.

ຖ້າມີບັນຫາເລື່ອງການນອນກົນ ທ່ານອາດຈະຕ້ອງກວດເບິ່ງທ່ານອນຂອງຕົນເອງເບິ່ງວ່ານອນຫງາຍລະບໍ່? ເພາະພື້ນຂອງລີ້ນ ແລະ ເພດານປາກອ່ອນໆ ປິດກັ້ນເສັ້ນທາງຫາຍໃຈຈົນເຮັດໃຫ້ເກີດເປັນສຽງກົນ.

ຫຼັງຈາກນັ້ນພະຍາຍາມລອງປ່ຽນທ່ານອນໃໝ່ ເພາະທ່ານອນຈະຊ່ວຍແກ້ໄຂການນອນກົນໃນໄລຍະເບື້ອງຕົ້ນໄດ້ດີທີ່ສຸດ ພ້ອມທັງງໍແຂນສອກເລັກນ້ອຍ ເພື່ອໃຫ້ມືຢັນຄາງເພື່ອເປັນປິດປາກ.

ແຕ່ຖ້າຜູ້ໃດບໍໍຊິນເຄີຍທີ່ຈະນອນແຄງ ອາດຈະໃຊ້ເຕັກນິກນ້ອຍໆ ເພື່ອຊ່ວຍໂດຍການໃສ່ຜ້າ ຫຼື ລູກເທັນນິດໃສ່ເຊື່ອນອນທາງຫຼັງ ເພື່ອເປັນການບັງຄັບໃຫ້ນອນແຄງຕະຫຼອດເວລາ ສີ່ງນີ້ຈະຊ່ວຍໃຫ້ປ່ຽນຈາກນອນຫງາຍເປັນນອນແຄງໄດ້ ເຊິ່ງຈະຊ່ວຍຫຼຸດການນອນກົນ ແລະ ຢຸດຫາຍໃຈໃນເວລານອນຫຼັບໄດ້ງ່າຍ.

  • ກຽມພ້ອມບັນຍາກາດໃນການນອນຫຼັບ

ພຽງແຕ່ປ່ຽນທ່ານອນພຽງຢ່າງດຽວອາດຈະບໍ່ພຽງພໍ ການແກ້ນອນກົນມີວິທີ 2 ນີ້ທີ່ຈະຊ່ວຍໃຫ້ທ່ານຮູ້ສຶກສະບາຍ ແລະ ນອນຫຼັບສະນິດໂດຍການຈັດບັນຍາກາດ ແລະ ສະ ຖານທີ່ກຽມພ້ອມໃນການນອນຫຼັບຫຼາຍທີ່ສຸດ.

ເລີ່ມຕົ້ນຈາກການປັບໝອນໃຫ້ເໝາະສົມພຽງແຕ່ຊອກຫາໝອນມາຮອງຫົວໃຫ້ສູງປະ ມານ 4 ນີ້ວເພື່ອຊ່ວຍຫຼຸດອາການບວມຂອງເນື້ອເຍື່ອໃນລະບົບທາງຫາຍໃຈສ່ວນເທິງເຮັດໃຫ້ຫາຍໃຈໄດ້ສະດວກຂື້ນ.

ລວມທັງການເຮັດຄວາມສະອາດຕຽງນອນ ແລະ ໝັ່ນຊັກສົບໝອນ, ຜ້າຫົ່ມ ແລະ ຜ້າປູບ່ອນນອນ ເພື່ອປ້ອງກັນບໍ່ໃຫ້ຂີ້ຝຸ່ນສະສົມເຊິ່ງເປັນສາເຫດເຮັດໃຫ້ເກີດອາການແພ້ ແລະ ສົ່ງຜົນກະທົບຕໍ່ລະບົບທາງເດີນຫາຍໃຈ ຈົນສຸດທ້າຍອາການແພ້ກໍ່ເປັນສາເຫດຂອງການນອນຫຼັບກົນໄດ້ເຊັ່ນດຽວກັນ.

ການເບີ່ງແຍງຮັກສາສຸຂະພາບ

ຫຼຸດ​ນໍ້າ​ຫນັກ

ນໍ້າໜັກທີ່ເພີ່ມຂື້ນຈະເຮັດໃຫ້ຄໍໜາ ສົ່ງຜົນໃຫ້ໄຂມັນສະສົມຢູ່ອ້ອມບໍລິເວນຄໍ ໜ້າເອີກ ລວມທັງໜ້າທ້ອງແຍ່ຊ່ອງທາງຫາຍໃຈຈົນເກີດອາການນອນກົນ ສະນັ້ນການສູນເສຍນໍ້າໜັກແມ່ນວິທີທີ່ຈຳເປັນທີ່ສຸດໃນການແກ້ໄຂອາການດັ່ງກ່າວ ເຊິ່ງຕ້ອງໄດ້ເຮັດໄປພ້ອມໆ ກັບອາຫານການກິນ ອອກກຳລັງກາຍ ແລະ ຮັກສາສຸຂະພາບໃນດ້ານອື່ນໆ.

ຄວບຄຸມການກິນເຂົ້າເດິກ

ສຳລັບຫຼັກການຂອງການກິນອາຫານທີ່ຖືກຕ້ອງຂອງຄົນເຈັບທີ່ມີອາການນອນກົນ ຈະຕ້ອງຢຸດກິນ 3 ຊົ່ວໂມງກ່ອນເຂົ້ານອນ ແລະ ຫຼີກລ່ຽງການດື່ມເຫຼົ້າ ເນື່ອງຈາກວ່າມັນຈະເຮັດໃຫ້ກ້າມຊີ້ນຄໍຍານກ່ວາປົກກະຕິ.

ໝັ່ນອອກກຳລັງກາຍ

ນອກຈາກຈະເປັນວິທີຊ່ວຍຫຼຸດນໍ້າໜັກ ແລະ ຮັກສາຮ່າງກາຍໃຫ້ສວຍງາມ ການອອກ ກຳລັງກາຍຍັງສາມາດຊ່ວຍຫຼຸດການນອນກົນໄດ້.

ຫຼຸດສູບຢາ

ຢາສູບມີສານທີ່ພາໃຫ້ເປັນມະເຮັງປອດ ແລະ ເຮັດໃຫ້ຕັນດັງ ລວມທັງຫາຍໃຈບໍ່ສະດວກ ສະນັ້ນຜູ້ໃດທີ່ມີອາການນອນກົນ ແລະ ຢາກປິ່ນປົວຄວນຫຼີກລ່ຽງການສູບຢາກ່ອນເຂົ້ານອນ.

ຄົ້ນຫາເຕັກໂນໂລຢີເພື່ອຊ່ວຍໃຫ້ການນອນຫຼັບ

ສຳລັບຜູ້ທີ່ບໍ່ອົດທົນຕ້ອງການຊອກຫາຄວາມຊ່ວຍເຫຼືອໃນການແກ້ໄຂການນອນກົນ ປະ ຈຸບັນມີການປະດິດສ້າງຕ່າງໆ ທີ່ຈະຊ່ວຍອາການນອນກົນຫຼຸດລົງໄດ້.

ໄປພົບແພດ

ຖ້າທ່ານມີການນອນກົນໃນຂັ້ນອັນຕະລາຍເຊັ່ນວ່າ ທ່ານຢຸດຫາຍໃຈໃນເວລານອນຫຼັບ ແນະນຳໃຫ້ໄປພົບແພດດ່ວນ ເພື່ອໃຫ້ໄດ້ຮັບຄຳແນະນຳ ກ່ຽວກັບສາເຫດຂອງການນອນກົນ ແລະ ບ່ອນທີ່ມາຈາກພະຍາດອື່ນໆ ຫຼື ເປັນຍ້ອນພຶດຕິກໍາທີ່ທ່ານເຮັດໃນຊີວິດປະຈຳວັນບໍ່?

ຖ້າເກີດມາຈາກໂລກປະຈຳຕົວ ຫຼື ໂລກທີ່ເກີດຈາກພຶດຕິກໍາຈາກການເຮັດວຽກຄືກັບພະຍາດໃນກຸ່ມໂລກຫ້ອງການ ຄວນຮີບຮ້ອນຮັກສາອາການຂອງພະຍາດເຫຼົ່ານີ້ກ່ອນ ເພື່ອປ້ອງກັນການແຜ່ລາມຂອງພະຍາດ ແລະ ເປັນການປິ່ນປົວການນອນກົນໄດ້ເຊັ່ນດຽວກັນ.

ສະຫຼຸບ

‘ການນອນກົນ’ ແມ່ນບັນຫາທີ່ນອນທົ່ວໄປ ເຊິ່ງຖ້າປະໄວ້ດົນຈາກອາການທີ່ຜິດປົກກະຕິອາດຈະແຜ່ລາມໄປສູ່ພະຍາດທີ່ກໍ່ໃຫ້ເກີດຄວາມສ່ຽງຕໍ່ການເສຍຊີວິດ.

ສະນັ້ນ, ຢ່າປ່ອຍໃຫ້ສັນຍານສຸຂະພາບນີ້ກາຍເປັນພຽງສຽງທີ່ດັງໆ ແລ້ວຜ່ານໄປຄວນຮີບຟ້າວໄປປີ່ນປົວໃຫ້ຫາຍດີ ເຊັ່ນດຽວກັນກັບການເບີ່ງແຍງສຸຂະພາບຢ່າງສະໝໍ່າສະເໝີ ລວມທັງການເຂົ້າໄປພົບຜູ້ຊ່ຽວຊານດ້ານການນອນຫຼັບຢ່າງສະໝໍ່າສະເໝີ ພຽງເທົ່ານີ້ທ່ານກໍ່ສາມາດກັບຄືນສູ່ສຸຂະພາບດີ ແລະ ສາມາດນອນຫຼັບສະນິດແບບບໍ່ເຄີຍເປັນຢ່າງແນ່ນອນວ່າ:)