ລະວັງແອັບ ຟິນໂກ ທຸລະກິດແຊຣລູກໂຊ້ແບບໃໝ່ ທີ່ຈະເຮັດໃຫ້ສັງຄົມຕົກເປັນເຫຍື່ອ.
ກົມສື່ມວນຊົນ ກະຊວງ ຖະແຫລງຂ່າວວັດທະນະທຳ ແລະ ທ່ອງທ່ຽວ ໃຫ້ຮູ້ວ່າ: ເລີ່ມແຕ່ຕົ້ນເດືອນມີນາ 2020 ໄດ້ມີການສ້າງເພສ Shopping online By Fingo ຂື້ນເພື່ອໂຄສະນາໃຫ້ປະຊາຊົນທີ່ຕ້ອງການລາຍຮັບເສີມແບບງ່າຍໆ ສະເລ່ຍລາຍຮັບສາມແສນຫາຫ້າແສນກີບ ຕໍ່ມື້ ສາມາດເຮັດວຽກໄດ້ທຸກເພດ-ທຸກໄວ; ເຮັດວຽກໄດ້ທຸກສະຖານທີ່-ທຸກເວລາ ພຽງແຕ່ມີສັນຍານອິນເຕີເນັດ. ພາຍຫຼັງທີ່ມີຜູ້ສົນໃຈສະໝັກເຂົ້າກຸ່ມແລ້ວ ແມ່ນໄດ້ມີການສອນການຂາຍໃນລະບົບອອນລາຍ ຜ່ານກຸ່ມສະເພາະ ໂດຍສະມາຊິກທຸກຄົນຕ້ອງອັບເກຼດຕົວເອງ ມາຊື້ສິນຄ້າ 1,599 ບາດ( ປະມານ 5 ແສນກີບ) ແລະ ຊັກຊວນໝູ່ເພື່ອນທີ່ຮູ້ຈັກມາສະໝັກສະມາຊິກ ແລະ ຊື້ສິນຄ້າຕໍ່ຜ່ານແອັບຂອງຕົນທີ່ດາວໂຫຼດໄວ້ແລ້ວນັ້ນ ຈີ່ງຈະສາມາດສ້າງລາຍຮັບໃຫ້ຕົນເອງໄດ້, ຕໍ່ມາໄດ້ມີ ເພສ ຮັບສະໝັກພະນັກງານເຂົ້າເຮັດວຽກ-ປະເທດລາວ ແລະ ມີຜູ້ໃຊ້ເຟສບຸກຈໍານວນໜຶ່ງ ໄດ້ໂພສຂ່າວ ແລະ ຮູບພາບການສົນທະນາລະຫວ່າງສະມາຊິກຄົນໜຶ່ງ ທີ່ສົ່ງຂໍ້ຄວາມມາຊັກຊວນໃຫ້ເຂົ້າຮ່ວມກຸ່ມດັ່ງກ່າວ ເພື່ອເຕືອນສະຕິໃຫ້ແກ່ຜູ້ທີ່ກຳລັງຕັດສິນໃຈເຂົ້າຮ່ວມກຸ່ມ ໂດຍບອກວ່ານີ້ຄືທຸລະກິດແຊລູກໂສ້ ທີ່ກຳລັງເປັນຄະດີຄວາມ ແລະ ມີການຮ້ອງຟ້ອງກັນຫຼາຍໃນໄລຍະຜ່ານມາ, ຊຶ່ງລັກສະນະດັ່ງກ່າວແມ່ນເປັນທຸລະກິດແຊຣລູກໂຊ້ແບບໃໝ່ໂດຍບໍ່ມີການຈົດທະບຽນວິສາຫະກິດທີ່ຖຶກຕ້ອງຕາມກົດໝາຍ, ອາດເປັນບັນຫາສັງຄົມ-ປະກົດການຫຍໍ້ທໍ້ໃນຕໍ່ໜ້າ. ສະນັ້ນ ຈຶ່ງເຕືອນປະຊາຊົນຢ່າງຫລົງເຊື່ອ ແລະ ເຂົ້າຮ່ວມທຸລະກິດນີ້ ຢ່າງເດັດຂາດ, ໂດຍ ປັດຈຸບັນ ພາກສ່ວນກ່ຽວຂ້ອງກຳລັງຕິດຕາມ ແລະ ຈັບຕົວຜູ້ຢູ່ເບື້ອງຫລັງເຄືອຂ່າຍທຸລະກິດມາດຳເນີນຄະດີ.
ກົມສື່ມວນຊົນ ຍັງເປີດເຜີຍລາຍລະອຽດ ຂອງແອັບ ຟິນໂກ ໃຫ້ຮູ້ວ່າ: Fingo App ເປັນແອັບຊື້-ຂາຍເຄື່ອງແບບອອນລາຍ ໂດຍການຊັກຊວນກັນເຂົ້າກຸ່ມ- ດາວໂຫຼດແອັບ ເພື່ອຊື້-ຂາຍເຄື່ອງຢູ່ໃນແອັບ. ດ້ວຍວິທີການສະໝັກສະມາຊິກ ໂດຍການດາວໂຫຼດ Applications ແລະ ຊື້ສິນຄ້າຜ່ານແອັບເລີ່ມຕົ້ນ ປະມານ 280,000ກີບ ຕໍ່ 1 ຄົນ ເພື່ອເຂົ້າເປັນສະມາຊິກຊື້ເຄື່ອງໃນລາຄາໂຮງງານ. ແຕ່ຖ້າຢາກອັບເກຼດ ເປັນຜູ້ຂາຍ ແລະ ມີລາຍຮັບຈາກການຊື້ຂອງສະມາຊິກຕໍ່ໄປຈະຕ້ອງຊື້ເຄື່ອງ ປະມານ 450,000ກີບ ໂດຍຈະໄດ້ຮັບລາຍໄດ້ຈາກການສະ ໝັກສະມາຊິກຂອງລູກຄ້າທີ່ເຮົາຊັກຊວນເຂົ້າກຸ່ມ 112,500ກີບ ຕໍ່ 1 ຄົນ ແລະ ຖ້າມີລູກຄ້າຊື້ເຄື່ອງຜ່ານແອັບທີ່ຕົນເອງດາວໂຫຼດ ກໍ່ຈະໄດ້ 10-15% ຕໍ່ 1 ບິນ. ໂດຍລວມແລ້ວສາມາດເອີ້ນໄດ້ວ່າເປັນທຸລະກິດແຊລູກໂສ້.
Fingo App ເລີ່ມມີການໂຄສະນາ ຊັກຊວນກັນຫຼາຍໃນປະເທດໄທ ໂດຍໃຊ້ຊື່ວ່າ Fingo Thailand ໂດຍເລີ່ມສ້າງເພສດັ່ງກ່າວຂື້ນໃນປີ 2013 ຕໍ່ມາໄດ້ມີການສ້າງເພສໂຄສະນາໃນ ສປປ ລາວ ແລະ ເລີ່ມໂຄສະນາໃຫ້ປະຊາຊົນລາວເຂົ້າຮ່ວມກຸ່ມໃນຕົ້ນເດືອນ ມີນາ 2020 ພາຍໃຕ້ຊື່ Shopping online By Fingo. ໂດຍຈະມີການຊັກຊວນເຂົ້າກຸ່ມລັບ ເພື່ອສອນການຂາຍໃຫ້ສະມາຊິກທີ່ເຂົ້າກຸ່ມໃໝ່ ໃນເວລາ 18:00 ຂອງທຸກມື້ ຜ່ານກຸ່ມສະເພາະ ສອນໂດຍແອດມີນກຸ່ມໃນປະເທດໄທ. ເຮັດໃຫ້ມີປະຊາຊົນຫລົງເຊື່ອ ແລະ ມີຄົນຕົກເປັນເຫຍື່ອຈຳນວນຫລາຍ.