ຊົມເຊີຍຜົນສຳເລັດ ກອງປະຊຸມສູນກາງພັກ ຄັ້ງທີ 10 ສະໄໝທີ X ຢ່າງສຸດໃຈ

0
1186

ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X ທີ່ດຳເນີນແຕ່ວັນທີ 08 ຫາ 12 ມິຖຸນາ ໄດ້ສຳເລັດຜົນຢ່າງຈົບງາມ.

ກອງປະຊຸມສູນກາງຄັ້ງນີ້, ໄດ້ລົງເລິກປຶກສາຫາລື ແລະ ປະກອບຄຳເຫັນຕໍ່ເອກະສານສຳຄັນຂອງຊາດ ແລະ ບັນດາເນື້ອໃນທີ່ເປັນບັນຫາຍຸດທະສາດຂອງພັກ ຂອງຊາດ ທີ່ຈະນຳເຂົ້າຮັບຮອງຢູ່ກອງປະຊຸມໃຫຍ່ ຄັ້ງທີ່ XI ຂອງພັກ ໃນຕໍ່ໜ້າດັ່ງນີ້:

  1. ການຈັດຕັ້ງປະຕິບັດມະຕິກອງປະຊຸມຄົບຄະນະ ຄັ້ງທີ 07, 08, 09 ຂອງຄະນະບໍລິຫານສູນກາງພັກສະໄໝທີ X, ຕິດພັນກັບຄວາມຄືບໜ້າໃນການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ, ງົບປະມານ, ເງິນຕາປະຈຳໄຕມາດທີ I ປີ 2020.
  2. ກອງປະຊຸມໄດ້ສຸມໃສ່ຕີລາຄາຄືນຜົນສຳເລັດ, ຂໍ້ຫຍຸ້ງຍາກໃນການຈັດຕັ້ງປະຕິບັດມະຕິກອງປະຊຸມຄົບຄະນະ ຄັ້ງທີ 07, 08, 09 ຂອງຄະນະບໍລິຫານງານສູນກາງພັກ ສະໄໝທີ X ໃນຊຸມປີຜ່ານມາ.
  3. ພ້ອມດຽວກັນ, ກອງປະຊຸມໄດ້ເປັນເອກະພາບຕໍ່ບັນດາມາດຕະການກະຕຸ້ນ ແລະ ຍູ້ແຮງການເຕີບໂຕຂອງເສດຖະກິດ-ສັງຄົມ ໂດຍສະເພາະຄວາມພະຍາຍາມປັບປຸງສະພາບແວດລ້ອມຂອງການລົງທຶນ ກໍ່ຄືການເຄື່ອນໄຫວທຸລະກິດ ແລະ ການບໍລິການ.
  4. ການແບ່ງຂັ້ນຄຸ້ມຄອງ ການແບ່ງສິດຄວາມຮັບຜິດຊອບ ແລະ ການປະສານງານ ລະຫວ່າງ ສູນກາງ ແລະ ທ້ອງຖິ່ນ, ການແກ້ໄຂໜີ້ສິນ, ການປັບປຸງໂຄງສ້າງຂອງລັດວິສາຫະກິດຈຳນວນໜຶ່ງ ລວມທັງການແກ້ໄຂການຮົ່ວໄຫຼຂອງງົບປະມານ, ການປະຕິບັດລາຍຈ່າຍບໍລິຫານ ກໍ່ຄື ການລົງທຶນຂອງລັດຢ່າງມີຈຸດສຸມ ແນ່ໃສ່ສ້າງການຫັນປ່ຽນທີ່ແທ້ຈິງໃນຊຸມປີຕໍ່ໜ້ານີ້.
  5. ຮ່າງລາຍງານການເມືອງກອງປະຊຸມໃຫຍ່ ຄັ້ງທີ XI ຂອງພັກ, ກອງປະຊຸມໄດ້ປະກອບຄວາມເຫັນຢ່າງກົງໄປກົງມາ ແລະ ລົງເລິກເນັ້ນໜັກໃສ່ບັນຫາທີ່ເປັນທັດສະນະພື້ນຖານ, ເປັນຫຼັກການນຳພາຂອງພັກ ກໍ່ຄືເດັດດ່ຽວຍຶດໝັ້ນອຸດົມການສັງຄົມນິຍົມຂອງພັກ ແລະ ລັກສະນະນຳໜ້າຂອງພັກ.
  6. ການສ້າງຄວາມສາມັກຄີພາຍໃນພັກ ແລະ ສ້າງຄວາມສາມັກຄີຂອງທົ່ວປວງຊົນລາວທັງຊາດ ແລະ ບັນຫາອື່ນໆ ທີ່ພົວພັນເຖິງການສ້າງພື້ນຖານອັນໜັກແໜ້ນໃຫ້ແກ່ການພັດທະນາ ເສດຖະກິດ-ສັງຄົມ, ການປັບປຸງຍົກລະດັບ, ສ້າງຄວາມຢູ່ດີກິນດີໃຫ້ແກ່ປະຊາຊົນບັນດາເຜົ່າ, ການສ້າງຄວາມສະເໝີພາບ ແລະ ຄວາມຍຸດຕິທຳໃນສັງຄົມ.
  7. ຮ່າງແຜນພັດທະນາ ເສດຖະກິດ-ສັງຄົມ 05 ປີ ຄັ້ງທີ 09, ກອງປະຊຸມໄດ້ສຸມໃສ່ຄົ້ນຄວ້າ, ປຶກສາຫາລື ແລະ ຊອກໃຫ້ເຫັນໝົດທ່າແຮງບົ່ມຊ້ອນຂອງຊາດ ເພື່ອແກ້ໄຂຄວາມທຸກຍາກຂອງປະຊາຊົນ, ແກ້ໄຂຄວາມທຸກຍາກຂອງ ເສດຖະກິດ-ການເງິນ ເພື່ອສ້າງບາດກ້າວ ບຸກທະລຸທີ່ໜັກແໜ້ນ, ໃຫ້ແກ່ການພັດທະນາເສດຖະກິດແຫ່ງຊາດໃນຊຸມປີຕໍ່ໜ້າຕາມທິດຮັບປະກັນຄຸນນະພາບ, ມີຈຸດສຸມ, ຍືນຍົງ ແລະ ສີຂຽວ.
  8. ໃນນັ້ນ ໄດ້ວາງຄາດໝາຍໃຫຍ່ ການສ້າງປະຖົມປັດໄຈໃຫ້ແກ່ການຫັນເປັນອຸດສາຫະກຳ ແລະ ທັນສະໄໝຮອດປີ 2025 ຕ້ອງໃຫ້ສຳເລັດໂດຍພື້ນຖານ, ການສູ້ຊົນບຸກບືນຢ່າງແຂງແຮງ ເຮັດໃຫ້ແຜນພັດທະນາເສດຖະກິດ-ສັງຄົມ 05 ປີ ຄັ້ງທີ 09 ມີດ້ານຫັນປ່ຽນໃນການພັດທະນາ, ມີຄວາມໝັ້ນທ່ຽງ ແລະ ຍືນຍົງ.
  9. ສຸມໃສ່ຄົ້ນຄວ້າ, ປຶກສາຫາລື ຕໍ່ການປັບປຸງຮ່າງກົດລະບຽບຂອງພັກປະຊາຊົນປະຕິວັດລາວ ສະໄໝທີ X ເພື່ອປັບປຸງດັດແປງ ໃຫ້ສອດຄ່ອງກັບສະພາບການໃນໄລຍະໃໝ່ ແນ່ໃສ່ເຮັດໃຫ້ກົດລະບຽບຂອງພັກ ປະຊາຊົນປະຕິວັດລາວ ສະໄໝທີ XI ຄົບຖ້ວນ, ຊັດເຈນ, ຮັດກຸມ ແລະ ສົມບູນຍິ່ງຂຶ້ນ ເພື່ອເຮັດໃຫ້ພັກມີຄວາມປອດໄສ-ເຂັ້ມແຂງ ແລະ ໜັກແໜ້ນ.
  10. ປຶກສາຫາລືກ່ຽວກັບການປັບປຸງກົງຈັກບໍລິຫານລັດໃຫ້ມີຄວາມເໝາະສົມ, ສອດຄ່ອງ ແລະ ສາມາດປະຕິບັດພາລະບົດບາດໃນການຄຸ້ມຄອງລັດ, ຄຸ້ມຄອງສັງຄົມ, ເຮັດໃຫ້ແນວທາງປ່ຽນແປງໃໝ່ຂອງພັກ ກໍຄືການພັດທະນາເສດຖະກິດ-ສັງຄົມ ແຕ່ລະໄລຍະໄດ້ມີບາດກ້າວຂະຫຍາຍຕົວດ້ວຍຈັງຫວະທີ່ຕໍ່ເນື່ອງ.
  11. ສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ໄດ້ເນັ້ນໃສ່ໃຫ້ທົ່ວພັກ ທົ່ວປວງຊົນ ຈົ່ງສືບຕໍ່ເສີມຂະຫຍາຍມູນເຊື້ອ ຄວາມສາມັກຄີໃຫ້ເປັນປຶກແຜ່ນ, ພ້ອມກັນສືບຕໍ່ສ້າງຂະບວນການຮອບດ້ານໃຫ້ແຂງແຮງ ເພື່ອສ້າງຜົນງານຄຳນັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ແລະ ວັນສ້າງຕັ້ງ ສປປ ລາວ ຄົບຮອບ 45 ປີ (1975 – 2020) ຢ່າງເປັນຂະບວນຟົດຝຶ້ນ ແລະ ມີຜົນສຳເລັດເປັນຮູບປະທຳ.

ທົ່ວພັກ-ທົ່ວກອງທັບ ແລະ ທົ່ວປວງຊົນເຮົາຈົ່ງກຳແໜ້ນ-ເຊື່ອມຊືມເນື້ອໃນສຳຄັນຂອງກອງປະຊຸມຄັ້ງນີ້ຢ່າງເລິກເຊິ່ງ, ເພື່ອພ້ອມກັນຈັດຕັ້ງປະຕິບັດໃຫ້ບັນລຸຜົນສຳເລັດສູງສຸດ %

ໂດຍ: ທິດດີ