ຫໍສະພາແຫ່ງຊາດຫລັງໃໝ່ຂອງລາວ ຊຶ່ງແມ່ນຂອງຂວັນຈາກພັກ, ລັດຖະບານ, ສະພາແຫ່ງຊາດ ແລະ ປະຊາຊົນຫວຽດນາມ ມອບໃຫ້ ພັກ, ລັດຖະບານ, ສະພາແຫ່ງຊາດ ແລະ ປະຊາຊົນລາວ, ແມ່ນໂຄງການຈຸດສຸມ ແລະ ແມ່ນກິດຈະການທີ່ມີຄວາມໝາຍດ້ານການເມືອງ – ການຕ່າງປະເທດ, ແມ່ນສັນຍາລັກ ແຫ່ງສາຍພົວພັນ ມິດຕະພາບອັງຍິ່ງໃຫຍ່, ນໍ້າໃຈສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ, ສອງສະພາແຫ່ງຊາດ ແລະ ປະຊາຊົນສອງປະເທດລາວ – ຫວຽດນາມອ້າຍນເອງ.

ໂຄງການກໍ່ສ້າງສະພາແຫ່ງຊາດຫລັງໃໝ່ຂອງລາວ ໄດ້ຮັບການກໍ່ສ້າງຢູ່ໃຈກາງນະຄອນຫລວງວຽງຈັນ ດ້ວຍມູນຄ່າ 100 ກວ່າລ້ານໂດລາ, ລວມມີ 5 ຊັ້ນ ແລະ 1 ຊັ້ນໃຕ້ດິນ, ສາມາດບັນຈຸບຸກຄະລາກອນແຕ່ 800- 1000 ຄົນ.ໃນນັ້ນ ມີສະໂມສອນໃຫຍ່, ມີລະບຽງກ້ວາງ, ບັນດາ ຫ້ອງປະຊຸມໃຫຍ່, ຫ້ອງປະຊຸມກາງ ແລະ ນ້ອຍ, ຫ້ອງເຮັດວຽກສໍາລັບບັນດາສະມາຊິກ ຄະນະກໍາມາທິການປະຈໍາການສະພາແຫ່ງຊາດ. ພາຍຫລັງສໍາເລັດ, ຫໍສະພາແຫ່ງຊາດຫລັງໃໝ່ຂອງລາວ ຈະສາມາດຮັບປະກັນທຸກການເຄື່ອນໄຫວຂອງສະພາແຫ່ງຊາດ ໃນໄລຍະເວລາ 100 ກວ່າປີ ແລະ ຍັງເປັນສັນຍາລັກ ໃຫ້ແກ່ສາຍພົວພັນມິດຕະພາບພິເສດ ລາວ – ຫວຽດນາມ.

ຕະຫລອດໄລຍະເວລາຜັນຂະຫຍາຍໂຄງການ, ຝ່າຍຫວຽດນາມ ໄດ້ເອົາໃຈໃສ່ເຖິງຄວາມຄືບໜ້າ ແລະ ຄຸນນະພາບໂຄງການ ຊຶ່ງຫວຽດນາມໄດ້ນໍາໃຊ້ບັນດາຜົນງານດ້ານວິທະຍາສາດ ເຕັກໂນໂລ ຊີການກໍ່ສ້າງ ທີ່ກ້າວໜ້າ ແລະ ຜັນຂະຫຍາຍຂັ້ນຕອນການຄວບຄຸມຢ່າງເຂັ້ມງວດ ທາງດ້ານຄຸນນະພາບ. ພ້ອມກັນນັ້ນ, ໄດ້ມີການຈັດຕັ້ງກອງປະຊຸມຊີ້ນໍາ, ການຢ້ຽມຢາມ, ຕິດຕາມຄວາມຄືບໜ້າໂຄງການຂອງນໍາພາຂັ້ນສູງ ແນໃສ່ຜັນຂະຫຍາຍໂຄງການຖືກຕາມແຜນການທີ່ວາງອອກ. ວັນທີ 3 ມິຖຸນາ ຜ່ານມາ, ໃນກອງປະຊຸມຄະນະປະຈໍາລັດຖະບານ ແລະ ບັນດາກະຊວງ, ອົງການທີ່ກ່ຽວຂ້ອງຂອງຫວຽດນາມ ໄດ້ແນໃສ່ສໍາຫລວດກວດກາຜົນການປະຕິບັດ ແລະ ຊຸກຍູ້ບັນດາແຜນການ, ໂຄງການຮ່ວມມືກັບລາວ, ທ່ານ ຫງວຽນຊວັນຟຸກ ນາຍົກລັດຖະມົນຕີຫວຽດນາມ ໄດ້ຮຽກຮ້ອງ ບັນດາກະຊວງ, ຂະແໜງການ, ທ້ອງຖິ່ນຂອງຫວຽດນາມ ຕ້ອງເປັນເຈົ້າການເພີ່ມທະວີການຮ່ວມມືຢ່າງແທດຈິງ, ມີປະສິດທິຜົນ ກັບ ລາວ. ກອງປະຊຸມ ໄດ້ສຸມໃສ່ຕີລາຄາຄວາມຄືບໜ້າ, ຜົນການປະຕິບັດບັນດາໂຄງການຮ່ວມມືກັບລາວ ໃນບັນດາຂົງເຂດໂຄງການກ່ຽວກັບພະລັງງານໄຟຟ້າ, ເຂື່ອນໄຟຟ້າ, ການເຊື່ອມຕໍ່ຄົມມະນາຄົມ, ທ່າກໍາປັ່ນ, ສະໜາມບິນ ແລະ ຊຸກຍູ້ຄວາມຄືບໜ້າການກໍ່ສ້າງຫໍສະພາແຫ່ງຊາດລາວ.

ວັນທີ 29 ກັນຍາ ປີ 2019, ໃນການຢ້ຽມຢາມ ແລະ ກວດກາໂຄງການກໍ່ສ້າງສະພາແຫ່ງຊາດລາວ, ໃນການຢ້ຽມຢາມ ລາວ ຢ່າງເປັນທາງການຂອງ ທ່ານ ນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ໄດ້ເນັ້ນຄວາມໝາຍ ຄວາມສໍາຄັນຂອງໂຄງການ ແລະ ມີທິດຊີ້ນໍາ ໃນທ້າຍປີ 2020 ຕ້ອງໃຫ້ສໍາເລັດການຮອບ-ຮັບໂຄງການ ເພື່ອຕ້ອນຮັບກອງປະຊຸມໃຫຍ່ຄັ້ງທີ XI ຂອງພັກປະຊາຊົນ ປະຕິວັດລາວ ທີ່ຈະຈັດຂຶ້ນໃນຕົ້ນປີ 2021, ຊີ້ນໍາຄະນະຄຸ້ມຄອງໂຄງການ, ບັນດາອົງການທີ່ປຶກສາ ແລະ ຕິດຕາມໃກ້ສິດ, ເຈົ້າຂອງໂຄງການ ແລະ ແມ່ທັບນ້ອຍ 11 ພ້ອມກັບບັນດາຜູ້ຮັບເໝົາ ຕ້ອງປະຕິບັດຢ່າງເຂັ້ມງວດບັນດາມາດຖານເຕັກນິກການກໍ່ສ້າງ ຖືກຕ້ອງຕາມການອອກແບບທີ່ໄດ້ຮັບອະນຸມັດ, ຊີ້ນໍາການປະຕິບັດຢ່າງເຂັ້ມງວດແຕ່ລະໄລຍະຂອງໂຄງການ. ພ້ອມກັນນັ້ນ, ສະເໜີຄະນະຊີ້ນໍາການກໍ່ສ້າງສະພາແຫ່ງຊາດຂອງລາວສ້າງເງື່ອນໄຂສະ ດວກ, ສະໜອງອຸປະກອນຕົກແຕ່ງພາຍໃນ, ວັດຖຸ ແລະ ບັນດາເອກະສານ ໂດຍໄວ ເພື່ອຜ່ານສິນຄ້າ, ເອກະສານວິຊາ ທີ່ຢູ່ອາໃສໃຫ້ພະນັກງານ, ກໍາມະກອນເຂົ້າຮ່ວມການກໍ່ສ້າງໂຄງການສະພາແຫ່ງຊາດລາວ. ທາງດ້ານຄວາມປອດໄພໂຄງການ, ທ່ານ ປະທານສະພາແຫ່ງຊາດ ໄດ້ເນັ້ນໜັກວ່າ: ເພື່ອຄວາມຄືບໜ້າ ແລະ ຄຸນນະພາບສູງຂອງໂຄງການ ຮຽກຮ້ອງຕ້ອງເຮັດວຽກທັງເວັນ ແລະ ຄືນ. ສະນັ້ນ, ບັນດາບໍລິສັດກໍ່ສ້າງ ຄວນເອົາໃຈໃສ່ຮັບປະກັນຄວາມປອດໄພຕໍ່ຜູ້ປະຕິບັດງານ ແລະ ອຸປະກອນ. ທ່ານ ປະທານສະພາແຫ່ງຊາດ ໄດ້ສະເໜີວ່າ: ໃນໄລຍະດໍາເນີນງານ, ການນໍາແມ່ ທັບນ້ອຍ 11 ຕ້ອງເຊື່ອມຊຶມຢ່າງເລິກເຊິ່ງຕໍ່ພະນັກງານ, ກໍາມະກອນ ຕ້ອງປະຕິບັດຕາມບັນດາຂໍ້ກໍານົດດ້ານກົດໝາຍ ແລະ ຮີດຄອງປະເພນີ, ວັດທະນະທໍາຂອງລາວ.

ໂດຍປະຕິບັດຄໍາເຫັນຊີ້ນໍາຂອງທ່ານ ນາງ ຫງວຽນທິກິມເງິນ ໃນການຢ້ຽມຢາມລາວຄັ້ງນີ້, ທ່ານ ຟ້າມຮົ່ງຮ່າ ລັດຖະມົນຕີກະຊວງກໍ່ສ້າງຫວຽດນາມ ໄດ້ຢັ້ງຢືນວ່າ: ຈະສືບຕໍ່ອອກແຮງ, ປະສານສົມທົບກັບບັນດາອົງການທີ່ກ່ຽວຂ້ອງໃນການຜັນຂະຫຍາຍ ບັນດາວຽກງານຕໍ່ໄປຂອງໂຄງ ການກໍ່ສ້າງສະພາແຫ່ງຊາດລາວ, ຮັບປະກັນຄຸນນະພາບ, ເຕັກນິກ, ສິລະປະການຕົກແຕ່ງ, ຄວາມປອດໄພ ກໍຄືຖືກຕ້ອງຕາມລະດັບຄາດໝາຍ ເພື່ອມອບຮັບໂຄງການ. ຈະປະຕິບັດເປັນຢ່າງດີວຽກງານຮັບປະກັນ, ການບໍາລຸງ, ການຄຸ້ມຄອງທີ່ລະດຽດອ່ອນ, ການດໍາເນີນໂຄງການ. ກອງປະຊຸມຫລາຍຄັ້ງຜ່ານມາ, ການຢ້ຽມຢາມ ແລະ ວຽກງານຜັັນຂະຫຍາຍໂຄງການກໍ່ສ້າງສະພາແຫ່ງຊາດລາວ ສະແດງໃຫ້ເຫັນວ່າ: ຫວຽດນາມ ສຸfທີ່ເອົາໃຈໃສ່ຕໍ່ຄຸນນະພາບ, ຄວາມຄືບໜ້າຂອງໂຄງການ, ການນໍາຂັ້ນສູງຂອງຫວຽດນາມ ໄດ້ເອົາໃຈໃສ່ຊີ້ນໍາຢ່າງໃກ້ສິດຕິດແທດ ໃນແຕ່ລະໜ້າວຽກດໍາເນີນໂຄງການ, ບັນດາບໍລິສັດກໍ່ສ້າງໂຄງການ ກໍໄດ້ຕັ້ງໜ້າເຮັດວຽກງານທັງເວັນ ແລະ ຄືນບັນດາໜ້າວຽກ ແນໃສ່ຮັບປະກັນຄວາມຄືບໜ້າ, ຄຸນນະພາບໂຄງການ, ຖືກຕ້ອງຕາມຈຸດທີ່ຕັ້ງ ແລະ ຄວາມໝາຍສໍາຄັນຂອງໂຄງການກໍ່ສ້າງ ໂດຍມີຈຸດປະສົງເປົ້າໝາຍໃຫ້ “ໂຄງການ ກໍ່ສ້າງຫໍສະພາແຫ່ງຊາດລາວ ເປັນສັນຍາລັກແຫ່ງສາຍພົວພັນ ມິດຕະພາບອັນຍິ່ງໃຫຍ່, ນໍ້າໃຈສາມັກຄີພິເສດ ແລະ ການຮ່ວມມືຮອບດ້ານ ລາວ – ຫວຽດນາມ”.

Medialaos MMD