ແຂວງວຽງຈັນ, ລະຫວ່າງວັນທີ 15-18 ມິຖຸນາ 2020 ບັນດາທ່ານຄະນະກົມ, ຄະນະພະແນກ ແລະ ວິຊາການທີ່ກ່ຽວຂ້ອງ ຈາກບັນດາກະຊວງ-ອົງການ ແລະ ຕາງໜ້າຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ລວມທັງຫ້ອງການກອງເລຂາ ຄະນະກຳມາທິການແຫ່ງຊາດເພື່ອຄວາມກ້າວຫນ້າຂອງແມ່ຍິງ ແລະ ແມ່-ເດັກ, ໄດ້ມາຮ່ວມປະຊຸມກັນໃນມື້ນີ້ ທີ່ເມືອງວັງວຽງ, ແຂວງວຽງຈັນ, ເພື່ອປຶກສາຫາລື ຮ່າງແຜນດໍາເນີນງານແຫ່ງຊາດ ວຽກງານແມ່ ແລະ ເດັກ 5 ປີ ຄັ້ງທີ III (2021-2025) ແລະ ຮ່າງແຜນດໍາເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ເດັກ 5 ປີ ຄັ້ງ II (2021-2025).

ກອງປະຊຸມ ພາຍໃຕ້ການເປັນປະທານຂອງທ່ານ ນາງ ບັນດິດ ປະທຸມວັນ, ຮອງປະທານຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ, ມີບັນດາທ່ານຄະນະກົມ, ຄະນະພະແນກ ແລະ ວິຊາການທີ່ກ່ຽວ ຂ້ອງ ຈາກບັນດາກະຊວງ-ອົງການ ແລະ ຕາງໜ້າຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ລວມທັງຫ້ອງການກອງເລຂາ ຄະນະກຳມາທິການແຫ່ງຊາດເພື່ອຄວາມກ້າວຫນ້າຂອງແມ່ຍິງ ແລະ ແມ່-ເດັກ ຊຶ່ງມີເຂົ້າຮ່ວມທັງໝົດ 50 ທ່ານ, ຍິງ 38 ທ່ານ, ຊາຍ 12 ທ່ານ.

ທ່ານ ນາງ ບັນດິດ ປະທຸມ ໄດ້ກ່າວໃນພາກເປີດກອງປະຊຸມວ່າ: ກອງປະຊຸມຂອງພວກເຮົາມື້ນີ້ ສຸດທີ່ມີຄວາມໝາຍສຳຄັນ ຢູ່ໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ພວມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ຈັດຕັ້ງປະຕິບັດໄລຍະທ້າຍຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ກໍຄືແຜນດໍາເນີນງານແຫ່ງຊາດວຽກແມ່ຍິງ ແລະເດັກ (2016-2020), ແຜນດຳເນີນງານແຫ່ງຊາດ ກ່ຽວກັບການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກໃນ ສປປ ລາວ (2014-2020); ອີກທັງຢູ່ໃນໄລຍະຂອງການສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX (2021-2025)ໃນຂອບເຂດທົ່ວປະເທດ ກໍຄືການສ້າງແຜນດຳເນີນງານຂອງຂະແໜງການຂັ້ນສູນກາງ ແລະ ທ້ອງຖິ່ນ ໄລຍະ 2021-2025; ພ້ອມນັ້ນ, ພວກເຮົາ ຍັງຢູ່ໃນໄລຍະການປ້ອງກັນ, ຄວບຄຸມການແຜ່ລະບາດຂອງພະ ຍາດອັກເສບປອດສາຍພັນໃໝ່ ( COVID-19 ) ທີ່ກຳລັງເປັນໄພຄຸກຄາມຢ່າງກວ້າງຂວາງຕໍ່ຊີວິດ, ສຸຂະພາບຂອງຊາວໂລກ ເວົ້າລວມ, ເວົ້າສະເພາະ ປະຊາຊົນລາວບັນດາເຜົ່າ.

ໃນຕອນທ້າຍກອງປະຊຸມ ທ່ານຍັງເນັ້ນຕື່ມອີກວ່າ: ການສ້າງ 02 ແຜນດໍາເນີນງານຄັ້ງນີ້ ແມ່ນໃຫ້ຄໍານຶງ ແລະ ອີງໃສ່ວຽກແມ່ ແລະ ເດັກ (ສິດທິເດັກ) ຕາມທີ່ກໍານົດໄວ້ໃນຂໍ້ສະເໜີ້ແນະຂອງ ສປຊ ຕໍ່ວຽກສິດທິເດັກ ກໍຄືຄວາມໝັ້ນຂອງລັດຖະບານ, ຂອງແຂວງ, ຂອງພາກທຸລະກິດເອກະຊົນ ແລະ ອົງການຈັດຕັ້ງທາງສັງຄົມ ໃນການພັດທະນາຄົນລາວລຸ້ນປີ 2030 ທີ່ໄດ້ສົມທົບຮ່ວມມືກັບຂະແໜງການກ່ຽວຂ້ອງ ເພື່ອໃຫ້ຄວາມໝາຍໝັ້ນເຫຼົ່ານັ້ນສໍາເລັດຜົນ, ພ້ອມດຽວກັນນີ້, ການສ້າງ 02 ແຜນດໍາເນີນງານເຫຼົ່ານີ້ ໃຫ້ຄໍານຶງເຖິງບັນຫາທີ່ກ່ຽວຂ້ອງກັບແມ່ ແລະ ເດັກ ເປັນຕົ້ນຕໍ ເພື່ອເຊື່ອມສານເຂົ້າໃນແຜນການລວມແຜນປະຕິບັດງານລວມຂອງກະຊວງ ແລະ ອົງການທີ່ກ່ຽວຂ້ອງ ໄລຍະ 2021-2025 ເພື່ອໃຫ້ວຽກນີ້ ໄດ້ຈັດຕັ້ງປະຕິບັດ ແລະ ມີງົບປະມານໃນອານາຄົດ.

ວັນທີ 24 ມິຖຸນາ 2020 ຈະມີກອງປະຊຸມຄົບຄະນະເປີດກວ້າງ ຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ໃນຮູບແບບກອງປະຊຸມທາງໄກ Video Conference), ຊຶ່ງຜົນຂອງກອງປະຊຸມຄັ້ງນີ້ ແມ່ນເປັນເອກະສານພືື້ນຖານ ໃຫ້ແກ່ກອງປະຊຸມຄົບຄະນະເປີດ ຄຊກມດ ກວ້າງທາງໄກ ເພື່ອປຶກສາຫາລື, ປະກອບ ຄໍາຄິດເຫັນ, ຮັບຮອງ ແລະ ຈັດຕັ້ງປະຕິບັດຕາມລະບຽບການໃນອານາຄົດ. ກອງປະຊຸມວິຊາການໃນມື້ນີ້ ໂດຍການສະຫນັບສະຫນູນ ຈາກອົງການຢູນີເຊັບ.

ຂໍ້ມູນເພິ້ມເຕີມ ກະລຸນາ ຕິດຕໍ່: ທ່ານ ສຸວັນທອນ ສຸວັນນະຈັກ ຫົວໜ້າພະແນກສິດທິເດັກ, ຫ້ອງການກອງເລຂາ ຄຊກມດ
ອີເມວ: thone.souvannachack@gmail.com,
ໂທ: 020 5400 0860.