ທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ (ສພຊ) ພ້ອມຄະນະໄດ້ສໍາເລັດ ການເຂົ້າຮ່ວມກອງປະຊຸມ ໃຫຍ່ສະມັດຊາ ລັດຖະສະພາ ລະຫວ່າງ ຊາດອາຊຽນ ຫຼື ໄອປາ ຄັ້ງ ທີ 40 ທີ່ ຣາຊະອານາຈັກໄທ ພາຍໃຕ້ຫົວຂໍ້: ກ້າວ ສູ່ການເປັນຄູ່ຮ່ວມລັດຖະສະພາເພື່ອປະຊາ ຄົມທີ່ຍືນຍົງ. ກອງປະຊຸມດັ່ງກ່າວ ໄດ້ເປີດຂຶ້ນຢ່າງເປັນທາງການ ຈັດຂຶ້ນໃນ ອາທິດຜ່ານມາ ນີ້ ທີ່ປະເທດໄທ ໂດຍມີ ທ່ານ ປະຢຸດ ຈັນໂອຊາ ນາຍົກລັດຖະມົນຕີ ແຫ່ງຣາຊະອານາຈັກໄທ ປະທານ ອາຊຽນ, ທ່ານ ຊວນຫຼີກໄພ ປະທານສະພາຜູ້ແທນລາດຊະດອນໄທ, ປະທານໄອປາ, ມີເລຂາທິການໃຫຍ່ໄອປາ ແລະ ຄະນະຜູ້ແທນຈາກລັດຖະສະພາບັນດາປະເທດອາຊຽນເຂົ້າ ຮ່ວມ. ກອງປະຊຸມດໍາເນີນພາຍໃຕ້ຫົວຂໍ້: ກ້າວສູ່ການເປັນ ຄູ່ຮ່ວມລັດຖະສະພາເພື່ອປະຊາ ຄົມທີ່ຍືນຍົງ, ໃນນັ້ນ ມີກອງປະຊຸມແຕ່ລະວຽກ ແລະ ມະຕິຕ່າງໆທີ່ໄດ້ມີການພິຈາລະນາຮັບ ຮອງເອົາ ເຊັ່ນ: ກອງປະຊຸມກໍາມາທິການເສດຖະກິດ ມີມະຕິ 4 ສະບັບ, ກອງປະຊຸມວຽກງານ ສັງຄົມ ມີ ມະຕິ 6 ສະບັບ, ກອງປະຊຸມກໍາມາທິການພາຍໃນມີ 20 ມະຕິ, ນອກນັ້ນ ຍັງມີ ກອງປະຊຸມສະມາຊິກລັດຖະສະພາ ເພດຍິງ ຫຼື ໄວປາ ແລະ ກອງປະຊຸມຄູ່ຮ່ວມເຈລະຈາກັບ ບັນດາລັດຖະສະພາສັງເກດການໄອປາຈໍານວນຫນຶ່ງ.

ໂອກາດດັ່ງກ່າວ ທ່ານ ບຸນປອນ ບຸດຕະນະວົງ ໄດ້ກ່າວໃນກອງປະຊຸມວ່າ: ສະພາແຫ່ງຊາດ ລາວ ຕີລາຄາສູງຕໍ່ຄໍາຂວັນຂອງກອງ ປະຊຸມສະມັດຊາໃຫຍ່ໄອປາ ຄັ້ງທີ 40 ທີ່ວ່າ: “ກ້າວສູ່ ການເປັນຄູ່ຮ່ວມລັດຖະສະພາເພື່ອປະຊາຄົມທີ່ຍືນຍົງ” ເພື່ອເສີມ ສ້າງບົດບາດຂອງໄອປາ ໃນການບັນລຸຄໍາຫມາຍຫມັ້ນຕ່າງໆໃນວິໄສທັດປະຊາຄົມອາຊຽນ 2025 ແລະ ແຜນແມ່ບົດ 3 ເສົາຄໍ້າປະຊາຄົມອາຊຽນ ແລະ ທັງສອດຄ່ອງກັບເປົ້າຫມາຍການພັດທະນາແບບຍືນຍົງ ຂອງອົງການສະຫະປະຊາຊາດ. ເພື່ອບັນລຸຄໍາຂວັນດັ່ງກ່າວ, ໄອປາ ໃນຖານະເປັນຕົວແທນ ຂອງປະຊາຊົນອາຊຽນ ແລະ ທັງເປັນອົງການນິຕິບັນຍັດຈະ ຕ້ອງເພີ່່ມທະວີບົດບາດຂອງ ຕົນໃນການຄົ້ນຄວ້າພິຈາລະນາຕົກລົງບັນຫາສໍາຄັນຕ່າງໆຂອງພາກພື້ນຜ່ານກົນໄກຕ່າງໆ ຂອງຕົນທີ່ມີຢູ່ບົນຫຼັກການຄວາມເປັນເອກະພາບ ເປັນຕົ້ນແມ່ນ ກອງປະຊຸມສະມັດຊາ ໃຫຍ່ໄອປາ, ຄະນະປະສານງານ ໄອປາ, ສະພາທີ່ປຶກສາກ່ຽວກັບບັນຫາຢາເສບຕິດຂອງໄອປາ, ການພົບປະລະຫວ່າງຜູ້ນໍາອາຊຽນ ແລະ ໄອປາໃຫ້ມີເນື້ອ ໃນເລິກເຊິ່ງຫຼາຍຂຶ້ນ. ພ້ອມນັ້ນ ກໍຊຸກຍູ້ບັນດາເນື້ອໃນຈິດໃຈເຫຼົ່ານັ້ນ ແລະ ໄດ້ຮັບການຈັດຕັ້ງ, ຜັນຂະຫຍາຍໃນປະເທດສະ ມາຊິກອາຊຽນ. ກອງເລຂາອາຊຽນ ແລະ ໄອປາ ຕ້ອງໄດ້ເພີ່ມທະວີການເປັນຄູ່ ຮ່ວມທີ່ມີປະ ສິດທິພາບໃນການຈັດຕັ້ງປະຕິບັດວຽກງານຂອງຕົນ, ສະຫນັບສະຫນູນຊຶ່ງກັນ ແລະ ກັນ ຮ່ວມກັນໂຄສະນາເຜີຍແຜ່ຂໍ້ມູນ-ຂ່າວສານໃຫ້ສາທາລະນະຊົນໄດ້ຮັບຊາບຢ່າງທົ່ວເຖິງ ໂດຍສ້າງຕັ້ງເປັນກົນໄກການຮ່ວມມືກັນຢ່າງຊັດເຈນ.

ໃນກອງປະຊຸມດັ່ງກ່າວ ໄດ້ຕົກລົງຮັບຮອງເອົາຜົນຂອງກອງປະຊຸມບັນດາກໍາມາທິການ ແລະ ກອງປະຊຸມກັບບັນດາປະເທດສັງເກດການລວມທັງຫມົດ 27 ມະຕິ ຄື: ກອງປະຊຸມສະ ມາຊິກລັດຖະສະພາເພດຍິງ 2 ມະຕິ, ມະຕິວ່າດ້ວຍ ການສົ່ງເສີມສິດ ສະເຫມີພາບ ຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແກ່ແມ່ຍິງໃນອາຊຽນ ແລະ ມະຕິວ່າດ້ວຍການລຶບລ້າງ ຊ່ອງວ່າງສິດສະເຫມີພາບ ຍິງ -ຊາຍ ໃນ Technology Based Dis-ciplines; ກອງປະຊຸມ ກໍາມາທິການເສດຖະກິດມີ 4 ມະຕິ: ມະຕິວ່າດ້ວຍ ການສົ່ງເສີມການພັດທະນາເສດຖະກິດ ແບບກວມລວມໃນອາຊຽນ; ມະຕິວ່າດ້ວຍ ການຮ່ວມມືໃນອາຊຽນເພື່ອກຽມຄວາມພ້ອມ ໃຫ້ແກ່ການປະຕິວັດອຸດສາຫະກໍາ ຄັ້ງທີ 4; ມະຕິ ວ່າດ້ວຍການປັບປຸງການເຊື່ອມຈອດທາງ ດ້ານດີຈີຕອນເພື່ອສະຫນັບສະຫນູນໃຫ້ແກ່ການເຕີບໂຕຂອງທຸລະກິດຂະຫນາດນ້ອຍ ແລະ ກາງ; ມະຕິ ວ່າດ້ວຍການຫັນເປັນມາດຕະຖານ ແລະ ການເປີດເສລີໃຫ້ແກ່ການບໍລິການ ທາງອາກາດ ພາຍໃຕ້ຕະຫຼາດການບິນທາງອາກາດດຽວຂອງອາຊຽນ. ກອງປະຊຸມກໍາມາທິ ການວຽກງານສັງຄົມ ມີ 6 ມະຕິ: ມະຕິ ວ່າດ້ວຍການຮັບຮອງເອົາບົດລາຍງານສະພາທີ່ປຶກ ສາສະມັດຊາລັດຖະສະພາລະຫ່ວາງຊາດອາຊຽນ ກ່ຽວກັບ ໄພອັນຕະລາຍຂອງຢາເສບຕິດ ຄັ້ງທີ 2,ມະຕິ ວ່າດ້ວຍການສົ່ງເສີມຄຸນນະພາບຊີວິດທີ່ດີຂອງຜູ້ອາຍຸສູງ; ມະຕິ ວ່າດ້ວຍການ ເພິ່ມທະວີຄວາມປອດໄພຕາມທ້ອງ ຖະຫນົນໃນອາຊຽນ, ມະຕິ ວ່າດ້ວຍການລຶບລ້າງການ ໃຊ້ຄວາມຮຸນແຮງ ແລະ ການເອົາປຽບຕໍ່ເດັກນ້ອຍ, ມະຕິ ວ່າດ້ວຍຂໍ້ລິເລີ່ມຂອງລັດຖະສະ ພາໃນພາກພື້ນເພື່ອເພີ່ມທະວີແຜນດໍາເນີນງານກ່ຽວກັບດິນຟ້າອາກາດໃນອາຊຽນ, ມະຕິ ວ່າດ້ວຍການເຂົ້າເຖິງຄວາມຍຸຕິທໍາຂອງແຮງງານເຄື່ອນຍ້າຍ, ນອກຈາກນີ້ ກອງປະຊຸມກໍາ ມາທິການວຽກງານພາຍໃນມີອີກ 20 ມະຕິ.

ແຫຼ່ງຂໍ້ມູນຈາກ: ໜັງສືພິມ ປະຊາຊົນ