ຝົນຕົກໜັກ ເກີດມີນ້ຳຖ້ວມ ເປັນເຫດໃຫ້ເກີດມີຄົນຕົກນ້ຳເສຍຊີວິດ

0
264

ອີງຕາມການລາຍງານຂອງເຈົ້າໜ້າທີ່ ໜ່ວຍງານຄະດີອາຍາ ກອງບັນຊາການ ປກສ ເມືອງອາດສະພອນໃຫ້ຮູ້ວ່າ: ເຫດເກີດເມື່ອ ເວລາ 15 ໂມງຂອງວັນທີ 30 ສິງຫາ 2019 ເຈົ້າໜ້າທີ່ໄດ້ຮັບລາຍງານທາງໂທລະສັບຈາກຄອບຄົວຜູ້ກ່ຽວ ວ່າມີຄົນຕົກນ້ຳ ຢູ່ເຂດບ້ານດົງນາຂາມ ເມືອງອາດສະພັງທອງ ແຂວງສະຫວັນນະເຂດ ເຊິ່ງເປັນຊາຍແດນເຊື່ອມຕໍ່ລະຫວ່າງເມືອງອາດສະພັງທອງ ແລະ ເມືອງອາດສະພອນ, ຊາບຊື່ ທ້າວ ດອກດາລາ ທຳມະວົງ ອາຍຸ 20 ປີ ເປັນປະຊາຊົນບ້ານທາດດອກແກ້ວ ເມືອງອາດສະພອນ; ດັ່ງນັ້ນ, ເຈົ້າໜ້າທີ່ຈຶ່ງໄດ້ສົມທົບກັບອຳນາດການປົກຄອງບ້ານ ແລະໄວໜຸ່ມອາສາສະໝັກ ອອກຄົ້ນຫາແຕ່ກໍ່ບໍ່ພົບເນື່ອງຈາກຈຸດເກີດເຫດຍັງມີປະລິມານນ້ຳຖ້ວມຂັງຫຼາຍ, ຈາກການສອບສວນຂອງເຈົ້າໜ້າທີ່ຊາບວ່າ: ທ້າວ ກ (ບໍ່ປະສົງອອກນາມ) ເຊິ່ງເປັນໝູ່ຂອງ ທ້າວ ດອກດາລາ ຜູ້ກ່ຽວແມ່ນຮຽນຢູ່ວິທະຍາໄລແຫ່ງໜຶ່ງທີ່ນະຄອນໄກສອນພົມວິຫານ ແຂວງສະຫວັນນະເຂດ, ຫຼັງຈາກເລີກຮຽນຜູ້ກ່ຽວກໍ່ເດີນທາງມາບ້ານພ້ອມໝູ່ ດ້ວຍລົດໂດຍສານ, ພໍມາຮອດຂົວຫ້ວຍພະນອມ ບ້ານດົງນາຂາມ ເມືອງອາດສະພັງທອງ ໄດ້ມີນ້ຳຖ້ວມທາງໂດຍສານບໍ່ສາມາດແລ່ນຜ່ານໄດ້ຍ້ອນຝົນຕົກໜັກ, ຈາກນັ້ນພວກກ່ຽວທັງສອງ ກໍ່ໄດ້ລົງຈາກລົດໂດຍສານ ແລ້ວຍ່າງຕາມທາງຂ້າມຫ້ວຍພະນອມ, ແລ້ວໄດ້ພົບກັບອາຈານທ່ານໜຶ່ງ (ບໍ່ປະສົງອອກນາມ) ສອນຢູ່ວິທະຍາໄລທີ່ຜູ້ກ່ຽວຮຽນ, ອາຈານຈຶ່ງໄດ້ຖາມ ທ້າວ ດອກດາລາວ່າ ບໍ່ຂີ່ເຮືອບໍ່? ຜູ້ກ່ຽວຕອບວ່າ ບໍ່ ຍ່າງເອົາ, ເມື່ອເວົ້າແລ້ວພວກກ່ຽວທັງສອງກໍ່ໄດ້ພາກັນຍ່າງຕາມທາງ ໂດຍ ທ້າວ ກ ແມ່ນຍ່າງເບື້ອງຊ້າຍມື, ທ້າວດອກດາລາ ແມ່ນຍ່າງເບື້ອງຂວາມື, ອາຈານກໍ່ໄດ້ຍ່າງຕາມຫຼັງຫ່າງປະມານ 2 ແມັດ, ເມື່ອຍ່າງມາໃກ້ຈະຮອດຂົວນ້ອຍ ທ້າວດອກກາລາ ກໍ່ໄດ້ຕົກຂຸມເລິກປະມານພຽງເອິກ ເຮັດໃຫ້ຕົນເສຍຫຼັກລົ້ມ ແລະ ຖືກກະແສນ້ຳພັດໄປ, ຜູ້ກ່ຽວກໍ່ໄດ້ພະຍາຍາມລອຍຂື້ນມາແຕ່ກໍ່ບໍ່ສາມາດຂື້ນມາໄດ້ ເພາະຜູ້ກ່ຽວໃສ່ໂສ້ງຢີນຂາຍາວ, ເສື້ອວອມແຂນຍາວມີໝວກ ແລະພາຍກະເປົານ້ອຍສີດຳຕິດຕົວ ເຮັດໃຫ້ຜູ້ກ່ຽວລອຍຜ່ານກະແສນ້ຳບໍ່ໄຫວຈຶ່ງຈົມລົງ, ເມື່ອເປັນແນວນັ້ນ ທ້າວ ກ ກໍ່ໄດ້ປະກະເປົາໄວ້ນຳອາຈານ ແລ້ວລອຍໄປຊ່ວຍແຕ່ບໍ່ສາມາດຊ່ວຍໄດ້ເນື່ອງຈາກກະແສນ້ຳພັດແຮງ ແລະ ເລິກ, ຈາກນັ້ນ ທ້າວ ກ ກໍ່ໄດ້ບອກປະຊາຊາຊົນທີ່ຮູ້ຈັກ ໂທລະສັບຫາຄອບຄົວ ທ້າວດອກດາລາ.
ດັ່ງນັ້ນ, ເຈົ້າໜ້າທີ່ ປກສ ເມືອງອາດສະພອນ ພ້ອມດ້ວຍປະຊາຊົນ ໄດ້ລະດົມກັນອອກຄົ້ນຫາ, ຕໍ່ມາໃນເວລາ 06 ໂມງ ຂອງວັນທີ 1 ກັນຍາ 2019 ຈຶ່ງໄດ້ພົບຊາກສົບຂອງ ທ້າວດອກດາລາ ຈົມຢູ່ກາງໄຮ່ນາ ຫ່າງຈາກຈຸດເກີດເຫດປະມານ 50 ແມັດ, ເມື່ອເຫັນຊາກສົບແລ້ວ ຄອບຄົວ ແລະ ອຳນາດການປົກຄອງບ້ານ ຈຶ່ງໄດ້ນຳເອົາມາທຳພິທີທາງສາສະໜາ ຢູ່ປ່າຊ້າບ້ານທາດດອກແກ້ວ ເມືອງອາດສະພອນ.
ພາບ ແລະ ຂ່າວ: ສົມຈິດ ແກ້ວສີຖາທິລາດ