ໃນວັນທີ 16 ມິຖຸນາ 2020 ນີ້, ທີ່ຫ້ອງປະຊຸມສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ກະຊວງວິທະຍາສາດ ແລະ ເຕັກໂນໂລຊີ (ກວຕ) ອົງຄະນະພັກ ກວຕ ໄດ້ຈັດກອງປະຊຸມທາບທາມ ບຸກຄະລາກອນ ຮອບທີ 2 ທີ່ຈະສະໝັກເລືອກຕັ້ງເປັນຄະນະບໍລິຫານງານພັກ ຂອງອົງຄະນະພັກກະຊວງ ຊຸດທີ II. ໂດຍໃຫ້ກຽດເຂົ້າຮ່ວມຂອງສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ,​ ເລຂາຄະນະພັກ, ລັດຖະມົນຕີ ກວຕ, ມີສະຫາຍໃນຄະນະພັກກະຊວງ, ສະຫາຍ ພອນສະຫວັນ ໄຊຊະນະ, ຮອງຫົວໜ້າກົມຈັດຕັ້ງ ແລະ ກົດລະບຽບພັກ, ຄະນະຈັດຕັ້ງສູນກາງພັກ, ບັນດາສະຫາຍເລຂາໜ່ວຍພັກຫ້ອງການ, ກົມ, ສະຖາບັນ ແລະ ສະມາຊິກພັກ ທົ່ວກະຊວງເຂົ້າຮ່ວມ.

ສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ,​ ເລຂາຄະນະພັກ, ລັດຖະມົນຕີ ກວຕ

ໂອກາດນີ້, ສະຫາຍ ສຸມານະ ຈຸລາມະນີ, ຄະນະພັກ ກວຕ, ເລຂາໜ່ວຍພັກກົມເຕັກໂນໂລຊີ ແລະ ນະວັດຕະກຳ ໄດ້ຂຶ້ນຜ່ານຮ່າງບົດລາຍງານການເມືອງຕໍ່ກອງປະຊຸມໃຫຍ່ຜູ້ແທນສະມາຊິກພັກຄັ້ງທີ II ຂອງອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ ຊຶ່ງປະກອບມີ II ພາກຄື: ພາກທີ 1 ຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ ໄລຍະ 5 ປີຜ່ານມາ (2016-2020) ແລະ ພາກທີ 2 ທິດທາງໜ້າທີ່ຕົ້ນຕໍ ຂອງອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ ໃນໄລຍະ 5 ປີຕໍ່ໜ້າ (2021-2025).

ສະຫາຍ ສຸມານະ ຈຸລາມະນີ, ຄະນະພັກ ກວຕ, ເລຂາໜ່ວຍພັກກົມເຕັກໂນໂລຊີ ແລະ ນະວັດຕະກຳ

ໃນໂອກາດດຽວກັນ, ສະຫາຍ ນາງ ໄມຕີ ວົງຄຳຊາວ, ຄະນະພັກ ກວຕ, ເລຂາໜ່ວຍພັກສະຖາບັນພະລັງງານທົດແທນແລະ ວັດສະດຸໄໝ ໄດ້ຂຶ້ນຜ່ານຮ່າງບົດສຳຫຼວດການນຳພາລວມຂອງຄະນະພັກ ຂອງອົງຄະນະພັກກະຊວງວິທະຍາສາດ ແລະ ເຕັກໂນໂລຊີ.
ພ້ອມນັ້ນ, ບັນດາເລຂາໜ່ວຍພັກ, ຮອງເລຂາໜ່ວຍພັກຂອງຫ້ອງການ, ກົມ ແລະ ສະຖາບັນ ແລະ ສະມາຊິກທີ່ເຂົ້າຮ່ວມໄດ້ປະກອບຄຳຄິດຄຳເຫັນໃສ່ຮ່າງເອກະສານທັງ 2 ສະບັບ ຢ່າງກົງໄປກົງມາ ແນໃສ່ເພື່ອໃຫ້ມີເນື້ອໃນຄົບຖ້ວນສົມບູນ.

ບັນຍາກາດປ່ອນບັດຄັດເລືອກ

ຫຼັງຈາກນັ້ນ, ສະຫາຍ ເຮີເຊັງ ເຢຍປໍເຮີ, ເລຂາໜ່ວຍພັກ ກົມກວດກາ ໄດ້ຂຶ້ນມາດຖານເງື່ອນໄຂຜູ້ທີ່ຈະສະໝັກເລືອກຕັ້ງເຂົ້າໃນຄະນະບໍລິຫານງານພັກກະຊວງຊຸດໃໝ່ ຊຶ່ງຕ້ອງເປັນຜູ້ທີ່ມີມາດຖານເງື່ອນໄຂຄົບຖ້ວນ, ຍຶດໝັ້ນອຸດົມການສັງຄົມນິຍົມ, ມີຄຸນສົມບັດສິນທຳປະຕິວັດ, ມີທັດສະນະການເມືອງໜັກແໜ້ນ, ມີຄວາມຈົງຮັກພັກດີຕໍ່ປະເທດ ຊາດຕໍ່ປະຊາຊົນ, ເປັນແບບຢ່າງ ໃນການປະຕິບັດກົດລະບຽບຂອງ ພັກກົດໝາຍຂອງລັດຢ່າງເຂັ້ມງວດ, ມີຄວາມຮູ້ຄວາມສາມາດ ອັນແນ່ນອນ, ມີແບບແຜນວິທີເຮັດວຽກຖືກຕ້ອງ, ເຄົາລົບ ແລະ ປະຕິບັດຫຼັກການລວມສູນປະຊາທິປະໄຕ, ມີສຸຂະພາບສົມບູນແຂງແຮງດີ. ຈາກນັ້ນ ສະຫາຍ ພອນສະຫວັນ ໄຊຂະນະ ກໍໄດ້ຂຶ້ນແນະນຳ, ອະທິບາຍກ່ຽວກັບເນື້ອໃນບາງຈຸດໃນການຂີດລາຍຊື່ ແລະ ວິທີໃຊ້ສິດໃນການປ່ອນບັດໃຫ້ ຖືກຕ້ອງຕາມລະບຽບຫຼັກການ ເພື່ອເປັນເອກະພາບ ພາຍໃນ ແລະ ຄວາມເປັນລະບຽບຮຽບຮ້ອຍ.

ບັນຍາກາດໃນຫ້ອງປະຊຸມ

ພ້ອມດຽວກັນ, ສະຫາຍ ສະຫາຍ ບັນດິດ ສຈ. ບໍ່ວຽງຄຳ ວົງດາລາ ກໍໄດ້ຊີ້ແຈ້ງອະທິບາຍບາດກ້າວການດໍາເນີນກອງປະຊຸມໃຫ້ເປົ້າໝາຍທີ່ເຂົ້າຮ່ວມໄດ້ຮັບຮູ້ຢ່າງເລິກເຊິ່ງ ໂດຍໄດ້ເນັ້ນໜັກໃຫ້ສະມາຊິກພັກແຕ່ລະຂັ້ນໃນການທີ່ຈະເຂົ້າມາເປັນຄະນະພັກຊຸດໃໝ່ ແລະ ຜູ້ມາໃຊ້ສິດຕ້ອງມີການໄຈ້ແຍກເບິ່ງທັດສະນະຄວາມຮູ້, ຄວາມສາມາດນໍາພາ, ມີຄຸນສົມບັດສິນທຳປະຕິວັດ, ມີແບບແຜນວິທີເຮັດວຽກທີ່ດີ, ເຮັດວຽກເປັນໝູ່ຄະນະແບ່ງໃຫ້ບຸກຄົນ ຮັບຜິດຊອບປະຕິບັດຫຼັກການ ລວມສູນປະຊາທິປະໄຕ, ເຮັດສໍາເລັດໜ້າທີ່ການເມືອງຂອງຕົນທີ່ການຈັດຕັ້ງຂັ້ນເທິງມອບໝາຍໃຫ້ແນໃສ່ເຮັດໃຫ້ການຄັດເລືອກຄະນະພັກຊຸດນີ້ດໍາເນີນໄປຢ່າງຖືກຕ້ອງຕາມກົດລະບຽບພັກ ກໍຄືທິດທາງແຜນການເຄື່ອນໄຫວ ກະກຽມກອງປະຊຸມໃຫຍ່ໃຫ້ໄດ້ຮັບຜົນສູງ. ຈາກນັ້ນ, ສະມາຊິກພັກເຂົ້າຮ່ວມທັງໝົດໄດ້ພ້ອມກັນໃຊ້ສິດຂອງຕົນປ່ອນບັດທາບທາມເອົາບຸກຄະລາກອນທີ່ຈະສະໝັກເລືອກຕັ້ງເປັນຄະນະບໍລິຫານງານພັກ ອົງຄະນະພັກ ກວຕ ຮອບທີ 2 ສະໄໝທີ II ສຳເລັດລົງຕາມແຜນການ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ວິທະຍາສາດ ແລະ ການພັດທະນາ)