ເມືອງໄຊພູທອງ ນໍ້າຖ້ວມໜັກ

0
112

ຕາມການລາຍງານຈາກຫ້ອງການກະສິກໍາ-ປ່າໄມ້ເມືອງໄຊພູທອງ ແຂວງສະຫວັນະເຂດ ໃຫ້ຮູ້ວ່າ ຈາກສະພາບຝົນຕົກ ຕໍ່ເນື່ອງກັນຫຼາຍວັນ ໃນລະຫວ່າງວັນທີ 30 ສິງຫາ ຫາວັນທີ 2 ກັນຍາ 2019,ນີ້ ເຮັດໃຫ້ມີນໍ້າຖ້ວມຂັງຫຼາຍພື້ນທີ່ເຂດ ເມືອງໄຊພູທອງ ໂດຍສະເພາະ ເຂດບ້ານ ພູມມະເຈດີ ຫາ ບ້ານໂພນທາດ ເກີດນໍ້າຖ້ວມໜັກ ເຮັດໃຫ້ຂົວເຂດບ້ານ ພູມມະເຈດີ ຫາ ບ້ານ ໂພນທາດຫັກ ແລະ ເຂດ ບ້ານ ແດງ ຫາ ບ້ານ ນາຄໍາ ເສັ້ນທາງ ຖຶກນໍ້າເຊາະເຈື່ອນ ເຮັດໃຫ້ເສັ້ນທາງເປ້ເພໜັກສົມຄວນ.


ສໍາລັບເຂດ ບ້ານທີ່ມີນໍ້າຖ້ວມຂັງຢູ່ເມືອງໄຊພູທອງລວມມີ 8 ບ້ານ ປະກອບມີ 301 ຄອບ ຄົວເນື້ອທີ່ນາ 5.112 ເຮັກຕາ ຖືກຖ້ວມເສຍຫາຍຫຼາຍສົມຄວນແຕ່ຍັງບໍສາມາດປະເມີນຜົນໄດ້ ຈົນກວ່ານໍ້າຈະບົກລົງ, ເຊິ່ງປະກອບມີ: ບ້ານ ນາຄໍາ 25 ຄອບຄົວ ເນື້ອທີ່ 336 ເຮັກຕາ,ບ້ານ ພູມມະເຈດີ 10 ຄອບຄົວ ເນື້ອທີ່ 115 ເຮັກຕາ, ບ້ານ ຕາກແດດ 54 ຄອບຄົວ ເນື້ອທີ່ 1.276 ເຮັກຕາ, ບ້ານ ໂພນທາດ 32 ຄອບຄົວ ເນື້ອທີ່ 332 ເຮັກຕາ, ບ້ານ ໂພນສົ້ມໂຮງ 89 ຄອບຄົວ ເນື້ອທີ່ 1.957 ເຮັກຕາ , ບ້ານ ນາໝາກເກືອ 68 ຄອບຄົວ ເນື້ອທີ່ 88,6 ເຮັກຕາ, ບ້ານ ມ່ວງໄຂ່ 3 ຄອບຄົວ 3 ເຮັກຕາ ແລະ ບ້ານດອນຕູມ 20 ຄອບຄົວ ເນື້ອທີ່ 18 ເຮັກຕາ.


ຢ່າງໃດກໍ່ຕາມ ທາງອໍານາດການປົກຄອງເມືອງໄຊພູທອງ ນໍາໂດຍ ທ່ານ ຄໍາວິໃສ ຜຸຍະວົງ ເຈົ້າເມືອງໄຊພູທອງ ພ້ອມຄະນະພັກ-ຄະນະນໍາຂອງເມືອງທຸກພາກສ່ວນ ໄດ້ສົມທົບກັບ ປກຊ-ປກສ ເມືອງ ແລະ ກຸ່ມບ້ານ ສ້າງຂະບວນການອອກແຮງງານລວມໂດຍຂົນເອົາຊາຍມາກັ້ນໃສ່ບ່ອນທີ່ຖືກນໍ້າເຊາະເຈື່ອນເພື່ອເຮັດການສັນຈອນໄປມາຂອງ ປະຊາຊົນ ໄດ້ມີຄວາມສະດວກ ແລະ ນັກທ່ອງທ່ຽວ ທີ່ເດີນມາສາກາລະບູຊາທີ່ວັດພະ ທາດໂຜ່ນ ໄດ້ສັນຈອນໄປມາໄດ້ເປັນປົກກະຕິ.