ທ່ານ ຈອມສີ ລັດຕະນະປັນ ຮອງເຈົ້າແຂວງ ຫົວໜ້າຄະນະສະເພາະກິດ ເພື່ອປ້ອງກັນ ຄວບຄຸມ ສະກັດກັ້ນການແຜ່ລະບາດຂອງພະຍາໂຄວິດ-19 ແຂວງບໍ່ແກ້ວ ໄດ້ໃຫ້ສໍາພາດຕໍ່ສື່ມວນຊົນວ່າ: ພາຍຫຼັງໄດ້ຮັບການລາຍງານວ່າມີການແຜ່ລະບາດຂອງພະຍາດໂຄວິດ-19 ໃນຫຼາຍປະເທດ ແລະ ມີຜູ້ຕິດເຊື້ອເປັນຈຳນວນຫຼາຍ ນັບແຕ່ເດືອນມັງກອນ ປີ 2020 ຄະນະສະເພາະກິດແຂວງບໍ່ແກ້ວ ຈື່ງໄດ້ຜັນຂະຫຍາຍຄຳສັ່ງ, ຄຳແນະນຳຂອງສູນກາງຢ່າງຮີບດ່ວນ ໂດຍສະເພາະການປະຕິບັດມາດຕະການປ້ອງກັນ ດ້ວຍການຕັ້ງຈຸດກວດກາກັ່ນຕອງຜູ້ໂດຍສານຂາເຂົ້າຢູ່ດ່ານສາກົນ, ດ່ານທ້ອງຖິ່ນ ແລະ ດ່ານນປະເພນີ, ຈັດຝຶກອົບຮົມ ແລະ ປະເມີນຄວາມພ້ອມຂອງສາທາລະນະສຸກຢ່າງຮີບດ່ວນ, ສ້າງຕັ້ງຫ້ອງແຍກປ່ຽວເພື່ອຕິດຕາມຜູ້ທີ່ເຂົ້າກັບນິຍາມພ້ອມກັບການປະສານງານກັບສູນກາງແຕ່ລະໄລຍະ.

ປິດດ່ານສາກົນ ດ່ານທ້ອງຖິ່ນ ແລະ ດ່ານປະເພນີຢ່າງເດັດຂາດ ພ້ອມກັບຍົກລະດັບມາດຕະການປ້ອງກັນຂື້ນຕື່ມ ໂດຍການເພີ່ມຈຸດກວດກາພາຍໃນແຂວງ ແລະ 5 ເມືອງລວມທັງໝົດ 19ຈຸດ, ມີສູນກັກຕົວຂັ້ນເມືອງ 4 ແຫ່ງ, ຂັນແຂວງ 1ແຫ່ງ ສຳລັບກັກຕົວແຮງງານລາວທີ່ກັບມາຈາກປະເທດເພື່ອນບ້ານ ນັກສຶກສາ ແລະ ຊ່ຽວຊານ ພ້ອມທັງຍົກລະດັບມາດຕະການຕ່າງໆໄດ້ຮັບຜົນສຳເລັດເຮັດໃຫ້ພາຍໃນແຂວງບໍ່ພົບຜູ້ຕິດເຊື້ອໂຄວິດ-19 ທ່ານຮອງເຈົ້າແຂວງໆ ບໍ່ແກ້ວກ່າວຕື່ມວ່າ: ເຖີງວ່າແຂວງບໍ່ແກ້ວຈະບໍ່ພົບຜູ້ຕິດເຊື້ອ ແຕ່ຄະນະສະເພາະກິດຂັ້ນແຂວງ ຍັງຈະສືບຕໍ່ປະຕິບັດມາດຕະການຕ່າງໆ ຢ່າງເຂັ້ມງວດ ມີການແບ່ງຄວາມຮັບຜິດແຕ່ລະຂະແໜງການຕາມພາລະບົດບາດ, ປຸກລະດົມສັງຄົມມີສ່ວນຮ່ວມ ແລະ ເປັນເຈົ້າການໃນການປະຕິບັດບັນດາຄຳສັ່ງຄຳແນະນຳຂອງຂັ້ນເທີງໃນແຕ່ລະໄລຍະເພື່ອເຮັດໃຫ້ແຂວງບໍ່ແກ້ວປອດຈາກພະຍາດໂຄວິດ-19

ທີ່ມາ: ສື່ ປກສ