ທ່ານ  ສົມຊາຍ ສີສະຫວັດ ຮອງຫົວໜ້າພະແນກສຶກສາທິການ ແລະ ກິລາແຂວງບໍ່ແກ້ວໄດ້ໃຫ້ສຳພາດຕໍ່ສື່ມວນຊົນ ກ່ຽວກັບການເປີດການຮຽນສາມັນສຶກສາຄືນໃຫ່ມ ເຊີ່ງທ່ານໃຫ້ຮູ້ວ່າ: ທົ່ວແຂວງບໍ່ແກ້ວ ມີໂຮງຮຽນທັງໝົດທັງພາກລັດ ແລະ ເອກະຊົນ 459 ແຫ່ງ, ມີຫ້ອງຮຽນ 1.916 ຫ້ອງ, ມີນັກຮຽນທັງໝົດ 54.125 ຄົນ ຍີງ 26.196 ຄົນ, ຄູສອນທັງໝົດ 2.577 ຄົນ ຍີງ 1.351ຄົນ, ໂດຍອີງຕາມແຈ້ງການຂອງລັດຖະມົນຕີກະຊວງສຶກສາທິການ ແລະ ກິລາ ກ່ຽວກັບການເປີດໂຮງຮຽນສາມັນສຶກສາຄືນໃໝ່, ມາຮອດປັດຈຸບັນແຂວງບໍ່ແກ້ວ ໄດ້ເປີດການຮຽນ-ການສອນຄືນໃໝ່ທຸກຊັ້ນ ທຸກຂັ້ນ ໃນຕົ້ນເດືອນມິຖຸນາ 2020  ເພື່ອໃຫ້ນັກຮຽນນັກສຶກສາທຸກຊັ້ນຈົບຕາມຫຼັກສຸດກະຊວງສຶກສາທິການ ແລະ ກິລາ ແລະ ເພື່ອຮັບປະກັນໃຫ້ນັກຮຽນມີຄວາມປອດໄພຈາກພະຍາດໂຄວິດ 19 ພະແນກສຶກສາທິການ ແລະ ກິລາແຂວງບໍ່ແກ້ວ ຈີ່ງໄດ້ອອກແຈ້ງການແນະນໍາໃຫ້ບັນດາຫ້ອງການສຶກສາທິການ ແລະ ກິລາເມືອງ ໂຮງຮຽນອ້ອມຂ້າງ ແບ່ງຄວາມຮັບຜິດຊອບກັບຄະນະພະແນກລົງສົມທົບກັບຄະນະຫ້ອງການສຶກສາທິການ ແລະ ກິລາ 5 ເມືອງລົງກວດກາ ຕິດຕາມ ແນະນຳຜູ້ບໍລິຫານ ຄູ ອາຈານ ແລະ ນ້ອງນັກຮຽນເປັນຕົ້ນແມ່ນການຈັດຕັ້ງຫ້ອງຮຽນ ແບ່ງຂັ້ນ ຊັ້ນຮຽນ ແບ່ງຫ້ອງຮຽນ ການຈັດນັ່ງ ໂຕະຕັ່ງແຕ່ລະຄົນໃຫ້ ຫ່າງກັນ 1 ແມັດຂື້ນໄປ, ຄູ-ອາຈານ ແລະ ນ້ອງນັກຮຽນແຕ່ລະຄົນຕ້ອງໃສ້ຜ້າອັດປາກ-ອັດດັງ ແລະ ຕ້ອງໄດ້ລ້າງມືດ້ວຍນໍ້າສະອາດ ໃສ່ສະບູ ຫຼື ເຈວລ້າງມືທຸກຄັ້ງ ແນະນໍາຄູບໍ່ໃຫ້ນັກຮຽນຈັດກຸ່ມກ້ອນຮ່ວມກັນໃນເວລາຜັກຜ່ອນ ຫຼື ຫຼິ້ນກິດຈະກຳຕ່າງໆ ຖ້າຈັດກໍ່ໃຫ້ເວັ້ນໄລຍະຫ່ງ 1 ແມັດຂື້ນໄປ.

ທ່ານ ສົມຊາຍ ສີສະຫວັດ ໃຫ້ຮູ້ອີກວ່າ: ເຖີງວ່າແຂວງບໍ່ແກ້ວຈະບໍ່ພົບຜູ້ຕິດເຊື້ອໂຄວິດ-19 ໃນຂະແໜງການສຶກສາ ແຕ່ຍັງຕ້ອງໄດ້ເຝົ້າລະວັງ  ແລະ ແນະນໍາຜູ້ບໍລິຫານໂຮງຮຽນເອົາໃຈໃສ່ຕິດຕາມການໄປມາ ການຂື້ນຫ້ອງຂອງນ້ອງນັກຮຽນຕະຫຼອດເວລາ ພ້ອມທັງແນະນໍາການສືບຕໍ່ປະຕິບັດບັນດາມາດຕະການຕ່າງໆ ຢ່າງເຂັ້ມງວດເພື່ອປ້ອງກັນໂຄວິດ-19

ທີ່ມາ: ສື່ ປກສ