( ພາບປະກອບ )

ປະຈຸບັນ ສັງຄົມກົ້ມໜ້າພວມເປັນພະຍາດທີ່ລະບາດແຮງໃນສັງຄົມໂລກລວມທັງປະເທດພວກເຮົາ ຊຶ່ງຜົນເນື່ອງມາຈາກເຄື່ອງມືສື່ສານທີ່ເປັນທຸກຢ່າງແກ່ມະນຸດຫາກນຳໃຊ້ໃນທາງທີ່ບໍ່ຖືກຕ້ອງ ພະຍາດກໍຈະມາບຽດບຽນເສຍສຸຂະພາບ ບໍ່ແລ້ວຍັງເສຍເງິນຕື່ມອີກ, ບາງຄົນລືມຈຸດຢືນຂອງຕົນຍ້ອນຖືກສັງຄົມອອນລາຍຊັກຈູງໄປ, ບາງຄົນເສຍເນື້ອເສຍຕົວ ຖືກຫຼອກຖືກຕົ້ມ, ໝົດສັດທາ ສູນສິ້ນຄຸນຄ່າຂອງຄວາມເປັນມະນຸດ ມີບາງຄົນ, ບາງກຸ່ມກໍນຳໃຊ້ເຄື່ອງມືເຫຼົ່ານີ້ໄປໃນທາງທີ່ບໍ່ດີ ໃສ່ຮ້າຍປ້າຍສີໂຈມຕີບຸກຄົນອື່ນ ໂດຍບໍ່ຄຳນຶງເຖິງສິນລະທຳ, ຈັນຍາບັນ, ກົດໝາຍ ແລະ ລະບຽບການ; ກົງກັນຂ້າມ ຫາກນຳໃຊ້ຖືກກາລະເທສະ, ຖືກວິທີຈະເພິ່ມພູນຄູນສ້າງສະຕິປັນຍາໃຫ້ຄວາມຮູ້ໃໝ່ໆ ສາມາດນຳເອົາສິ່ງດີໆໄປພັດທະນາຊີວິດ, ອາຊີບຂອງຕົນໃຫ້ທັນສະໄໝ ແລະ ມີລາຍໄດ້ເພິ່ມຂຶ້ນ.

( ພາບປະກອບ )

ໃນຂະນະນີ້ ໄດ້ມີຫຼາຍປະເທດລວມທັງ ສປປ ລາວ ກໍມີກົດໝາຍຂໍ້ຫ້າມໃນການນຳໃຊ້ເຄື່ອງສື່ສານໃນທາງທີ່ບໍ່ຖືກຕ້ອງເຊັ່ນກັນ ຜ່ານມາອາດເຫັນການສົ່ງຂໍ້ມູນເອກະສານ ແລະ ຮູບຈຳນວນໜຶ່ງຂອງບຸກຄົນໄປໃນທາງທີ່ບໍ່ຖືກຕ້ອງຕ່າງໆນາໆ ຮ້າຍແຮງໄປກວ່ານັ້ນ ຍັງມີການວິພາກວິຈານບຸກຄົນ, ກຸ່ມຄົນລວມທັງອົງກອນທີ່ສ້າງສິ່ງດີໆໃຫ້ຊາດ ແລະ ສັງຄົມ ແມ້ແຕ່ເອກະສານທາງລັດຖະການກໍນຳໄປເຜີຍແຜ່ (ສົ່ງ ຫຼື ໂພສ) ທັງທີ່ບໍ່ໄດ້ຮັບອະນຸຍາດ ຊຶ່ງອາດຕົກໃນເຄືອຂ່າຍການຈໍລະກຳຂໍ້ມູນຕ່າງໆ ແຕ່ຈົ່ງສ້າງແຕ່ຄວາມດີ ແລະ ຢຸດຄິດ, ຢຸດຂຽນ ແລະ ກ່າວຮ້າຍຄົນອື່ນແບບບໍ່ມີມູນຄວາມຈິງ, ຂໍໃຫ້ພ້ອມກັນສົ່ງແຕ່ຂໍ້ຄວາມທີ່ຖືກຕ້ອງ, ບໍ່ເປັນພິດເປັນໄພແກ່ຜູ້ອື່ນ ແລະ ສັງຄົມ.

ທຸກມື້ນີ້ ໂລກໄດ້ຫົດຕົວຈາກການເພິ່ມຂຶ້ນຂອງປະຊາກອນໂລກ ຈາກການລະລາຍນ້ຳກ້ອນຢູ້ຂົ້ວໂລກ, ໄພພິບັດຈາກທຳມະຊາດ ເປັນຕົ້ນ ແຜນດິນໄຫວ, ພູໄຟລະເບີດ, ນ້ຳກັດເຊາະດິນດອນໜ້ານ້ຳທະເລ, ມະຫາສະໝຸດກວ້າງອອກ…ໄປພ້ອມໆກັນກັບປະກົດການທາງທຳມະຊາດນັ້ນ, ຈິດໃຈຂອງຄົນເຮົາ ກໍໄດ້ຮັບຜົນກະທົບຈາກກົນໄກຕະຫຼາດຢ່າງຫຼີກລ້ຽງບໍ່ໄດ້.

ປະຈຸບັນ ພວກເຮົາພວມຢູ່ໃນໂລກແຫ່ງການສື່ສານທີ່ຂະຫຍາຍຕົວ, ໃນໂລກຂອງດີຈີຕອນ ຫຼື ຍຸກ 4.0 ຢ່າງຫຼີກລ້ຽງບໍ່ໄດ້ ເຮັດໃຫ້ຫຍໍ້ໂລກມາຢູ່ພຽງໜ້າຈໍຄອມພິວເຕີ ຫຼື ຈໍໂທລະພາບ ສົ່ງຜົນໃຫ້ຄົນນັ່ງອ້ອມຂ້າງເໜືອນຢູ່ກັນຄົນລະໂລກ, ມັນຊ່າງພິກຜັນ ແລະ ກົງກັນຂ້າມ ມັນສາມາດຍູ້ຄົນທີ່ຕົນຮັກໃຫ້ຫຍັບອອກຫ່າງເທື່ອລະໜ້ອຍ, ສະຖາບັນຄອບຄົວທີ່ເຄີຍຢູ່ອ້ອມລ້ອມກັນດ້ວຍຄວາມອົບອຸ່ນຊື່ນບານ ກໍເລີ່ມມີການສັ່ນຄອນຈົນບໍ່ຢາກເວົ້າບໍ່ຢາກຈານຳກັນ ເຖິງຂັ້ນນັ່ງຕັ່ງດຽວ ກໍປານຢູ່ກັນຄົນລະຟາກຟ້າ.

ນີ້ຄືຄວາມເປັນຈິງທີ່ເຄີຍພົບ ແລະ ເຫັນໃນຍຸກສັງຄົມປະຈຸບັນ ຊຶ່ງເລື່ອງດັ່ງກ່າວ ກໍບໍ່ຄວນຖິ້ມໂທດໃສ່ເຄື່ອງມືສື່ສານທີ່ຂະຫຍາຍຕົວ ແຕ່ຕ້ອງເບິ່ງຕົວເອງຄືນໃໝ່ ກ່ອນມາເຖິງຍຸກນີ້ ບັນດານັກປາດນັກປະດິດຫຼາຍສະໄໝ ໄດ້ນຳມາດັດແກ້ປ່ຽນແປງ ແລະ ພັດທະນາຈຶ່ງເຮັດໃຫ້ມັນຈະເລີນຄືໃນທຸກມື້ນີ້ ແຕ່ຈະເຮັດຈັ່ງໃດມັນຈຶ່ງໃຫ້ຄຸນ ຫຼື ໂທດ, ແຕ່ທຸກຢ່າງມັນບໍ່ສະເໝີໄປ ຫາກເຮົາບໍລິໂພກມັນເກີນຂອບເຂດ ອາດຈະເກີດປະຕິກິລິຍາໂຕ້ຕອບໂດຍທັນທີ, ສະໝອງຄົນກໍມີຂີດຈຳກັດ ມັນຄືກັບເຄື່ອງເກັບຂໍ້ມູນ (ຮາດດີດ) ແມ່ນມີຄວາມຈຳສະເພາະ ຫາກເກີນກວ່ານັ້ນກໍຈະປິດປະຕູຢ່າງອັດຕະໂນມັດ; ດັ່ງນັ້ນ, ການນຳໃຊ້ເຄື່ອງມືສື່ສານກໍໃຫ້ພໍດີ ຢ່າໃຫ້ມັນລົງໂທດເຮົາ ໂດຍຈາກຕົວເຮົາເອງເປັນຜູ້ກຳນົດ.

Medialaos MMD (ແຫຼ່ງຂໍ້ມູນຈາກ: ໜັງສືພິມແຮງງານ)