ມື້ກ່ອນໜ້າອອນລາຍເຮົາໄດ້ລົງພິມບົດໃນຫົວຂໍ້: “…ກຳໃຫ້ໄດ້ຍຸດທະສາດຫັນປ່ຽນໂດຍສັນຕິ…” ມີເພື່ອນຜູ້ອ່ານອອນລາຍແຈ້ງເຂົ້າມາວ່າ: ຢາກໃຫ້ຊອກຂໍ້ມູນກ່ຽວກັບ ກົນອຸບາຍ ແລະ ເຫຼ້ຫຼ່ຽມຂອງຍຸດທະສາດນີ້ ມາລົງພິມຕື່ມ ແດ່ວ່າຊັ່ນ!.

ຜູ້ຂຽນໄດ້ຊອກຄົ້ນຈາກເອກະສານພາຍໃນ ແລະ ຈາກຕ່າງປະເທດເພື່ອນມິດຍຸດທະສາດ ເຊິ່ງພໍສັງລວມໄດ້ບາງບັນຫາດັ່ງນີ້:

ບາງກົນອຸບາຍ – ເຫຼ້ຫຼ່ຽມຂອງຍຸດທະສາດຫັນປ່ຽນໂດຍສັນຕິ ມີບາງຈຸດຕົ້ນຕໍຄື:

ໜຶ່ງ: ເດັດຂາດນຳໃຊ້ເຄືອຂ່າຍອິນເຕີເນັດ-ສື່ອອນລາຍ ເພື່ອໂຄສະນາແຊກຊືມບັນດາທັດສະນະທີ່ບໍ່ຖືກຕ້ອງຜິດພາດ; ປໍລະປັກ ບຸກໂຈມຕີ ເຂົ້າບັນດາປະເທດທີ່ບໍ່ເດີນຕາມເສັ້ນທາງມະຫາອຳນາດຕາເວັນຕົກ.

ສອງ: ແມ່ນນຳໃຊ້ບັນຫາປະຊາທິປະໄຕ; ສິດທິມະນຸດ ເພື່ອຕ້ານກັບບັນດາປະເທດທີ່ບໍ່ຍ່ອມຂຶ້ນຕໍ່.

ສາມ: ຍຸຍົງ ແລະ ຊຸກຍູ້ ພາຍໃນເຮັດໃຫ້ມີການ “ຫັນປ່ຽນພາຍໃນຕົນເອງ”; ຜັນແປດ້ວຍຕົວເອງ.

ສີ່: ຍຸຍົງຫັນເປັນເອກະຊົນຢ່າງເຖິງກົກເຖິງຮາກຕໍ່ພື້ນຖານເສດຖະກິດ; ລົບລ້າງເສດຖະກິດແຫ່ງຊາດແນໃສ່ເຮັດໃຫ້ກາຍເປັນ ແລະ ພັດທະນາເປັນຊົນຊັ້ນນາຍທຶນ ເຊິ່ງຕົກຢູ່ໃນກົນອຸບາຍຂອງນາຍທຶນ “…ຊ່ວຍຊູການລົງທຶນ ແລະ ຍຶດຄອງຕະຫຼາດ…”.

ຫ້າ: ເພິ່ມທະວີວຽກງານການຕ່າງປະເທດ ໃກ້ຊິດຕິດແທດ; ແກ່ດຶງ ແລະ ຊື້ຈ້າງຈອບອອຍເອົາພະນັກງານຫຼັກແຫຼ່ງໃນອົງການຂັ້ນສູນກາງ; ຂັ້ນແຂວງ ແນໃສ່ຈຸດປະສົງສ້າງໃຫ້ນິຍົມຕາເວັນຕົກ; ຫວັງນຳໃຊ້ພະນັກງານເຫຼົ່ານີ້ຄ່ອຍໆຫັນປ່ຽນແນວທາງ; ນະໂຍບາຍຂອງພັກ-ລັດ ໄປຕາມລັດທິທຶນນິຍົມ.

ຫົກ: ໃຫ້ການຮ່ວມມື; ກໍ່ສ້າງ ແລະ ກ້າວໄປສູ່ການສ້າງຕັ້ງຊັ້ນຄົນປັນຍາຊົນທີ່ນິຍົມຕາເວັນຕົກ; ສ້າງເງື່ອນໄຂເພື່ອໃຫ້ຈຳນວນຄົນເຫຼົ່ານີ້ຊຶມເລິກເຂົ້າພາຍໃນ; ຊັກຈູງແກ່ດຶງ ແລະ ຄ່ອຍໆຫັນປ່ຽນລະບອບສັງຄົມນິຍົມ (ກົນອຸບາຍນີ້ໄດ້ຮັບຜົນສຳເລັດຢູ່ສະຫະພາບໂຊວຽດ; ນັ້ນແມ່ນກໍລະນີ ກອກບາຊອບ ຜູ້ນຳເວລານັ້ນ).

ເຈັດ: ດຳເນີນການຄົບຊຸດລະຫວ່າງ “…ຫັນປ່ຽນໂດຍສັນຕິ ກັບ ການຍຸຍົງປັ່ນປ່ວນໂຄ່ນລົ້ມ; ໂດຍນຳໃຊ້ຂໍ້ຂັດແຍ່ງຂອງຊົນເຜົ່າ; ສາສະໜາເພື່ອແບ່ງແຍກ; ຍຸຍົງທ່າອ່ຽງແຍກຕົວ; ແຍກຄົນເພື່ອສ້າງເງື່ອນໄຂໃຫ້ມີການປະທະກັນ ລະຫວ່າງ ຊົນເຜົ່າ; ສາສະໜາ; ຫັນເປັນ “ຈຸດຮ້ອນ” ກ້າວຂຶ້ນໃຊ້ກຳລັງທະຫານບຸກເຂົ້າສົມທົບກັບດ້ານການເມືອງພັກຝ່າຍຄ້ານຕ້ານ ພັກ-ລັດ; ຕ້ານລະບອບສັງຄົມນິຍົມ.

ແປດ: ສວຍໃຊ້; ລ້ຽງເກືອ ບັນດາຄັນທຸງ ສວຍໂອກາດດ້ານການເມືອງທີ່ເປັນປະຕິການພາຍໃນແນ່ໃສ່ເຕົ້າໂຮມກຳລັງໃຫ້ກາຍເປັນການຈັດຕັ້ງການເມືອງ ລໍໂອກາດເພື່ອລົງສູ່ສະໜາມການເມືອງ.

ທັງໝົດນັ້ນຄືບາງຂໍ້ມູນທີ່ຜູ້ຂຽນຊອກຫາມາໄດ້ ເພື່ອສະໜອງໃຫ້ແກ່ເພື່ອນອອນລາຍພວກເຮົາໄດ້ຮັບຊາບ%

ໂດຍ: ທິດດີ